Ikpokpogho Esa Erukaro na

Ọke oru, na gba emọ Israel na wian ewian egbogbanhon jerẹ evrẹn uvuẹn Egypt. Jehova no dje Moses ọrhẹ Aaron bru i Pharaoh, aye ni ta riẹn: ‘Tiobọnu ihworho mẹ, neneyo aye i sabu ya ha ẹga mẹ uvuẹn ato.’ Ọrẹ aruehinmo, Pharaoh nọ tare: ‘Mia damerhọ oborẹ i Jehova ọ tare-e, mi tiobọnu emọ Israel na nẹ aye i nyarhẹ-ẹn.’ Omarana, Pharaoh nọ gba emọ Israel na wian ewian egbogbanhon erọrọ. Jehova ọnọ ha oja riẹ i Pharaoh. Wu rhe oborẹ o rurie lele? Jehova nọ ha Ikpokpogho Ikpe na vwe itu Egypt. Jehova nọ ta rẹn i Moses: ‘Pharaoh o kwerhọ oborẹ mi tare-e. Urhiọke odẹ rọ sa na, Pharaoh ọ samọ riẹ Urhie i Nile. Bruie ne wu ta riẹn taghene, nime o kwe tiobọnu ihworho mẹ nẹ aye i nyarhẹ-ẹn, ọsoso Urhie i Nile na, ọnọ dẹriẹrhiẹ ọbara.’ Moses no bru i Pharaoh nya. Pharaoh no ni Aaron ọke rọ ha ukorọkpọ ye te Urhie i Nile na, urhie na nọ dẹriẹrhiẹ ọbara. Urhie na no gbon, irhenrin ri ha uvuien ni hwuru, orho vwo ame rọ fonron aye ina da uvuẹn urhie na ghwomara-an. Pharaoh o ji kwe tiobọnu emọ Israel nẹ aye i nyarhẹ-ẹn.

Ẹdọke irhiruẹ a vrẹn hin, Jehova no dje i Moses bru i Pharaoh, rhẹ ẹmro enana: ‘We rhe kwe tiobọnu ihworho mẹ nẹ aye i nyarhẹ-ẹn, igoro ina vuọn Egypt.’ Aaron nọ riẹn ukorọkpọ ye rierun, igoro ni vuọn otọre na ephian. Ihworho na mẹrẹn igoro uvuẹn oghwa aye, uvuẹn ukpe aye, ọrhẹ uvuẹn imize aye. Igoro ni vuọn ekete ephian! Pharaoh nọ ta rẹn i Moses nọ rẹ i Jehova nọ dobọ ukpokpogho na ji. Pharaoh nọ tare taghene ono tiobọnu emọ Israel, nẹ aye i nyarhẹn. Jehova nọ ghini dobọ ukpokpogho na ji, itu Egypt ni koko igoro ri hwuru na rhọ ẹko sansan. Ekete ephian no gbon. Ọrẹn, Pharaoh o ji kwe tiobọnu ihworho na nẹ aye i nyarhẹ-ẹn.

Omarana, Jehova nọ ta rẹn i Moses: ‘Ta rẹn Aaron nọ ha ukorọkpọ ye fomu otọre, eyẹn ni na dẹriẹrhiẹ etọlọ.’ Ogege, etọlọ ni vuọn ekete ephian. Itu Egypt ezẹko ni ta rẹn Pharaoh: ‘Obẹ Osolobrugwẹ yẹ ukpokpogho ọnana o nẹ sa.’ Ọrẹn, Pharaoh o ji kwe tiobọnu emọ Israel nẹ aye i nyarhẹ-ẹn.