Iseri Jehova a Kẹnoma Rẹn Ihworho re le nẹ Ukoko Aye?

Owuọwan usuẹn Iseri Jehova ọrhọ dobọ aghwoghwo ọrhẹ uyono ẹnya ji, ame i vwa kẹnoma rẹn ọravwọ-ọ. Ọrẹn, ame a damoma ha userhumu rẹn aye neneyo aye i sabu ruẹ ẹguọlọ aye i vwo kpahen i Jehova gbanhonrhọ.

Ohworho ọrhọ tobọ ruẹ ọdandan ọghwaghwa, orhiẹ ọke ephian ye le ọravwọ nẹ ukoko-o. Ọrẹn, Olele Kristi ro bromarhame ne ọrhọ ha arudo kparehasuẹ irhi Osolobrugwẹ, ọrhọ ghwẹriẹ-ẹ, ne le ọravwọ nẹ ukoko. Baibol na ọ tare: “Are i tiẹ ọvwọkon na nẹ uvwre are.”—1 Corinthians 5:13.

Me yọ nọ phia rẹn ọhworhare re le nẹ ukoko, ọrẹn aniẹ ọrhẹ emọyen jẹ Iseri Jehova? Uvuẹn erhirhiẹ ọnana, dedevwo esa na o nẹ ukoko na ne, ọrẹn ọye jẹ usuẹn ekrun na. O fori nẹ aniẹ ọrhẹ emọyen i họghọ ọrhẹ ẹguọlọ ro fori riẹn.

Ihworho re le nẹ ukoko ina sabu rhiẹ irueruo ogame ame. Aye ina ji sabu nekpẹn userhumu mie ekpako ukoko na. Ekpako ukoko na i vwo omwemẹ aye ina ha userhumu rẹn ohworho na ruẹ ewene, nọ sabu rharhumu vwo omamọ onyerẹnkugbe rhẹ i Jehova. Ohworho re le nẹ ukoko orho ruẹ ewene, ji dje omwemẹ phia rọ nọ nyalele iruemru-urhi Baibol, nọ nọ sabu rharhumu rhiẹ owuọwan usuẹn Iseri Jehova.