A Rhọmọ i Jesu nẹ Uhwu

Ọke i Jesu o hwu hin, ọdafe owu rẹ odẹ ye o rhiẹ Joseph, nọ rẹ i Pilate no tiobọnu orinmi Jesu ra kanren mwu orhan na riẹn. Joseph no rhie ichiani ghwu orinmi Jesu jeghwai ha owẹn efeludu fariẹ, no sin rien rhẹ unu rọ ha uvuẹn atita. Nọ ha atita ọghwaghwa rhurhu unu rọ ha uvuẹn atita na. Irherẹn na ni ta rẹn i Pilate: ‘Ofẹn o mwu ame sẹ idibo i Jesu ezẹko ina ya kpare orinmi Jesu, aye ni na gemai ta taghene a rhọmeriẹn nẹ uhwu ne.’ Omarana, Pilate nọ ta rẹn aye: ‘Are i ha ihworho ya dẹrẹ usin na.’

Ẹdọke esa a vrẹn, emẹse ezẹko ni riẹ ekete re sin i Jesu rhọ igidi urhiọke ẹdẹ ọrana, aye ni mẹrenriẹn taghene e ghorien atita na nẹ avwaye ne. Ọmakashe owu nọ ta rẹn emẹse na: ‘Are i vwa zofẹ-ẹn. A rhọmọ i Jesu nẹ uhwu ne. Are i nyarhẹn ya ta rẹn idibo yi nẹ aye i riẹ Galilee ya vwa ye.’

Mary Magdalene no brokpakpa ya guọlọ i Peter ọrhẹ i John. Nọ ta rẹn aye: ‘Ohworho ọ kpare orinmi Jesu!’ Peter ọrhẹ i John ni zẹ riẹ ekete re sin i Jesu rhọ na. Ọke aye a mẹriẹn taghene o rhiefirhọ, dawandẹ oghwa ye ni nyaren.

Ọke i Mary o te ekete usin na, nọ mẹrẹn emakashe awanva uvuẹn unu rọ ha uvuẹn atita na, nọ ta rẹn aye: ‘Mie rhe ekete ra kpare orinmi Ọrovwori mẹ nya-a.’ Ọke oru, nọ mẹrẹn ọhworhare owu, no rorori taghene ọhworhare na yọ dẹrẹ ekete na, Mary nọ ta riẹn: ‘Ọga, biko ta mẹ ekete wu kpareriẹ nya.’ Ọrẹn, ọke ọhworhare na o se odẹ i Mary, Mary nọ rheri taghene ọhworhare na i Jesu. Mary no se rie: “Oyono!” nọ gbale riẹ. Jesu nọ ta riẹn: ‘Nyarhẹn ya ta rẹn imizu mẹ taghene wu rhiẹromẹren mẹ ne.’ Ogege, Mary nọ zẹ ya vwa idibo i Jesu, nọ ta rẹn aye taghene ọye ọ mẹrẹn i Jesu ne.

Ọke oru, uvuẹn ẹdẹ ọrana, idibo i Jesu awanva, ne nẹ i Jerusalem riẹ Emmaus. Ọhworhare owu nọ homaba aye uvuẹn izede na, ọhworhare na nọ nọrẹn aye oborẹ aye a ta kpahan. Aye ni tare: ‘We ji rhon? Ẹdọke esa re vrẹnren na, irherẹn na i kpe i Jesu. Vwarana, emẹse ezẹko a ta taghene a rhọmeriẹn ne!’ Ọhworhare na nọ nọrẹn aye: ‘Are i vwo imwẹro kpahen emẹraro na? Emẹraro na i tare taghene i Kristi ono hwuo, ana jeghwai rhọmiẹ nẹ uhwu.’ Ọhworhare na no dje Eyaya Ọfuanfon na fiotọre harẹn aye. Ọke aye e te Emmaus, idibo na ni ta rẹn ọhworhare na no lele aye. Owuọwọn o te, ọke ọhworhare na ọ nẹrhomo rhẹ ibrẹdi aye a guọlọ ria na hin, aye ni mẹrẹnvwrurhe taghene ọhworhare na i Jesu. Ogege, Jesu nọ ranmiẹnren.

Idibo awanva na, ni brokpakpa riẹ oghwa inyikọ na ephian e koko uvuẹn Jerusalem, aye ni ta rẹn aye kpahen oborẹ ọ phiare. Ọke aye a ha uvuẹn oghwa na, Jesu nọ homaphia rẹn aye ephian. Ukukaro, inyikọ na e kwerhọ ye taghene i Jesu yọ homaphia na-a. Omarana, Jesu nọ tare: ‘Are i ni obọ mẹ; are i hobọte mẹ. A yariẹ rhotọre taghene i Kristi ono hwuo, ana jeghwai rhọmiẹ nẹ uhwu.’