Marhẹ i Jesu ọ Havwọ?
Ẹkpahenrhọ i Baibol na
O vwo ohworho rọ dabu ghwai rhe oborẹ i Jesu ọ havwọ-ọ, nime a hunute oborẹ ugboma yen ọ havwọ uvuẹn i Baibol na-a. Ọnana no djephia taghene oborẹ ugboma i Jesu ọ havwọ ọ ghwai ghanre-en. Ọrẹn, Baibol na ọ ta ibiẹ emru kpahen oborẹ ugboma i Jesu ọ havwọ.
Ekete ro nurhe: Jesu onyẹ i Jew, ọkezẹko ọ ha iruemru itu i Jew riuku mie izie. (Hebrews 7:14) O fiotọre taghene ọ họhọ ihworho ri ha ekete ro nurhe. Uvuẹn erhirhiẹ owu, Jesu ọ sabu nẹ Galilee ọrẹ odjahen riẹ Jerusalem, ọrẹn ihworho e vwrurhe yi-i. (John 7:10, 11) Ọkezẹko dede, ọye rhẹ idibo yi ri mai kẹriẹ i họhọre. Karorhọ taghene Judas Iscariot yo dje i Jesu rẹn otu isodja ri rhe mo mwuie.—Matthew 26:47-49.
Oborẹ ẹtuiẹn i seri te: Ọnọ sabu rhirhiẹ taghene ẹton i Jesu e seri-i, nime Baibol na ọ tare taghene “ẹton iseseri o vwo brọghọ rhẹ ọhworhare-e.”—1 Corinthians 11:14.
Ẹtuegban: Jesu o vwo ẹtuegban. Ọ nyalele irhi itu i Jew, rọ tare taghene ọhworhare ọ vwọ hwanren ẹtuegban yen mwuotọre-e. (Leviticus 19:27; Galatians 4:4) Habaye, Baibol na ọ hunute ẹtuegban i Jesu uvuẹn aruẹmẹrẹn owu sekpahen oja rọ nọ re.—Isaiah 50:6
Ugboma yen: Iyẹnrẹn o djephia taghene Jesu o vwo obọdẹn omọkpokpọ. Uvwrọke ro ghwoghwo, ọ nya ugbo onya iroko buebun. (Matthew 9:35) O ruẹ oghwa ẹga itu i Jew na fon ọgbeva, jeghwai bọmọ imẹdjẹ aye e wene igho rhu, ọ ji ha ophianphian le isurhe nẹ oghwa ẹga na ukwọgbọ. (Luke 19:45, 46; John 2:14, 15) McClintock ọrhẹ Strong’s Cyclopedia ni tare: “Ọsoso oborẹ inyikọ na i ya kpahen i Jesu o djephia taghene [Jesu] ohworho rọ gbanhonma ro ji vwo obọdẹn omọkpokpọ.”—Volume IV, aruọbe 884.
Oborẹ ọ họhọre: Jesu ohworho aruẹdọn ọrhẹ ohworho ghwologhwolo, a mẹrẹn ọnana vwrurhe uvuẹn ughwaruiẹ. (Matthew 11:28, 29) Aruẹ ihworho ephian e bruie sa ma nekpẹn urhebro ọrhẹ userhumu. (Luke 5:12, 13; 7:37, 38) Emọvwerhe dede i tobọ vwo ẹguọlọ kpahiẹn.—Matthew 19:13-15; Mark 9:35-37.
Iroro ri sọre kpahen oborẹ i Jesu ọ havwọ
Iroro rọ sọre: Ihworho ezẹko a frẹfro taghene Jesu o nẹ Africa rhe, nime ọbe i Revelation ọ ha ẹtuiẹn dje oruru, nọ rhọ ha isihanghwẹ ye dje “ẹrẹnmo ro lo.”—Revelation 1:14, 15, The New Jerusalem Bible.
Iroro rọ gbare: A ha ọbe i Revelation phia “nyoma eka.” (Revelation 1:1) Idjedje ẹton i Jesu ọrhẹ isihanghwẹ ye ra ha ruiruo o mevirhọ emru oka ra ta kpahen iruemru ro vwori ọke ra rhọmiẹ nuhwu hin, a vwa haye dje oborẹ ugboma yen ọ havwọ ọke rọ ha otọrakpọ na-a. Ọke i Revelation 1:14 ọ ta taghene “urhomie ọrhẹ ẹtuiẹn a fuan jerẹ oruru ọfuanfon, jerẹ imito,” ọ vwọ ta kpahen ugboma ekwakwa na-a, ukpomaran ikọlọ aye. Ọnana no dje oborẹ o vwo ẹghwanren te. (Revelation 3:14) Oghwẹmro i Baibol ọnana ọ vwọ ha ẹton i Jesu vwanvwọn oborẹ oruru yanghene imito i havwọ-ọ.
Isihanghwẹ i Jesu ọ họhọ “ẹrẹnmo ro vwo erhumu ọke ra vwrorhan yen.” (Revelation 1:15) Habaye, “ughwaro ọnẹyen o lo vwranvwran jerẹ ọren na.” (Revelation 1:16) Ra mẹriẹn taghene o vwo ẹkwotọre owuorowu ro vwo ophianroma jerẹ idjedje enana-a, nọyẹ aruẹmẹrẹn ọnana oka ro djephia taghene Jesu ra rhọmọnuhwu na, o “rhirhiẹ ekete ukpẹ ra na ja sabu ti kẹrẹ.”—1 Timothy 6:16.
Iroro rọ sọre: Jesu ọvwiẹlẹ
Iroro rọ gbare: Jesu o vwo uduefigbere. Jerẹ udje, o fiudugbere dje oma phia rẹn otu isodja ri rhe mo mwuie. (John 18:4-8) Orhianẹ i Jesu o vwo omẹgbanho-on, manẹ ọ vwọ sabu wian owian ikapita-a.—Mark 6:3.
Omarana, mesoriẹ a ha userhumu rẹn i Jesu kpare orhan oja ye? Mesoriẹ o kiki hwu jẹ ihworho ra kanren mwu orhan kẹriẹ? (Luke 23:26; John 19:31-33) E ki kpe i Jesu, oma ọ ghwọgheriẹ omamọ ne. Ọ merhen ọsoso ason na-a, fọkiẹ omiamiamo rọ dẹrughwaroghwu. (Luke 22:42-44) Uvwre ason ọrana, itu i Jew i ha oja riẹ omamọ, urhiọke ẹdẹ ọreva ye, itu i Rome ni kperie omamọ ekpe. (Matthew 26:67, 68; John 19:1-3) Ọkezẹko, erhirhiẹ enana yi lẹrheriẹ kiki hwu.
Iroro rọ sọre: Jesu o mwuomarhọ ọke ephian.
Iroro rọ gbare: Jesu o dje iruemru Jehova ro rhiẹ Ọsẹ ye rọ ha obẹ odjuwu phia gbagba, ri Baibol na o seri “Osolobrugwẹ oma ọ merhan.” (1 Timothy 1:11; John 14:9) Itiọrurhomẹmro, Jesu o yono awọrọ oborẹ aye ine ru vwo omamerhomẹ. (Matthew 5:3-9; Luke 11:28) Iroro enana i djephia taghene Jesu ohworho oma ọ merhan ọke ephian, ra ji mẹrẹnvwrurhe uvuẹn ughwaruiẹ.