Iyẹnrẹn Ọrẹ i Matiu

7 “Are i dobọ iguegun ji, nẹ awọrọ i je rhe guẹn are. 2 Fọkime oborẹ are i guẹn awọrọ lele, omaran ene ji guẹn are, aruẹ ovwanvwọn are i ha vwanvwọn rẹn awọrọ, yẹ aye ina ji ha vwanvwọn rẹn are. 3 Omarana, mesoriẹ we ni ikwekwu rọ ha ukẹro omizuo, ọrẹn wu vwa djokarhọ uphrophro orhan rọ ha uvuẹn ukẹruọ-ọ? 4 Gbinẹ marhẹ wu ne ru ta rẹn omizuo, ‘Ji mẹ tiẹ ikwekwu nẹ ukẹruọ,’ ọrẹn uphrophro orhan ọ ha uvuẹn ukẹro ọnọ? 5 Ọrọ gemai ruẹ na! Kiki tiẹ uphrophro orhan na nẹ ukẹruọ vwẹre, ọke ọrana ne wu na mẹrude fiotọre tiẹ ikwekwu nẹ ukẹro omizuo.

6 “Are i vwa ha ekwakwa efuanfon rẹn erimwamwa yanghene donron itama eghoghanren are rẹn eti-i, neneyo aye i je rhe sihin aye botọre, ji ghwẹrioma rhe mọ kuẹn are gbangbanhon.

7 “Are i rha nọ, na na yẹ are. Are i rha gwọlọ, are ni na mẹrẹn. Are i rha ha obọ fomu ighwe, ne ne je yi rẹn are. 8 Fọkime kohworho kohworho rọ nọren, ana yẹ ye, ọrọ gwọlọ emru ọnọ mẹrẹn, ọrọ ha obọ fomu ighwe, ene je yi riẹn. 9 Itiọrurhomẹmro, ọrọmo usuẹn are na yẹ ọmọyen ọnọ nekpẹn ibrẹdi, ọ vwọ yẹ ye atita? 10 Yanghene ọmọ na ọrhọ nekpẹn erhenrin, ọnọ yẹ ye obodirin? 11 Omarana, orhianẹ are ri rhiẹ evwọkon i rhe oborẹ a yẹ emọ are ẹghẹlẹ irhorhomu, are i gbe ji rhe taghene Ọsẹ are obẹ odjuwu ono tiobọnu ekwakwa irhorhomu rẹn ihworho ra nekpẹn yen mie yi!

12 “Omarana, kemru kemru are i gwọlọre nẹ ihworho i ru rẹn are, are ine vi ruẹ omaran rẹn aye. Itiọrurhomẹmro, ọnana yẹ oborẹ Urhi na ọrhẹ Emẹraro na i mevirhọ.

13 “Are i nya anurẹsẹ ọkpakpa na vrẹn, fọkime anurẹsẹ okekeri ọrhẹ izede ophẹnphẹn na yo suẹn riẹ oghwọghọ, ihworho buebun ya nya anurẹsẹ ọnana vrẹn. 14 Ọrẹn anurẹsẹ ọkpakpa ọrhẹ izede ro kenkenrin na yo suẹn riẹ arhọ, ibiẹ ihworho ya gwọliẹ mẹrẹn.

15 “Are i ni oma so fọkiẹ emẹraro efian re bru are sa ji ruẹ kamẹriẹn aye igegede. Ọrẹn uvuien, aye erimwamwa egbo ra faro gbangbanhon. 16 Are ine vwrurhe aye nyoma emamọ aye. Ihworho i vwa kọrọ igrepu nẹ idjigbẹ-ẹn, yanghene aye i vwa kọrọ ifigi nẹ ikukusẹ-ẹ, rhomaran? 17 Omaran ọ ji havwọ, obọdẹn orhan yọ mọ emamọ irhorhomu, ọrẹn orhan ro gbonrin yọ mọ emamọ ibiobiomu. 18 Obọdẹn orhan ọ sabu mọ emamọ ibiobiomu-u, yanghene orhan ro gbonrin ọ sabu mọ emamọ irhorhomu-u. 19 Korhan korhan rọ vwọ mọ emamọ irhorhomu, ana hẹn yen se ji donrien rhẹ uvuẹn erhanren. 20 Itiọrurhomẹmro, are ine vwrurhe emẹraro efian erana nyoma emamọ aye.

21 “Rhẹ ihworho ephian re se mẹ, ‘Ọrovwori, Ọrovwori,’ yi na ruẹ Uvie idjuwu na-a, ọrẹn ohworho ro ruẹ ọhọre Ọsẹ mẹ ọvo, rọ ha obẹ idjuwu na yọ nọ ruiẹ. 22 Ihworho buebun ina ta mẹ uvuẹn ẹdẹ ọrana: ‘Ọrovwori, Ọrovwori, ame a ha odọ mẹraro, ji ha odọ le ikpodje, jeghwai ha odọ wian ewian igbevwunu buebun?’ 23 Ọrẹn, ni mi na ta rẹn aye: ‘Mie rhe are kakaka-a! Are i nẹ aran, are ri vwa nyalele urhi!’

24 “Omarana, kohworho kohworho ro rhon ẹmro mẹ enana ji ha aye ruiruo, ọnọ họhọ ọvwẹghwanren rọ bọn oghwa ye rhẹ oberun atita. 25 Ọke oso ọ rhọ gbangbanhon, ukude no kuru. Ogiribo no zuẹ oghwa na gbangbanhon, ọrẹn o se-e, fọkime a bọnriẹn rhẹ oberun atita. 26 Habaye, kohworho kohworho ro rhon ẹmro mẹ enana ọrẹn ọ ha aye ruiruo-o, ọnọ họhọ ọvwidjigbo rọ bọn oghwa ye rhẹ oberun eyẹn. 27 Ọke oso ọ rhọ gbangbanhon, ukude no kuru. Ogiribo no zuẹ oghwa na gbangbanhon, no seri ji ghwọghọ totọre.”

28 Ọke i Jesu ọ tẹmro enana hin, oborẹ o yono otu na lele no gberẹ aye unu omamọ, 29 fọkime o yonirin aye jerẹ ohworho ro vwo omẹgbanhon, ọ họhọ eyẹbe aye-e.