Ọrọmo Yẹ Osolobrugwẹ?

1. Mesoriẹ ọwan ena ga Osolobrugwẹ?

Osolobrugwẹ Urhomẹmro na ọyẹ ọ ma ekwakwa ephian. Ọye ovwo ọtonrhọ-ọ, o ji vwo oba-a. (Psalm 90:2) Ọye yẹ Ovwo iyẹnrẹn esiri rọ ha uvuẹn i Baibol na. (1 Timothy 1:11) Ofori taghene ọwan i ga Osolobrugwẹ, nime ọye yẹ ọyẹ rẹ ọwan arhọ.—Se Revelation 4:11.

2. Oka ohworho ọgo yẹ Osolobrugwẹ ọ havwọ?

O vwo ohworho rọ mẹrẹn Osolobrugwẹ dẹ ne-e, nime ọye ohworho ẹhẹn. Jerẹ ohworho Ẹhẹn, ọye ọ do ghwẹ emama ephian re nyerẹn uvuẹn otọrakpọ na. (John 1:18; 4:24) Jọrẹn, ọwan ena sabu vwrurhe Osolobrugwẹ nyoma ekwakwa rẹ ọye ọ marẹn. Jerẹ udje, oka emamọn sansan rhẹ idodo, a ta rẹn ọwan kpahen ẹguọlọ rhẹ eghwanren ọnẹyen. Ukekeri akpọ na odje omẹgbanhon ọnẹyen phia.—Se Romans 1:20.

Erhe yono i Baibol na, ọwan ine ghini sabu vwrurhe iruemru Osolobrugwẹ ovwori. Jerẹ udje, ọ ta kpahen oborẹ Osolobrugwẹ o vwo ẹguọlọ kpahen rhẹ oborẹ ọye ovwo utuoma kpahen, oborẹ ọye ọ mọrọn ihworho lele, rhẹ oborẹ ọye o ruẹ lele erhirhiẹ sansan.—Se Psalm 103:7-10.

3. Osolobrugwẹ o vwo odẹ?

Jesu ọ tare: “Ọsẹ ame rọ ha obẹ odjuwu, jenẹ e ru odẹ ọnọ fuanfon.” (Matthew 6:9) Dede Osolobrugwẹ ovwo edovan buebun, jọrẹn ọye ovwo odẹ owu ọvo. Edjadjẹ buebun i vwo oborẹ aye e seyi lele. Uvuẹn Okpẹ, e seyi “Jehova.” Ọrẹn, ihworho ezẹko e seyi “Yahweh.”—Se Psalm 83:18.

E tiẹ odẹ Osolobrugwẹ nẹ uvuẹn i Baibol buebun, na ha Ọrovwori yanghene Osolobrugwẹ wenie. Jọrẹn, ọke ra ya i Baibol na, odẹ Osolobrugwẹ ọ homaphia ọgbọ ro te 7,000. Jesu odje odẹ Osolobrugwẹ phia ọke rẹ ọye o yono ihworho kpahiẹn.—Se John 17:26.

Ni Ividio na Osolobrugwẹ O Vwo Odẹ?

4. Jehova ọ hẹrote ọwan?

Oja-ẹriọ buebun rọ ha uvuẹn ekete ephian odje phia taghene Jehova Osolobrugwẹ ọ vwọ hẹrọte ọwa-an? Ihworho buebun eroro taghene Osolobrugwẹ ọ ha oja-ẹriọ damu ọwan nẹ, ọrẹn ọrana ofian.—Se James 1:13.

Osolobrugwẹ ọ yẹ rẹ ọwan ephian ugbomọphẹ ene brorhiẹn. Orho fo taghene edje ọdaremẹro kpahen ugbomọphẹ ọnana ana ga Osolobrugwẹ na? (Joshua 24:15) Jọrẹn, ihworho buebun i djẹ odjẹ aye ine ru oborẹ obiomurun harẹn ihworho erọrọ, omaran na oja-ẹriọ ne buẹnrhọ-buẹnrhọ. Oma ọ vwọ merhen i Jehova ọ rhọ mẹrẹn osehiẹn enana-a.—Se Genesis 6:5, 6.

Jehova Osolobrugwẹ ọ vwo ọdamẹ kpahen ọwan. Ọguọlọre taghene ọwan i riẹ-akpọ. Phẹrẹkpẹ, ọye ono tiẹ oja-ẹriọ rhẹ ihworho ra suẹ nie. Ọrẹn, ọye o vwo omamọ iroro rọ ha uphẹn rẹn oja-ẹriọ ibiọke krẹn. Uvuẹn Uyono 8, ọwan ine yono kpahen oborẹ osoriẹ.—Se 2 Peter 2:9; 3:7, 13.

5. Marhẹ ọwan ine ru sabu ti kẹrẹ Osolobrugwẹ?

Jehova o se rẹ ọwan ne ti kẹriẹ nyoma ẹrhomo rhe. Ọye o vwo ọdamẹ kpahen ame owuowu. (Psalm 65:2; 145:18) Omwegbe ọnọ harhomu ọwan. Ọ mẹrẹn omẹdamu ọwan ene ru oma merhiẹn, dedevwo ọwan e ruẹ sọ. Udabọ i jẹgba ọwan, ọwan ena sabu vwo omamọ onyerẹnkugbe rhẹ Osolobrugwẹ.—Se Psalm 103:12-14; James 4:8.

Jehova ọ yẹ ọwan arhọ na, no fori nẹ ọwan i vwo ẹguọlọ kpahiẹn ghwẹ kohworho-kohworho. (Mark 12:30) Wu na sabu ti kẹrẹ Osolobrugwẹ nyoma wu ne vwo ẹguọlọ kpahiẹn, yono kpahiẹn, ji ru oborẹ ọye ọ tare.—Se 1 Timothy 2:4; 1 John 5:3.