Enọ i Baibol na ọ Kpahenrhọ / Dẹbolo ọrhẹ Ikpodje na / Dẹbolo ọ Havwiẹ?
Ẹkpahenrhọ i Baibol na
Dẹbolo ọ havwiẹ. Ọye yo “suẹn akpọ na,” ọye ohworho ẹhẹn rọ rhiẹ ọvwọkon, rọ ji kparehaso Osolobrugwẹ. (John 14:30; Ephesians 6:11, 12) Baibol na o dje aruẹ ohworho i Dẹbolo ọ havwọ phia nyoma edẹ enana ọrhẹ oborẹ aye i mevirhọ:
Echu ro mevirhọ “Ọrọ Kparahasuẹ Awan.”—Job 1:6.
Dẹbolo ro mevirhọ “Ọrọ Rhaphiawan.”—Revelation 12:9.
Baibol na o dje obodirin rhiẹ “Ọrọ Phiẹ Awan Rhọ.”—2 Corinthians 11:3.
Ọrọ damẹ awan.—Matthew 4:3.
Ọmọronfian.—John 8:44.
Echu rhẹ uruemru-urhi yanghene irueruo ọko-on
Ihworho ezẹko e roro taghene Echu uruemru-urhi ro suẹn ohworho yanghene irueruo ọkon rẹ ihworho e ruẹ. Ọrẹn, Baibol na ọ ta kpahen ikuegbe owu rọ homaphia uvwre Osolobrugwẹ ọrhẹ Echu. Osolobrugwẹ ohworho rọ gbare, omarana ọ sabu vwobọrhọ irueruo ọko-on. (Deuteronomy 32:4; Job 2:1-6) Habaye, Echu ọ damẹ i Jesu ro rhiẹ ohworho rọ gbare ni. (Matthew 4:8-10; 1 John 3:5) Omarana, oborẹ i Baibol ọ tare o djephia taghene Dẹbolo ọ havwiẹ, ukperẹ ọnọ ghwai rhiẹ oborẹ a ha dje irueruo ọkon.
O fori no gbe ọwan unu nime ihworho buebun e vwo imwẹro taghene Dẹbolo ọ havwiẹ-ẹ? Ẹjo, nime Baibol na ọ tare taghene Echu ọ ha ọphiẹrhọ ruiruo omamọ. (2 Thessalonians 2:9, 10) Owu usuẹn ena rẹ Echu ọ mai ha ruiruo yẹ ọrẹ o ruie nẹ ihworho i roro taghene ọ havwiẹ-ẹ.—2 Corinthians 4:4.
Iroro erọrọ ri sọre kpahen Dẹbolo
Iroro rọ gbare: Uvuẹn erhianrhian i Baibol ezẹko ẹmro i Hebrew na “Lucifer” o mevirhọ “ọro lo.” (Isaiah 14:12) Ọnana o djephia taghene ẹmro ọrana ọ rionbọrhọ irodje sansan yanghene usun ọrẹ Babylon, rẹ Osolobrugwẹ ọnọ ghwọghọ fọkime aye i kparehasuiẹ. (Isaiah 14:4, 13-20) Ọke e fiẹ Babylon kparobọ hin, na ha aye djechẹẹ rhẹ ẹmro na “ọro lo.”
Iroro rọ sọre: Osolobrugwẹ ọ ha Echu ruiruo nẹ ọhọriẹ ọ sabu rugba.
Iroro rọ gbare: Dẹbolo ọvwreghrẹn Osolobrugwẹ, rhẹ odibo yi-i. Echu ro rhiẹ i Dẹbolo ọ kparahasuẹ ihworho Osolobrugwẹ ji mọrenfian baren aye.—1 Peter 5:8; Revelation 12:10.