Iyẹnrẹn Ọrẹ i Matiu
28 Ọke urhiọke ọ joma te ne uvuẹn ẹdẹ ọrukaro ọrẹ ọkprughwre na, ọke Ẹdẹ Omeronmo na ọ vrẹn hin, Meri Magdalin ọrhẹ Meri ọreva ye na, ni mo ni usin na.
2 Nughe! otọre ekpogho ọgbogbanhon ọ phia vrẹn ne, fọkime ọmakashe i Jehova o nẹ odjuwu rhe me ghonron atita na nẹ obaro usin na, no siyẹ oberuien. 3 Ọmakashe na o lo jerẹ ukpẹ agbranran, ewuien ọ ji fuan jerẹ imito. 4 Itiọrurhomẹmro, fọkime ofẹn ọmakashe na o mwu isodja ra dẹrẹ avwaye, aye na phariẹ, aye ni họhọ ihworho ri hwuru.
5 Ọrẹn, ọmakashe na nọ ta rẹn emẹse na: “Are i vwa zofẹ-ẹn, fọkime mi rheri taghene are a gwọlọ i Jesu re kpe mwu orhan no hwu na. 6 Ọ ha aran ghwomara-an, fọkime a rhọmeriẹn nuhwu ne, jerẹ oborẹ ọ tare. Are i mọ mẹrẹn ekete ra kpareriẹ rhọ bi. 7 Omarana, are i brokpakpa ya ta rẹn idibo yi taghene a rhọmeriẹn nuhwu ne, nughe! ọye ọ kobaro rẹn are riẹ i Galili. Are ina mẹriẹn oboran. Ọnana yẹ oborẹ mi rhe mọ ta rẹn are.”
8 Omarana, aye ni nẹ ekete usin na ogege rhẹ ofẹn kugbe aghọghọ rode, aye ni zorhẹ ya nẹ iyẹnrẹn rẹn idibo i Jesu. 9 Nughe! Jesu nọ vware aye ji ta: “Wadoo!” Aye ni brurie nya ji mọren aghwẹ ye, aye ni gburhomu rhotọre riẹn. 10 Jesu nọ ta rẹn aye: “Are i vwa zofẹ-ẹn! Are i nyarhẹn ya nẹ iyẹnrẹn rẹn imizu mẹ neneyo aye i riẹ i Galili, aye ina vwa mẹ oboran.”
11 Ọke emẹse na a nyarhẹn izede, isodja na ezẹko ni ruẹ uvuẹn amwa na ya nẹ iyẹnrẹn rẹn ilori irherẹn na kpahen ọsoso ekwakwa ri phiare na. 12 Ọke ilori irherẹn na ọrhẹ ekpako na a vwoma djiroro kugbe hin, aye ni ha idọlọ efuanfon buebun rẹn isodja na. 13 Aye ni ta rẹn aye: “Are i ta taghene, ‘Idibo yi i rhere uvuẹn ason me so orinmie, ọke ame a merhẹn.’ 14 Igọvunọ na orho rhon kpahen ẹmro ọnana, ame ine dje erhirhiẹ* na fiotọre riẹn, orho vwo oborẹ ọnọ lẹrhẹ are brudu-u.” 15 Omarana, aye ni ha idọlọ efuanfon na ji ru lele oborẹ a ta rẹn aye. Ikuegbe ọnana no mo kerabọ lele ekete ephian uvwre itu i Ju na me te inyenana.
16 Ọke oru, idibo awan 11 na ni riẹ ugbenu owu rọ ha i Galili. Jesu ọ ta rẹn aye rhotọre bi ne taghene aye ina vwoma avwaye. 17 Ọke idibo na a mẹriẹn, aye ni gburhomu rhotọre riẹn, ọrẹn ezẹko ne vwo ẹhẹn eveva. 18 Jesu nọ nya bru aye ji ta rẹn aye taghene: “A yẹre mẹ omẹgbanhon ephian obẹ odjuwu ọrhẹ uvuẹn otọrakpọ na ne. 19 Omarana, are i nyarhẹn ye yono ihworho uvuẹn egbamwa na ephian nẹ aye i rhiẹ idibo mẹ, are i bru aye rhẹ ame uvuẹn odẹ Ọsẹ na, odẹ Ọmọ na ọrhẹ ọrẹ ẹhẹn ọfuanfon na. 20 Are i ji yono aye nẹ aye i nyalele ọsoso ekwakwa mi jurhie rẹn are. Nughe! Mẹmẹ rhẹ are i havwiẹ uvuẹn ọsoso ẹdẹ na ye te ehion enyerakpọ ọnana.”