Idama owu ro ni ihworho ra nya ruẹ Aghwẹlẹ Uvie

ENỌ IPHUPHẸN A NỌ

Mesoriẹ mi ne Riẹ Uyono Iseri Jehova Uvuẹn Aghwẹlẹ Uvie?

Ọgbeva uvuẹn kọkprughwre kọkprughwre, Iseri Jehova e ruẹ uyono aye uvuẹn ekete ogame aye re se Aghwẹlẹ Uvie. Me yọ phia avwaye, marhẹ wu ne ru mẹrẹn erere wu rha nya?

Me ọye ruẹ uvuẹn Aghwẹlẹ Uvie?

Aghwẹlẹ Uvie ekete re yono kpahen i Baibol na. Iyono re ruẹ avwaye ina sabu ha userhumu wẹn:

yono urhomẹmro na kpahen Osolobrugwẹ.
vwẹruọ oborẹ eka ra homaphia vwana i mevirhọ.
rhiẹ omamọ ohworho.
guọlọ emamọ igbehian.

Wu rheri? E se ekete Iseri Jehova a ga ogame Aghwẹlẹ Uvie nime Uvie Osolobrugwẹ yẹ oborẹ a mai ta kpahan uvuẹn avwaye.—Matthew 6:9, 10; 24:14; Luke 4:43.

Mesoriẹ o fo ne wu nya?

Iyono na ina ha userhumu wẹn. Iruemru-urhi Baibol re yono kpahan uvuẹn iyono Iseri Jehova ina ha userhumu wẹn “vwo ẹghwanren.” (Proverbs 4:5) Ọrana no mevirhọ taghene Baibol na ọnọ sabu ha userhumu wẹn brorhiẹn ẹghwanren uvuẹn akpenyerẹn ọnọ. Ọnọ ji sabu ha userhumu wẹn guọlọ ẹkpahenrhọ rẹn enọ eghoghanren jerẹ:

Enana usuẹn irhomu-ẹmro ezẹko ra haphia uvuẹn uyono ame re ruẹ uvuẹn ehion ọkprughwre na:

Why Be Guided by the Bible?
Where Can You Get Help in Times of Distress?
What God’s Kingdom Is Doing for Us Now.

“Owuọwan uvuẹn iklasi mẹ ọ rhiẹ uyono ame ẹdẹ owu. No siyẹ kẹrẹ ekrun mẹ, ame ni yẹriẹ ọbe ijoro ame. Ọke oru, nọ ta mẹ taghene oma ọ merhenriẹn omamọ kpahen ẹkpahenrhọ rẹ ihworho i haphia, uvuẹn oghọn rẹ otu e vwobọrhọ uvuẹn uyono na. Nọ ji ta taghene uvuẹn ishọshi ọnẹyen, aye e vwo aruẹ ẹbe uyono jerẹ ame-e.”—Brenda

Wu rheri? Wu na sabu siyẹ ekete ro jeruo uvuẹn Aghwẹlẹ Uvie na, a vwa ji kpare ọsete-e.

Okugbe na ọnọ bọn gbanhon. Baibol na ọ tare taghene iroro owu rọ soriẹ o fo nẹ Ilele Kristi kwomakugbe, yẹ ọrẹ aye ina “ha urhebro rẹn owuowọnwan.” (Hebrews 10:24, 25) Obọdẹn okugbe ro vwo ihworho ri vwo ẹguọlọ kpahen Osolobrugwẹ ọrhẹ awọrọ, ọ bọn ọwan gbanhan uvuẹn akpọ ọnana rẹ ihworho a damerhọ oma aye ọvo.

“Oma ọ rhọ mẹ uvuẹn ehion ẹdẹ na, mie ji mwuomarhọ, ọrẹn ihworho mia vwa uvuẹn Aghwẹlẹ Uvie a lẹrhẹ oma merhen mẹ ọke ephian. Mie rhe riẹ oboghwa ọke uyono orho fuen ne, oma nọ merhen mẹ, ni mie ji vwo omẹgbanhon mi na dẹrughwaroghwu ẹdẹ ọreva ye.”—Elisa

Wu rheri? Iseri Jehova i vwo ikoko ri ghwẹ 120,000 uvuẹn ọsoso akpọ na, aye a vwoma ruẹ uyono uvuẹn ekete ri ghwẹ 60,000. Kẹgbukpe kẹgbukpe, a bọn Aghwẹlẹ Uvie ri te 1,500 fọkiẹ uchunu ihworho ra rhiẹ iyono na.a

Oborẹ Otuẹdẹruọ a ta

“Ọke mia ha isukuru, ọmọ iklasi mẹ owu o leli mẹ rhiẹ uyono ame ọkezẹko, oma ọ merhenriẹn kpahen aruẹ ihworho sansan re yono i Baibol na kuẹgbe avwaye. Ro vwo jijiri na, ọrẹ mia wian riẹn nọ rhiẹ uyono ame, o gberie unu ọke rọ mẹrẹn oborẹ a ha i Baibol ruiruo uvuẹn uyono na. Ọke mia mẹrẹn ọdaremẹro ro vwo kpahen uyono na, nọ lẹrhẹ ọdaremẹro ọnẹmẹ kodorhọ!”—Jessica.

“Mi mẹrẹnvwrurhe taghene iyono na a lẹrhẹ ọfiamu ọrhẹ uduebro mẹ riotọre. Ame e yono oborẹ ene ru nyerẹn omamọ akpọ, oborẹ ene ru rhiẹ omamọ ohworho, ọrhẹ ekwakwa buebun. Mie nẹ Aghwẹlẹ Uvie na rhẹ omẹrhuọnrhuọn kugbe omamerhomẹ.”—Timothy.

“Ọhworhare owu mi ha use riẹn rhiẹ uyono ame nọ tare ọke oru: ‘Mi rhiẹ uyono na rhẹ ẹhẹn mi ne djephia taghene oborẹ aye e yono ofian. Ọrẹn ni mi mẹrẹnvwrurhe taghene imwẹro mẹ yọ sọre!’ Oma ọ merhenriẹn omamọ fọkiẹ oborẹ Iseri Jehova i dedirie sasasa. Nọ tare: ‘Dedevwo mi tu mẹrẹn are obọ, are i dediri mẹ kamẹriẹn mi rheri aye ẹgbukpe buebun ne!’”—Jacob.

“O vwo ẹdẹ ezẹko mie roro taghene, ‘Ogege uyono na orho fuen, mie rie.’ Ọrẹn, ọke re ruẹ uyono na, iroro erana na ramiẹ. Uyono na orho fuen hin, ni mie lele ihworho tẹmro, mi vwa rha karorhọ oborẹ ọ lẹrhere mẹ vwo aruẹ iroro ọrana ọke ọrukaro-o. O vwo rhiẹ iyono na, manẹ mi vwa sabu vwo obọdẹn igbehian mi vwori vwana-a.”—Madison.

a Ne wu sabu mẹrẹn ekete re ruẹ uyono ame, hiẹn riẹ “Congregation Meetings of Jehovah’s Witnesses” uvuẹn iwẹbsaiti ame, ne wu hiẹn “Find a Location Near You.”