Igho yẹ Esiri Ekwakwa Ọkon Ephian?

Ẹkpahenrhọ i Baibol na

Ẹjo. Baibol na ọ ta rẹn ọwan taghene igho oborẹ ọsọre-e, yanghene oborẹ ọ suẹ obiobiomu-u. Ihworho ezẹko a ta taghene Baibol ọ tare taghene “igho yẹ esiri ekwakwa ọkon ephian,” ọrẹn rhẹ omaran yọ havwọ-ọ. Baibol na ọ tare taghene “ẹguọlọ ọrẹ igho ọyẹ esiri ekwakwa ọkon ephian.”a—1 Timothy 6:10, King James Version, ikerẹmro ikpokpoto.

Me yi Baibol na ọ ta kpahen igho?

Baibol na ọ tare taghene igho omamọ emru arha haye ruiruo izede ro serhọ, ọnọ ji sabu “sẹrorẹ ọwan.” (Ecclesiastes 7:12) Habaye, Baibol na ọ ji ta omamọ ẹmro kpahen ihworho re tiobọnẹ rẹn awọrọ.—Proverbs 11:25.

Baibol na ọ ha orhetio rẹn ọwan taghene a vwa lẹrhẹ igho rhiẹ oborẹ ọ mai ghanren uvuẹn akpenyerẹn ọwa-an. Nọ tare: “Jenẹ akpenyerẹn are ọ vabọ ufiuvwele igho, nẹ are i vwo ẹhẹn otemẹ kpahen ekwakwa are i vwori.” (Hebrews 13:5) Oghwẹmro na o yonirin ọwan taghene a ha igho ruiruo izede ro serhọ, o vwo rhiẹ emru ọrukaro uvuẹn akpenyerẹn ọwa-an. Ukpomaran, jenẹ e vwo ọdaremẹro kpahen oborẹ ọwan i vwo ne, ekwakwa jerẹ emaren, iwun, ọrhẹ oghwa.—1 Timothy 6:8.

**Mesoriẹ i Baibol na o tiẹ ọwan orhọ kpahen oborẹ ana ha igho ruiruo lele?**

Ihworho ri vwo ufiuvwele i vwo arhọ i bẹmẹdẹ-ẹ. (Ephesians 5:5) Iroro owu rọ soriẹ yẹ, ufiuvwele izede ọrọrọ ohworho ọ ga ema yanghene vwobọrhọ ẹga efian. (Colossians 3:5) Nime ihworho ri vwo ufiuvwele i guọlọ vwo oborẹ aye a guọlọ, aye na sẹrerhumuji omamọ ọkpọvi ra yẹrẹ aye. Proverbs 28:20 nọ tare taghene, ihworho ra ‘guọlọ efe okpakpa, ina vi riẹ iborhin.’ Ọkezẹko, aye ina ji sabu vwobọrhọ erharhere irueruo jerẹ, ofian ẹmọrọn, uhieso, uruemru ọphiẹrhọ, uruemru re mwu awọrọ ha, yanghene uruemru re kpe awọrọ.

Ọrhọ tobọ rhianẹ e vwe vwobọrhọ aruẹ irueruo enana-a, ẹguọlọ re vwo kpahen igho jẹ emru imwofẹn. Baibol na o tare taghene “otu ri guọlọ fe, ne se rhẹ ọdamuni kugbe ufi ọrhẹ ojemẹ akpa rọ suẹ ẹkuọn.”—1 Timothy 6:9.

Marhẹ ene ru mẹrẹn erere nẹ urhebro ro ni Baibol na rhe kpahen igho?

Ọwan i rha nyalele irhi Osolobrugwẹ kpahen oborẹ ana ha igho ruiruo lele, ne ne vwo ekwerhọ ọnẹyen ọrhẹ obẹhatua ye. Osolobrugwẹ o vive rẹn idibo yi ra damoma ga ye taghene, “o vwo ọke owuorowu mi na nyajẹ owẹwẹ vwo-o, mi jeghwai zẹ jẹ owẹwẹ vwo-o.” (Hebrews 13:5, 6) Osolobrugwẹ ọ ji yẹ ọwan imwẹro ọrọrọ taghene “ohworho rọ fuevwan ọnọ mẹrẹn ebrurhọ buebun.”—Proverbs 28:20.

Eghwẹmro i Baibol ri ta Kpahen Igho

Ecclesiastes 7:12: ‘Igho ọ sẹrorẹ ọwan.’

Oborẹ o mevirhọ: Arha ha igho ruiruo izede ẹghwanren, ọnọ sabu sẹrorẹ ọwan ibiesuọn.

Luke 12:15: “Ohworho ọrhọ tobọ vwo ekwakwa buebun dede, ọ sabu simi arhọ ye nyoma ekwakwa ro vwori na-a.”

Oborẹ o mevirhọ: Igho rhẹ oborẹ ọ mai ghanren uvuẹn akpọ ọwa-an, ọ sabu lẹrhẹ ọwan vwo arhọ-ọ.

1 Timothy 6:10: “Ẹguọlọ ọrẹ igho ọyẹ esiri kemru kemru rọ rhua ẹkuọn sa, ẹguọlọ ọnana ọ lẹrhẹ ihworho ezẹko beghe nẹ esegburhomẹmro na ne, ji dumu oma aye ephian rhẹ omiamiamo buebun.”

Oborẹ o mevirhọ: Ọ sọ re ne vwo igho-o. Ọrẹn ihworho ri vwo ẹguọlọ kpahen igho omamọ, ra ji haye ruẹ emru ukaro uvuẹn akpenyerẹn aye, a rhua ebẹnbẹn vwe oma aye, jerẹ ekrun ro vwo vwo omamerhomẹ ọrhẹ je vwo omọkpokpọ.

Hebrews 13:5: “Jenẹ akpenyerẹn are ọ vabọ ufiuvwele igho, nẹ are i vwo ẹhẹn otemẹ kpahen ekwakwa are i vwori.”

Oborẹ o mevirhọ: Ukperẹ ana hatua efe uvuẹn kizede kizede, o fori ne vwo ẹhẹn otemẹ kpahen oborẹ e vwori.

Matthew 19:24: “Ọnọ phẹrẹ rẹ ekẹrẹkẹtẹ ọnọ nyavrẹn unu eghwede, ghwẹ ọrẹ ọdafe ọnọ ruẹ uvuẹn Uvie Osolobrugwẹ.”

Oborẹ o mevirhọ: Jesu ọ ha use rẹn idama owu ro rhiẹ ọdafe no lelie. Ọrẹn ọdafe na nọ tenren fọkime o vwo ẹguọlọ kpahen ekwakwa ugboma ro vwori. Omarana, orhetio yi Jesu ọ haphia. Ohworho rọ hatua efe ukperẹ ono rhiẹ Osolobrugwẹ, o vwo arhọ-ọ.

a A ji rhian oghwẹmro na izede omana: “Ẹguọlọ ọrẹ igho ọyẹ esiri kemru kemru rọ rhua ẹkuọn sa.”