Guọlọ Efe Erẹ Ẹhẹn wu na Sabu ha Ruiruo

Ọke re se i Baibol na, ana sabu guọlọ efe erẹ ẹhẹn nyoma ra na guọlọ riarorhọ kpahen ihwẹnmro eghoghanren. Ọrẹn, marhẹ ene ru mẹrẹn erere rhọ?

Guọlọ kodorhọ uvuẹn iyẹnrẹn i Baibol na. Jerẹ udje, guọlọ ohworho rọ ya oghwẹmro i Baibol owu, ohworho rọ yariẹ vwe, ọrhẹ ọke rọ ya ye. Me yẹ erhirhiẹ na, me yọ phiare bi, me yọ phiare ọke oru?

Roro kpahen oborẹ wu na sabu yono nyoma wu na guọlọ kodorhọ kpahen aruẹ enọ enana: ‘Marhẹ oma o ruẹ ihworho we se kpahan na? Iruemru ego yẹ aye i djephia? Mesoriẹ o fo ne mi hẹrokele aye yanghene kẹnoma rẹn aruẹ iruemru erana?’

Ha ekwakwa wu yonorin na ruiruo, ọkezẹko uvuẹn aghwoghwo na, yanghene ọke we lele awọrọ ruẹ kugbe. We rhe ruẹ ọnana, wu ne dje ẹghwanren ro nẹ obẹ i Jehova phia, jerẹ oborẹ i Baibol na ọ tare: “Kohworho kohworho ro vwo ẹghwanren ono ni ekwakwa enana so.”—Ps. 107:43.

• Irorẹdjẹ: Djokarhọ oborẹ iyẹnrẹn ri ha uyono re ruẹ erhẹrhẹ ọkprughwre na, uvuẹn oghọn Efe ri nẹ Ẹmro Osolobrugwẹ Rhe, e ru ha userhumu rẹn ọwan tẹnrovi oborẹ ene ru ha oborẹ e yonorin ruiruo. Ọgbọ buebun, oghọn ọnana o vwo enọ ra na sabu nọ oma ọwan, ihwẹnmro ra na sabu roro kodo kpahen, ọrhẹ idje ra na sabu niso.