Iyẹnrẹn Ọrẹ i Mak

5 Ọke oru, aye ni danvrẹn riẹ obọreva urhie na, riẹ uvwrotọre ihworho i Gẹrasa. 2 Ogege i Jesu ọ ruotọre nẹ owọ na, ọhworhare owu rẹ okpodje o kpokpo ro nẹ uvwre isin* na sa, nọ vwariẹ. 3 Uvwre isin na yọ mai rhirhiẹ. Ye te ọke ọrana, o vwo ohworho owuorowu rọ sabu ha ejọrọ gba ye mwu ekete owu-u. 4 Ọgbọ buebun, a ha ejọrọ sansan gba abọ ọrhẹ aghwẹ ye ne, ọrẹn no vwere ejọrọ na ji ghwọghọ aye. O vwo ohworho owuorowu ro vwo omẹgbanhon rọ nọ gba ye rhotọre-e. 5 Habaye, nọ viẹ phia ọke ephian te ason te uvo uvwre isin na ọrhẹ uvuẹn igbenu na, nọ ji ha itita bru omayen. 6 Ọrẹn, ọke rọ kparughwaro mẹrẹn i Jesu, nọ zẹ bruie ji gburhomu rhotọre riẹn. 7 Nọ viẹ phia rhẹ uvwele gorigori taghene: “Me yẹ omẹmẹ ọrhẹ owẹwẹ i gbe vwo kugbe, Jesu ro rhiẹ Ọmọ Osolobrugwẹ rọ Mai Rierun na? Dumirhonrin obaro Osolobrugwẹ taghene wu ha oja re mẹ-ẹ.” 8 Fọkime Jesu ọ havwẹ ta riẹn bi ne taghene: “Okpodje na, nẹ oma ọhworhare na.” 9 Ọrẹn, Jesu nọ nọriẹn: “Me yẹ odọ?” Nọ kpahenrhọ riẹn: “Odẹ mẹ i Lijọn, fọkime ame i bunrun.” 10 Ọrẹn, nọ rẹ i Jesu ọgbọ buebun taghene o vwo le ikpodje na nẹ ẹkwotọre na-a.

11 Vwana, iti buebun a riẹ emaren avwaye uvuẹn oberun ugbenu na. 12 Omarana, ikpodje na ni rẹ i Jesu taghene: “Le ame ruẹ oma iti na, nẹ ame i ruẹ uvuẹn aye.” 13 Jesu no kwenu rẹn aye. Omarana, ikpodje na ni nẹ oma ọhworhare na ruẹ oma iti na. Iti ri te emrẹ 2,000 ni họrhọ nẹ okokọ ugbenu na* ruẹ urhie ọduado na, aye ephian ni hwu rhẹ uvuẹn ame na. 14 Ọrẹn, ihworho ra hẹrote iti na, ni zẹ ya nẹ iyẹnrẹn oborẹ ọ phiare rẹn ihworho ri ha amwa na ọrhẹ ere rhirhiẹ kẹrẹ amwa na. Ihworho ni ghwiẹ mọ mẹrẹn oborẹ ọ phiare na. 15 Aye ni bru i Jesu ji mẹrẹn ọhworhare rẹ okpodje o kpokpo bi na, ri lijọn ọ ji ha omayen bi na. Ọhworhare na o siyẹ ji kuẹ ewun rhọ, iroro yi ọ ji gba ne, omarana ofẹn no mwurun aye. 16 Habaye, ihworho ri rhiẹromẹrẹn oborẹ ọ phiare na, ni ta rẹn aye kpahen oborẹ ọ phia rẹn ọhworhare rẹ okpodje o kpokpo na ọrhẹ iti na. 17 Omarana, aye na rẹ i Jesu no nẹ okogho aye.

18 Vwana, ọke i Jesu ọ ruẹ owọ, ọhworhare rẹ okpodje o kpokpo bi na, nọ rẹ ye taghene ono lelie. 19 Ọrẹn, o kwe riẹ-ẹn, ukpomaran nọ ta riẹn: “Ghwẹrioma bru ihworho ekruon, ne wu nẹ iyẹnrẹn rẹn aye kpahen ọsoso ekwakwa ri Jehova* o ru wẹn, ọrhẹ oborẹ o ru gbe arodọmẹ wẹn.” 20 Ọhworhare ọnana nọ nyarhẹn ye ghwoghwo uvuẹn i Dikapolis* kpahen ọsoso ekwakwa ri Jesu o ru hariẹn, ọnana no gbe ihworho ephian unu.

21 Ọke i Jesu ọ rharhumu ha owọ danvrẹn riẹ obọreva urhie na, ihworho buebun ni ghwiẹ bruie rhe ọke rọ ha okokọ urhie ọduado na. 22 Owuọwan usuẹn ere suẹn uvuẹn i sinagọg na re se i Jairọs nọ rhere. Ọke rọ mẹrẹn i Jesu, no sighwẹ rhẹ obaruiẹ. 23 Nọ rẹ ye ọgbọ buebun taghene: “Ọmọ mẹ ọgbọtọ o kpomẹ gbangbanhon.* Biko mọ ha obọ kpahiẹn neneyo omayen ọ sasa, no jo rho hwu.” 24 Omarana, Jesu no lele ọhworhare na. Otu buebun na ghwiẹ lelie ji kenkien.

25 Vwana, o vwo ọmase owu ro kpomu emiamo rẹ ọbara ọ zẹ nẹ omayen sa ẹgbukpe 12 ne. 26 Ọmase na ọ rioja omamọ* ne uvuẹn abọ idọkitọ buebun, ọ ji ghwọghọ ọsoso igho ro vwori ne. Ọrẹn omayen ọ ji gbanho-on, ukpomaran no biomurhọ. 27 Ọke ro rhon kpahen i Jesu, nọ nya oberhumu hobọte ewun otafe i Jesu uvuẹn otu na, 28 fọkime ọ ta rẹn omayen: “Mi rha ghwai hobọte ewun otafiẹ, omamẹ ọnọ gbanhon.” 29 Ogege, ọbara rọ zẹ nẹ omayen bi na nọ dobọji, nọ mẹrẹnvwrurhe uvuẹn omayen taghene e simirien nẹ emiamo ọgbogbanhon na ne.

30 Ogege, Jesu nọ mẹrẹnvwrurhe taghene omẹgbanhon o nẹ omayen, nọ dẹrioma uvuẹn otu na ji nọ: “Ọrọmo yọ hobọte ewun otafe mẹ?” 31 Ọrẹn, idibo yi ni ta riẹn: “Wa mẹrẹn otu na re kenkuon, ọrẹn wa nọ taghene, ‘Ọrọmo yọ hobọte mẹ?’” 32 Udabọ ọrana, Jesu no ji ni ekete ephian kinhariẹ sẹ ọnọ mẹrẹn ọrọ hobọte yi. 33 Ọke ọmase na o rhe oborẹ ọ phia riẹn, ofẹn no mwurien, nọ phariẹ. No mo sighwẹ rhẹ obaro i Jesu ji ta ọsoso urhomẹmro na riẹn. 34 Jesu nọ ta riẹn: “Ọgbọtọ mẹ, esegburhomẹmro ọnọ o simiruon ne. Gba nyarhẹn ọrẹ ufuoma, e simiruon nẹ emiamo ọgbogbanhon na ne.”

35 Ọke i Jesu ọ ji tẹmro, ehworhare ezẹko ni nẹ oghwa i Jairọs rhe, aye ni ta riẹn: “Ọmọ ọgbọtọ o hwu ne! Wu vwa laha Oyono na ghwomara-an.” 36 Ọrẹn, ọke i Jesu o rhon ẹmro aye a ta rẹn i Jairọs, nọ ta riẹn: “Wu vwa zofẹ-ẹn,* ghwai vwo esegburhomẹmro.” 37 Vwana, Jesu o kwe nẹ ohworho owuorowu o lelie-e, jokpanẹ i Pita, Jems ọrhẹ i Jọn ro rhiẹ omizu i Jems.

38 Omarana, ọke aye e te oghwa i Jairọs, Jesu nọ mẹrẹn ihworho re don ọrhẹ era viẹ ji vwerhoma gbangbanhon. 39 Ọke rọ ruẹ oghwa na, nọ ta rẹn aye: “Mesoriẹ are a viẹ ji suẹ edon? Ọmọ na o hwu-u, ọrẹn ọ merhẹn.” 40 Omarana, aye na haye djechẹẹ. Ọrẹn ọke rọ ta rẹn aye ephian nẹ aye i ruẹ otafe hin, no se ọsẹ ọrhẹ izu ọmọ na kugbe eri lelirie, no riẹ ekete ọmọ na ọ havwọ. 41 Omarana, nọ mọrẹn obọ ọmọ na ji ta riẹn: “Talita kumi,” ro mevirhọ: “Ibiẹ ọgbọtọ, mia ta wẹn, Vẹnrẹn!” 42 Ogege, ọgbọtọ na no vẹnrẹnren, nọ nya sa nya rie. (Ọgbọtọ na ọ ha ẹgbukpe 12.) Ogege aye a mẹrẹn ọnana, oma nọ merhenren aye omamọ. 43 Jesu nọ ha orhetio rẹn aye ọgbọ buebun* taghene aye i vwa ta rẹn ihworho kpahen oborẹ ọ phiare na-a. Nọ ta rẹn aye nẹ aye i yẹ ọmọ na emaren re.