Iyẹnrẹn Ọrẹ i Matiu
8 Ọke i Jesu ọ ruotọre nẹ ugbenu na, otu buebun ni lelirie. 2 Nughe! ohworho owu ro kpomu emiamo oti no mo gburhomu rhotọre riẹn, nọ tare: “Ọrovwori, wu rha gwọlọ, wu na sabu ru mẹ fon.” 3 Omarana, Jesu nọ rionbọ ji hobọte ọhworhare na, nọ tare: “Mi gwọlọ simuo! Gba fon.” Ogege, emiamo oti na no nẹ omayen. 4 Jesu nọ ta riẹn: “Wu vwa ta rẹn ohworho owuorowu kpahiẹ-ẹn. Ọrẹn, nyarhẹn ye dje oma rẹn orherẹn na, ne wu ji ze izobo ra ta kpahen uvuẹn Urhi Mosis na, no rhiẹ oseri rẹn aye.”
5 Ọke i Jesu ọ ruẹ Kapaniọm, olotu isodja owu no brurie rhe, nọ rẹ ye 6 taghene: “Ọga, odibo mẹ ọ riẹn rhotọre oboghwa fọkime ugboma yen o hwuru, emiamo na o gboja riẹn omamọ.” 7 Jesu nọ ta riẹn: “Mi rhe te avwaye, mi ne simie.” 8 Olotu isodja na nọ kpahenrhọ riẹn: “Ọga, mie mwuovwan wu na rhiẹ oghwa mẹ-ẹ, ghwai ta taghene omayen ọ gbanhon, oma odibo mẹ na nọ nọ gbanhon. 9 Fọkime mi ha otọre omẹgbanhon usun, mi ji vwo isodja ri ha otọre usun mẹ, mi rha ta rẹn ọnana, ‘Nyarhẹn!’ nọ nyarhẹn. Mi rha ta rẹn ọrọrọ, ‘Mọ!’ nọ sa, mi rha ji ta rẹn ọvrẹn mẹ, ‘Ruẹ ọnana!’ no ruie.” 10 Ọke i Jesu o rhon oborẹ ọ tare, no gberie unu, nọ ta rẹn ere lelie: “Urhomẹmro mia ta rẹn are, mia ji mẹrẹn ohworho owuorowu uvuẹn Izrẹl ro vwo aruẹ esegburhomẹmro ọgbogbanhon ọnana-a. 11 Ọrẹn, mia ta rẹn are taghene ihworho buebun ine nẹ obọrẹ ọren na ọ va nẹ sa rhe, ọrhẹ obọrẹ ọren na o se gbe. Aye ni ne lele Ebraham, Aizik kugbe Jekọb siyẹ ekete imẹdjẹ kugbe uvuẹn Uvie idjuwu na. 12 Ọrẹn, ene donron emọ Uvie na rhẹ otafe ro mwuokuku. Avwaye yẹ aye ina viẹ ji riẹ ikanwun aye.” 13 Omarana, Jesu nọ ta rẹn olotu isodja na: “Gba nyarhẹn. Je nọ phia wẹn omaran lele esegburhomẹmro wu djephia na.” Oma odibo na nọ gbanhonron uvuẹn unọke ọrana.
14 Ọke i Jesu o te oghwa i Pita, nọ mẹrẹn izu ane i Pita ro semerhẹn, fọkime o kpomu emiamo ifiva.* 15 Omarana, Jesu nọ hobọte obọ izu ane i Pita, ifiva na no nẹ omayen, no vẹnrẹn ye gbodibo rẹn i Jesu. 16 Ọrẹn ọke owuọwọn o te, na kpare ihworho buebun rẹ ikpodje i ha oma aye vwe i Jesu, nọ ha ẹmro unu le ikpodje na nẹ oma aye jeghwai simi ọsoso ihworho ra rioja emiamo. 17 Ọnana nọ ha oborẹ ọmẹraro Aizaya ọ tare te orugba taghene: “Ọye ọ kpare emiamo ọrhẹ emiamiamo ọwan.”
18 Ọke i Jesu ọ mẹrẹn otu na ri kinhariẹ ye, nọ ta rẹn idibo yi nẹ aye i lelie danvrẹn riẹ obọreva urhie na. 19 Ọyẹbe owu no brurie rhe, nọ ta riẹn: “Oyono, mi ne leluo riẹ ekete wu nyaren ephian.” 20 Jesu nọ ta riẹn: “Irhianko i vwo unu aye e rhirhiẹ, efen ra dan uvuẹn ivwrevwrede na i vwo eghwa, ọrẹn Ọmọ onyakpọ na o vwo ekete rọ nọ ha urhomu kpahe-en.” 21 Owuọwan usuẹn idibo yi nọ ta riẹn: “Ọrovwori, kwenu mẹ mi nyarhẹn ye siẹn ọsẹ mẹ vwẹre.” 22 Jesu nọ ta riẹn: “Rhe leli mẹ. Jenẹ irinmi, i siẹn irinmi aye.”
23 Ọke i Jesu ọ ruẹ owọ owu, idibo yi ni lelirie. 24 Ọke oru, ọkpẹ ogiribo no zuẹ uvuẹn urhie ọduado na, te erhirhiẹ ukolame a mwamọ ruẹ owọ na. Ọrẹn, Jesu ọ merhẹn. 25 Aye ni rhe mọ rhọmiẹ, aye ni ta riẹn: “Ọrovwori simi ame, uhwu yẹ ame i havwọ na!” 26 Ọrẹn, nọ ta rẹn aye: “Mesoriẹ ofẹn o mwu are?* Are ri vwo esegburhomẹmro ọkokamu na.” Omarana, no vẹnrẹnren ji vanghwu ogiribo na ọrhẹ urhie ọduado na, ekete ephian ni fọre. 27 Ọnana no gbe idibo na unu omamọ, aye ni tare: “Ọnana aruẹ ohworho ọgo? Ogiribo na ọrhẹ urhie ọduado na dede, a huvwele yi.”
28 Ọke oru, Jesu nọ danvrẹn riẹ uvwrotọre itu i Gadara. Ehworhare awanva rẹ ikpodje i ha oma aye, re nẹ uvwre isin na sa, ni vwariẹ. Aye a djoma omamọ, fọkiẹ ọrana o vwo ohworho owuorowu ro hinmi nya izede ọrana vrẹ-ẹn. 29 Nughe! ehworhare na ne kperẹ ji ta: “Me yẹ ame ọrhẹ owẹwẹ i gbe vwo kugbe, Ọmọ Osolobrugwẹ? Wu rhiẹ aran me gboja rẹn ame bọmọke ọke re bruru na ono ki te?” 30 Aye ni kpararo mẹrẹn iti buebun ra riẹ emaren uvuẹn ekete oseseri. 31 Omarana ikpodje na, na rẹ i Jesu taghene: “Wu rhe le ame, gbe le ame ruẹ oma iti na.” 32 Jesu nọ ta rẹn aye: “Are i nyarhẹn!” Omarana, aye ni nẹ oma ehworhare na ji ruẹ oma iti na. Nughe! ọsoso iti na ni họrhọ nẹ okokọ ugbenu na* ruẹ urhie ọduado na, aye ni hwu rhẹ uvuẹn ame na. 33 Ọrẹn, ihworho ra hẹrote iti na ni zẹre. Ọke aye a ruẹ uvuẹn amwa na, aye ni ta rẹn ihworho kpahen ọsoso oborẹ ọ phiare na ọrhẹ oborẹ ọ phia rẹn ehworhare rẹ ikpodje i ha oma aye na. 34 Nughe! ọsoso ihworho ri ha amwa na ni ghwiẹ ya vwa i Jesu, ọke aye a mẹriẹn, aye ni rẹriẹ no nẹ okogho aye.