Iyẹnrẹn Ọrẹ i Mak
4 Ọke oru, Jesu no yono ihworho uvuẹn okokọ urhie na, otu buebun ni ghwiẹ bruie rhe. Omarana, no yo siyẹ owọ owu ji bie nẹ akpa ibiesuọn, ọrẹn ọsoso otu na ni mevi okokọ urhie na. 2 No yono aye ekwakwa buebun nyoma idje. Ọke ro yono aye, nọ ta rẹn aye: 3 “Are i kerhọ. Nughe! Ọghwẹrẹ owu nọ yọ wọ ikeri ewawọ. 4 Ọke rọ wọ ikeri na, ezẹko ni se rhẹ okokọ izede, efen ni rhe mọ riẹ aye. 5 Ikeri erọrọ ni se rhẹ otọre ri vwo itita, ọrẹn o vwo eyẹn bu-un. Aye ni mwurun ogege fọkime otọre na o kodo-o. 6 Ọrẹn, ọke uvo ọ varhe ji lo mwu aye, aye ni hwuru fọkime aye e vwo esiri-i. 7 Ikeri erọrọ ni se rhẹ uvwre idjigbẹn, idjigbẹn na ni mwurun ji dumu aye kpe. Omarana, aye arha mọ emamọ-ọ. 8 Ọrẹn, ikeri erọrọ ni se rhẹ otọre orhorhomu, aye na dua ji buẹnrhọ. Aye ni mọ emamọ 30, 60 ọrhẹ 100 bun ghwẹ oborẹ a wọre.” 9 Nọ ji habaye: “Jenẹ ọro vwo erhọ rọ nọ kerhọ, ọ kerhọ.”
10 Vwana, ọke ọye ọvo ọ havwiẹ, ihworho ri ha avwaye ọrhẹ awan Ikpereva na, na nọ yen enọ kpahen idje na. 11 Nọ ta rẹn aye: “E kwenu rẹn are nẹ are i vwẹruọ odjahen ọfuanfon ọrẹ Uvie Osolobrugwẹ, ọrẹn harẹn ihworho ri ha otafe, ọsoso ekwakwa enana ghwai idje kpekpa rẹn aye. 12 Omarana, dedevwo aye e nughe, aye i vwa mẹrẹn oborẹ aye e nẹ-ẹ, dedevwo aye e rhon, aye i vwe vwẹruọ oborẹ aye e rho-on. Aye i ji ghwẹriẹ bru mẹ sa ni mi harhomu aye-e.” 13 Habaye, nọ ta rẹn aye: “Are dede e vwẹruọ udje ọnana? Ni marhẹ are ine ru vwẹruọ ọsoso idje ri hẹrhẹre na?
14 “Ikeri rẹ ọghwẹrẹ na ọ wọre yẹ ẹmro Osolobrugwẹ. 15 Ikeri ri se rhẹ okokọ izede na yẹ ihworho ri rhon ẹmro Osolobrugwẹ. Ọrẹn, ogege aye e rhon ẹmro na, Echu no mo so ẹmro ra wọ rhẹ ọmudu aye na. 16 Ikeri ri mwu rhẹ otọre rẹ itita i havwọ na yẹ ihworho ri rhon ẹmro na. Ogege aye e rhon ẹmro na, aye ni rhiabọ dedie rhẹ aghọghọ. 17 Dedevwo aye i havwiẹ ibiọke, ọrẹn ẹmro na o vwo esiri uvuẹn oma aye-e. Ogege ukpokpogho yanghene ẹkparehaso ọ homaphia fọkiẹ ẹmro na, aye ni seri. 18 O ji vwo ikeri erọrọ ri mwu rhẹ uvwre idjigbẹn. Enana yẹ ihworho ri rhon ẹmro na, 19 ọrẹn ọfiamu enyerakpọ ọnana* ọrhẹ omẹgbanhon ọphiẹrhọ efe, kugbe ojemẹ kpahen ekwakwa sansan ni ruẹ uvuẹn ọmudu aye ji kenken ẹmro na. Omarana, ọrhọ sabu mọ emamọ-ọ. 20 Ọrọkẹta, ikeri ra wọ rhẹ otọre orhorhomu na yẹ ihworho ri kerhọ ẹmro na ji dabu rhiabọ dedie, aye ni mọ emamọ 30, 60 ọrhẹ 100 bun ghwẹ oborẹ a wọre.”
21 Nọ ji ta rẹn aye: “A vwa bọmu okalokpọ* rhurhu ukpẹ yanghene kparẹ ukpẹ rhẹ obotọre ekpa-a, rhomaran? Rhẹ oberun oborẹ ọ mọren ukpẹ ya kpariẹ rhọ? 22 Fọkime o vwo emru owuorowu re tinu re ne je ghwolo phia-a, o vwo emru owuorowu ra dabu tinu ro no jo ghwolo phia uvuẹn afiede-e. 23 Jenẹ ohworho ro vwo erhọ rọ nọ kerhọ, ọ kerhọ.”
24 Nọ ji ta rẹn aye: “Are i dabu kpomavi rẹn oborẹ are e rhon na. Aruẹ ovwanvwọn rẹ are i ha vwanvwọn rẹn ihworho, ya na ji ha vwanvwọn rẹn are, itiọrurhomẹmro ana tobọ fi ba ye rẹn are. 25 Fọkime kohworho kohworho ro vwo emru, ana haba oborẹ o vwori na. Ọrẹn ohworho ro vwo vwo, oborẹ ọ tobọ vwo dede, ana haye mie yi.”
26 Omarana, nọ ta rẹn aye: “Ana sabu ha Uvie Osolobrugwẹ dje ọhworhare rọ rhagha ikeri rhẹ otọre. 27 Ọhworhare na nọ merhẹn kason kason ji rhọmọ urhiọke, ikeri na ni mwurun ji do. Ọrẹn, o rhe oborẹ ọ phia lele-e. 28 Otọre na ọvo no ruie nẹ ikeri na i mwu bibiesuọn, ọrukaro ugbẹn na nọ homaphia. Orho ru, nọ kpipho. Obẹtaye, nọ mọ emamọ. 29 Ọrẹn ogege emamọ na a ho ne, ọhworhare na nọ ha aphia ya kọrọ aye, fọkime ọke orhọ na o te ne.”
30 Nọ ji ta rẹn aye: “Me ya na sabu ha Uvie Osolobrugwẹ dje, yanghene udje ọgo ya na sabu ha djeyi fiotọre? 31 Ọ họhọ ukeri mọstad. Ọke ra wọ ukeri ọnana, ọye yọ mai kamu usuẹn ikeri ri ha otọrakpọ na. 32 Ọrẹn ọke ra wọ ye hin, nọ mọ duọ omamọ ghwẹ ewawọ ri hẹrhẹre ephian, no ji vwo eghọn eduado, te erhirhiẹ efen ri ha ivwrevwrede na e rhirhiẹ obotọre ophie yi.”
33 Jesu nọ ha idje buebun jerẹ ọrana yono aye ẹmro Osolobrugwẹ, te erhirhiẹ aye i sabu vwẹruọ ye te. 34 Itiọrurhomẹmro, ọ vwọ tẹmro rẹn aye-e, jokpanẹ ọ ha udje ruiruo. Ọrẹn, ọye ọvo ọrhẹ idibo yi i rha havwiẹ, no dje ekwakwa ephian fiotọre rẹn aye.
35 Ọke owuọwọn o te uvuẹn ẹdẹ ọrana, nọ ta rẹn aye: “Jena danvrẹn riẹ obọreva urhie na.” 36 Ọke aye e tiobọnu otu na hin, aye ni ha owọ kpare i Jesu nyarhẹn, ewọ erọrọ ni ji ha kpahiẹn. 37 Vwana, ogiribo ọgbogbanhon no zuẹ, ukolame nọ mwamọ ruẹ uvuẹn owọ na, te erhirhiẹ owọ na ọ joma rhue. 38 Ọrẹn, Jesu o semerhẹn oberun ọsurhomu uvuẹn oberhumu owọ na. Omarana, aye ni rhọmeriẹn ji ta riẹn: “Oyono, wu vwa mẹriẹn taghene uhwu yẹ ame i havwọ na?” 39 Omarana, no vẹnrẹnren ji vanghwu ogiribo na, nọ ta rẹn urhie ọduado na: “Fọ gbien!” Ogiribo na nọ dobọji, ekete ephian nọ dabu fọ. 40 Omarana, Jesu nọ nọren aye: “Mesoriẹ ofẹn o mwu are omana?* Are e ji vwo esegburhomẹmro owuorowu?” 41 Ọrẹn, ofẹn no mwurun aye omamọ, aye na ta rẹn owuowọnwan: “Ọnana aruẹ ohworho ọgo? Ogiribo na ọrhẹ urhie ọduado na dede, a huvwele yi.”