E Tiobọnẹ Ẹhẹn Ọfuanfon na rẹn i Cornelius

O vwo olotu isodja i Rome owu uvuẹn i Caesarea, rẹ odẹ ye o rhiẹ Cornelius. Dedevwo ọye rhẹ onyẹ i Je-ew, ọrẹn, itu i Jew a họghọ riẹn. Cornelius ọ ha userhumu rẹn ivwiegbere ọrhẹ ihworho ri vwe vwo bun. Cornelius o vwo esegburhomẹmro kpahen i Jehova, ọ jeghwai nẹrhomo vwe yi ọke ephian. Ẹdẹ owu, ọmakashe nọ homaphia rẹn i Cornelius, nọ tare: ‘Osolobrugwẹ o rhon ẹrhomo ọnọ ne. Vwarana, gbe dje ehworhare riẹ amwa re se Joppa, ro rhiẹ ekete i Peter o rhirhiẹ, ne wu ta riẹn no bro rhe.’ Ogege, Cornelius no dje ehworhare awansa riẹ i Joppa, ro seri te iroko 30 rọ ha obọrẹ o riotọre na.

Ọrẹn, Peter ọ ji menemena arudo uvuẹn Joppa. Ọ mẹrẹn eranmo itu i Jew i vwa ria, no rhon uvwele ohworho owu rọ ta riẹn nọ riẹ. Peter nọ tenren, nọ tare: ‘Mia ji riẹ aranmo rọ vwọ fon dẹ-ẹ.’ No rhon uvwele na rọ ta riẹn: ‘Wu vwe se eranmo enana oborẹ i vwa fo-on. Osolobrugwẹ o ruru aye fon ne.’ Nọ ji ta rẹn i Peter: ‘Ehworhare awansa i ha uvuẹn anurẹsẹ ọnọ. Lele aye nyarhẹn.’ Peter no riẹ anurẹsẹ na, nọ nọrẹn aye oborẹ ọsoriẹ aye a rhe. Aye ni tare: ‘Cornelius ro rhiẹ olotu isodja i Rome, yo djerẹ ame rhe. Ọ tare taghene wu rhiẹ oghwa ye obẹ i Caesarea.’ Peter nọ ta rẹn ehworhare na nẹ aye i daji oghwa ye ason ọrana. Ẹdẹ ọreva ye, ọye ọrhẹ imizu erọrọ ri nẹ i Joppa rhe, ni lelirẹ aye riẹ Caesarea.

Ogege i Cornelius ọ mẹrẹn i Peter, no sighwẹ totọre. Ọrẹn, Peter nọ tare: ‘Vẹnrẹn! Mẹmẹ ohworho jerẹ owẹwẹ. Osolobrugwẹ ọ ta mẹ ni mi rhiẹ oghwa ọnọ, dedevwo itu i Jew i vwa ruẹ oghwa egehọ-ọ. Vwarana, biko ta mẹ oborẹ ọsoriẹ we se mẹ.’

Cornelius nọ ta rẹn i Peter: ‘Ẹdọke ẹne ri vrẹnren na, ọke mia nẹrhomo vwe Osolobrugwẹ, ọmakashe owu nọ ta mẹ taghene mi dje urhomu vwo, ne wu rhe. Biko yono ame ẹmro i Jehova.’ Peter nọ tare: ‘Mi mẹrẹnvwrurhe ne taghene Osolobrugwẹ o vwo nẹ ohworho ruẹ-ẹ. O rhiabọ dede kohworho kohworho rọ guọlọ ga ye.’ Peter no yonirin aye ekwakwa buebun kpahen i Jesu. Ọke oru, ne tiobọnẹ ẹhẹn ọfuanfon na rẹn i Cornelius ọrhẹ ọsoso ihworho ri ha uvuẹn oghwa na, aye ephian ni bromarhame.