Ona Uyono

Yono Kpahen Iruemru Eghoghanren i Jehova Rhọ

Ọke re se i Baibol na, ana sabu guọlọ riarorhọ ne vwẹruọ oborẹ e se na. Ọrẹn, o fori ne ru vrẹn ọrẹ ana ghwai guọlọ riarorhọ ne vwo irherhe. Ọwan i guọlọ rhe kpahen efe erẹ ẹhẹn ri sekpahen iruemru i Jehova, ri na lẹrhẹ ọwan vwo ẹguọlọ kpahiẹn rhọ. Ne ruẹ ọnana, ana sabu nọ oma ọwan, ‘Me yẹ iyẹnrẹn i Baibol ọnana o yoni mẹ kpahen Jehova?’

Ana sabu guọlọ imwẹro ri dje iruemru i Jehova enana phia: ẹguọlọ, ẹghwanren, orhienbro ọsoso, ọrhẹ omẹgbanhon. Ọrẹn, orhiẹ erana ọvo yẹ iruemru ri Jehova o vwori-i. O ji vwo iruemru irhorhomu erọrọ. Bọgo wu na sabu mẹrẹn iyẹnrẹn erọrọ kpahen iruemru enẹyen?

Yono kpahen iruemru erọrọ ri vrẹn 50 ri ha Watch Tower Publications Index, ro vwo urhomu-ẹmro na “Jehovah” ọrhẹ oghwẹmro na “Qualities by Name.” Guọlọ riarorhọ kpahen iyẹnrẹn ri serhọ rhẹ oghwẹmro i Baibol we se na. (Orhianẹ Research Guide for Jehovah’s Witnesses ọvo wu na ha guọlọ riarorhọ, se urhomu-ẹmro na “Jehovah God” ọrhẹ oghwẹmro na “Jehovah’s Qualities.”)