Wu na Sabu Rhiẹ Ugbehian i Jehova

Jehova ọ guọlọre ne wu dabu rhe yi. Mesoriẹ? Ọ guọlọre ne wu dabu rhe kpahen iruemru enẹyen, izede yi, ọrhẹ ọhọre ọnẹyen, ọke wa guọlọ rhiẹ ugbehian yen. Wu na ghini sabu rhiẹ ugbehian Osolobrugwẹ? (Se Psalm 25:14.) Me wu ne ruo, ne wu sabu rhiẹ ugbehian yen? Baibol na ọ kpahenrhọ enọ erana, o ji djephia taghene onyerẹnkugbe rhẹ i Jehova yẹ oborẹ ọ mai ghanren ra na sabu vwo.

1. Use ọgo yi Jehova ọ rionbọ ye vwo?

“Are i ti kẹrẹ Osolobrugwẹ, ọye no no ti kẹrẹ are.” (James 4:8) Me yẹ ọnana o mevirhọ? Jehova ọ ha use wẹn ne wu rhiẹ ugbehian yen. Ọ bẹn rẹn ihworho ezẹko rẹ aye ine vwo imwẹro na taghene aye ina sabu rhiẹ ugbehian Osolobrugwẹ, fọkime aye i vwe rhiẹro mẹriẹ-ẹn. Ọrẹn, uvuẹn Ẹmro ọnẹyen ro rhiẹ i Baibol na, Jehova ọ dabu dje rẹn ọwan oborẹ ene ru sabu rhe iruemru enẹyen, neneyo a sabu tikẹriẹ. Ọwan e rhe se iyẹnrẹn Osolobrugwẹ ọ yẹrẹ ọwan uvuẹn i Baibol na, onyerẹnkugbe ọwan rhẹ i Jehova nọ gbanhanrhọ dedevwo a vwa mẹriẹ-ẹn.

2. Mesoriẹ i Jehova o rhiẹ obọdẹn Ugbehian wu na sabu vwo?

Ovwo ohworho ro vwo ẹguọlọ kpahuọn ti Jehova-a. Ọ ji guọlọ ne wu nẹrhomo vwe yi nọ ha userhumu wẹn ọke wa guọlọ userhumu ephian. Wu na sabu ha ‘ọfiamu enọ ephian dọn yen, fọkime ọ heroto.’ (1 Peter 5:7) Jehova o mwuegbe rọ nọ hobọtua igbehian yen, yẹ aye urhebro, jeghwai kerhọ aye.—Se Psalm 94:18, 19.

3. Me ye ne ruo na ki sabu rhiẹ ugbehian i Jehova?

Jehova o vwo ẹguọlọ kpahen ihworho ephian, “ọrẹn, o vwo omamọ onyerẹnkugbe rhẹ ohworho ọsoso.” (Proverbs 3:32) Jehova ọ guọlọre nẹ igbehian yen i damoma ru oborẹ ọ merhiẹn oma, jeghwai kẹnoma rẹn oborẹ o vwo utuoma kpahen. Ihworho ezẹko e roro taghene aye i sabu nyamwuẹ evwan egbagba eri Jehova-a. Ọrẹn, Jehova ọ dabu vwẹruọ ọwan. O dede kohworho kohworho ro vwo ẹguọlọ kpahiẹn, rọ ji damoma ro no ru oborẹ ọ merhiẹn oma.—Psalm 147:11; Acts 10:34, 35.

YONO KODO RHỌ

4. Abraham ugbehian i Jehova

Iyẹnrẹn i Baibol na kpahen Abraham (re ji se Abram,) ọ dabu dje fiotọre rẹn ọwan kpahen oborẹ o mevirhọ re ne rhiẹ ugbehian Osolobrugwẹ. Se kpahen i Abraham uvuẹn Genesis 12:1-4. Orho ru, are i gba kpahenrhọ enọ enana:

• Me yi Jehova ọ ta rẹn Abraham no ru?

• Ive ọgo yi Jehova o ve riẹn?

• Marhẹ Abraham ọ kpahenrhọ ọkpọvi i Jehova lele?

5. Oborẹ i Jehova ọ guọlọre nẹ igbehian yen i ru

Itiọrurhomẹmro, a guọlọre nẹ igbehian ọwan i ruẹ ekwakwa ezẹko rẹn ọwan.

• Ekwakwa ego ye wu guọlọre nẹ igbehian i ru wẹn?

Se 1 John 5:3, orho ru, are i gba kpahenrhọ onọ ọnana:

• Me yi Jehova ọ guọlọre nẹ igbehian yen i ru?

Na sabu huvwele i Jehova, o fori ne wene iruemru yanghene irueruo ọwan. Se Isaiah 48:17, 18, orho ru, are i gba kpahenrhọ onọ ọnana:

• Mesoriẹ i Jehova ọ guọlọ nẹ igbehian yen i ru ewene?

6. Oborẹ i Jehova o ru ha userhumu rẹn igbehian yen

IVIDIO: Jehova O Ru Ekwakwa i Buebun Mẹ Ne (3:20)

• Marhẹ i Jehova o ru ha userhumu rẹn ọmase uvuẹn ividio na vwo edirin udabọ iroro esọsọ ro vwori ọrhẹ ẹhẹn yen ro seriotọre?

Se Isaiah 41:10, 13, orho ru, are i gba kpahenrhọ enọ enana:

• Me yi Jehova o veri taghene ono ru rẹn igbehian yen ephian?

• Wu rorori taghene ana sabu hi Jehova mwu obọdẹn ugbehian? Mesoriẹ?

7. Na sabu rhiẹ ugbehian i Jehova, ana vi tẹmro riẹn jeghwai kerhọ ye

Onyerẹnkugbe uvwre igbehian ọ gbanhanrhọ aye arha tẹmro ọke ephian. Se Psalm 86:6, 11, orho ru, are i gba kpahenrhọ enọ enana:

• Marhẹ ene ru sabu tẹmro rẹn i Jehova?

• Marhẹ i Jehova o ru tẹmro rẹn ọwan?

ME WU YONORIN?

Jehova ọ guọlọre ne wu rhiẹ Ugbehian yen, ọnọ jeghwai ha userhumu wẹn ne wu sabu tikẹriẹ.

Ẹzẹkoko

• Marhẹ i Jehova o ru ha userhumu rẹn igbehian yen?

• Mesoriẹ i Jehova ọ ta rẹn igbehian yen nẹ aye i ruẹ ewene?

• Wu rorori taghene ọ bẹnren omamọ ra na sabu rhiẹ ugbehian i Jehova? Me wu rorori? Mesoriẹ?

GUỌLỌ IYẸNRẸN ERỌRỌ

Erere ego wu na mẹrẹn uvuẹn akpenyerẹn ọnọ, wu rhe rhiẹ ugbehian Osolobrugwẹ?

“Jehova Osolobrugwẹ ro Fori ne Rhe Kpahen” (Oghwa Odẹrẹ, February 15, 2003)

Yono kpahen oborẹ wu ne ru sabu rhiẹ ugbehian Osolobrugwẹ.

“Marhẹ mi ne ru Sabu Rhiẹ Ugbehian Osolobrugwẹ?” (Questions Young People Ask—Answers That Work, Ẹrhiọ 2, urhomu-ẹmro 35)

Se kpahen oborẹ ọsoriẹ ọmase owu o roro taghene onyerẹnkugbe ọnẹyen rhẹ i Jehova ọ lẹrhẹ akpenyerẹn ọnẹyen rhomurhọ.

“Mia Guọlọ Hwu-u!” (Oghwa Odẹrẹ Ikekele 1 2017)

Kerhọ oborẹ iphuphẹn i tare kpahen oborẹ aye e roro kpahen i Jehova.

Me yo Mevirhọ ne Rhiẹ Ugbehian Osolobrugwẹ? (1:46)