Ekete ra Rionbọrhọ Uvuẹn Ọbe Owian Akpenyerẹn Ọwan Ọrhẹ Iruo Uvie Na
MARCH 4-10
EFE RI NẸ ẸMRO OSOLOBRUGWẸ RHE | ROMANS 12-14
“Oborẹ o Mevirhọ re ne Dje Ẹguọlọ Olele Kristi Phia”
(Romans 12:10) Are i dje ẹguọlọ imizu okokodo rẹn owuowọnwan. Are i kobaro ọghọ e djephia rẹn owuowọnwan.
it-1 55
Ẹguọlọ Okokodo
O fori nẹ ẹguọlọ imizu (ẹmro Greek re se phi·la·del·phiʹa, ro mevirhọ “ẹguọlọ okokodo re vwo kpahen imizu”) o rhirhiẹ erhẹrhẹ Ilele Kristi uvuẹn ukoko na. (Ro 12:10; Heb 13:1; jeghwai se 1Pe 3:8.) Omarana, no fori nẹ onyerẹnkugbe rọ ha uvwre imizu ukoko na ọ kpẹnkpẹn jeghwai merhoma jerẹ ọrẹ imizu evwan. Dedevwo imizu ukoko na e dje ẹguọlọ imizu phia, e ji jirie rẹn aye nẹ aye i rhe dje yi phia vuọnvuọn.—1Th 4:9, 10.
A ha ẹmro i Greek re se phi·loʹstor·gos ro mevirhọ “re dje ẹguọlọ okokodo phia,” e ruiruo arha ta kpahen ohworho ro vwo onyerẹnkugbe rọ kpẹnkpẹnren omamọ rhẹ ọwọrọ. Ọgbọ buebun, a ha ẹmro ọnana re se sterʹgo, e ruiruo ọke ra ta kpahen ẹguọlọ re djephia uvwre ihworho ekrun. Ọnyikọ Paul ọ ha urhebro rẹn Ilele Kristi nẹ aye i vwo uruemru ọnana. (Ro 12:10) Paul ọ ji ta taghene ihworho uvuẹn ẹdẹ ri koba na i “damerhọ awọrọ-ọ,” (ẹmro Greek re se aʹstor·goi) habaye nọ tare taghene ihworho erana i fo uhwu.—2Ti 3:3; Ro 1:31, 32.
(Romans 12:17-19) Are i vwa ha ọdandan kwosa ọdandan rẹn ohworho owuorowu-u. Are i roro kpahen oborẹ o serhọ uvuẹn ukẹro ihworho ephian. 18 Orho rhiẹ oborẹ are ina sabu ru, are i lele ihworho ephian nyerẹn ọrẹ ufuoma. 19 Are i vwe ru kele-e, imizu mẹ ri mi vwo ẹguọlọ kpahen, ọrẹn, are i nyaji orukele vwo rẹn Osolobrugwẹ; fọkime a yariẹ rhotọre: “‘Orukele ọnẹmẹ; mi na kwosa,’ omaran i Jehova ọ tare.”
w09 10/15 8 ¶3
“Lele Ihworho Ephian Nyerẹn Ọrẹ Ufuoma”
3 Se Romans 12:17. Paul o djerie fiotọre taghene erhe ru ọwan sọ, o fo ne ru kele-e. Urhebro ọnana ọ ghanranren omamọ uvuẹn ekrun re riẹ ẹga sansan. O fori nẹ ane yanghene esa ro rhiẹ Olele Kristi, ọ kẹnoma rẹn uruemru ra tẹmro yanghene ruẹ emru hwainhwain nime ọreva ye o rurie sọ bi. Emru orhorhomu o vwo nie sa, arha ha “ọdandan kwosa ọdanda-an.” Ukpomaran, aruẹ uruemru ọrana ọ lẹrhẹ erhirhiẹ na biomẹrhọ.
w07 7/1 24-25 ¶12-13
“Are i Vwa Ha Ọdandan Kwosa Ọdandan Rẹn Ohworho Owuorowu-u”
12 Urhebro ọrọrọ ri Paul ọ haphia kpahen oborẹ ene nyerẹn lele rhẹ imizu ukoko ọrhẹ awọrọ ri vwa ha uvuẹn ukoko na yẹ: “Are i vwa ha ọdandan kwosa ọdandan rẹn ohworho owuorowu-u.” Ẹmro ọrana o surhobọmwu oborẹ i Paul ọ kiki ta nọyẹ: “Are i vwo utuoma kpahen oborẹ obiomurun.” Marhẹ ohworho ono ru djephia taghene o vwo utuoma kpahen obiobiomu, orhianẹ ọ ha ọdandan kwosa ọdandan? Erhe ru ọnana, ono mevirhọ taghene e vwo ẹguọlọ rọ ‘vabọ omeru-u.’ Ọke oru, Paul nọ tare: “Are i roro kpahen oborẹ o serhọ uvuẹn ukẹro ihworho ephian.” (Romans 12:9, 17) Marhẹ ana ha ẹmro erana ruiruo lele?
13 Uvuẹn ileta ri Paul ọ ya vwe itu i Corinth, ọ ya kpahen ẹkparehaso rẹ inyikọ na i dẹrughwaroghwu. Nọ tare: “Ọwan ni họhọ ughe harẹn akpọ na, emakashe ọrhẹ ituakpọ. . . . Erhe fi ame ekan, ame na ha ebrurhọ phia; arha kparehaso ame, ame ne dien, arha rhaphiẹ ame, ame na kpahanrhọ dẹndẹn.” (1 Corinthians 4:9-13) Omaran ihworho inyenana a ji ha Ilele Kristi urhomẹmro ruẹ ughe nẹ. Ọke ihworho re rhirhiẹ kẹrẹ ọwan a mẹrẹn ekwakwa irhorhomu re ruẹ dedevwo e sehiẹn ọwan, ọrana ọnọ sabu mwu aye kerhọ urhomu edje ọwan.—1 Peter 2:12.
(Romans 12:20, 21) Ọrẹn “orhianẹ orhọmo o kpe ọvwreghrẹn are, are i yẹ ye emaren; uhrun ame ọrhọ ka ye, are i yẹ ye oborẹ ọnọ da; fọkime are i rhe ru ọnana, are ina kwruọ ighumu erhanren rhẹ ọye urhomu.” 21 Are i vwe jenẹ ọkon fi are kparobọ-ọ, ọrẹn, are i rha ha orhorhomu fi ọkon kparobọ.
w12 11/15 29 ¶13
Harhomu Owuowọnwan Nẹ Ẹhẹn Rhe
13 O vwo ọkezẹko re roro taghene ana sabu ha userhumu rẹn ohworho ro ru rẹ ọwan sọ, nọ sabu vwo ọdaremẹro kpahen irhi Osolobrugwẹ. Ọnyikọ Paul nọ yare: “‘Orhianẹ orhọmo o kpe ọvwreghrẹn are, are i yẹ ye emaren; uhrun ame ọrhọ ka ye, are i yẹ ye oborẹ ọnọ da; fọkime are i rhe ru ọnana, are ina kwruọ ighumu erhanren rhẹ ọye urhomu.’ Are i vwe jenẹ ọkon fi are kparobọ-ọ, ọrẹn, are i rha ha orhorhomu fi ọkon kparobọ.” (Rom. 12:20, 21) Wu rhe dje uruemru esiri phia erhe ruo sọ, wu na sabu wene orharhere iruemru ihworho jeghwai lẹrhẹ aye dje omamọ iruemru ri gberirẹ aye phia. Nyoma e dje ọmẹrẹnvwrurhe, aruẹdọn, tobọ te arodọmẹ rẹn ohworho ro ru rẹ ọwan sọ, ọwan ina sabu lẹrhiẹ me yono kpahen urhomẹmro ri ha uvuẹn i Baibol na. Kerhirhiẹ kerhirhiẹ, ẹkpahenrhọ bọrọbọrọ ọnọ sabu lẹrhẹ ohworho na roro kpahen omamọ uruemru wu vwori.—1 Pet. 2:12; 3:16.
Ra Guọlọ Efe erẹ Ẹhẹn
(Romans 12:1) Omarana, imizu mẹ, mi rẹrẹ are rhẹ arodọmẹ Osolobrugwẹ, nẹ are i ha oma are kpahontọre jerẹ izobo ro nyerẹn, rọ fonron, rẹ Osolobrugwẹ o ji vwo ekwerhọ kpahen, nọyẹ, ogame rọ fonron rhẹ omẹgbanhon iroro are.
Oborẹ Ene Ru Djẹ Iruẹn Ọrhẹ Ughe Ọwan
5 Kemru kemru re ruẹ uvuẹn akpenyerẹn ọwan, o surhobọmwu ogame ra harẹn i Jehova. Paul o dje ọnana fiotọre ọke rọ ta: “Are i ha oma are kpahontọre jerẹ izobo ro nyerẹn, rọ fonron, rẹ Osolobrugwẹ o ji vwo ekwerhọ kpahen.” (Romans 12:1) Jesu ọ tare: “Wu ne vi vwo ẹguọlọ kpahen Jehova Osolobrugwẹ ọnọ rhẹ ọsoso ọmudu ọnọ rhẹ ọsoso ugboma ọnọ kugbe ọsoso ẹhẹn ọnọ ọrhẹ ọsoso omẹgbanhon ọnọ.” (Mark 12:30) A guọlọ yẹ i Jehova oborẹ ọ mai rhomu ọke ephian. Uvuẹn Israel ọke ahwanren, ọke ihworho a ha eranmo ze izobo rẹn i Jehova, omamọ aranmo ya guọlọre nẹ aye i ha ze izobo na. Orhianẹ izobo na o vwo oborẹ ọ sọre vwọye, Osolobrugwẹ o vwo kwerhọ ye-e. (Leviticus 22:18-20) Omaran ọ ji havwọ, Jehova ọnọ sabu tiẹn ogame ọwan. Izede ọgo?
6 Jehova ọ ta rẹn ọwan: “Are ina vi fon, fọkime mẹmẹ ọfuanfon.” (1 Peter 1:14-16; 2 Peter 3:11) Jehova ono kwerhọ ogame ọwan orhianẹ ọ fonron. (Deuteronomy 15:21) Ogame ọwan ọ sabu fua-an, orhianẹ e ruẹ ekwakwa ri Jehova o vwo utuoma kpahen, ekwakwa jerẹ irueruo ọfanrhiẹn, ozighi, ọrhẹ ekwakwa ri surhobọmwu irueruo ikpodje. (Romans 6:12-14; 8:13) Habaye, orhianẹ e nughe ọrhẹ iruẹn re jiri ekwakwa enana, oma ọ vwọ samọ merhen i Jehova-a. Ọnana ọnọ sabu lẹrhẹ ogame ọwan rhiẹ oborẹ ọ vwọ fon, jeghwai lẹrhẹ i Jehova tiẹn, habaye, ọnọ sabu ghwọghọ onyerẹnkugbe re vwori rhẹ ọye.
(Romans 13:1) Jenẹ kohworho kohworho ọ homariotọre harẹn ihworho ri vwo omẹgbanhon usun, fọkime o vwo omẹgbanhon ọrọrọ-ọ, jokpanẹ ọrẹ o nẹ obẹ Osolobrugwẹ rhe; ihworho re suẹn na ephian Osolobrugwẹ yọ ha uphẹn rẹn aye.
w08 6/15 31 ¶4
Ẹzẹkoko ro nẹ Ileta ra ya vwe itu i Rome rhe
13:1—Izede ọgo yẹ Osolobrugwẹ ‘ọ ha uphẹn rẹn ihworho re suẹn’? Ihworho a sabu suẹn inyenana fọkime Osolobrugwẹ ‘ọ ha uphẹn rẹn aye.’ Uvuẹn erhirhiẹ ezẹko, Osolobrugwẹ yọ ta kpahen isuensun aye rhotọre. A mẹrẹn ọnana vwrurhe nyoma oborẹ i Baibol na ọ ta kpahen ihworho buebun ri sunrun.
Isese i Baibol
(Romans 13:1-14) Jenẹ kohworho kohworho ọ homariotọre harẹn ihworho ri vwo omẹgbanhon usun, fọkime o vwo omẹgbanhon ọrọrọ-ọ, jokpanẹ ọrẹ o nẹ obẹ Osolobrugwẹ rhe; ihworho re suẹn na ephian Osolobrugwẹ yọ ha uphẹn rẹn aye. 2 Omarana, kohworho kohworho rọ kparehaso omẹgbanhon usun, ọ kparehaso ẹkwaphiẹrhotọre Osolobrugwẹ; ihworho ri kparehasuiẹ ina rhua ẹzẹnguon vwe oma aye. 3 Fọkime ihworho re suẹn na, emru ofẹn fọkiẹ irueruo ibiobiomu, o rhiẹ fọkiẹ irueruo irhorhomu-u. Are i guọlọ vabọ ofẹn omẹgbanhon usun na? Are i gbe rhe ruẹ orhorhomu, nẹ are ina mẹrẹn ujiri nẹ uvuien rhe; 4 fọkime aye idibo Osolobrugwẹ rẹn are fọkiẹ orhorhomu are. Ọrẹn orhianẹ are e ruẹ oborẹ obiomurun, jẹ ofẹn o mwu are, fọkime aye i vwe ghemeghe kpare odan ọlọkọ na-a. Aye idibo Osolobrugwẹ, era ha oja riẹ ihworho rẹ ruẹ oborẹ obiomurun. 5 Omarana o vwo oborẹ ọsoriẹ are ina homariotọre rẹn aye, orhiẹ fọkiẹ ojẹriọ ọrana ọvo-o, ọrẹn fọkiẹ ẹhẹn obrorhiẹn are. 6 Ọnana yọ soriẹ are a ji kwosa urhomu; fọkime aye idibo Osolobrugwẹ ọrẹ afiede ra wian owian ọnana ọke ephian. 7 Yẹ kohworho kohworho oborẹ o forie: ọrọ guọlọ osa urhomu yẹ ye osa urhomu; ọrọ guọlọ arhọghọ yẹ ye arhọghọ; ọrọ guọlọ ofẹnzẹ yẹ ye ofẹnzẹ; ọrọ guọlọ ọghọ yẹ ye ọghọ. 8 Are i vwa riosa ohworho owuorowu-u, jokpanẹ ọrẹ are ine vwo ẹguọlọ kpahen owuowọnwan; fọkime ohworho ro vwo ẹguọlọ kpahen ọreva ye ọ ha urhi na te orugba ne. 9 Fọkime irhi enana, “Are i vwa ghwọwe-e, are i vwe kpe ohworho-o, are i vwe so uhi-i, are i vwe vwo ufiuvwele-e,” ọrhẹ ọsoso irhi re hẹrhẹre na, e ku rẹ aye kugbe uvuẹn ẹmro ọnana: “Are ine vi vwo ẹguọlọ kpahen ọreva are jerẹ oma are.” 10 Ẹguọlọ o vwo ruẹ emru obiobiomu rẹn ọreva ye-e; omarana, ẹguọlọ yọ ha urhi na te orugba. 11 Are i ruẹ ọnana fọkime are i rhe ọke na, taghene o te unọke rẹ are ine vẹnrẹn nẹ omerhẹn ne, fọkime usimirhọ ọwan ọ kẹrẹ vrẹn ọke ọwan a tu ghwẹriẹ obọ. 12 Ason na ọ nya kodo ne; ẹdẹ na ọ joma te ne. Omarana, jene donron ewian erẹ okuku fughwẹ, ne ku ekwakwa owọnren ọrẹ ukpẹ rhọ. 13 Jenẹ ọwan i nya dẹndẹn jerẹ ọke ude ọ ji havwiẹ, o vwo rhiẹ akpẹriọ eduado ọrhẹ enyo ẹda vrẹn oma-a, o vwo rhiẹ ọrẹ e vwobọrhọ irueruo ọfanrhiẹn ọrhẹ uruemru jodojodo-o, o vwo rhiẹ ọrẹ eghrẹn ọrhẹ omẹriọ-ọ. 14 Ọrẹn, are i gbe ku Ọrovwori Jesu Kristi na rhọ, are i vwa djiroro hẹrhẹ ojemẹ ugboma-a.
MARCH 11-17
EFE RI NẸ ẸMRO OSOLOBRUGWẸ RHE | ROMANS 15-16
“Tẹnrovi Jehova nọ yọ Edirin Ọrhẹ Urhebro”
(Romans 15:4) Nime ọsoso ekwakwa ra ya rhotọre, a yariẹ nọ yẹ ọwan ọkpọvi, neneyo nyoma edirin ọwan ọrhẹ nyoma urhebro ro nẹ Eyaya Ọfuanfon na rhe, ọwan ina sabu vwo ifiẹrorhọ.
“Viẹ Rhẹ Ihworho Ra Viẹ”
11 Iyẹnrẹn kpahen omiamiamo i Jesu o rhiẹromẹrẹn ọke i Lazarus o hwu, ọ ha usuẹn iyẹnrẹn urhebro ri ha uvuẹn i Baibol na. Itiọrurhomẹmro, “ọsoso ekwakwa ra ya rhotọre, a yariẹ nọ yẹ ọwan ọkpọvi, neneyo nyoma edirin ọwan ọrhẹ nyoma urhebro ro nẹ Eyaya Ọfuanfon na rhe, ọwan ina sabu vwo ifiẹrorhọ.” (Rom. 15:4) Orhianẹ, we mwuomarhọ fọkiẹ ohworho ọnọ ro hwuru, wu na sabu mẹrẹn urhebro nẹ ekete i Baibol enana rhe:
▪ “Jehova ọ kẹrẹ ihworho rẹ ẹhẹn aye o seriotọre; o simi ihworho rẹ ẹhẹn aye ọ ghwọghọre.”—Ps. 34:18, 19.
▪ “Ọke ọfiamu ọ vuọn ẹhẹn mẹ, [Jehovah ọ] ha urhebro mẹ jeghwai ru mẹ gbanhon.”—Ps. 94:19.
▪ “Jenẹ Ọrovwori ọwan Jesu Kristi ọrhẹ Osolobrugwẹ ro rhiẹ Ọsẹ ọwan, ro vwo ẹguọlọ kpahen ọwan, rọ jeghwai yẹ ọwan urhebro i bẹmẹdẹ ọrhẹ obọdẹn ifiẹrorhọ nyoma ẹghẹlẹ ọphẹ ye ha urhebro rẹn ọmudu are jeghwai ru are gbanhon.”—2 Thess. 2:16, 17.
(Romans 15:5) Omarana, jenẹ Osolobrugwẹ ro tiobọnẹ edirin ọrhẹ urhebro, lẹrhẹ are vwo aruẹ iroro ri Kristi Jesu o vwori uvwre omomare,
w16.04 14 ¶5
“Jenẹ Edirin ọ Wian Owian Yen Hin”
5 Hẹroso i Jehova nọ yọ omẹgbanhon. Jehova yẹ “Osolobrugwẹ ro tiobọnẹ edirin ọrhẹ urhebro.” (Rom. 15:5) Ọye ọvo yọ dabu vwẹruọ ebẹnbẹn ra dẹrughwaroghwẹ, tobọ te oborẹ ekete re rhirhiẹ, iroro ọwan ọrhẹ iyẹn ugboma ọwan a hobọte ọwan lele. Omarana, ọye ọvo yọ nọ sabu sa ọwan erhumu vwo edirin. Baibol na ọrhọ ta: “Ọ yẹ ihworho ra zofẹn yen oborẹ aye i guọlọre; aye i rha viẹ nekpẹn userhumu, o rhon aye, nọ jeghwai simi aye.” (Ps. 145:19) Ọrẹn, marhẹ Osolobrugwẹ ono ru kpahenrhọ ẹrhomo ọwan i nẹren fọkiẹ edirin?
(Romans 15:13) Jenẹ Osolobrugwẹ ro tiobọnẹ ifiẹrorhọ ọ yẹ are aghọghọ ọrhẹ ufuoma nyoma ẹruẹhaso are i vwo kpahiẹn, neneyo ifiẹrorhọ are o bunrhọ nyoma omẹgbanhon ẹhẹn ọfuanfon na.
w14 6/15 14 ¶11
“Are Ine vi Vwo Ẹguọlọ Kpahen i Jehova Osolobrugwẹ Are”
11 Jehova o ‘tiobọnẹ ifiẹrorhọ rọ yẹ ọwan aghọghọ ọrhẹ ufuoma.’ (Rom. 15:13) Ifiẹrorhọ rẹ Osolobrugwẹ ọ yẹ ọwan, ọ ha userhumu rẹn ọwan sabu fi ekwakwa ra damu esegburhomẹmro ọwan nẹ kparobọ. Ilele Kristi ra djẹha ri ‘fuevwan ye te ẹdẹ uhwu, ana yẹ aye erhu ọrẹ arhọ na obẹ odjuwu.’ (Rev. 2:10) Ilele Kristi ri vwo ifiẹrorhọ rẹ aye ine rhirhiẹ otọrakpọ na, ina riamerhen arhọ i bẹmẹdẹ uvuẹn i Paradais. (Luke 23:43) Marhẹ oma o ruẹ ọwan kpahen ẹruefirhọ enana? Ẹhẹn ọwan ọ vwọ vuọn rhẹ aghọghọ ọrhẹ ufuoma, kugbe ẹguọlọ rẹn Osolobrugwẹ ro tiobọnu “ẹghẹlẹ irhorhomu ọrhẹ obọdẹn ẹghẹlẹ ephian”?—Jas. 1:17.
Ra Guọlọ Efe erẹ Ẹhẹn
(Romans 15:27) Itiọrurhomẹmro, oma ọ merhen rẹ aye rẹ aye ine ru omaran, habaye aye i riosa aye; fọkime orhianẹ egbamwa na i ghalẹre uvuẹn ekwakwa ri sekpahen ogame Osolobrugwẹ, o ji fo nẹ aye i ha ekwakwa ugboma rẹ aye i vwori gbodibo rẹn aye.
w89 12/1 24 ¶3
“Ọdamuni Ro Dje Oborẹ Ẹguọlọ Ọnọ o Kodo Te”
Itiọrurhomẹmro, o fori nẹ Ilele Kristi ri vwe rhiẹ itu i Jew, i ha userhumu rẹn Ilele Kristi ri rhiẹ itu i Jew na. Aye i riosa Ilele Kristi ri ha uvuẹn i Jerusalem. Nime uvuẹn i Jerusalem yẹ iyẹnrẹn esiri na o kerabọ te Ilele Kristi ri vwe rhiẹ itu i Jew na. Paul nọ tare: “Orhianẹ Ilele Kristi ri rhiẹ itu i Jew i ghalẹ ekwakwa ri sekpahen ogame Osolobrugwẹ rhẹ Ilele Kristi ri vwe rhiẹ itu i Jew na, Ilele Kristi ri vwe rhiẹ itu i Jew na, i ji vwo owian rẹ aye ine toro ekwakwa ugboma aye.”—Romans 15:27, The New English Bible.
(Romans 16:25) Vwana harẹn Ohworho rọ nọ sabu ruẹ are gbanhon sekpahen iyẹnrẹn esiri mie ghwoghwo ọrhẹ aghwoghwo kpahen i Jesu Kristi na, sekpahen oghwolophia ọrẹ odjahen ọfuanfon na ra vwa ji ta kpahen uvwre ọke jijiri ne
it-1 858 ¶5
Re Rhe Obore Ọnọ Phia Obaro, Ra Ta Oborẹ Ọnọ Phia Obaro Na Rhotọre
Messiah yanghene i Kristi na, yo no rhiẹ ọmọ re vive kpahen taghene nyoma yen yẹ ọsoso evwata ina mẹrẹn ebrurhọ. (Ga 3:8, 14) A kiki hunute “ọmọ” na ọke Adam ọrhẹ Eve a kparehaso i Jehova uvuẹn ogba Eden hin, a ki ma mẹrẹn uvwiẹ Abel. (Ge 3:15) A tẹmro aruẹmẹrẹn enana emrẹ ẹgbukpe 4,000, e ki rhe kpahen “odjahen ọfuanfon na,” ọke ihworho e me rhe kpahen i Messiah na. Itiọrurhomẹmro, o ghini rhiẹ emru odjahen “uvwre ọke jijiri.”—Ro 16:25-27; Eph 1:8-10; 3:4-11.
Isese i Baibol
(Romans 15:1-16) O fori nẹ ọwan ri rhiẹ ihworho ri gbanhonron, i hobọtua ihworho ri vwa gbanhon, a vwa jeghwai ruẹ oborẹ ọnọ lẹrhẹ oma merhen ọwan ọvo-o. 2 Jenẹ owuowọnwan lẹrhẹ oma merhen ọreva ye fọkiẹ orhorhomu ọnẹyen, nọ bọn yen gbanhon. 3 Nime Kristi o ru oborẹ ọnọ lẹrhẹ oma merhiẹn ọvo-o, ọrẹn jerẹ oborẹ a yare: “Ekan ihworho ra ha owẹwẹ djechẹẹ, o te ri mẹ oma ne.” 4 Nime ọsoso ekwakwa ra ya rhotọre, a yariẹ nọ yẹ ọwan ọkpọvi, neneyo nyoma edirin ọwan ọrhẹ nyoma urhebro ro nẹ Eyaya Ọfuanfon na rhe, ọwan ina sabu vwo ifiẹrorhọ. 5 Omarana, jenẹ Osolobrugwẹ ro tiobọnẹ edirin ọrhẹ urhebro, lẹrhẹ are vwo aruẹ iroro ri Kristi Jesu o vwori uvwre omomare, 6 neneyo are i sabu ha uvwele owu ọrẹ okugbe jiri Osolobrugwẹ ọrhẹ Ọsẹ Ọrovwori ọwan Jesu Kristi. 7 Omarana, are i rhiabọ dede owuowọnwan jerẹ oborẹ i Kristi o rhiabọ dede are, neneyo are i sabu ha ujiri vwe Osolobrugwẹ. 8 Fọkime mia ta rẹn are taghene i Kristi o rhiẹ odibo rẹn ihworho ri samo ne fọkiẹ urhomẹmro Osolobrugwẹ, neneyo ọ sabu lẹrhẹ ive ro ve rẹn ese aye ride rhiẹ urhomẹmro, 9 neneyo egbamwa na i jiri Osolobrugwẹ fọkiẹ arodọmẹ ọnẹyen. Jerẹ oborẹ a ya rhotọre: “Ọnana yọ soriẹ mi na ta kpahuọn ọrẹ afiede uvwre egbamwa na, jeghwai so ijoro rẹn odẹ ọnọ.” 10 Ọgbọrọrọ nọ tare: “Are i ghọghọ, egbamwa na ọrhẹ ihworho ri ha uvuien.” 11 Ọgbọrọrọ nọ tare: “Jiri Jehova, ọsoso egbamwa na, habaye, jenẹ ọsoso ihworho na jirie.” 12 Ọgbọrọrọ Isaiah nọ tare: “Ono vwo esiri orhan ọrẹ i Jes′se, ohworho ro no sun egbamwa na; ọye yẹ egbamwa na ine fiẹrorhọ.” 13 Jenẹ Osolobrugwẹ ro tiobọnẹ ifiẹrorhọ ọ yẹ are aghọghọ ọrhẹ ufuoma nyoma ẹruẹhaso are i vwo kpahiẹn, neneyo ifiẹrorhọ are o bunrhọ nyoma omẹgbanhon ẹhẹn ọfuanfon na. 14 Vwana, imizu mẹ, o mwurun mẹ ẹro taghene are i ji vwo orhorhomu vuọn oma, are i vwo irherhe buebun, are a jeghwai ha urhebro rẹn owuowọnwan. 15 Ọrẹn, mi ya kpahen ẹmro ẹzeko vabọ ofa neneyo mi karorhọ are kpahiẹn, fọkiẹ ẹghẹlẹ ọphẹ rẹ Osolobrugwẹ ọ yẹre mẹ 16 ne mi sabu rhiẹ odibo i Kristi Jesu rọ wian owian afiede rẹn egbamwa na. Mie vwobọrhọ owian ọfuanfon ọrẹ iyẹnrẹn esiri Osolobrugwẹ, neneyo egbamwa enana i sabu rhiẹ izobo re rhiabọ ha, re ru fon nyoma ẹhẹn ọfuanfon.
MARCH 18-24
EFE RI NẸ ẸMRO OSOLOBRUGWẸ RHE | 1 CORINTHIANS 1-3
“Wa Lẹrhẹ Ẹhẹn Ọfuanfon i Jehova Suon Gbinẹ wu vwa Lẹrhiẹ Suo-on?”
(1 Corinthians 2:14) Ọrẹn, ohworho rẹ ẹhẹn ọfuanfon Osolobrugwẹ o vwo suẹn, ọ vwọ ha ekwakwa erẹ ẹhẹn Osolobrugwẹ-ẹ, nime aye emru akpa ha riẹn; ọ ji sabu vwẹruọ aye-e, nime e yono kpahen aye izede ọrẹ ẹhẹn.
Me yo Mevirhọ rẹ Ẹhẹn Ọfuanfon i Jehova ono sun Ọwan?
4 Ọrukaro, jene roro kpahen iruemru ohworho rọ vwọ lẹrhẹ ẹhẹn ọfuanfon i Jehova suien. Ituakpọ inyenana a hatua ekwakwa erẹ ugboma. Paul ọ hariẹ dje “oborẹ ọ wian uvuẹn oma ihworho re vwa huvwele.” (Eph. 2:2) Iroro ọnana yọ lẹrhẹ ihworho buebun vwo aruẹ uruemru owu ọvo, nọyẹ, ọrẹ aye ina nyalele otu na. Aye i tẹnrovi ekwakwa erẹ ugboma. Omarana, ihworho buebun ne ruẹ oborẹ o serhọ uvuẹn ukẹro aye, ukperẹ ono rhiẹ oborẹ Osolobrugwẹ ọ guọlọre. Ohworho rẹ ẹhẹn ọfuanfon Osolobrugwẹ o vwo suẹn, o roro kpahen ekwakwa erẹ ugboma ọrhẹ otitimẹ, ọ jeghwai chochọn oborẹ o rorori taghene ọ gbare uvuẹn ikẹruiẹ.
5 Izede ọrọrọ ọgo ya na sabu rhe ohworho rọ vwọ lẹrhẹ ẹhẹn ọfuanfon i Jehova suien? Ihworho re fiomarhọ “ewian erẹ ugboma na,” i ha usuẹn ihworho enana. (Gal. 5:19-21) Ileta ọrukaro ri Paul ọ ya vwe ukoko i Corinth, o dje iruemru buebun rẹ ihworho ri vwo ẹguọlọ kpahen ekwakwa ugboma i vwori. Enana yẹ: uruemru re fiẹ ohra rhẹ ekete, ẹghwọ, uruemru oghalẹ, uruemru ra kpare ọreva ye riẹ ẹghware, ja họghọ rẹn eri vwo ẹrhẹ, ọrhẹ uruemru ra riakpọ jeghwai da enyo vrẹn oma. Ohworho rọ vwọ lẹrhẹ ẹhẹn ọfuanfon i Jehova suien ọrhọ dẹrughwaroghwu ọdamuni, o kiki se. (Prov. 7:21, 22) Jude ọ tẹmro kpahen ihworho ri ne biomu te erhirhiẹ rẹ aye ine je “vwo ẹhẹn ọfuanfon i Jehova.”—Jude 18, 19.
(1 Corinthians 2:15, 16) Ọrẹn, ohworho rẹ ẹhẹn ọfuanfon Osolobrugwẹ o suẹn o roro kpahen ekwakwa ephian, ọrẹn o vwo ohworho owuorowu ro nie sua-a. 16 Omarana, “ọrọmo yọ sabu rhe iroro i Jehova ne, neneyo ọ yẹ ye ọkpọvi?” Ọrẹn, ọwan i vwo iroro i Kristi.
Me yo Mevirhọ rẹ Ẹhẹn Ọfuanfon i Jehova ono sun Ọwan?
6 Me yo mevirhọ re ne vwo ẹhẹn ọfuanfon i Jehova? Ohworho ro vwo ẹhẹn ọfuanfon i Jehova, o roro kpahen ogame Osolobrugwẹ ọke ephian, ọrẹn, orhiẹ omaran rẹn ohworho ro vwo vwo ẹhẹn ọfuanfon i Jehova-a. Ihworho ri vwo ẹhẹn ọfuanfon i Jehova, a damoma rẹ aye ina “hẹrokele Osolobrugwẹ.” (Eph. 5:1) Ọnana o mevirhọ taghene aye a damoma aye ine vwo iroro Osolobrugwẹ, jeghwai ni emru lele oborẹ Osolobrugwẹ o nie. Omarana, Osolobrugwẹ no rhiẹ ohworho imwẹro rẹn aye. Aye i vẹnẹ ihworho ri vwa lẹrhẹ ẹhẹn ọfuanfon i Jehova sun aye, nime aye a damoma aye ine nyerẹnmwu iruemru-urhi Jehova. (Ps. 119:33; 143:10) Ohworho rọ lẹrhẹ ẹhẹn ọfuanfon i Jehova suien, ọ tẹnroviẹ “omamọ ẹhẹn ọfuanfon na,” ukperẹ ono rhiẹ ekwakwa erẹ ugboma. (Gal. 5:22, 23) Ne dje “ihworho ri vwo ẹhẹn ọfuanfon i Jehova” riarorhọ, roro kpahen udje ọnana: Ohworho rọ tẹn ona eyẹsuọ ye se omamọ ọleyi. Omaran ọ ji havwọ, ohworho ro vwo ọdamẹ kpahen ekwakwa erẹ ẹhẹn, yọ lẹrhẹ ẹhẹn ọfuanfon i Jehova suien.
Me yo Mevirhọ rẹ Ẹhẹn Ọfuanfon i Jehova ono sun Ọwan?
15 Marhẹ yẹ owuowọnwan ono ru sabu hẹrokele i Kristi? Uvuẹn 1 Corinthians 2:16, Baibol na ọ tare taghene e vwo “iroro i Kristi.” Habaye, Romans 15:5, nọ tare taghene e vwo “aruẹ iroro ri Kristi Jesu o vwori.” Omarana, na sabu họhọ i Kristi, o fori na dabu rhe iroro yi jeghwai rhe iruemru enẹyen fiotọre. O ji fo na hẹrokelie. Jesu ọ tẹnrovi onyerẹnkugbe ọnẹyen rhẹ Osolobrugwẹ. Omarana, arha hẹrokele i Jesu, ana sabu hẹrokele i Jehova. Enana ni dabu dje oborẹ ọsoriẹ ọ ghanren ne yono oborẹ ene ru vwo iroro i Jesu.
Ra Guọlọ Efe erẹ Ẹhẹn
(1 Corinthians 1:20) Bọgo yẹ ọvwẹghwanren na ọ havwọ? Bọgo yẹ ọyẹbe na ọ havwọ? Bọgo yẹ ọrọ frẹfro kpahen enyerẹn ọnana ọ havwọ? Osolobrugwẹ o ji ruẹ ẹghwanren akpọ na rhiẹ emru idjigbo?
it-2 1193 ¶1
Ẹghwanren
Akpọ na nọ fọkiẹ ẹghwanren ọnẹyen tiẹn ẹkwaphiẹrhotọre Osolobrugwẹ nyoma i Kristi taghene emru idjigbo; ihworho re suẹn ni tobọ “kpe Ọrovwori ro vwo odidi na rhẹ orhan oja” dedevwo manẹ aye a sabu brorhiẹn ro serhọ. (1Co 1:18; 2:7, 8) Ọrẹn, Osolobrugwẹ no ruẹ ẹghwanren akpọ na rhiẹ emru idjigbo jeghwai phọphọ evwẹghwanren akpọ na, nyoma rọ ha ọhọre ọghoghanren Ọnẹyen te orugba nyoma ihworho rẹ aye e nẹ taghene e vwo omẹgbanhon ọrhẹ irherhe-e, ọrhẹ ekwakwa aye e nẹ rhiẹ emru akpa ọrẹ Osolobrugwẹ. (1Co 1:19-28) Paul nọ ji karorhọ Ilele Kristi ri ha uvuẹn i Corinth taghene ana ghwọghọ ‘ẹghwanren ọrẹ enyerakpọ ọnana kugbe ẹghwanren ihworho re suẹn enyerẹn ọnana;’ omarana aruẹ ẹghwanren ọrana ọ ha usuẹn iyẹnrẹn ri Paul o ghwoghwo kpahe-en. (1Co 2:6, 13) Paul nọ ji ha urhebro rẹn Ilele Kristi ri ha uvuẹn i Colossae nẹ aye i ja lẹrhẹ “iyono ọrẹ akpọ na [phi·lo·so·phiʹas, nọyẹ, ẹguọlọ re vwo kpahen ẹghwanren] ọrhẹ iyono ọphiẹrhọ sekpahen irueruo ituakpọ” phiẹ aye rhọ-ọ.—Col 2:8; haye vwanvwọn udjoghwẹ 20-23.
(1 Corinthians 2:3-5) Ni mi bru rẹ are rhe ọrẹ ovwiẹlẹme ọrhẹ ofẹn kugbe ighweghwe ọgbogbanhon; 4 ẹmro mẹ ọrhẹ oborẹ mie ghwoghwo, o rhiẹ ẹmro ẹghwanren ra riẹriẹ ihworho-o, ọrẹn odjephia ẹhẹn ọrhẹ omẹgbanhon, 5 neneyo are i sabu bọn esegburhomẹmro are kpahen omẹgbanhon Osolobrugwẹ, o rhiẹ ẹghwanren ituakpọ-ọ.
w08 7/15 27 ¶6
Ẹzẹkoko ro nẹ Ileta ra ya vwe itu i Corinth rhe
2:3-5. Ọke i Paul o ghwoghwo uvuẹn i Corinth ro rhiẹ otọre amwa itu i Greek e yono, ro ji vwo igbirherhe, ọnọ sabu rhe roro sẹ ọnọ sabu ghwoghwo rẹn ihworho na izede ro no te aye ẹhẹn. Ọrẹn, ọ ha uphẹn rẹn ovwiẹlẹme yanghene ofẹn lẹrhiẹ ja wian owian aghwoghwo rẹ Osolobrugwẹ ọ ha riẹn na-a. Omarana, o fo nẹ ọwan i ji ha uphẹn rẹn erhirhiẹ ri vwe serhọ lẹrhẹ ọwan je ghwoghwo iyẹnrẹn esiri Uvie Osolobrugwẹ-ẹ. O fori na hẹroso i Jehova nọ yẹ ọwan userhumu jerẹ oborẹ ọ yẹ i Paul userhumu.
Isese i Baibol
(1 Corinthians 1:1-17) Paul re seri no rhiẹ ọnyikọ i Kristi Jesu nyoma ọhọre Osolobrugwẹ ọrhẹ Sos′the·nes ro rhiẹ omizu ọwan, 2 harẹn ukoko ọrẹ Osolobrugwẹ rọ ha uvuẹn i Corinth, harẹn are re ru fon nyoma i Kristi Jesu, re seri ni rhiẹ ihworho ri fonron, kugbe ọsoso ihworho ephian re se odẹ Ọrovwori ọwan Jesu Kristi, Ọrovwori aye ọrhẹ ọrẹ ame: 3 Jenẹ are i vwo ẹghẹlẹ ọphẹ ọrhẹ ufuoma ro nẹ obẹ Osolobrugwẹ rhe, ro rhiẹ Ọsẹ ọwan ọrhẹ Ọrovwori na Jesu Kristi. 4 Ọke ephian yi mia kpẹmẹ Osolobrugwẹ mẹ harẹn are fọkiẹ ẹghẹlẹ ọphẹ ọrẹ Osolobrugwẹ, rọ yẹrẹ are nyoma Kristi Jesu; 5 fọkime are i feri uvuẹn kemru kemru nyoma ọye, uvuẹn omẹgbanhon ẹmro ẹta ọrhẹ uvuẹn irherhe are, 6 jerẹ oborẹ oseri ro sekpahen Kristi na ọ dabu mwuotọre uvwre are, 7 neneyo ẹghẹlẹ owuorowu ọ jọ rhọ kanren are, rẹ are a hẹrhẹ rhẹ oruru fọkiẹ oghwolophia Ọrovwori ọwan Jesu Kristi. 8 Ọye ono ji ru are gbanhon ye toba, neneyo na ja rha mẹrẹn oborẹ ana mọrọn ba are abọ uvuẹn ẹdẹ Ọrovwori ọwan Jesu Kristi. 9 Osolobrugwẹ ohworho atamwu, nyoma yen ye se are me kwomakugbe Ọmọyen ro rhiẹ Jesu Kristi Ọrovwori ọwan. 10 Vwana imizu, mi jiririe rẹn are nyoma odẹ Ọrovwori ọwan Jesu Kristi taghene o fori nẹ ẹmro are o rhiẹ owu, o ji fo nẹ oghalẹ o rhirhiẹ uvwre are-e, ukpomaran are i rhirhiẹ ye ọrẹ okugbe uvuẹn ẹhẹn kugbe iroro owu. 11 Fọkime ihworho ezẹko ri nẹ unuoghwa i Chlo′e rhe, i nẹ iyẹnrẹn kpahen are imizu mẹ, taghene oghalẹ ọ ha uvwre are. 12 Oborẹ mia haye ta nọye na, owuowọnwan nọ ta: “Obọrẹ i Paul yi mi havwọ,” “Ọrẹn obọrẹ A·pol′los yi mi havwọ,” “Ọrẹn obọrẹ i Ce′phas yi mi havwọ,” “Ọrẹn obọrẹ Kristi yi mi havwọ.” 13 Kristi na o vwo oghalẹ? E kpe i Paul rhẹ orhan oja fọkiẹ are-e, rhomaran? Gbinẹ are i bromarhamẹ uvuẹn odẹ i Paul? 14 Mi kpẹmẹ Osolobrugwẹ taghene rhẹ omẹmẹ yi bruru are rhame-e, jokpanẹ Crisʹpus ọrhẹ i Gaʹius ọvo, 15 neneyo ohworho owuorowu ọ jọ rhọ ta taghene o bromarhame uvuẹn odẹ mẹ. 16 Habaye, mẹmẹ yi ji ghini bru unuoghwa i Stephʹa·nas rhẹ ame. Harẹn otu ri hẹrhẹre, mie rhe sẹ mẹmẹ yi bruru aye rhame-e. 17 Fọkime i Kristi o dje mẹ rhe ni mi bru awan rhame-e, ọrẹn ọrẹ mi ne ghwoghwo iyẹnrẹn esiri na; o rhiẹ ẹghwanren ọrẹ ẹmro ẹta-a, neneyo e je rhe ruẹ orhan oja ọrẹ i Kristi na rhiẹ oborẹ o vwo fiemru.
MARCH 25-31
EFE RI NẸ ẸMRO OSOLOBRUGWẸ RHE | 1 CORINTHIANS 4-6
“Ibiẹ Oborẹ ọ Lẹrhẹ Ekwakwa Phie, yo ruẹ Ọsoso Oborẹ a ha ruẹ Ibrẹdi na Phie”
(1 Corinthians 5:1, 2) A nẹ iyẹnrẹn uruemru ọfanrhiẹn kpahen are, aruẹ ọfanrhiẹn ọrana ọ vwọ tobọ phia uvuẹn agbamwa na-a, rẹ ọhworhare ono lele ane ọsẹ ye merhẹn. 2 Are na haye kparoma? O fo nẹ are i mwuomarhọ, neneyo e tiẹ ọhworhare na ro vwobọrhọ irueruo ọnana nẹ uvwre are?
(1 Corinthians 5:5-8) are ine vi tiobọnu ọhworhare ọrana rẹn Echu fọkiẹ oghwọghọ ọrẹ ugboma na, neneyo ẹhẹn na ọ sabu simirhọ uvuẹn ẹdẹ Ọrovwori na. 6 Omẹkpare are o serhọ-ọ. Are e rhe taghene ibiẹ oborẹ ọ lẹrhẹ ekwakwa phie, yo ruẹ ọsoso oborẹ a ha ruẹ ibrẹdi na phie? 7 Are i tiẹ oborẹ ọ lẹrhẹ ekwakwa phie ọrẹ ahwanren na nie, neneyo are i sabu rhiẹ ọkpokpọ, ra mẹriẹn taghene are i sabu phie ghwomara-an. Fọkime, a ha i Kristi ro rhiẹ ọmogegede rẹn Orẹ Ọnyavrẹn na ze izobo ne. 8 Omarana, jenẹ arha riorẹ na, orhiẹ ọrẹ oborẹ ọ lẹrhẹ ekwakwa phie ọrẹ ahwanren na-a, yanghene oborẹ ọ lẹrhẹ ekwakwa phie ọrẹ obiobiomu ọrhẹ ọko-on, ọrẹn rhẹ ibrẹdi ro vwo phie na ọrẹ omamọ ẹhẹn ọrhẹ urhomẹmro.
(1 Corinthians 5:13) neneyo Osolobrugwẹ o guẹnzọn ihworho otafe na? “Are i tiẹ ọvwọkon na nẹ uvwre are.”
it-2 230
Oborẹ Ọ Lẹrhẹ Ekwakwa Phie
Ọnyikọ Paul ọ ji ha aruẹ udje ọnana ruiruo ọke ro jurhi rẹn ukoko i Corinth nẹ aye i le ọhworhare owu ro gbọfanrhiẹn nẹ ukoko na, ọke rọ ta: “Are e rhe taghene ibiẹ oborẹ ọ lẹrhẹ ekwakwa phie, yo ruẹ ọsoso oborẹ a ha ruẹ ibrẹdi na phie? Are i tiẹ oborẹ ọ lẹrhẹ ekwakwa phie ọrẹ ahwanren na nie, neneyo are i sabu rhiẹ ọkpokpọ, ra mẹriẹn taghene are i sabu phie ghwomara-an. Fọkime, a ha i Kristi ro rhiẹ ọmogegede rẹn Orẹ Ọnyavrẹn na ze izobo ne.” Paul nọ dabu dje oborẹ ọ lẹrhẹ ekwakwa phie na fiotọre, ọke rọ ta: “Omarana, jenẹ arha riorẹ na, orhiẹ ọrẹ oborẹ ọ lẹrhẹ ekwakwa phie ọrẹ ahwanren na-a, yanghene oborẹ ọ lẹrhẹ ekwakwa phie ọrẹ obiobiomu ọrhẹ ọko-on, ọrẹn rhẹ ibrẹdi ro vwo phie na ọrẹ omamọ ẹhẹn ọrhẹ urhomẹmro.” (1Co 5:6-8) Uvuẹn aran na, Paul ọ tẹmro kpahen oborẹ Orẹ Ibrẹdi ro vwo Phie ọrẹ itu i Jew na o mevirhọ, re ruẹ ogege erhe ru Orẹ Ọnyavrẹn na hin. Jerẹ oborẹ ibiẹ emru rọ lẹrhẹ ekwakwa phie, o ruẹ ọsoso oborẹ a ha ruẹ ibrẹdi na phie, omaran ukoko na ọnọ ji sabu gbe uvuẹn ukẹro i Jehova orhianẹ e le ohworho ro gbọfanrhiẹn na nẹ uvwre aye-e. Aye ina vi kpare idjaghwẹ rẹ aye ine ti “oborẹ ọ lẹrhẹ ekwakwa phie na”nẹ uvwre aye, jerẹ oborẹ emọ Israel e ti oborẹ ọ lẹrhẹ ibrẹdi phie nẹ oghwa aye uvwre ọke aye a riorẹ na.
it-2 869-870
Echu
Me yo mevirhọ re ne ‘tiobọnu ohworho rẹn Echu fọkiẹ oghwọghọ ọrẹ ugboma na’?
Ọke ri Paul ọ ha ọkpọvi rẹn ukoko i Corinth sekpahen idjaghwẹ rẹ aye ina kpare ọke owuọwan uvuẹn ukoko na o lele ane ọsẹ ye gbọfanrhiẹn, ọnyikọ Paul nọ yare: “Are ine vi tiobọnu ọhworhare ọrana rẹn Echu fọkiẹ oghwọghọ ọrẹ ugboma na.” (1Co 5:5) Paul no jurhi rẹn aye nẹ aye i le ọhworhare na nẹ ukoko na, e vwe lelie ru kugbe-e. (1Co 5:13) Erhe tiobọnie rẹn Echu, o mevirhọ taghene ene le yi nẹ ukoko na ruẹ akpọ rẹ Echu o rhiẹ osolobrugwẹ ye, rọ jeghwai suẹn. Jerẹ “ibiẹ oborẹ ọ lẹrhẹ ekwakwa phie” uvuẹn ‘ibrẹdi ro phieri,’ ọhworhare ọnana yẹ ohworho ugboma uvuẹn ukoko na; erhe ti ọhworhare ọnana nẹ ukoko na, no mevirhọ taghene ukoko na ro vwo ẹhẹn ọfuanfon Osolobrugwẹ ọ ghwọghọ ugboma na nẹ uvwre yi ne. (1Co 5:6, 7) Omaran i Paul o ji tiobọnu Hymenaeus ọrhẹ Alexander rẹn Echu, fọkime aye i sẹrerhumuji esegburhomẹmro na ọrhẹ omamọ ẹhẹn obrorhiẹn, esegburhomẹmro aye nọ ji ghwọghọ jerẹ owọ ro rhueri.—1Ti 1:20.
(1 Corinthians 5:9-11) Uvuẹn ileta mẹ, mi ya vwe are taghene are i vwe kwomakugbe evwọfanrhiẹ-ẹn, 10 o rhiẹ ọsoso evwọfanrhiẹn ri ha akpọ ọnana-a yanghene ihworho ri vwo ufiuvwele yanghene ere ken ekwakwa awan ha yanghene egehọ-ọ. Orho rhiẹ omaran, nọyẹ are ina kwa nẹ akpọ na. 11 Ọrẹn, mia ya vwe are vwana, taghene are i vwe kwomakugbe ohworho ro se omayen omizu ro rhiẹ ọvwọfanrhiẹn yanghene ro vwo ufiuvwele yanghene ọgehọ yanghene ọrọ tẹmro evwiavwia yanghene ọdinyo yanghene ọro ken emru awan ha, are i vwa tobọ lele aruẹ ohworho ọrana riẹ emare-en.
lvs 241, iyẹnrẹn ra habaye
Ohworho Re Le Nẹ Ukoko
Ohworho ro ruẹ ọdandan ọghwaghwa jeghwai tiẹn evwan efuanfon i Jehova ro vwo kwe ghwẹriẹ, ọ sabu daji uvuẹn ukoko na-a. O fori ne le yi nẹ ukoko na. Erhe le ohworho nẹ ukoko na, e rhe vwo onyerẹnkugbe owuorowu rhẹ ọravwọ-ọ, ọwan i ji lelie tẹmro-o. (1 Corinthians 5:11; 2 John 9-11) Ẹkwaphiẹrhotọre re le ohworho nẹ ukoko, ọ sẹrorẹ odẹ i Jehova ọrhẹ ukoko na. (1 Corinthians 5:6) Ẹkwaphiẹrhotọre re le ohworho nẹ ukoko, ji ọghwọghwu rọ ha userhumu rẹn ohworho na neneyo ọ sabu rharhumu ma ga i Jehova.—Luke 15:17.
▸ Urhomu-ẹmro 3, udjoghwẹ 19
Ra Guọlọ Efe erẹ Ẹhẹn
(1 Corinthians 4:9) Fọkime, nọ họhọre taghene Osolobrugwẹ o fi rẹ ọwan ri rhiẹ inyikọ na rhẹ afiughe kerhumu, jerẹ ihworho re brorhiẹn uhwu kpe, fọkime ọwan ni họhọ ughe harẹn akpọ na, emakashe ọrhẹ ituakpọ
w09 5/15 24 ¶16
Emakashe Na “Ihworho Ẹhẹn Ra Wian Owian Ọrẹ Afiede”
16 Ilele Kristi ra dẹrughwaroghwẹ ẹkparehaso, ‘ughe harẹn emakashe.’ (1 Cor. 4:9) Oma ọ merhen emakashe na omamọ ọke aye a mẹriẹn taghene ọwan a fuevwan, aye a ji ghọghọ aye i rha mẹrẹn oruọdandan owu rọ ghwẹriẹre. (Luke 15:10) Emakashe na a ji djokarhọ omamọ uruemru rẹ emẹse ri rhiẹ Ilele Kristi e djephia. Baibol na o djephia taghene o fori nẹ ọmase “ọ ha emru rhurhu urhomuie, fọkiẹ emakashe na.” (1 Cor. 11:3, 10) Itiọrurhomẹmro, oma ọ merhen emakashe na ọke aye a mẹrẹn emẹse ri rhiẹ Ilele Kristi ọrhẹ ọsoso idibo Osolobrugwẹ ra nyalele ẹkwaphiẹrhotọre ukoko na ọrhẹ uvwele ẹha rẹn eri rhiẹ urhomu rẹn aye. Aruẹ uvwele ẹha ọrana o rhiẹ emru okarorhọ rẹn emakashe Osolobrugwẹ enana.
(1 Corinthians 6:3) Are e rhe taghene ọwan ina ha emakashe guẹnzọn? Nẹ ekwakwa erẹ akpọ ọnana ya na ja sabu ha guẹnzọn?
it-2 211
Urhi
Urhi harẹn emakashe. Dedevwo emakashe i rierun ghwẹ ituakpọ, aye i ji ha otọre urhi ọrhẹ ekama Osolobrugwẹ. (Heb 1:7, 14; Ps 104:4) Jehova ọ tobọ jurhi rẹn Echu ro rhiẹ ọvwreghrẹn yen jeghwai gberẹ ughwru riẹn. (Job 1:12; 2:6) Michael ro rhiẹ olotu emakashe na, o mwuọghọ rẹn ẹrhẹ i Jehova jerẹ Oguẹnzọn rọ Maido ọke rọ ta rẹn i Dẹbolo: “Jenẹ i Jehova ọ ghwọghwuo.” (Jude 9; haye vwanvwọn Zec 3:2.) Jehova Osolobrugwẹ ọ yẹ i Jesu Kristi ro rhiẹ orodje omẹgbanhon no sun emakashe na. (Heb 1:6; 1Pe 3:22; Mt 13:41; 25:31; Php 2:9-11) Omarana, Jesu no jurhi rẹn ọmakashe owu no bru i John nya. (Re 1:1) Ọrẹn, uvuẹn 1 Corinthians 6:3, ọnyikọ Paul ọ tare taghene a ha imizu Kristi mwu nẹ aye i gun emakashe ẹzọn, ọkezẹko fọkime aye ine vwobọrhọ oghwọghọ ikpodje na.
Isese i Baibol
(1 Corinthians 6:1-14) Owuọwan usuẹn are orho vwo ẹghwọ rhẹ omizie, no hinmi kpare ẹzọn na riẹ ẹghware ihworho ri vwe rhiẹ evwata, ukperẹ ono rhiẹ ihworho efuanfon na? 2 Gbinẹ are e rhe taghene ihworho efuanfon na yi na ha akpọ na guẹnzọn? Orho rhianẹ are yi na ha akpọ na guẹnzọn, are e mwuovwan rẹ are ina kwaphiẹ ibiẹ ẹmro kpekpa rhọ? 3 Are e rhe taghene ọwan ina ha emakashe guẹnzọn? Nẹ ekwakwa erẹ akpọ ọnana ya na ja sabu ha guẹnzọn? 4 Orhianẹ are i vwo ẹmro uvuẹn akpọ ọnana rẹ are ine guẹnzọn ye, ihworho re nẹ sakamu uvuẹn ukoko na yẹ are i ha mwu ni guẹnzọn? 5 Mia tẹmro enana nẹ ofa ọ ruẹ are. O vwo ọvwẹghwanren owuorowu uvwre are rọ nọ sabu rhiẹ oguẹnzọn uvuẹn erhẹrhẹ imizie? 6 Ukpomaran, omizu no se omizie ẹzọn uvuẹn ẹghware, obaro egehọ dede! 7 Itiọrurhomẹmro, ọnana emru ofa rẹ are ine se omoma are ẹzọn. Mesoriẹ are i vwa kpariroro vrẹn orusọ na? Mesoriẹ a vwa ghwa are ria? 8 Ukpomaran, are ne ruẹ imizu are sọ jeghwai ghwa aye ria dede! 9 Gbinẹ are e rhe taghene ihworho ri vwe rhiẹ evwata i sabu ha Uvie Osolobrugwẹ riuku-u? Are i vwe jene sun are vru-u. Eri vwo uruemru ọfanrhiẹn, egehọ, eghwọwe, ehworhare ri kwerhọ uruemru rẹ ehworhare a gbẹ ehworhare, ehworhare ra gbẹ ehworhare, 10 ihi, evwuvwele, idinyo, era tẹmro evwiavwia, kugbe ere ken emru awan ha, i ha Uvie Osolobrugwẹ riuku-u. 11 Ọrẹn, omaran ihworho ezẹko usuẹn are i havwọ bi. Ọrẹn, e ru rẹ are fon ne; e ru rẹ are fiotọre ne; e ru rẹ are rhiẹ evwata nyoma odẹ Ọrovwori na Jesu Kristi ọrhẹ nyoma ẹhẹn ọfuanfon ọrẹ Osolobrugwẹ ọwan ne. 12 Ekwakwa ephian i vwo urhi, ọrẹn, rhẹ ekwakwa ephian yi serhọ rẹn ọwa-an. Ekwakwa ephian i vwo urhi, ọrẹn mi ha uphẹn rẹn emru owuorowu no sun mẹ-ẹ. 13 A ma emaren fọkiẹ evwan na, a jeghwai ma evwan na fọkiẹ emaren, ọrẹn Osolobrugwẹ ọnọ ghwọghọ eva na fughwẹ. A ma ugboma na fọkiẹ irueruo ọfanrhiẹ-ẹn, ọrẹn fọkiẹ Ọrovwori na, a jeghwai ma Ọrovwori na fọkiẹ ugboma na. 14 Ọrẹn, Osolobrugwẹ nọ rhọmọ Ọrovwori na, ọnọ ji rhọmọ ọwan nuhwu nyoma omẹgbanhon ọnẹyen.