Iseri Jehova a Ghwọghọ Ekrun Gbinẹ Aye a Bọn Ekrun Gbanhan?

Ame ri rhiẹ Iseri Jehova, a bọn ekrun ame ọrhẹ ekrun ereva ame gbanhan. Ame a họghọ rẹn Osolobrugwẹ ro rhiẹ Ọmemama rọ ha ẹkwaphiẹrhotọre ekrun mwu. (Genesis 2:21-24; Ephesians 3:14, 15) Uvuẹn i Baibol na, Osolobrugwẹ o yonirin ọwan iruemru-urhi ri na ha userhumu rẹn ihworho uvuẹn akpọ na vwo ekrun omamerhomẹ rọ ji gbanhon.

Oborẹ Iseri Jehova e ru Bọn Ekrun Gbanhan

Ame a damoma lele urhebro i Baibol na, nime ọnana ọ ha userhumu rẹn ọwan rhiẹ emamọ esa, ene, ọrhẹ emiemọ. (Proverbs 31:10-31; Ephesians 5:22–6:4; 1 Timothy 5:8) Ẹghwanren ri ha uvuẹn i Baibol na, ọ ha userhumu rẹn ekrun re riẹ ẹga sansan vwo omamerhomẹ. (1 Peter 3:1, 2) Roro kpahen ẹmro rẹ ihworho ri vwe rhiẹ Iseri Jehova i tare ọrẹn erẹ aye a rọnmọ Iseri Jehova:

• “Ẹgbukpe erhan erukaro orọnmo ame ọ vuọnren rhẹ unuẹkọ ọrhẹ ọyanghanyanghan. Ọrẹn ọke Ivete o rhiẹ Oseri Jehova hin, no mo rhiẹ ohworho ẹguọlọ ọrhẹ erhionrin. Ewene enana ro ruru na o simi orọnmo ame.”—Clauir, ro nẹ Brazil rhe.

• “Ọke esa me re se Chansa ọ tuẹn uyono i Baibol rhọ rhẹ Iseri Jehova, mie kwe ọke ọrukaro-o, nime mie roro taghene Iseri Jehova ina ghwọghọ ekrun ame. Nẹ ọke ọrana rhe, ni mi ma mẹrẹnvwrurhe taghene Baibol na ọ ghini ha userhumu rẹn orọnmo ame.”—Agness, ro nẹ Zambia rhe.

Uvuẹn owian aghwoghwo ame, ame e dje rẹn ereva ame taghene aye i rha ha ẹghwanren i Baibol ruiruo, ọnọ sa aye erhumu

• Djẹ ohworho aye ina rọnmọ rhẹ ẹghwanren

• Nyerẹnghele ebẹnbẹn ra homaphia arha rọnmọ obọ

• Lele egọ aye nyerẹnkugbe ọrẹ ufuoma

• Ghwọghọ igho rhẹ ẹghwanren

• Dobọ unuẹkọ ji

• Yono oborẹ a harhomẹ

• Yono emọ aye

Ohworho orho wene ẹga ye, ọ suẹ ẹghwọ uvuẹn orọnmo?

Itiọrurhomẹmro, ọkezẹko ọ phia. Jerẹ udje, iyẹnrẹn ro nẹ ikọpini owu re se Sofres rhe uvuẹn ẹgbukpe 1998, o djephia taghene owu usuẹn orọnmo uze o vwo ebẹnbẹn egbogbanhon, nime owuọwan uvuien ọ ghwẹriẹ rhiẹ Oseri Jehova.

Jesu ọ mẹraro rhotọre taghene ihworho ri nyalele iyono enẹyen, ine vwo ebẹnbẹn uvuẹn ekrun aye ọkezẹko. (Matthew 10:32-36) Ogbikun re se Will Durant nọ djokarhọ uvuẹn Isuensuon i Rome taghene, “e brorhiẹn kpe Ilele Kristi taghene aye a ghwọghọ ekrun,”a Iseri Jehova ezẹko a ji dẹrughwaroghwẹ aruẹ erhirhiẹ ọnana inyenana. Ọnana no mevirhọ taghene Iseri Jehova ya ghwọghọ orọnmo na?

Ọke European Court of Human Rights o brorhiẹn ro sekpahen Iseri Jehova ra ghwọghọ ekrun, nọ tare taghene eri vwe rhiẹ Iseri Jehova uvuẹn ekrun na ya suẹ unuẹkọ, nime “aye i vwe kwe ji họghọ rẹn ohworho ekrun na nọ ga ẹga ye rhẹ ugbomọphẹ-ẹ.” Ẹghware na nọ ji habaye: “Erhirhiẹ ọnana o titiri omamọ uvuẹn ekrun re riẹ ẹga sansan, tobọ te uvuẹn ekrun Iseri Jehova.”b Iseri Jehova i rha dẹrughwaroghwu ẹkparehaso fọkiẹ ẹga aye, aye a damoma nyalele urhebro i Baibol na: “Are i vwa ha ọdandan kwosa ọdandan rẹn ohworho owuorowu-u. . . . Orho rhiẹ oborẹ are ina sabu ru, are i lele ihworho ephian nyerẹn ọrẹ ufuoma.”—Romans 12:17, 18.

Oborẹ ọsoriẹ Iseri Jehova e vwo imwẹro taghene o fori nẹ aye i rọnmọ uvuẹn ẹga aye ọvo

Iseri Jehova a nyalele ọkpọvi Baibol rọ tare taghene a rọnmọ “uvuẹn Ọrovwori na ọvo,” nọyẹ ọrẹ aye ina rọnmọ ohworho rẹ aye i gbe vwo esegburhomẹmro owu. (1 Corinthians 7:39) Urhi ọnana ọ ha uvuẹn Baibol na, o ji rhiẹ emru erere. Jerẹ udje, urhomu-ẹmro owu re fomu phia uvuẹn Journal of Marriage and Family ọrẹ ẹgbukpe 2010 nọ tare taghene, “ihworho ri rọnmọren re riẹ ẹga owu, ri ji vwo imwẹro owu, ọ lẹrhẹ onyerẹnkugbe aye rhomẹrhọ.c

Ọrẹn, Iseri Jehova i vwe jirie rẹn eri ghwanriẹn rhiẹ Iseri Jehova ne, nẹ aye i nẹ orọnmo aye nime ọreva aye rhẹ Oseri Jehova-a. Baibol na ọrhọ ta: “Orhianẹ omizu ọhworhare o vwo ane rọ vwọ ji ghwẹriẹ, ro kweri taghene ọye ono lelie rhirhiẹ, o vwo tiobọnẹ ane ọnẹyen na-a; orhianẹ omizu ọmase o vwo esa rọ vwọ ji ghwẹriẹ ro ji kwe taghene ono lelie rhirhiẹ ye, ọ vwọ nyajẹ esa ye na vwo-o.” (1 Corinthians 7:12, 13) Iseri Jehova a mọrọn urhi ọnana.