Tiẹn Uruemru Ufiuvwele Ọrẹ Akpọ na
WU DJOKARHỌ ye ne taghene ihworho buebun uvuẹn akpọ na e roro taghene aye i rhomu ghwẹ awọrọ ji mwuovwan ẹrhẹ oghẹnrensan? Oborẹ aye i vwori ọ vwọ da aye ẹro-o. Aruẹ uruemru ọnana o djephia taghene ọwan e nyerẹn uvuẹn ẹdẹ ri koba.—2 Tim. 3:2.
Itiọrurhomẹmro, o jiri ne rẹ uruemru ufiuvwele ọ havwiẹ. Jerẹ udje, Adam ọrhẹ Eve i brorhiẹn aye ina djẹ odjẹ oborẹ ọgbare ọrhẹ oborẹ ọsọre, vwana, ọwan ephian a rioja fọkiẹ orhienbro aye. Ẹgbukpe buebun a vrẹn, Orodje Uzziah ọrẹ Judah no rorori taghene ọnọ sabu torhẹ ajijan uvuẹn oghwa ẹga na, ọrẹn iroro yi ọsọre. (2 Chron. 26:18, 19) Habaye, otu i Pharisee ọrhẹ Sadducee i vwo imwẹro taghene aye i mwuovwan aye ine vwo ebrurhọ Osolobrugwẹ fọkime aye emọ Abraham.—Matt. 3:9.
Akpọ na inyenana ọ vuọnren rhẹ ihworho ri vwo ufiuvwele ọrhẹ omẹkpare, uruemru aye ọnọ ji sabu hobọte ọwan. (Gal. 5:26) Arha jomarhotọre-e, ana sabu rhe roro taghene e mwuovwan ẹrhẹ oghẹnrensan yanghene e rhomu ghwẹ awọrọ. Marhẹ ene ru kẹnoma rẹn iroro ọnana? O fori na ha ukẹro ri Jehova ọ ha ni erhirhiẹ na nie. Iruemru-urhi Baibol eva ina ha userhumu rẹn ọwan.
Jehova yo brorhiẹn oborẹ o fori na yẹ ọwan. Roro kpahen idje enana.
Uvuẹn ekrun na, esa o fiẹrorhọ taghene aniẹ ọnọ họghọ riẹn, ane ọ ji guọlọ nẹ esa ye o vwo ẹguọlọ kpahiẹn. (Eph. 5:33) O fori nẹ eri rọnmọ ne i rhe dje ẹguọlọ phia rẹn owuowọnwan. (1 Cor. 7:3) Emiemọ i fiẹrorhọ taghene emọ aye ina huvwele aye, emọ i guọlọre nẹ eri vwiẹre aye i dje ẹguọlọ phia rẹn aye ji hobọtua aye.—2 Cor. 12:14; Eph. 6:2.
Uvuẹn ukoko na, o fori na họghọ rẹn ekpako ukoko fọkiẹ ewian aye. (1 Thess. 5:12) Ọrẹn, o fo nẹ aye i suẹn imizu ukoko na yanghene gba aye ruẹ oborẹ aye i vwa guọlọ-ọ.—1 Pet. 5:2, 3.
Osolobrugwẹ ọ tare taghene o fori na kwosa urhomu rẹn ere suẹn, ji họghọ ro fori rẹn aye.—Rom. 13:1, 6, 7.
Oborẹ i Jehova ọ yẹ ọwan ọ ghwẹ oborẹ e mwuovwan yen. Fọkiẹ ijẹgba ra ha riuku, uhwu ọvo ye mwuovwan yen. (Rom. 6:23) Udabọ ọrana, Jehova ọ yẹ ọwan erere buebun fọkiẹ ẹguọlọ atamwu ro vwo kpahen ọwan. (Ps. 103:10, 11) Ẹghẹlẹ esiri rode ro vwo kpahen ọwan yo mwurien yẹ ọwan ebrurhọ ọrhẹ uphẹn ephian re vwori.—Rom. 12:6-8; Eph. 2:8.
OBORẸ ENE RU KẸNOMA RẸN URUEMRU UFIUVWELE ỌRHẸ OMẸKPARE
Kẹnoma rẹn uruemru akpọ na. Fọkiẹ je rhe te, ana sabu vwo uruemru re roro taghene e rhomu ghwẹ awọrọ. Jesu o dje ọnana phia ọke ro dje udje kpahen eri wian owian ra kwa i denarius owu riẹn. Ezẹko usuẹn aye i tuẹn owian rhọ urhiọke ji wian ọsoso ẹdẹ na uvuẹn uvo ọgbogbanhon; awọrọ i wianren emrẹ unọke owu ọvo. Ọrẹn, ẹko ọrukaro ne fiẹrorhọ taghene igho aye yọ nọ mai bun fọkiẹ uchunu owian aye i wianren. (Matt. 20:1-16) Jesu ọ nyoma udje ọnana djephia taghene o fori nẹ ere lelie, i vwo ọdaremẹro kpahen oborẹ Osolobrugwẹ o tiobọnu rẹn aye.
Ehworhare ri wianren ọsoso ẹdẹ na e roro taghene igho aye yọ nọ mai bun
Rhe dje ekpẹmẹ phia, ukperẹ wu ne fiẹrorhọ taghene ene rhe tiobọnẹ wẹn ọke ephian. (1 Thess. 5:18) Hẹrokele ọnyikọ Paul, dedevwo ọnọ sabu nekpẹn ekwakwa ugboma mie imizu ri ha ukoko i Corinth, ọrẹn o ruẹ omara-an. (1 Cor. 9:11-14) O fori ne dje ọdaremẹro phia rẹn i Jehova fọkiẹ ẹghẹlẹ ro tiobọnu rẹn ọwan, ukperẹ ene fiẹrorhọ taghene ono rho tiobọnẹ rẹn ọwan ọke ephian.
Ọnyikọ Paul ọ nekpẹn userhumu igho mie imizu ukoko na-a
Vwo uruemru omeriotọre. Ohworho orho ni omayen gegerege, oborẹ o vwori ọ vwọ rhọ da ye ẹro-o. Omeriotọre yọ nọ ha userhumu rẹn ọwan fiẹ aruẹ iroro ọrana kparobọ.
Omeriotọre ọmẹraro Daniel ọ lẹrheriẹ ghanren uvuẹn ikẹro i Jehova
Ọmẹraro Daniel obọdẹn udje omeriotọre. Manẹ ọ sabu rhe roro taghene o mwuovwan ẹrhẹ oghẹnrensan ọrhẹ uphẹn ra yẹriẹ fọkiẹ ekrun ro nurhe, oborẹ o vwo erhumu ọrhẹ irherhe te, kugbe ena sansan ro vwori. (Dan. 1:3, 4, 19, 20) Ọrẹn Daniel o vwo omeriotọre, uruemru ọnana nọ lẹrheriẹ ghanren uvuẹn ikẹro i Jehova.—Dan. 2:30; 10:11, 12.
Omarana, jena tiẹn uruemru ufiuvwele ọrhẹ omẹkpare rọ vuọn akpọ na inyenana. Ukpomaran, jena rha riamerhen ebrurhọ ephian ri Jehova ọ yẹrẹ ọwan, fọkiẹ ẹghẹlẹ esiri rode ọnẹyen.