Marhẹ Iseri Jehova e ru Mẹrẹn Igho rẹ Aye a ha Wian Owian Aye?

Iseri Jehova sansan ri ha uvuẹn akpọ na, ya hobọtua owian na nyoma itetoro ro nẹ ẹhẹn rhe.a O vwo ekpeti itetoro sansan uvuẹn ekete ogame ame, wu na ji sabu mẹrẹn izede erọrọ wu ne toro itetoro uvuẹn ekete aran. O ji vwo ẹkwaphiẹrhotọre rẹ ohworho ọnọ sabu toro itetoro rẹn owian akpọ ephian, igho ra ghwọghọre, yanghene eva na.

A vwa gba Iseri Jehova toro akwa ọrẹ ikpe yanghene uchunu igho ọrọrọ usuẹn igho aye i mẹrẹnre-en. (2 Corinthians 9:7) Ihworho i vwa kwosa aye a ki ruẹ ekete ogame ame-e, ame i vwa ji kpare ọsete yanghene nekpẹn igho ame e ki ruẹ irueruo orinmi, orọnmo, omebrurhame yanghene irueruo erọrọ-ọ. Ame i vwa mẹrẹn igho nyoma emaren yanghene ekwakwa erọrọ ẹrhẹ-ẹ, yanghene nyoma iruẹn ra haphia-a, aye i vwa ji nekpẹn igho mie ihworho-o. Aye i vwe ji ghwoghwo iyẹnrẹn ohworho ro toro itetoro-o. (Matthew 6:2-4) Ame i vwa ha iwẹbsaiti ọrhẹ ẹbe ukoko ame guọlọ igho-o.

Kibiamo kibiamo, ukoko Iseri Jehova e se iyẹnrẹn ekiri igho na rẹn ọsoso ukoko na, ihworho ephian ina sabu rhiẹ uyono enana. O ji vwo ihworho re ni iyẹnrẹn ekiri igho na sua ọke ephian, neneyo a ja rha ha igho re torori na ruiruo izede ro vwo serhọ.—2 Corinthians 8:20, 21.

Oborẹ e Toro Itetoro Lele

• Ekpeti Itetoro: Wu na sabu toro igho yanghene ishẹki rhẹ ekpeti itetoro ri ha Aghwẹlẹ Uvie, Aghwẹlẹ Omẹvwa, yanghene ekete erọrọ re ruẹ uyono.

• Itetoro nyoma itanẹti: Uvuẹn ẹkwotọre buebun, wu na sabu ha oghọn na “Donate to Jehovah’s Witnesses” toro itetoro, nyoma wu na ha credit card, ATM card, yanghene ena erọrọ ruiruo.b Iseri Jehova ezẹko e “fiẹ emru rhẹ okokọ” kibiamo kibiamo, nyoma rẹ aye e ruie na rha ha igho na nẹ ekiri igho aye kibiamo kibiamo.—1 Corinthians 16:2.

  

• Ẹghẹlẹ re mwuegbe yi rhotọre: Ne wu ki sabu ha ena ezẹko toro itetoro, wu ne mwuegbe yi rhotọre vwẹre yanghene tobọ jẹ igọmẹti rhe kpahiẹn dede. Ọnana ọnọ lẹrhuọ rhe oborẹ wu ne toro itetoro lele, neneyo wu ja rha kwa osa urhomu buebun. Ẹkwaphiẹrhotọre ọnana ọ lẹrhẹ ihworho buebun rhe ne taghene, aye ina sabu tiobọnẹ ẹghẹlẹ rẹn ukoko na ọke aye a ji ha akpọ, yanghene aye i rha tobọ hwu ne. Orhianẹ wu guọlọ toro aruẹ itetoro ri ha obotọre na, biko gbe dje urhomu vwe oghọn ukoko ọrẹ Iseri Jehova rọ kẹreruọ:

  • ekiri igho ibanki

  • igho ra kwa rẹn ohworho orhianẹ emru kpregede ọ phia riẹn, ọrhẹ igho ra kwa rẹn ọrọ ruotọre nẹ iruo ne

  • enyerẹn re vwori

  • uchunu enyerẹn ra ghalẹ te ohworho uvwrọke ezẹko, ọrhẹ ẹbe ro djerie phia

  • uku ra ghalẹ

Wu rha guọlọ iyẹnrẹn erọrọ kpahen ona wu na sabu ha toro itetoro uvuẹn ekete we rhirhiẹ, riẹ oghọn na “Donate to Jehovah’s Witnesses.”