Marhẹ I Baibol Na Ono Ru Sa Mẹ Erhumu?

ME ỌYẸ WU NE RU?

Roro kpahen erhirhiẹ ọnana: David ọ ghwa imoto uvuẹn ekete ro vwo rhe. Oka ọrhẹ ekwakwa ra ha vwrurhe ekete o djephia taghene o rhe ekete rọ havwọ-ọ. David nọ mẹrẹnvwrurhe taghene ọye o vru ne. Ọ ghwa ruẹ izede ro vwo fo taghene ọ ro uvuẹn onya yen na.

Orhianẹ wẹwẹ yi David, me ọyẹ wu ne ru?

ZIKẸN NE WU RORO!

Wu vwo odjẹ sansan:

1. Nọ ne dje izede wẹn.

2. Guọlọ izede nyoma imapu yanghene GPS.

3. Rha ghwa nyarhẹn, ọkezẹko wu na mẹrẹn izede na.

Ọrẹ imwẹro, Odjẹ C ọ ghwai vwo erere-e.

Odjẹ B orhomu ghwẹ ọrukaro na. Nime, imapu yanghene GPS ono gberuo uvuẹn ọsoso onya na, rọ nọ ha userhumu wẹn kpọ onya ọnọ vi.

Baibol na ọnọ je sabu ha userhumu wẹn izede omaran!

Ọbe ọnana rọ mai titi na ọnọ sabu

• sa erhumu nyerẹn ghele ebẹnbẹn akpọ

• sa erhumu yono kpahen oma ọrhẹ oborẹ wu ne ru sabu rhiẹ omamọ ohworho

• dje wẹn oborẹ wu ne ru sabu vwo akpọ rọ mai rhomu kparobọ

RA KPAHANRHỌ ENỌ EDUADO RI SEKPAHEN AKPENYERẸN

Nẹ ọke rẹ ọwan a sabu tẹmro, ọwan na nọ enọ.

• Mesoriẹ iphrephrede na ọ havwọ vwierhevwierhe?

• Me ya ha ma ikereti na?

Orhoru, ọwan na nọ kpahen akpọ rẹ ọwan enyerẹn.

• Mesoriẹ ekwakwa ibiobiomu a phia?

• Mesoriẹ ihworho e hwuẹ?

Orhianẹ ẹkpahenrhọ harẹn enọ enana e ha uvuẹn i Baibol na ọke jijiri ne vwo-o?

Ihworho buebun a ta taghene i Baibol na ọ vuọnren rhẹ ikun ghemeghe ọrhẹ esia, taghene o se fa ne, yanghene ọgbanhon vwan, a sabu vwẹruọ ye-e. Ọrẹn i Baibol na yọ rọ ghini sọ, yanghene oborẹ ihworho irhon kpahen Baibol na yọ rọ sọre? Ọnọ sabu rhirhiẹ taghene ofian ya ta rẹn aye?

Jerẹ udje, ihworho e roro taghene i Baibol na ọ tare taghene Osolobrugwẹ yo ro sun akpọ na. Ọrẹn marhẹ ọnọ sabu rhirhiẹ omaran? Akpọ ọnana o biomu ghwẹ ọrẹ ana sabu sun ne! Ọ vuọnren rhẹ omiamiamo ọrhẹ ojẹriọ, emiamo ọrhẹ uhwu, ogbere ọrhẹ oghwọghọ. Marhẹ Osolobrugwẹ ro vwo ẹguọlọ ono vwobọrhọ ekwakwa enana?

Wu guọlọ rhe ẹkpahenrhọ ye? Oborẹ i Baibol na ọ tare kpahen ọrẹ osun akpọ na ono gbo unu!

Itiọrurhomẹmro wu na sabu djokarhọ ye taghene urhebro wu mẹrẹnren uvuẹn i broshọ ọnana o ni Baibol na rhe. Iseri Jehova i vwo imwẹro taghene i Baibol na ekete urhebro o nẹ sa, ra na sabu hẹroso. Nime ‘ẹhẹn ọfuanfon Osolobrugwẹ ya ha ya ye, emru erere harẹn uyono, harẹn ọghwọghwu, a haye ruẹ ekwakwa serhọ.’ (2 Timothy 3:16, 17) O fori ne yono ọbe ọnana ro jiri ne na—ọrẹn ọ je kpokpọ!