Me Yi Baibol na ọ ta Kpahen Ekwakwa ra ha Sẹ Osẹme Ọrhẹ Eheri?

Ẹkpahenrhọ i Baibol na

Dedevwo i Baibol na ọ ghwai ta kpahiẹn omamọ-ọ, ọrẹn, ọ kparehaso eheri ughwaro yanghene ekwakwa erọrọ ra ha sẹ osẹme-e. Ọrẹn, ukperẹ i Baibol na ọnọ tẹnrovi omẹhaphia, no jiri “osẹme rọ vwọ ghwọghọ rọ havwọ fọfọ ọrhẹ ẹhẹn dẹndẹn.”—1 Peter 3:3, 4.

Ọ kparehaso eheri ugboma-a

• Emẹse ri fuevwan ga i Jehova uvuẹn i Baibol na i sẹ osẹme. Rebekah, rọ rọnmọ Isaac ro rhiẹ ọmọ i Abraham, o ku usan oro rhẹ irhuen yi, ekwakwa ra ha oro ru re kuẹ rhẹ abọ, ọrhẹ ekwakwa eghoghanren erọrọ rẹ Abraham ọ yẹriẹ. (Genesis 24:22, 30, 53) Omaran ọ ji havwọ, Esther ọ ha “ekwakwa ri na lẹrhiẹ vwo erhumu rhọ” e mwuegbe omayen hẹrhẹ ọke ro no rhiẹ ane Orodje i Persia. (Esther 2:7, 9, 12) Ekwakwa enana i sekpahen “ekwakwa sansan ra ha lerhe oma,” yanghene “ekwakwa eheri ughwaro.”—New International Version; Easy-to-Read Version.

• Baibol na ọ ha ekwakwa osẹme dje udje ro serhọ. Jerẹ udje, a ha ohworho ro tiobọnẹ omamọ urhebro dje “ekwakwa erhọ ra ha oro ru . . . rẹn ọrọ kerhọ ye.” (Proverbs 25:12) Omaran ọ ji havwọ, Osolobrugwẹ ọ ha oborẹ o lele agbamwa Israel ru kugbe ha vwanvwọn oborẹ esa ọ dabu ha ekwakwa osẹme ha sẹ ọmase rọ guọlọ rọnmọ jerẹ ekwakwa owọre, ekwakwa abọ, ọrhẹ ekwakwa erhọ. Eheri ọnana ọ lẹrhẹ agbamwa na “vwo erhumu omamọ.”—Ezekiel 16:11-13.

Iroro ri sọre sekpahen ekwakwa osẹme ọrhẹ eheri

Iroro rọ sọre: Tiro yanghene ekwakwa ra ha sin ukẹro, rẹ Orodje ọmase Jezebel ọ ha sin ikẹriẹ, o djephia taghene ekwakwa ra ha gbe ughwaro i sọre.—2 Kings 9:30, ekete ra djokarhọ.

Urhomẹmro: Jezebel, ro vwobọrhọ iruemru eda ro ji rhiẹ ogbu, a hariẹ guẹnzọn fọkiẹ irueruo ọkon ọnẹyen orhiẹ fọkiẹ omẹhaphia ọnẹye-en.—2 Kings 9:7, 22, 36, 37.