UYONO 80
Jesu ọ djẹ Inyikọ Awan Ikpereva
Ọke i Jesu o ghwoghwo te uvwre ẹgbukpe owu gbẹ uphrophro ne, nọ dẹrughwaroghwu orhienbro ọghoghanren owu. Ayọmo yi Jesu ọnọ djẹ ni rhiẹ inyikọ na? Ayọmo yi Jesu ono yono ni kobaro uvuẹn ukoko na? Neneyo i Jesu ọ sabu brorhiẹn enana, o fori nọ nekpẹn ọkpọvi mie i Jehova. Omarana, Jesu ọvo no riẹ ugbenu owu, nọ nẹrhomo ọsoso ason ọrana. Urhiọke o te, Jesu no se idibo yi ezẹko koko, nọ djẹ inyikọ awan ikpereva. Ọgo usuẹn aye ye wu rhe odẹ ye? Odẹ aye yẹ Peter, Andrew, James, John, Philip, Bartholomew, Thomas, Matthew, James ọmọ ọrẹ Alphaeus, Thaddaeus, Simon, ọrhẹ Judas Iscariot.
Andrew, Peter, Philip, James
Inyikọ awan ikpereva na ina nyalele i Jesu. Ọke i Jesu o yono aye hin, no dje rẹ aye ye ghwoghwo. Jehova nọ yẹrẹ aye omẹgbanhon rẹ aye ine le ikpodje nẹ ihworho oma jeghwai simi ihworho re kpomẹ.
John, Matthew, Bartholomew, Thomas
Jesu o se inyikọ awan ikpereva na igbehian yen, ọ jeghwai hẹroso aye. Otu i Pharisee na e roro taghene inyikọ na ihworho ri vwe rhe ẹbe ọrhẹ ihworho ghemeghe. Ọrẹn, Jesu ọ ha ukẹro ọrana ni aye-e, nime o yonirin aye rhẹ owian aghwoghwo na ne. Aye ọrhẹ i Jesu ine gbe rhirhiẹ ye ọke rọ nọ dẹrughwaroghwu erhirhiẹ sansan, jerẹ udje, Jesu ọrhẹ inyikọ na i havwiẹ e ki kpe yi ọrhẹ ọke ra rhọmiẹ nẹ uhwu. Jesu ọrhẹ idibo yi ezẹko itu i Galilee. Ezẹko usuẹn aye i rọnmọren.
James ọmọ ọrẹ Alphaeus, Judas Iscariot, Thaddaeus, Simon
Inyikọ na, ihworho ri vwa gba re ji ruẹ sọ. Ọkezẹko, aye a tẹmro phia vwẹre aye e ki rorie, aye a jeghwai brorhiẹn re sọre. Ọkezẹko, aye i vwe vwo erhionri-in. Aye i tobọ frẹfro kpahen ohworho rọ mai ghanren uvwre aye. Ọrẹn, aye ihworho ri vwo ẹguọlọ kpahen i Jehova. Jesu orho riẹ odjuwu ne, aye yi na kobaro uvuẹn ukoko na.
“Mi se rẹ are igbehian mẹ, fọkime mi ta rẹn are kpahen ọsoso ekwakwa mi rhon mie Ọsẹ me.”—John 15:15