Iyẹnrẹn Ọrẹ i Mak
11 Vwana, ọke aye a joma te i Jerusalẹm ne, aye ni vwẹriẹ i Bẹtfeji ọrhẹ i Bẹtani ri ha Ugbenu Oliv, Jesu no dje idibo yi awanva urhomu. 2 Nọ ta rẹn aye: “Are i ruẹ uvuẹn ọko ra kpararo mẹrẹn na, ogege are i rhe te avwaye, are ina mẹrẹn ọmọ ekẹrẹkẹtẹ ra gbare rẹ ohworho owuorowu o vwo ji siyẹ oberuien dẹ. Are i rhan yen, nẹ are i haye rhiẹ aran. 3 Ohworho ọrhọ nọ are taghene, ‘Mesoriẹ are a rhan yen?’ are i ta riẹn taghene, ‘Ọrovwori na ọ gwọlọ haye ruiruo, ọnọ ji haye ghwẹrioma rhe ogege.’” 4 Omarana, aye ni nyarhẹn ji mẹrẹn ọmọ ekẹrẹkẹtẹ na ra gba kẹrẹ ighwe owu rọ ha otafe okokọ udumu na, aye ni rhan riẹn. 5 Ọrẹn, ihworho ezẹko ri mevi avwaye ni nọren aye: “Mesoriẹ are a rhan ọmọ ekẹrẹkẹtẹ na?” 6 Aye ni ghwai ta rẹn aye oborẹ i Jesu ọ tare, omarana aye ni tiobọnu aye nyarhẹn.
7 Aye ni ha ọmọ ekẹrẹkẹtẹ na vwe i Jesu ji ha ewun otafe aye kpa ye, Jesu no siyẹ oberuien. 8 Habaye, ihworho buebun na ha ewun otafe aye kpa izede na, ọrẹn awọrọ ni ye bru ẹbe nẹ egbo rhe. 9 Ihworho ri kobaro ọrhẹ eri ha oberhumu, ne kperẹ phia: “Biko simie! Ebrurhọ o rhirhiẹ ye rẹn ohworho rọ rhere rhẹ odẹ i Jehova!* 10 Ebrurhọ o rhirhiẹ ye rẹn Uvie ọsẹ ame Devid rọ sa na! Biko simie, wẹwẹ ri ha idjuwu na!” 11 Ọke i Jesu o te i Jerusalẹm, nọ ruẹ uvuẹn oghwa ẹga na ji ni ekwakwa ephian so. Ọrẹn, ra mẹriẹn taghene ọke na ọ nya seri ne, ọye ọrhẹ awan Ikpereva na ni riẹ i Bẹtani.
12 Ẹdẹ ọreva ye ọke aye e nẹ i Bẹtani, orhọmo no kpe yi. 13 Nọ kpararo mẹrẹn orhan ifigi owu ro vwo ẹbe, nọ nyarhẹn ye nie sẹ ọnọ mẹrẹn emamọ uvuien. Ọrẹn, ọke ro te avwaye ọ mẹrẹn omamọ owuorowu-u, jokpanẹ ẹbe ọvo, fọkime o ji te ọke ifigi a mọ-ọ. 14 Omarana, nọ ta rẹn orhan na: “E vwe jenẹ ohworho owuorowu riẹ omamọ ọnọ ghwomara-an.” Ọrẹn, idibo yi a kerhọ ye.
15 Ọke oru, aye ni te i Jerusalẹm. Jesu nọ ruẹ oghwa ẹga na, ji le ọsoso ihworho ra rhẹ ji dẹ uvuẹn oghwa ẹga na ruẹ otafe. Nọ bọmọ imẹdjẹ ihworho re wene igho na rhotọre, omaran ji te ega ihworho ra rhẹ erurẹ na. 16 Habaye, o kwe nẹ ohworho owuorowu ọ kpare emru nya oghwa ẹga na vrẹ-ẹn. 17 No yono aye ji nọ aye: “A ya ye rhotọre taghene, ‘Ene se oghwa mẹ oghwa ẹrhomo rẹn ọsoso egbamwa na’? Ọrẹn, are i ghwẹrieriẹ rhiẹ unu ihi e tiomanuẹ ne.” 18 Ọke ilori irherẹn na ọrhẹ eyẹbe na e rhon kpahen oborẹ ọ phiare, aye na gwọlọ izede aye ine kpe yi hwu. Ọrẹn ofẹn no mwu aye, fọkime uyono yi o gbe ọsoso ihworho na unu.
19 Ọke owuọwọn o te, aye ni nẹ amwa na. 20 Ọrẹn, ọke aye a nyavrẹn igidurhiọke ẹdẹ ọreva ye, aye ni mẹrenriẹn taghene orhan ifigi na o hwu ne, nẹ esirie ye te oberuien. 21 Ọke i Pita ọ karorhọ oborẹ i Jesu ọ ta rẹn orhan na, nọ ta riẹn: “Rabbai, nughe! orhan ifigi wu dumirhonrin riẹn na, o hwu ne.” 22 Jesu nọ ta rẹn aye: “Are i vwo esegburhomẹmro kpahen Osolobrugwẹ. 23 Itiọrurhomẹmro, mia ta rẹn are taghene kohworho kohworho rọ ta rẹn ugbenu ọnana, ‘Ghwie nẹ aran ye se rhẹ urhie ọduado na,’ ọravwọ orho vwo ẹhẹn eveva uvuẹn ọmuduie-e, ọrẹn no vwo esegburhomẹmro taghene oborẹ ọ tare na ọnọ phia, ọnọ ghini phia riẹn omaran. 24 Ọnana yọ soriẹ mia ta rẹn are taghene ọsoso ekwakwa are a nẹrhomo kpahan ji nekpẹn yen, are i vwo esegburhomẹmro taghene o teri are obọ ne, are ni ne ghini vwo aye. 25 Are erhe meviẹ ji nẹrhomo, are i harhomu kemru kemru ohworho o ruru are sọ, neneyo Ọsẹ are obẹ odjuwu ọ ji harhomu orusọ are.” 26* ——
27 Aye ni ghwẹrioma riẹ i Jerusalẹm. Ọke rọ nya uvuẹn oghwa ẹga na, ilori irherẹn na ọrhẹ eyẹbe na kugbe ekpako na ni rhere. 28 Aye ni nọriẹn taghene: “Omẹgbanhon ọgo wa ha ruẹ ekwakwa enana? Yanghene ọrọmo yọ yẹruọ omẹgbanhon wa ha ruẹ ekwakwa enana?” 29 Jesu nọ kpahenrhọ rẹn aye: “Mi na ji nọ are onọ owu. Are i rha kpahenrhọ ye mẹ, ni mi na ta rẹn are kpahen omẹgbanhon mie ruẹ ekwakwa enana. 30 Omebrurhame i Jọn o nẹ obẹ odjuwu rhe gbinẹ obẹ ituakpọ? Are i kpahenrhọ ye mẹ.” 31 Omarana, aye ne roro uvwre oma aye taghene: “Ọwan i rha ta taghene, ‘Obẹ odjuwu,’ ọnọ nọ ọwan, ‘Ni mesoriẹ are i vwe vwo imwẹro kpahiẹn?’ 32 Ọrẹn, a sabu hinmi ta taghene, ‘Obẹ ituakpọ-ọ.’” Aye a zofẹn otu na, fọkime aye ephian i vwo imwẹro taghene i Jọn ghini ọmẹraro. 33 Omarana, aye ni kpahenrhọ rẹn i Jesu: “Ame e rhe-e.” Jesu nọ ta rẹn aye: “Mi ji ta rẹn are kpahen omẹgbanhon mie ruẹ ekwakwa enana-a.”