Ojẹriọ ono vwoba dẹ?

OBORẸ I BAIBOL NA Ọ TARE

‘Osolobrugwẹ . . . ono hionron amioviẹ nẹ aye ẹro, uhwu orho rhirhiẹ ye-e, orho vwo omemwurhọ-ọ, yanghene unuebo oviẹ-ẹ, yanghene omiamiamo orho rhirhiẹ ye ghwomara-an.’—Revelation 21:3, 4, Contemporary English Version.

OBORẸ ỌRANA ỌNỌ SABU MEVIRHỌ WẸN

Imwẹro taghene rhẹ Osolobrugwẹ yọ suẹ ebẹnbẹn ọwa-an.—James 1:13.

Re rhe taghene Osolobrugwẹ o roro harẹn ọwan ọke arha rioja, ọ lẹrhẹ ẹhẹn ọwan totọre.—Zechariah 2:8.

Ẹruefirhọ ọ havwiẹ taghene ojẹriọ ephian ine vwoba.—Psalm 37:9-11.

ỌWAN INE GHINI SABU KWERHỌ OBORẸ I BAIBOL NA Ọ TARE?

Ee, orho riotọre, fọkiẹ iroro eva:

• Osolobrugwẹ o vwo utuoma kpahen ojẹriọ ọrhẹ osehiẹn. Gbe roro kpahen oborẹ ọ hobọte i Jehova te, ọke re sehiẹn ihworho yi ọke ahwanren. Baibol na ọ tare taghene oma ọ vwọ merhiẹn kpahen ‘ihworho re ruẹ aye gbalogbalo-o.’—Judges 2:18, New World Translation.

  Evwan o biomu Osolobrugwẹ kpahen ihworho ra ha ẹkuọn rẹn awọrọ. Jerẹ udje, Baibol ọrhọ ta taghene Osolobrugwẹ o vwo utuoma kpahen ‘ihworho re biomu ọbara.’—Proverbs 6:16, 17.

• Osolobrugwẹ o vwo ọdamẹ kpahen ọwan owuowu. Jerẹ oborẹ owuowọnwan ‘o rhe oborẹ ọ lahiẹ ọrhẹ oborẹ ọ miamiẹ’ ẹhẹn, omaran i Jehova o ji rhe yi!—2 Chronicles 6:29, 30.

  Phẹrẹkpẹ, Jehova ọnọ ha ojẹriọ ọwan toba nyoma Uvie yi. (Matthew 6:9, 10) Ọrẹn vwana, Jehova ọ ha urhebro rẹn ihworho ra guọliẹ nẹ ẹhẹn sa.—Acts 17:27; 2 Corinthians 1:3, 4.