Marhẹ wu ne ru Mẹrẹn Erere wu rhe riẹ Iyono Iseri Jehova?

A ha use wẹn riẹ uyono Iseri Jehova dẹ ne? Orhianẹ wa ji nya dẹ-ẹ, ọkezẹko ofa ọnọ ruọ ọke ọrukaro. Wu na sabu rhe roro: ‘Me ye ruẹ uvuẹn iyono enana? Mesoriẹ aye a ghanren? Mesoriẹ o fo ni mi nya?’ Uvuẹn uyono ọnana, wu ne yono oborẹ wu ne ru tikẹrẹ Osolobrugwẹ rhọ, jeghwai mẹrẹn userhumu ọnẹyen wu rhe kwomakugbe awọrọ ga ye.

1. Mesoriẹ Iseri Jehova e kwomakugbe ruẹ uyono?

Djokarhọ oborẹ owuọwan usuẹn ihworho ri ya i Baibol na ọ tare kpahen oborẹ ọsoriẹ ọghanren re ne kwomakugbe awọrọ: “Uvuẹn ukoko ọduado na, mi ne jiri Jehova.” (Psalm 26:12) Omaran ọ ji havwọ, Iseri Jehova a mẹrẹn aghọghọ ọduado ọke aye e koko kugbe. Uvuẹn akpọ na ephian, aye e kwomakugbe kọkprughwre kọkprughwre jiri Osolobrugwẹ, so ijoro, jeghwai nẹrhomo. Ẹdẹ ezẹko kẹgbukpe kẹgbukpe, aye e ji ruẹ omẹvwa rẹ aye a ga i Jehova.

2. Me wu ne yono uvuẹn iyono ame?

Ame e yono i Baibol uvuẹn iyono ame, jeghwai “dje yi fiotọre na sabu vwẹruọ ye.” (Se Nehemiah 8:8.) Wu rhe riẹ uyono ame, wu ne yono kpahen i Jehova ọrhẹ obọdẹn iruemru enẹyen. Wu na mẹrẹnvwrurhe taghene o vwo ẹguọlọ kpahuọn, ọnana ọnọ lẹrhuọ tikẹriẹ rhọ. Wu ne yono oborẹ ono ru ha userhumu wẹn riamerhen akpenyerẹn omamerhomẹ.—Isaiah 48:17, 18.

3. Marhẹ wu ne ru mẹrẹn erere wu rhe lele awọrọ tẹmro uvuẹn iyono ame?

Jehova ọ yẹrẹ ame ọkpọvi taghene ame i rhe ‘roro harẹn owuowọnwan neneyo ame i sabu dje ẹguọlọ ọrhẹ iruo esiri phia, nẹ ame i ja rha sẹrerhumuji okugbe ọrẹ ame.’ (Hebrews 10:24, 25) Uvuẹn iyono ame, wu na mẹrẹn ihworho ri ghini vwo ẹguọlọ kpahen owuowọnwan, ri ji vwo omamerhomẹ rẹ aye ine yono kpahen Osolobrugwẹ jerẹ owẹwẹ. Wu ne rhon ẹmro ọrhẹ ẹkpahenrhọ ra bọn kpahen i Baibol rẹ aye a haphia. (Se Romans 1:11, 12.) Wu na sabu tẹmro rhẹ eri vwa ji rọnmọ ọrhẹ eri rọnmọ ne, ji rhe oborẹ ọ lẹrhẹ oma merhen aye udabọ ebẹnbẹn rẹ aye a dẹrughwaroghwẹ. Enana iroro ezẹko rọ lẹrhẹ i Jehova guọlọ nẹ ame i rhe kwomakugbe ruẹ uyono kọke kọke!

YONO KODO RHỌ

4. Iyono Iseri Jehova

Ọke ephian yẹ Ilele Kristi erukaro e kwomakugbe ha ẹga rẹn i Jehova. (Romans 16:3-5) Se Colossians 3:16, orho ru, are i gba kpahenrhọ onọ ọnana:

• Marhẹ Ilele Kristi erukaro i ha ẹga rẹn i Jehova lele?

IVIDIO: Me ọye ruẹ Uvuẹn Aghwẹlẹ Uvie? (2:12)

• Marhẹ oborẹ e ruẹ uvuẹn Aghwẹlẹ Uvie wu djokarhọ, o ru họhọ oborẹ wu seri uvuẹn Colossians 3:16?

• Uvuẹn ividio yanghene ifoto na, wu ji djokarhọ emru ọrọrọ uvuẹn iyono na rọ merhenruọn oma?

Se 2 Corinthians 9:7, orho ru, are i gba kpahenrhọ onọ ọnana:

• Mesoriẹ avwa ha igho mie ihworho uvuẹn iyono Iseri Jehova?

Ọrọ ha i Baibol yonuo ọnọ ta wẹn kpahen uyono ra na haphia uvuẹn ọkprughwre na.

• Oghọn ọgo uvuẹn uyono na ye wu rorori taghene ọnọ mai merhuọn oma, yanghene ha userhumu wẹn?

Wu rheri?

Uvuẹn jw.org, wu na sabu guọlọ ekete ọrhẹ ọke re ruẹ uyono uvuẹn ekete sansan uvuẹn akpọ na.

1. Uvuẹn iyono ame, a ha ẹmro phia rẹn otu na, ruẹ idje, jeghwai kporo ividio. A ha ijoro ọrhẹ ẹrhomo tuẹn uyono na rhọ, ji ha ye fuien

2. Erhe ruẹ uyono na, a ha uphẹn rẹn otu na nẹ aye i ha ẹkpahenrhọ phia uvuẹn eghọn ezẹko

3. E dede ihworho ephian, ekrun, eri vwa ji rọnmọ, eri kpako ne, ọrhẹ emọvwerhe

4. A vwa kwosa rhẹ uyono ame-e. Iseri Jehova i vwa ha igho mie ihworho yanghene kpare ọsete itetoro-o

5. A guọlọ omẹdamu mio ne wu sabu riẹ iyono enana

Roro kpahen udje ekrun i Jesu. Kẹgbukpe kẹgbukpe, aye a ha oghwẹ nya iroko 60 nẹ Nazareth vrẹn ẹkwotọre ri vwo igbenu, nẹ aye i sabu riẹ oghwa ẹga na uvuẹn i Jerusalem. Se Luke 2:39-42, orho ru, are i gba kpahenrhọ enọ enana:

• Wu rorori taghene onya ọnana riẹ i Jerusalem ọ guọlọ omẹdamu?

• Mesoriẹ a guọlọ omẹdamu mio ne wu sabu riẹ iyono?

• Wu rorori taghene wu na mẹrẹn erere nie rhe? Mesoriẹ?

• Mesoriẹ o fo nẹ ọwan i riẹ iyono ọke ephian?

ME WU YONORIN?

We rhe riẹ iyono, ọnọ ha userhumu wẹn yono riaro kpahen i Jehova, ọnọ lẹrhẹ onyerẹnkugbe ọnọ rhẹ ọye gbanhonrhọ, ru we kwomakugbe awọrọ ha ẹga riẹn.

Ẹzẹkoko

• Mesoriẹ i Jehova ọ guọlọ ne kwomakugbe ruẹ uyono?

• Me wu ne yono uvuẹn iyono Iseri Jehova?

• O ji vwo izede ọrọrọ rẹ iyono na ine ru ha userhumu wẹn?

GUỌLỌ IYẸNRẸN ERỌRỌ

Me wu ne ruo orhianẹ ofa ọ ruọ wu ne riẹ uyono? Ni ividio rọ ta kpahen ọhworhare owu rẹ ofa ọ roro ọke ọrukaro, ọrẹn ọke o ru, no mo vwo ẹguọlọ kpahen uyono.

Ẹmroma Na Ọ Sẹrẹ Ame Ẹro-o (4:16)

Ni oborẹ idama owu o ru riamerhen iyono na, ọrhẹ oborẹ o ruru nọ sabu rha nya ọke ephian.

Iyono na i Jeri mẹ Omamọ! (4:33)

Yono kpahen oborẹ awọrọ i rorori kpahen iyono ẹnya.

“Mesoriẹ mi ne Riẹ Uyono Iseri Jehova Uvuẹn Aghwẹlẹ Uvie?” (Urhomu-ẹmro rọ ha uvuẹn itanẹti)

Yono kpahen oborẹ ologbozighi owu o ru wene akpenyerẹn yen fọkiẹ uyono Iseri Jehova rọ nyaren.

“Mia Kpare Okpọghọ mẹ Riẹ Ekete Ephian Mia Nya” (Oghwa Odẹrẹ, July 1, 2014)