Abraham Ọrhẹ Sarah i Huvwele Osolobrugwẹ

O vwo amwa owu re se Ur, ọ ghwai seri phan rẹn amwa i Babel na-a. Ihworho ri ha uvuẹn amwa na a ga isolobrugwẹ buebun, aye i vwa ga i Jehova-a. Ọrẹn, o vwo ọhworhare owu uvuẹn Ur rọ ga i Jehova. Odẹ ọhworhare na Abraham.

Jehova nọ ta rẹn Abraham: ‘Nyajẹ oghwa ọnọ ọrhẹ imizu enọ vwo, ne wu riẹ ẹkwotọre mi ne dje wẹn na.’ Osolobrugwẹ no vive hariẹn: ‘Wu ne rhiẹ agbamwa ọduado, ni mi ne ruẹ ekwakwa irhorhomu rẹn ihworho ri ha uvuẹn otọrakpọ na fọkiẹ owẹwẹ.’

Abraham o rhe ekete i Jehova o dje yi nya na-a, ọrẹn ọ hẹroso i Jehova. Omarana, Abraham, aniẹ re se i Sarah, ọsẹ ye re se Terah, ọrhẹ ọmọ omizie re se i Lot ni huvwele i Jehova, aye ni kwa nẹ Ur.

Abraham ọ ha ẹgbukpe 75, ọke ọye ọrhẹ ekrun ọnẹyen e te ẹkwotọre ri Jehova ọ guọlọre taghene aye i nya na. E se ẹkwotọre na Canaan. Avwaye, Osolobrugwẹ no vive rẹn Abraham: ‘Mi na ha ọsoso ẹkwotọre wa mẹrẹn na rẹn emọ enọ.’ Abraham ọrhẹ Sarah i ho ne, ọrẹn, aye e ji vwiẹ ọmọ-ọ. Marhẹ i Jehova ono ru ha ive ọnẹyen te orugba?