Enọ i Baibol na ọ Kpahenrhọ / Ẹrhomo / O Fori mi Nẹrhomo Vwe Ihworho Efuanfon?

Ẹkpahenrhọ i Baibol na

Ẹjo. Baibol na o djephia taghene ọwan i nẹrhomo vwe Osolobrugwẹ ọvo, ne fuien nyoma odẹ i Jesu. Jesu nọ ta rẹn idibo yi: “Omana yẹ are ina nẹrhomo: Ọsẹ ame obẹ odjuwu, jenẹ odẹ ọnọ ọ fon.” (Matthew 6:9, New American Bible) O vwo ọke owuorowu ri Jesu o yono idibo yi nẹ aye i nẹrhomo vwe ihworho efuanfon, emakashe, yanghene ohworho ọrọrọ-ọ, jokpanẹ Osolobrugwẹ ọvo.

Jesu nọ ji ta rẹn idibo yi: “Mẹmẹ yẹ izede na, urhomẹmro na, ọrhẹ arhọ na. O vwo ọrọ nọ sabu bru Ọsẹ na rhe jokpanẹ nyoma mẹ-ẹ.” (John 14:6, NAB) Jesu ọvo yẹ Osolobrugwẹ ọ ha mwu nọ rẹ fọkiẹ ọwan.—Hebrews 7:25.

Mi sabu nẹrhomo vwe Osolobrugwẹ ọrhẹ ihworho efuanfon na?

Usuẹn Ekama Ikpe rẹ Osolobrugwẹ o tiobọnu ọrhọ ta: “Mẹmẹ, ỌROVWORI na, ro rhiẹ Osolobrugwẹ are, mẹmẹ Osolobrugwẹ rọ rioma.” (Exodus 20:5, NAB) Izede ọgo yẹ Osolobrugwẹ ọ “rioma”? Ekete ra djokarhọ uvuẹn New American Bible ọrhọ ta taghene, Osolobrugwẹ “ọ guọlọ ẹga ro fiotọre.” Osolobrugwẹ ọ guọlọre na ha ẹga ro fiotọre riẹn, ji nẹrhomo vwe ọye ọvo.—Isaiah 48:11.

Evwan ono biomu Osolobrugwẹ arha nẹrhomo vwe ohworho ọrọrọ, tobọ te ihworho efuanfon yanghene emakashe na. Ọke ọnyikọ John ọ damoma rọ nọ ha ẹga rẹn ọmakashe owu, ọmakashe na nọ dobọ ye ji, nyoma rọ ta: “Wu vwa damiẹ-ẹ! Mẹmẹ odibo ọnọ, ọrhẹ odibo imizu enọ re se oseri rẹn Jesu. Ga Osolobrugwẹ.”—Revelation 19:10, NAB.