Ẹmro ra Haphia Uvuẹn Oberun Ugbenu

Ọke i Jesu ọ djẹ inyikọ awan 12 na hin, nọ ruẹ otọre nẹ ugbenu owu riẹ ekete ihworho i kokori. Ihworho na i nẹ Galilee, Judea, Tyre, Sidon, Syria, ọrhẹ emwa erọrọ ri ha obọreva Urhie i Jordan rhe. Aye i kpare ihworho re kpomu aruo emiamo sansan rhe, kugbe ihworho rẹ ikpodje a ha oja ria. Jesu o simi rẹ aye ephian. Ọke oru, Jesu no siyẹ okokọ ugbenu na, nọ tẹmro rẹn aye. Jesu nọ ta rẹn aye oborẹ aye ine vi ru nẹ aye i sabu rhiẹ igbehian Osolobrugwẹ. Jesu o djerie fiotọre taghene o fori na mẹrẹnvwrurhe taghene ọwan i guọlọ Jehova, ọ jeghwai fo ne yono kpahen oborẹ ene ru vwo ẹguọlọ kpahiẹn. Ọrẹn, a sabu vwo ẹguọlọ kpahen Osolobrugwẹ-ẹ, jokpanẹ e vwo ẹguọlọ kpahen ereva ọwan. O fori ne dje uruemru esiri phia jeghwai vwo ẹguọlọ kpahen ihworho ephian, tobọ te evwreghrẹn ọwan.

Jesu ọrhọ ta: ‘Rhẹ igbehian enọ ọvo ye wu ne vwo ẹguọlọ kpahe-en. O ji fo ne wu vwo ẹguọlọ kpahen evwreghrẹn enọ jeghwai harhomu ihworho nẹ ẹhẹn rhe. Orhianẹ ohworho o biomevwan kpahuọn, bruie ogege ya rẹ ye. Oborẹ wu guọlọre taghene ihworho i ru wẹn ji ru omaran harẹn aye.’

Jesu ọ ji yẹ ihworho na obọdẹn urhebro kpahen ekwakwa ugboma. Jesu nọ tare: ‘Ne rhiẹ ugbehian i Jehova orhomu ghwẹ ọrẹ ene vwo igho buebun. Ohi ọnọ sabu so igho wu vwori, ọrẹn, o vwo ohworho rọ nọ sabu so onyerẹnkugbe wu vwori rhẹ i Jehova-a. Wu vwe brudu kpahen oborẹ wu na re, oborẹ wu na da yanghene oborẹ wu ne kurhọ-ọ. Dabu ni efen ra dan na. Osolobrugwẹ ọ ghẹrẹ aye ọke ephian. Uduebro ọ sabu ha ẹdẹ owu ba akpenyerẹn ọnọ-ọ. Karorhọ, Jehova o rhe oborẹ wu guọlọre.’

Otu ri kokori na, a ji mẹrẹn ohworho rọ tẹmro jerẹ i Jesu dẹ-ẹ. Ilori ẹga aye e ji yono aye ekwakwa enana dẹ-ẹ. Mesoriẹ i Jesu o rhiẹ oyono ọduado? Fọkime, kemru kemru ro yono ihworho i nẹ obẹ i Jehova rhe.