Iyẹnrẹn Ọrẹ i Mak
10 Ọke i Jesu o vẹnrẹn nẹ avwaye hin, no riẹ ughwru eri Judia ri ha obọreva Urhie i Jọdan, otu buebun ni rharhumu ghwiẹ bruie rhe. Nọ rharhumu yono aye, jerẹ oborẹ o rhiẹ uruemruie. 2 Itu i Farisi na ni brurie rhe rhẹ ẹhẹn aye ina damiẹ ni, aye ni nọriẹn sẹ o fori nẹ ọhworhare ọ fonrọnmo rhẹ aniẹ. 3 Nọ nọren aye: “Urhi ọgo yi Mosis o je rẹn are?” 4 Aye ni kpahenrhọ riẹn: “Mosis o kweri nẹ ọhworhare ọ ya ọbe ra fonrọnmo rẹn aniẹ, ji le yi rie.” 5 Ọrẹn, Jesu nọ ta rẹn aye: “Ọ ya urhi ọnana rẹn are fọkime are iludu. 6 Ọrẹn, nẹ ọtonrhọ emama rhe, ‘Osolobrugwẹ ọ maren aye ọhworhare ọrhẹ ọmase. 7 Fọkiẹ ọnana, ọhworhare nọ nọ nyaji ọsẹ ye ọrhẹ izie vwo. 8 Ọye ọrhẹ aniẹ ni ne rhiẹ ugboma owu.’ Omarana, aye rhẹ awanva ghwomara-an, ukpomaran aye nẹ ugboma owu. 9 Omarana, oborẹ Osolobrugwẹ ọ tan kugbe ne, e vwe jẹ ohworho owuorowu hẹriẹ ye-e.” 10 Ọke aye a rharhumu ruẹ oghwa owu, idibo yi na nọ yen onọ kpahen ẹmro ọnana. 11 Nọ ta rẹn aye: “Kohworho kohworho rọ fonrọnmo rhẹ aniẹ ji ya rọnmọ ọwọrọ, ọ ghwọwe rhurhu aniẹ. 12 Habaye, orhianẹ ọmase rọ fonrọnmo rhẹ esa ye, ọ yọ rọnmọ ohworho ọrọrọ, ọmase na ọ ghwọwe ne.”
13 Vwana, ihworho na kparẹ ibiẹ emọvwerhe bruie sa neneyo ọ hobọte aye, ọrẹn idibo na ni vanghwu aye. 14 Ọke i Jesu ọ mẹrẹn oborẹ ọ phia, nọ tuekwẹre ji ta rẹn aye: “Are i nyaji emọvwerhe na vwo nẹ aye i bru mẹ rhe, are i vwa da aye obọ ji-i, fọkime Uvie Osolobrugwẹ ọ havwiẹ rẹn aruẹ ihworho erana. 15 Itiọrurhomẹmro mia ta rẹn are, kohworho kohworho ro vwo rhiabọ dede Uvie Osolobrugwẹ jerẹ ibiẹ ọmọvwerhe, ọ sabu ruẹ uvuien dẹ-ẹ.” 16 Ọke rọ kpare emọ na rhẹ abọ ye, ji ha abọ kpahen aye hin, nọ ha ebrurhọ rẹn aye.
17 Ọke rọ nyarhẹn uvuẹn izede, ọhworhare owu nọ zẹ bruie rhe ji sighwẹ rhẹ obaruiẹ, nọ nọriẹn: “Omamọ Oyono, me mi ne vi ru ni mi sabu vwo arhọ i bẹmẹdẹ?” 18 Jesu nọ ta riẹn: “Mesoriẹ we se mẹ omamọ ohworho? O vwo ohworho ro rhomuru-un, jokpanẹ Osolobrugwẹ ọvo. 19 Wu rhe ekama na: ‘Wu vwe dozighẹ-ẹ,* wu vwa ghwọwe-e, wu vwe suhi-i, wu vwe se oseri efia-an, wu vwa ghwa ohworho re-e, họghọ rẹn ọsọ ọrhẹ izuo.’” 20 Ọhworhare na nọ ta riẹn: “Oyono, mie ruẹ ọsoso ekwakwa enana nẹ ọke uphuphẹn mẹ rhe.” 21 Jesu no nirien ji vwo ẹgwọlọ kpahiẹn, nọ tare, “Emru owu o ji vruẹ uvuẹn oma: Nyarhẹn, ya rhẹ enyerẹn enọ, ji ha igho na rẹn ivwiegbere, ne wu ne vwo efe rhẹ obẹ odjuwu. Orho ru, ne wu rhiẹ odibo mẹ.”* 22 Ọrẹn, ọhworhare na no mwuomarhọ fọkiẹ ẹkpahenrhọ na, no nẹ avwaye rhẹ omemwurhọ, fọkime o vwo enyerẹn buebun.
23 Ọke i Jesu o ni oma kinhariẹ hin, nọ ta rẹn idibo yi: “Ọnọ bẹn omamọ rẹ ihworho ri vwo igho ina ruẹ Uvie Osolobrugwẹ!” 24 Ọrẹn, ẹmro rọ tare na no gbe idibo na unu. Jesu nọ ta rẹn aye: “Emọ, ọnọ bẹn omamọ ra na ruẹ Uvie Osolobrugwẹ! 25 Ọnọ phẹrẹ rẹ ijaki ọnọ nya ophiọ oghwede vrẹn, ghwẹ ọrẹ ọdafe ọnọ ruẹ Uvie Osolobrugwẹ.” 26 Ọrẹn, no ji gbe aye unu omamọ, aye ni nọriẹn:* “Nẹ ọrọmo yọ nọ sabu simirhọ?” 27 Ọke i Jesu ọ tẹnrovi aye, nọ tare: “Harẹn ituakpọ, ọnana ọ sabu phia-a. Ọrẹn, rhẹ omaran rẹn Osolobrugwẹ-ẹ, fọkime Osolobrugwẹ ọnọ sabu ruẹ kemru kemru.” 28 Pita nọ ta riẹn taghene: “Nughe! Ame i nyaji ekwakwa ephian vwo ji leluo ne.” 29 Jesu nọ tare: “Itiọrurhomẹmro mia ta rẹn are, o vwo ohworho rọ nyaji oghwa vwo, yanghene imizu ehworhare yanghene imizu emẹse, yanghene izu, yanghene ọsẹ, yanghene emọ, yanghene ikebi fọkiẹ omẹmẹ ọrhẹ fọkiẹ iyẹnrẹn esiri na, 30 ro no jo vwo aye ghwẹ akwa 100 vwana uvuẹn enyerẹn ọnana-a. Ono vwo eghwa, imizu ehworhare, imizu emẹse, izu, emọ, ọrhẹ ikebi ji mẹrẹn ẹkparehaso, ọrẹn uvuẹn enyerẹn* rọ sa na, ono vwo arhọ i bẹmẹdẹ. 31 Ọrẹn, ihworho buebun ri rhiẹ erukaro ni na kerhumu, eri kerhumu ni ne rhiẹ erukaro.”
32 Vwana, ọke aye e riẹ i Jerusalẹm, Jesu nọ kobaro rẹn aye, no gbe idibo na unu omamọ, ọrẹn ihworho re lele aye na zofẹn. Jesu nọ rharhumu se awan Ikpereva na riẹ okokọ, ji ta rẹn aye kpahen ekwakwa enana ri na phia riẹn phẹrẹkpẹ: 33 “Nughe! Jerusalẹm yẹ ọwan a nya na, ene fiẹ Ọmọ onyakpọ na rhẹ abọ ilori irherẹn na ọrhẹ eyẹbe na. Aye ni ne brorhiẹn uhwu kpe yi, ji tiobọnie rẹn ihworho egbamwa na. 34 Ihworho enana ni na haye djechẹẹ, djen erhẹnrhen ghwuie, fa ye, ji kpe yi hwu. Ọrẹn ẹdọke esa i rha vrẹn ne, na na rhọmiẹ nuhwu.”
35 Jems ọrhẹ i Jọn ri rhiẹ emọ i Zẹbẹdi, ni bru i Jesu rhe mọ ta riẹn: “Oyono, ame i gwọlọre ne wu ruẹ kemru kemru ame i nekpẹn yen harẹn ame.” 36 Nọ nọren aye: “Me yẹ are i gwọlọre mi ru rẹn are?” 37 Aye ni kpahenrhọ riẹn: “Wu rha ruẹ ẹrhẹ odidi ọnọ ne, gbe kwenu rẹn ame nẹ ame i siyẹ kẹruọ, owu obọrhen ọnọ, ọreva ye obohwẹre ọnọ.” 38 Ọrẹn, Jesu nọ ta rẹn aye: “Are e rhe oborẹ are a nekpẹn yen na-a. Are ina sabu da oborẹ ọ ha uvuẹn uko mia da na, yanghene bromarhame rhẹ aruẹ omebrurhame ọnẹmẹ na?” 39 Aye ni ta riẹn: “Ame ina sabu ruie.” Omarana, Jesu nọ ta rẹn aye: “Are ina da nẹ uko mia da nẹ na, are ine ji bromarhame rhẹ aruẹ omebrurhame ọnẹmẹ na. 40 Ọrẹn, rhẹ omẹmẹ yi ne brorhiẹn ohworho ro no siyẹ obọrhen yanghene obohwẹre mẹ-ẹ. Ukpomaran, ihworho re mwuegbe ekete erana riẹn ne, yi ne siyẹ avwaye.”
41 Ọke idibo awan ikpe ri hẹrhẹre na e rhon kpahen oborẹ ọ phiare na, ephan ni biomirin aye omamọ kpahen i Jems ọrhẹ i Jọn. 42 Ọrẹn, Jesu no serẹ aye kẹroma ji ta rẹn aye: “Are i rheri taghene ihworho re suẹn egbamwa na, a ha oma aye ruẹ onini rẹn ihworho aye. Ihworho eduado na a ji ha omẹgbanhon aye sehiẹn ihworho. 43 E vwe je no rhiomaran uvwre are-e. Ọrẹn, kohworho kohworho rọ gwọlọ rhiẹ ọrọ doro uvwre are, ono vi rhe gbodibo rẹn ihworho ephian. 44 Habaye, kohworho kohworho rọ gwọlọ rhiẹ ọrukaro uvwre are, ono vi rhiẹ ọvrẹn ihworho ephian. 45 Fọkime Ọmọ onyakpọ na dede, ọ rhe me gbodibo ji ha arhọ ye ruẹ otan fọkiẹ ihworho buebun, ukperẹ ene gbodibo riẹn.”
46 Omarana, aye ni riẹ i Jẹriko. Ọke oru, Jesu ọrhẹ idibo yi kugbe otu buebun, na ghwiẹ nẹ i Jẹriko sa. Ọrẹn, Batimiọs (ọmọ i Timiọs) ro rhiẹ otuẹro rọ rẹ erarẹ, o siyẹ okokọ izede. 47 Ọke ro rhon taghene i Jesu ro rhiẹ onyẹ i Nazarẹt na yọ nyavrẹn, no korunu phia: “Jesu, Ọmọ i Devid, gbe arodọmẹ mẹ!” 48 Omarana, ihworho buebun na vanghwuie ji ta riẹn no kudu, ọrẹn no ji korunu phia gbangbanhon: “Ọmọ i Devid, gbe arodọmẹ mẹ!” 49 Jesu nọ domaji, nọ tare: “Are i se yi vwe mẹ.” Omarana, aye ni se otuẹro na ji ta riẹn taghene: “Fiudugbere! Vẹnrẹn, o so.” 50 Omarana, no donron ewun otafiẹ fughwẹ, no pho mevi ji bru i Jesu. 51 Jesu nọ nọriẹn: “Me wu gwọlọre mi ru wẹn?” Otuẹro na nọ kpahenrhọ riẹn: “Rabboni,* ji mẹ mẹrude.” 52 Jesu nọ ta riẹn: “Nyarhẹn. Esegburhomẹmro ọnọ o simiruon ne.” Ogege, otuẹro na nọ mẹrude, nọ ji nyalelie uvuẹn izede na.