Oborẹ wu ne ru Mẹrẹn Erere we rhe se i Baibol na

O vwo owian ọduado wu guọlọ tonrhọ dẹ ne, ọrẹn, nu we roro taghene ọ gbanhon phan? Neneyo owian na ọ sabu lọhọ wẹn, wu na guọlọ rha wian yen bibiesuọn. Omaran isese i Baibol ọ ji havwọ. Wu na sabu nọ, ‘Bọgo mi na tonrhọ?’ Uvuẹn uyono ọnana, ene yono kpahen ekwakwa elolọhọ ezẹko wu na sabu ru, ri na ha userhumu wẹn riamerhen isese ọrhẹ uyono i Baibol.

1. Mesoriẹ o fo ne rhe se i Baibol na kọke kọke?

Ohworho ro se i Baibol na yanghene “urhi Jehova” kọke kọke, ọnọ mẹrẹn omamerhomẹ ọrhẹ ifiẹrorhọ. (Se Psalm 1:1-3.) Wa rha guọlọ tuẹn isese i Baibol rhọ, damoma se yi iminiti ezẹko kẹdẹkẹdẹ. Wa rha riẹnrioma rhẹ Ẹmro Osolobrugwẹ ne, ne wu na rha riamerhen isese i Baibol ọnọ.

2. Me yọ nọ ha userhumu wẹn mẹrẹn erere we rhe se i Baibol na?

Na sabu mẹrẹn erere erhe se i Baibol na, o fori ne zikẹn, ji roro kpahen oborẹ e se na. Ọwan ine vi se yi, “jeghwai roro kpahiẹn.” (Joshua 1:8, ekete ra djokarhọ) We rhe se i Baibol na, nọ oma enọ jerẹ: ‘Me yẹ ọnana ọ ta mẹ kpahen Jehova Osolobrugwẹ? Marhẹ mi ne ru ha ọnana ruiruo uvuẹn akpenyerẹn mẹ? Marhẹ mi ne ru ha eghwẹmro enana ha userhumu rẹn awọrọ?’

3. Marhẹ wu ne ru kwaphiẹ ọke rhọ wu ne se i Baibol na?

Wu vwo ebẹnbẹn wu na kwaphiẹ ọke rhọ wu ne se i Baibol na? Ihworho buebun a mẹrẹn ebẹnbẹn ọnana. Damoma ne wu ‘dabu ha ọke ọnọ ruiruo.’ (Ephesians 5:16) Wu na sabu ru ọnana nyoma wu na sanọ ọke wu ne se i Baibol na kẹdẹkẹdẹ. Ihworho ezẹko e se i Baibol na igidurhiọke. Awọrọ e se yi uvwrọke ọrọrọ uvuẹn ẹdẹ na, ọkezẹko ọke aye e ronmoma riẹ emaren erhẹrhuvo. O ji vwo ezẹko re se i Baibol na owuọwọn aye e ki semerhẹn. Ọkiọgo yọ mai serhọ wẹn?

YONO KODO RHỌ

4. Yono oborẹ wu ne ru riamerhen isese i Baibol

Ọkezẹko, ọnọ sabu bẹn wu na tuẹn isese i Baibol rhọ. Ọrẹn, wu na sabu yono oborẹ a riamerhen isese i Baibol, jerẹ oborẹ we yono oborẹ a riẹ emaren wu vwa ji re dẹ. Se 1 Peter 2:2, orho ru, are i gba kpahenrhọ onọ ọnana:

• We rhe se i Baibol na kẹdẹkẹdẹ, wu rorori taghene ọnọ lẹrhuọ riamerhiẹn, jeghwai rhe se yi kọke kọke?

Kporo IVIDIO na ne wu mẹrẹn oborẹ ihworho ezẹko i ru mẹrẹn erere ọke aye a tuẹn i Baibol e se rhọ. Orho ru, are i gba kpahenrhọ enọ enana.

IVIDIO: Iphuphẹn ri Vwo Ẹguọlọ Kpahen Ẹmro Osolobrugwẹ (5:33)

• Uvuẹn ividio na, egbobọse ego yẹ iphuphẹn na i fikparobọ?

• Me yọ ha userhumu rẹn aye rhe se i Baibol na kọke kọke?

• Me yẹ aye i ruru nẹ aye i sabu rha riamerhen isese i Baibol na?

Irorẹdjẹ ezẹko ri na ha userhumu wẹn tonrhọ:

• Sanọ erhianrhian rọ gbare wu na sabu vwẹruọ ye. Ha i Baibol i New World Translation ruiruo, orhianẹ ọ havwiẹ uvuẹn edjadjẹ ọnọ.

• Tuẹn isese na rhọ nẹ ekete rọ mai merhuọn oma. Ne wu rhe oborẹ wu ne ruie lele, ni ishati na, “Tuẹn Isese i Baibol Rhọ.”

• Djokarhọ oborẹ wu seri. Ha ishati na “Djokarhọ Isese i Baibol Ọnọ” ruiruo, rọ ha uvuẹn ọbe ọnana.

• Ha i JW Library^® app ruiruo. Wu rhe fie rhẹ ifonu yanghene ikọmputa ọnọ, wu na sabu ha ye se yanghene kerhọ isese i Baibol na ekete wu havwọ ephian.

• Ha appendix ri ha uvuẹn i New World Translation ruiruo. O vwo imapu, ishati, ọrhẹ iglọzri uvuien, ri na lẹrhuọ riamerhen isese i Baibol.

5. Mwuegbe hẹrhẹ uyono i Baibol ọnọ

Se Psalm 119:34, orho ru, are i gba kpahenrhọ onọ ọnana:

• Mesoriẹ o fo ne wu nẹrhomo wu ki tuẹn isese i Baibol rhọ, yanghene ọke wa guọlọ mwuegbe uyono i Baibol ọnọ?

Marhẹ wu ne ru mẹrẹn erere uvuẹn uyono na? Ọke we mwuegbe uyono owuowu uvuẹn ọbe ọnana, damoma ne wu ha ena enana ruiruo:

1. Se idjaghwẹ ri ha uvuẹn ọtonrhọ uyono na.

2. Se ekete i Baibol na, ne wu damoma vwẹruọ oborẹ aye i ru sekpahen oborẹ we yono na.

3. Djokarhọ ẹmro kirighwo ri kpahenrhọ enọ owuowu; ọnana ọnọ lẹrhẹ uyono na lọhọ ha wẹn ọrhẹ ohworho ro yonuo.

Wu rheri?

Iseri Jehova i ha erhianrhian i Baibol sansan ruiruo dẹ ne. Ọrẹn, Baibol i New World Translation of the Holy Scriptures yọ mai je ame, fọkime ọgbare, o fiotọre, ọ ji ha odẹ Osolobrugwẹ ruiruo.—Se Urhomu-ẹmro ọnana rọ ha uvuẹn itanẹti “Iseri Jehova i Vwo i Baibol Obọ Aye?”

ME WU YONORIN?

Ne wu sabu mẹrẹn erere ni Baibol na, kwaphiẹ ọke rhọ wu ne se yi, nẹrhomo ne wu sabu vwẹruọ ye, jeghwai mwuegbe uyono na owuowu.

Ẹzẹkoko

• Me yọ nọ ha userhumu wẹn mẹrẹn erere nẹ i Baibol na?

• Ọkiọgo wu na sabu kwaphiẹrhọ wu ne se, jeghwai yono i Baibol na?

• Erere ego yi havwiẹ wu rhe mwuegbe uyono i Baibol owuowu?

GUỌLỌ IYẸNRẸN ERỌRỌ

Rharhumu se irorẹdjẹ ezẹko ri na ha userhumu wẹn mẹrẹn erere nẹ isese i Baibol na.

“Oborẹ wu ne ru Mẹrẹn Erere we rhe se i Baibol na” (Oghwa Odẹrẹ Ikekele 1 2017)

Yono kpahen izede esa ri na ha userhumu wẹn se i Baibol na.

“Marhẹ i Baibol na Ono ru ha Userhumu mẹ?—Obọrẹ Ukaro: Dabu Rhe i Baibol Ọnọ” (Urhomu-ẹmro rọ ha uvuẹn itanẹti)

Yono oborẹ wu ne ru riamerhen isese i Baibol na.

“Marhẹ i Baibol na Ono ru ha Userhumu mẹ?—Obọreva: Riamerhen Isese i Baibol” (Urhomu-ẹmro rọ ha uvuẹn itanẹti)

Yono mie ihworho ezẹko ri riamerhen isese i Baibol na ẹgbukpe buebun ne

Uyono Omobọ Ro Mwidjẹn (2:06)