E Kpe i Jesu Uvuẹn Ekete re se Golgotha

Ilori irherẹn na, ni ha i Jesu vwe i Pilate ro rhiẹ igọvunọ ẹkwotọre na. Pilate nọ nọrẹn aye: ‘Me yẹ ọhworhare ọnana o ruru?’ Aye ni tare: ‘O se omayen orodje!’ Pilate nọ nọ i Jesu: “Wẹwẹ yẹ Orodje itu i Jew na?” Jesu nọ kpahenrhọ riẹn: “Uvie mẹ ọ ha usuẹn akpọ na-a.”

Omarana, Pilate nọ ha i Jesu vwe i Herod ro rhiẹ ohworho ro suẹn i Galilee, no nieso sẹ ọnọ mẹrẹn oborẹ o ru biomu. Herod ọ mẹrẹn emru owuorowu ri Jesu o ru biomu-u, nọ rharhumu ha ye vwe i Pilate. Omarana, Pilate nọ ta rẹn ihworho na: ‘Mẹmẹ ọrhẹ i Herod a mẹrẹn emru owuorowu rẹ ohworho ọnana o ru biomu-u. Mi ne tiobọnie.’ Otu na ni tueri: ‘E kpe yi! E kpe yi!’ Isodja ezẹko na ha iphianphian fa i Jesu, aye ne djen erhẹnrhen ghwuie, jeghwai ghwiẹ ye. Aye ni ku erhu ivwẹn rhọ ye urhomu, aye na haye djechẹẹ, aye na ta: ‘Doo, Orodje itu i Jew.’ Pilate nọ tare ọgbọrọrọ: ‘Mia mẹrẹn oborẹ ọhworhare ọnana o rusọ-ọ.’ Ọrẹn, aye ne bunu: “Jenẹ a kanriẹn mwu orhan na!” Omarana, Pilate no tiobọnie rẹn aye ne kpe yi.

Aye ni ha i Jesu riẹ ekete re se Golgotha, aye ni kanren riẹn mwu orhan, aye ni kpare orhan na mevi. Jesu nọ nẹrhomo: ‘Ọsẹ, harhomu aye, nime aye e rhe oborẹ aye e ruẹ-ẹ.’ Ihworho na ha i Jesu djechẹẹ, aye na ta: ‘Wu rhe ghini rhiẹ Ọmọ Osolobrugwẹ, ruẹ otọre nẹ orhan ra kanren ruọn mwu na! Simi oma ọnọ.’

Owu usuẹn ihi ra kanren mwu orhan kẹriẹ na, nọ ta riẹn: “Karorhọ mẹ uvuẹn Uvie ọnọ.” Jesu no vive riẹn: “Wu ne leli mẹ rhirhiẹ ye uvuẹn i Paradais.” Uvuẹn erhẹrhuvo, ekete ephian no mwuokuku uvuẹn ẹkwotọre na te inọke esa. Ezẹko usuẹn idibo i Jesu, i mevi kẹrẹ orhan ra kanren i Jesu mwu na, Mary ro rhiẹ izu i Jesu ọ jeghwai ha avwaye. Jesu nọ ta rẹn i John nọ hẹrote Mary ro rhiẹ izie.

Ọke oru, Jesu nọ tare: “O rugba ne!” No gbughwaro rhotọre, no hwuru. Ogege, otọre ekpogho ọgbogbanhon nọ homaphia. Ikọtini rọ ha uvwre ekete Ọfuanfon ọrhẹ ekete rọ Mai Fon na nọ bẹrẹre akwava. Olotu isodja owu nọ tare: ‘Ọnana ghini Ọmọ Osolobrugwẹ.’