Moses ọ djẹ Odjẹ rọ nọ ga i Jehova

Ne me rhe ekrun i Jacob rhẹ emọ Israel uvuẹn Egypt. Ọke i Jacob ọrhẹ Joseph e hwu hin, Pharaoh ọrọrọ nọ yo sun Egypt. Ofẹn no mwuie taghene emọ Israel ine vwo omẹgbanhon ghwẹ itu Egypt. Omarana, Pharaoh ọnana nọ ha emọ Israel ruẹ evrẹn. Nọ gba aye nẹ aye i rha ma iblọku riẹn, nọ jeghwai ha aye wian owian ọgbogbanhon uvuẹn ikebi ọnẹyen. Itu Egypt a ha oja riẹ emọ Israel dede, ọrẹn, emọ Israel ne buẹnrhọ buẹnrhọ. Nime Pharaoh ọ guọlọ ọrana-a, no jurhi taghene e kpe emọ Israel ehworhare re vwiẹre obọ. Wu na sabu roro oborẹ ofẹn o mwu emọ Israel te?

Ọmase owu re se Jochebed ro rhiẹ onyẹ Israel no vwiẹ ọmọ ọhworhare ro vwo erhumu omamọ. Nọ sabu sẹrorẹ ọmọ na, no fi rie rhẹ okalokpọ, nọ kpareriẹ rhẹ okokọ odin ri ha uvuẹn urhie re se Nile. Omizu ọmọ na re se Miriam nọ dẹrẹ ọmọ na, nọ mẹrẹn oborẹ ọnọ phia rẹn ọmọ na.

Ọmọ ọgbọtọ i Pharaoh nọ rhe ma wọ uvuẹn urhie na, nọ mẹrẹn okalokpọ na. Nọ mẹrẹn ọmọ na uvuien rọ viẹ, aro ọmọ na nọ dọn riẹn. Miriam nọ nọ riẹn: ‘Mi ye se ọmase rọ nọ hẹrote ọmọ na wẹn?’ Ọke ọmọ ọgbọtọ i Pharaoh o kwe riẹn, Miriam no ye se Jochebed ro rhiẹ izie rhe. Ọmọ ọgbọtọ i Pharaoh nọ ta riẹn: ‘Kpare ọmọ na, ne wu hẹrote yi mẹ, mi na kwosa wẹn.’

Ọke ọmọ na ọ ghwanren ibiesuọn, Jochebed nọ kpareriẹ vwe ọmọ ọgbọtọ i Pharaoh, ọmọ ọgbọtọ i Pharaoh no serie Moses jeghwai hẹrote yi jerẹ ọmọyen. Moses no rhiẹ ọmọ orodje, ọye ọnọ sabu vwo oborẹ ọ guọlọre ephian. Ọrẹn, Moses ọ karorhọ i Jehova ọke na ephian. Ọye o rheri taghene ọye onyẹ Israel. Nọ djẹ odjẹ rọ nọ ga i Jehova.

Ọke i Moses o te ẹgbukpe 40, nọ djẹ odjẹ rọ nọ ha userhumu rẹn ihworho yi. Ọke rọ mẹrẹn onyẹ Egypt ro kpe onyẹ Israel, Moses nọ ghwiẹ onyẹ Egypt na gbanhon omamọ, no hwuru. Moses no sin ohworho na. Ọke i Pharaoh o rhon kpahiẹn, nọ guọlọ kpe i Moses. Ọrẹn, Moses nọ zẹ riẹ ẹkwotọre i Midian. Jehova nọ hẹrote yi uvuẹn i Midian.