Iyẹnrẹn Ọrẹ i Matiu
9 Omarana, Jesu nọ ruẹ owọ ji danvrẹn riẹ obọreva urhie na riẹ amwa ọnẹyen. 2 Nughe! o vwo ọhworhare owu rọ riẹn rhẹ ekpa fọkime ugboma yen o hwuru. Ihworho ezẹko ni kpareriẹ vwe i Jesu. Ọke i Jesu ọ mẹrẹn esegburhomẹmro aye, nọ ta rẹn ọhworhare na: “Fiudugbere, ọmọ mẹ! A ha edandan enọ harhomuo ne.” 3 Vwana, eyẹbe ezẹko ne roro uvuẹn ẹhẹn aye taghene: “Ọhworhare ọnana ọ rhaphiẹ Osolobrugwẹ.” 4 Ọke i Jesu o rhe oborẹ aye e roro, nọ tare: “Mesoriẹ are e roro iroro ọkon uvuẹn ọmudu are? 5 Jerẹ udje, ọgo yọ nọ phẹrẹ ẹta, ‘A ha edandan enọ harhomuo ne,’ gbinẹ ‘Vẹnrẹn wu nya’? 6 Ọrẹn, nẹ are i rhe taghene Ọmọ onyakpọ na o vwo omẹgbanhon rọ nọ harhomu edandan uvuẹn otọrakpọ na—” nọ ta rẹn ọhworhare rẹ ugboma yen o hwuru na: “Vẹnrẹn, kpare ekpa ne wu riẹ oghwa ọnọ.” 7 Ọhworhare na no vẹnrẹn riẹ oghwa ye. 8 Ọke otu na a mẹrẹn oborẹ ọ phiare, ofẹn no mwurun aye, aye ni jiri Osolobrugwẹ ro tiobọnu aruẹ omẹgbanhon ọnana rẹn ituakpọ.
9 Ọrẹn, ọke i Jesu ọ nya nẹ avwaye, nọ mẹrẹn ọhworhare owu re se Matiu ro siyẹ oghwa ra kwosa urhomu, nọ ta riẹn: “Rhiẹ odibo mẹ.”* Ogege no vẹnrẹnren ji nyalelie. 10 Ọke oru, Jesu nọ riẹ emaren* uvuẹn oghwa i Matiu, nughe! ihworho buebun re vwiosa urhomu ọrhẹ iruedandan ni rhere, aye ne leli Jesu ọrhẹ idibo yi riẹ emaren* kugbe. 11 Ọke itu i Farisi na a mẹrẹn oborẹ ọ phia, aye ni nọ idibo yi: “Mesoriẹ oyono are ọ riẹ emaren rhẹ ere vwiosa urhomu ọrhẹ iruedandan na?” 12 Ọke i Jesu o rhon ẹmro aye, nọ tare: “Ihworho ri vwo omọkpokpọ a gwọlọ idọkitọ-ọ, ọrẹn ere kpomẹ yi gwọleriẹ. 13 Omarana, are i nyarhẹn ye yono oborẹ ẹmro ọnana o mevirhọ: ‘Mi gwọlọ arodọmẹ, rhẹ izobo-o.’ Fọkime mi rhiẹ otọrakpọ na me se iruedandan, rhẹ evwata-a.”
14 Ọke oru, idibo i Jọn ni bru i Jesu rhe, aye ni nọriẹn: “Mesoriẹ ame ọrhẹ itu i Farisi na e zinrin orhọmo, ọrẹn idibo enọ i vwe zinrin orhọmo-o?” 15 Jesu nọ ta rẹn aye: “O vwo oborẹ ọsoriẹ igbehian ọhworhare rọ rọnmọ na ine mwuomarhọ-ọ, fọkime ọhworhare na rhẹ aye i gba havwiẹ, rhomaran? Ọrẹn, ọke na ọ sa ra na ha ọhworhare rọ rọnmọ na nyaji aye vwo, ọke ọrana aye ni ne zinrin orhọmo. 16 O vwo ohworho ro ko ovwẹrowẹn ọkpokpọ rhẹ oberun ewun otafe ahwanre-en, fọkime ọrẹ ọkpokpọ na ọnọ fan nẹ ewun na, ekete rọ bẹrẹre na nọ nọ do rhọ. 17 Ihworho i vwe rhie enyo ọkpokpọ rhẹ ẹkpa enyo ahwanre-en. Aye i rhe ruẹ omaran, ẹkpa enyo na ni na sa ji rhie enyo na fughwẹ, ẹkpa enyo na ni na ji ghwọghọ. Ọrẹn ihworho e rhie enyo ọkpokpọ rhẹ uvuẹn ekpa enyo ọkpokpọ, na sabu sẹrorẹ eva na.”
18 Ọke rọ tẹmro enana rẹn aye, nughe! ọhworhare owu ro suẹn, no mo gburhomu rhotọre riẹn. Nọ tare: “O mwurun mẹ ẹro taghene ọmọ mẹ ọgbọtọ o hwu ne vwana, ọrẹn mọ ma ha obọ kpahiẹn, nọ nọ rharhumu nyerẹn.”
19 Omarana, Jesu ọrhẹ idibo yi ni vẹnrẹnren, aye ni lele ọhworhare na. 20 Nughe! ọmase owu ro kpomu emiamo rẹ ọbara ọ zẹ nẹ omayen sa ẹgbukpe 12 ne, nọ nya oberhumu hobọte ejẹnjẹn ewun otafe i Jesu. 21 Fọkime ọ ta rẹn omayen: “Mi rha ghwai hobọte ewun otafiẹ, omamẹ ọnọ gbanhon.” 22 Ọke i Jesu ọ dẹrioma ji mẹrẹn ọmase na, nọ tare: “Fiudugbere, ọgbọtọ mẹ! Esegburhomẹmro ọnọ o simiruon ne.” Nẹ unọke ọrana nyarhẹn, oma ọmase na nọ gbanhonron.
23 Vwana, ọke i Jesu o te oghwa ọhworhare ro suẹn na, nọ mẹrẹn ihworho re kporo ikpekporo* ọrhẹ otu na re don. 24 Jesu nọ tare: “Are i nẹ aran, fọkime ibiẹ ọgbọtọ na o hwu-u, ọrẹn ọ merhẹn.” Ọke aye e rhon ẹmro ọnana, aye na haye djechẹẹ. 25 Ogege otu na a ruẹ otafe hin, Jesu nọ ruẹ oghwa na ji mọrọn obọ ọgbọtọ na, ibiẹ ọgbọtọ na no vẹnrẹnren. 26 Itiọrurhomẹmro, oborẹ ọ phiare na no kerabọ lele ọsoso okogho ọrana.
27 Ọke i Jesu o nẹ avwaye, ehworhare awanva ri tuẹro ni lelirie, aye ne kperẹ phia: “Gbe arodọmẹ rẹn ame, Ọmọ i Devid.” 28 Ọke i Jesu ọ ruẹ oghwa owu, ituẹro na ni brurie rhe, Jesu nọ nọren aye: “Are i vwo esegburhomẹmro taghene mi na sabu simi are?” Aye ni kpahenrhọ ye: “Ee, Ọrovwori.” 29 Omarana, nọ hobọte ukẹro aye, nọ tare: “Je nọ phia rẹn are omaran lele esegburhomẹmro are.” 30 Omarana, aye ni mẹrude. Habaye, Jesu nọ ha orhetio ọgbogbanhon rẹn aye taghene: “Are i vwa ta rẹn ohworho owuorowu kpahiẹ-ẹn.” 31 Ọrẹn ọke aye a ruẹ otafe, aye na ta rẹn ọsoso ihworho ri ha okogho ọrana kpahen i Jesu.
32 Ọke aye e nẹ avwaye, nughe! ihworho ni kpare ọhworhare owu ro diunu, rẹ okpodje ọ ha omayen vwe i Jesu. 33 Ọrẹn, ọke ro le okpodje na nẹ omayen hin, ọhworhare ro diunu na nọ tẹmro. Oborẹ ọ phiare na no gbe otu na unu, aye na ta: “Ame a ji mẹrẹn aruẹ emru omana dẹ uvuẹn Izrẹ-ẹl.” 34 Ọrẹn, itu i Farisi na na ta: “Omẹgbanhon ọro sun ikpodje na yọ ha le ikpodje na.”
35 Omarana, Jesu no kiẹn ọsoso emwa na ọrhẹ ọko sansan, no yono ihworho uvuẹn sinagọg aye ji ghwoghwo iyẹnrẹn esiri Uvie na, no ji simi aruẹ emiamo ọrhẹ emiamiamo ephian uvwre ihworho na. 36 Ọke rọ mẹrẹn otu na, aruo aye nọ dọnriẹn fọkime aye i họhọ igegede ri konron, ra nya sa nya rie, ri vwe vwo ohworho ro sun aye. 37 Nọ ta rẹn idibo yi: “Itiọrurhomẹmro, orhọ na ọ doro omamọ, ọrẹn eri na wian owian na e bu-un. 38 Omarana, are i gba rẹ Onini orhọ na no dje ihworho ya wian owian orhọ ye.”