Homariotọre Kwerhọ Oborẹ wu Vwe Vwẹruọ ye

1. Omẹgbanhon ọgo yi Jehova ọ yẹrẹ ọwan, mesoriẹ?

JEHOVA ọ maren ọwan rhẹ omẹgbanhon re ne roro emru, vwo irherhe ọrhẹ ọmẹrẹnvwrurhe, ji dje ẹghwanren phia. Mesoriẹ ọ ma ọwan omaran? Ọ gwọlọre ne “vwo irherhe Osolobrugwẹ” ji ha omẹgbanhon iroro ọwan ga ye.—Prov. 2:​1-5; Rom. 12:1.

2. (a) Me yo fori ne rhe kpahen oma ọwan? (Job 37:​23, 24) (Ji ni ifoto na.) (b) Erere ọgo ya na mẹrẹn arha homariotọre kwe taghene e rhe i kemru kemru-u?

² Dedevwo ọwan i vwo omẹgbanhon re ne yono ekwakwa ekpokpọ, ọrẹn orhiẹ ekwakwa ephian ya na sabu yono kpahe-en. (Se Job 37:​23, 24.) Jerẹ udje, roro kpahen udje i Job. A nọriẹn enọ buebun ri ha userhumu riẹn rhe taghene o vwo ekwakwa buebun ro vwo rhe. Ọnana ọ lẹrheriẹ vwo omeriotọre ji ha userhumu riẹn kpọ iroro yi vi. (Job 42:​3-6) Ana ji mẹrẹn erere orhianẹ a homariotọre kwerhọ ye taghene e rhe i kemru kemru-u. Aruẹ omeriotọre ọnana ono mwu ọwan hẹroso i Jehova taghene ọnọ ghini ta rẹn ọwan oborẹ o fori ne rhe na sabu djẹ odjẹ ri serhọ.—Prov. 2:6.

3. Me ye ne yono kpahen uvuẹn urhomu-ẹmro ọnana?

³ Uvuẹn urhomu-ẹmro ọnana, ene yono kpahen ekwakwa ezẹko re vwe rhe, ọrhẹ ebẹnbẹn ra na sabu dẹrughwaroghwu fọkiẹ ọnana. Ene ji yono kpahen oborẹ ọsoriẹ o rhomu taghene orhiẹ i kemru kemru ye rheri-i. Ọnana ọnọ bọn imwẹro ọwan gbanhon taghene Jehova “ro rhiẹ Ohworho ro vwo irherhe ọgbagba,” ọnọ ta rẹn ọwan oborẹ o fori ne rhe kpahen.—Job 37:16.

ỌWAN E RHE ỌKE OBA NA ỌNỌ RHE-E

4. Lele oborẹ ọ ha uvuẹn Matthew 24:​36, me yẹ emru owu re vwe rhe?

⁴ Se Matthew 24:36. Ọwan e rhe ọke enyerakpọ ọnana ono toba-a. Ọke i Jesu ọ tobọ ha otọrakpọ na, o rhe “ẹdẹ ọrhẹ unọke” na-a.a Ọke oru, nọ ta rẹn inyikọ ye taghene Jehova ro rhiẹ Ọrọ Mai Nya Mwu Ọke na, ono ruẹ ekwakwa ephian uvuẹn “ọke” ọrhẹ ohra ro serhọ riẹn. (Acts 1:​6, 7) Jehova o bru ọke rẹ enyerakpọ ọnana ono toba ne, ọrẹn ọ sabu jẹ ọwan rhe ọke na-a.

5. Me yọ nọ sabu phia rẹn ọwan fọkime e rhe ẹdẹ oba na-a?

⁵ Sekpahen oborẹ i Jesu ọ tare, ọwan e rhe oborẹ ana hẹrhẹ jiri te bọmọke oba na ọnọ ki rhe-e. Fọkiẹ ọnana, ẹhẹn ọwan ọnọ sabu seriotọre maido orhianẹ o jiri ne ra hẹrhẹ ẹdẹ i Jehova nọ rhe. Yanghene ẹhẹn ọwan ọnọ sabu seriotọre orhianẹ ihworho ekrun ọwan ọrhẹ awọrọ a ha ọwan djechẹẹ. (2 Pet. 3:​3, 4) Ana sabu rhe roro taghene orhianẹ e rhe ẹdẹ oba na, manẹ ọ lọhọ re ne vwo erhionrin ji din echẹdjẹ.

6. Mesoriẹ o rhomu taghene e rhe ọke oba na ọnọ rhe-e?

⁶ Urhomẹmro taghene ọwan e rhe ẹdẹ oba na-a, ọrẹn ọnana ọnọ yẹ ọwan uphẹn re ne djephia rẹn i Jehova taghene a ga ye fọkiẹ ẹgwọlọ ọrhẹ ẹruẹhaso re vwo kpahiẹn. Ọwan i vwa ga i Jehova rhẹ ẹhẹn ra na dobọji obaro na-a, kamẹriẹn o vwo ọke re bru rhọ ogame ọwan. Ukperẹ ana tẹnrovi ọke “ẹdẹ i Jehova” ọnọ rhe, o fori na tẹnrovi ebrurhọ rẹ ẹdẹ ọrana ọnọ rhua vwe ọwan. Erhe ruẹ omaran, ene tikẹrẹ i Jehova rhọ, hẹrosuiẹ, ji damoma ruẹ oborẹ ọnọ lẹrhẹ oma merhiẹn.—2 Pet. 3:​11, 12.

7. Me yẹ ọwan i rheri?

⁷ O fori na tẹnrovi oborẹ e rheri—taghene ẹdẹ ri koba na ọ tonrhọ ẹgbukpe 1914. Jehova o tiobọnu aruẹmẹrẹn i Baibol sansan ri ha userhumu rẹn ọwan rhe ẹgbukpe ọrana, ji dje kpahen oborẹ akpọ na ono rhirhiẹ nẹ ọke ọrana rhe. Fọkiẹ ọrana, e vwo imwẹro taghene “ẹdẹ rode i Jehova o tikẹrẹ ne.” (Zeph. 1:14) Ọwan i ji rhe owian ri Jehova ọ gwọlọre na wian, nọyẹ ọrẹ ene ghwoghwo “iyẹnrẹn esiri Uvie na” rẹn ihworho buebun. (Matt. 24:14) Vwana, e ghwoghwo iyẹnrẹn esiri na uvuẹn ẹkwotọre ri vrẹn 240, ọrhẹ edjadjẹ ri vrẹn 1,000. O fori ne ghwoghwo iyẹnrẹn esiri na rhẹ oruru, sẹ e rhe “ẹdẹ ọrhẹ unọke” na yanghene e rhe yi-i.

ỌWAN E RHE OBORẸ I JEHOVA ONO RUẸ EKWAKWA LELE-E

8. Me yẹ “owian Osolobrugwẹ urhomẹmro na” o mevirhọ? (Ecclesiastes 11:5)

⁸ Ọwan i sabu rhe “owian Osolobrugwẹ urhomẹmro na” hiẹ-ẹn (Se Ecclesiastes 11:5.) Ẹmro ọrana o mevirhọ oborẹ i Jehova o ruru yanghene oborẹ ọ ha uphẹn riẹn nọ phia, neneyo ọhọriẹ ọ sabu te orugba. Ọwan i sabu rhe oborẹ ọsoriẹ Osolobrugwẹ ọ ha uphẹn rẹn ekwakwa ezẹko nẹ aye i phia, yanghene oborẹ ono simi ọwan lele-e. (Ps. 37:5) Jerẹ oborẹ itu isayẹnsi i vwa dabu vwẹruọ oborẹ ọmọ rọ ha uvuẹn ephan izie o ru dua, omaran ọwan ine je vwẹruọ irherhe Osolobrugwẹ.

9. Ebẹnbẹn ego ya na sabu dẹrughwaroghwu fọkime e rhe oborẹ i Jehova ọnọ ha userhumu rẹn ọwan lele-e?

⁹ Ọkezẹko, e ruẹ sikẹnsikẹn re ne brorhiẹn, fọkime e rhe oborẹ i Jehova ọnọ ha userhumu rẹn ọwan lele-e. Ana sabu tirierhumu re ne kerabọ owian aghwoghwo ọwan, yanghene ru akpenyerẹn ọwan lọhọ na sabu ya ga uvuẹn ekete ra gwọlọ ighwoghwẹmro Uvie na. Ọkezẹko, ana sabu rhe roro taghene e vwo ekwerhọ Osolobrugwẹ-ẹ, fọkime a vwa sabu nyamwu ẹkẹ re bruru yanghene mẹrẹn erere uvuẹn owian aghwoghwo na-a, yanghene ana sabu rhiẹromẹrẹn ebẹnbẹn uvuẹn owian ebanbọn ukoko na.

10. Iruemru ego ya na sabu vwo fọkime e rhe oborẹ i Jehova o ruẹ ekwakwa lele-e?

¹⁰ Ra mẹriẹn taghene ọwan e rhe oborẹ i Jehova ono ruẹ ekwakwa lele-e, na sabu vwo obọdẹn iruemru jerẹ omeriotọre ji rhe ekete omẹgbanhon ọwan o teri. Ọwan i mẹrẹnvwrurhe ne taghene iroro ọrhẹ izede i Jehova i do ghwẹ ọrẹ ọwan. (Isa. 55:​8, 9) E ji yono oborẹ ọ ghanren te ne na hẹroso i Jehova vuọnvuọn, ji hẹrosuiẹ taghene ene fikparobọ. Arha mẹrẹn erere uvuẹn owian aghwoghwo na yanghene owian ebanbọn ukoko na, na ha ujiri na rẹn i Jehova. (Ps. 127:1; 1 Cor. 3:7) Orhianẹ ekwakwa a phia lele oborẹ e fiẹrorhọ-ọ, o fori na karorhọ taghene Jehova yo suẹn ekwakwa ephian. (Isa. 26:12) O fori ne ruẹ ekete omẹgbanhon ọwan o teri, ji hẹroso i Jehova taghene ọnọ ha userhumu rẹn ọwan. E vwo imwẹro taghene ọnọ yẹ ọwan ọkpọvi ra gwọlọre, ọrhọ tobọ rhianẹ ọ vẹnẹ izede igbevwunu jerẹ oborẹ o ru vrẹn ne uvuẹn erhirhiẹ ezẹko ọke ahwanren.—Acts 16:​6-10.

11. Me ye rheri rọ nọ sabu ha userhumu rẹn ọwan?

¹¹ O fori na karorhọ taghene Jehova o dje ẹgwọlọ, orhienbro ọsoso, ọrhẹ ẹghwanren phia ọke ephian. E rheri taghene ọ ha ukẹro ọghoghanren ni oborẹ e ruẹ riẹn ọrhẹ imizu ukoko na erọrọ. Ọwan i ji rhe taghene Jehova ọnọ ha ebrurhọ rẹn ihworho ri vwo atamwu kpahiẹn.—Heb. 11:6.

ỌWAN E RHE OBORẸ ODẸ ONO RHIRHIẸ-Ẹ

12. Lele oborẹ ọ ha uvuẹn James 4:​13, 14, imwẹro ọgo ye vwori?

¹² Se James 4:​13, 14. Itiọrurhomẹmro, ọwan e rhe oborẹ akpọ ono rhirhiẹ rẹn ọwan odẹ-ẹ. Uvuẹn enyerakpọ ọnana, “ọke ọrhẹ oborẹ e vwe fiẹrorhọ” ọnọ sabu phia rẹn ọwan. (Eccl. 9:11) Fọkiẹ ọnana, ọwan i sabu rhe sẹ iroro ra djẹre ono vwo efikparobọ-ọ, ọrhọ tobọ rhianẹ a ji ha akpọ dede.

13. Marhẹ ọfiamu kpahen obaro na ono ru hobọte ọwan?

¹³ Obẹnbẹn owu ra na sabu rhiẹromẹrẹn, yẹ ọfiamu kpahen obaro na. Izede ọgo? Erhe brudu phan kpahen oborẹ ọnọ phia obaro na, erhe vwo aghọghọ-ọ. Ekwakwa ibiobiomu ri phia rẹn ọwan ọrhẹ oborẹ e vwe fiẹrorhọ ri phiare, ọnọ sabu lẹrhẹ ọwan mwuomarhọ ji kpe ẹhẹn ọwan riotọre. Habaye, oborẹ e fiẹrorhọ ọrhọ phia-a, ẹhẹn ọwan ọnọ sabu seriotọre.—Prov. 13:12.

14. Me yẹ omamerhomẹ ọwan o surhobọmwu? (Ji ni ifoto na.)

¹⁴ Erhe din ebẹnbẹn, ne djephia taghene ẹgwọlọ yo mwu ọwan ga Ọsẹ ọwan obẹ odjuwu, orhiẹ ọdamẹ omobọ ọwa-an. Iyẹnrẹn i Baibol o djephia taghene orhiẹ ọke ephian yi Jehova ọnọ sẹrorẹ ọwan nẹ ebẹnbẹ-ẹn, habaye, orhiẹ ọye yọ lẹrhẹ ekwakwa ibiobiomu phia rẹn ọwa-an. O rheri taghene omamerhomẹ ọwan o surhobọmwu oborẹ obaro na ono rhirhiẹ-ẹ. Ukpomaran, o surhobọmwu ọkpọvi ọnẹyen ra nyalele ọrhẹ uphele ẹha. (Jer. 10:23) Arha nekpẹn urhebro mie yi bọmọke e ki brorhiẹn, na haye ta taghene: “Orho rhiẹ ọhọre i Jehova, ọwan ine nyerẹn ji ruẹ ọnana yanghene ọrana.”—Jas. 4:15.

15. Me yẹ ọwan i rhe kpahen obaro na?

¹⁵ Dedevwo ọwan e rhe oborẹ odẹ ono rhirhiẹ-ẹ, ọrẹn e rheri taghene Jehova o ve rẹn ọwan ne taghene ọnọ yẹ ọwan arhọ i bẹmẹdẹ—sẹ obẹ odjuwu yanghene otọrakpọ na. E rheri taghene ọ sabu mọrenfia-an, habaye, ive yi ephian ine vi te orugba. (Titus 1:2) Ọye ọvo yọ nọ sabu ‘ta oborẹ emru ono rhirhiẹ, ji ta kpahen ekwakwa ri vwa ji phia nẹ ọke jijiri rhe.’ Aruẹmẹrẹn sansan i te orugba ne, e ji vwo imwẹro taghene eri hẹrhẹre ine rugba obaro na. (Isa. 46:10) E rheri dẹn taghene emru owuorowu ọ sabu da i Jehova obọ jẹ-ẹ. (Rom. 8:​35-39) Ọnọ yẹ ọwan ẹghwanren, urhebro ọrhẹ omẹgbanhon ra gwọlọre, na sabu din ebẹnbẹn ephian ra dẹrughwaroghwu. Jene vwo imwẹro taghene Jehova ọnọ ha userhumu ọrhẹ ebrurhọ rẹn ọwan.—Jer. 17:​7, 8.

A SABU VWẸRUỌ OBORẸ I JEHOVA O RHERI ỌWAN TE-E

16. Lele oborẹ ọ ha uvuẹn Psalm 139:​1-6, irherhe ọgo yi Jehova o vwori ra na ja sabu vwẹruọ ye?

¹⁶ Se Psalm 139:​1-6. Ọmemama ọwan o rhe oborẹ a maren ọwan lele, o ji rhe ebẹnbẹn sansan ra dẹrughwaroghwu ne. O vwo ọdamẹ kpahen ọwan omamọ. O rhe oborẹ ọwan a ta ọrhẹ oborẹ o mwu ọwan ta ye, kugbe oborẹ e ruẹ ọrhẹ oborẹ o mwu ọwan ruie. Jerẹ oborẹ Orodje David ọ djokarhọ, Jehova ọ gbogba kinhariẹ ọwan ji hẹrote ọwan, ọwan e serabọ phan riẹ-ẹn. Ọ merhoma omamọ taghene Osuinsuensun ro rhiẹ Ọrovwori akpọ na ọrhẹ Ọmemama idjuwu ọrhẹ otọrakpọ na, ọ kpomaviẹ rẹn ọwan! David nọ tare: “Aruẹ irherhe ọnana o bun phan mẹ. Mi sabu vwẹruọ ye-e.”—Ps. 139:​6, ekete ra djokarhọ.

17. Mesoriẹ ọnọ bẹn ne kwerhọ ye taghene Jehova o ghini rhe ọwan fiotọre?

¹⁷ Ọkezẹko fọkiẹ ekrun re nurhe, irueruo amwa ọwan, yanghene imwẹro re vwori bi, ọnọ sabu bẹn re ne ni Jehova jerẹ Ọsẹ ro vwo ẹgwọlọ ọrhẹ ọdamẹ kpahen ọwan. Yanghene ana sabu roro taghene a sabu tiẹkẹrẹ i Jehova dẹ-ẹ, fọkiẹ edandan re ru vrẹn ne. David dede o ji vwo aruẹ iroro enana ọkezẹko. (Ps. 38:​18, 21) Habaye, ohworho rọ damoma ro no ruẹ ewene nọ sabu nyalele irhi egbagba Osolobrugwẹ, ọnọ sabu rhe roro, ‘Osolobrugwẹ orho ghini vwẹruọ mẹ, mesoriẹ ọ gwọlọ ni mi wene aruẹ akpọ mi nyerẹn nẹ otọre rhe ne?’

18. Erere ọgo ya na mẹrẹn erhe kwerhọ ye taghene Jehova o rheri ọwan ghwẹ oborẹ e rhe oma ọwan? (Ji ni ifoto na.)

¹⁸ Ana sabu kwerhọ ye taghene Jehova o rheri ọwan ghwẹ oborẹ e rhe oma ọwan, habaye ọ ji mẹrẹn orhorhomu uvuẹn oma ọwan. Ọrẹn, udabọ orusọ ọwan rọ mẹrẹn, o vwẹruọ iroro ọwan ọrhẹ oborẹ o mwu ọwan ruẹ oborẹ e ruẹ, o vwo ẹgwọlọ kpahen ọwan. (Rom. 7:15) Arha mẹrẹnvwrurhe taghene aruẹ ukẹro ọrana yi Jehova ọ ha ni ọwan, imwẹro ọwan nọ nọ gbanhonrhọ, ne ne ji vwo omwemẹ ra na ga ye rhẹ aghọghọ.

19. Me yẹ ọwan i rhe kpahen i Jehova?

¹⁹ Ọwan i rheri taghene Jehova yẹ ẹgwọlọ. O vwo ẹfro kpahiẹ-ẹn. (1 John 4:8) Ọwan i rheri taghene ẹgwọlọ yo mwuie tiobọnẹ irhi sansan rẹn ọwan, o ji vwo ọdamẹ kpahen ọwan. E rheri taghene Jehova ọ gwọlọre ne vwo arhọ i bẹmẹdẹ. O tiobọnẹ izobo otan na neneyo ọrana ọ sabu phia. Ẹghẹlẹ izobo otan na ọ yẹrẹ ọwan imwẹro taghene ana sabu fikparobọ udabọ ijẹgba ọwan. (Rom. 7:​24, 25) Ọwan i ji rhe taghene “Osolobrugwẹ ọ do ghwẹ ọmudu ọwan, ọ jeghwai rhe i kemru kemru.” (1 John 3:​19, 20) Jehova ọ mẹrẹn kemru kemru ro sekpahen ọwan, o ji vwo imwẹro taghene ana sabu ruẹ ọhọriẹ rhẹ efikparobọ.

20. Me yọ nọ ha userhumu rẹn ọwan kẹnoma rẹn uduebro?

²⁰ O vwo iyẹnrẹn owuorowu ro fori ne rhe, ri Jehova o tinu rẹn ọwa-an. Erhe vwẹruọ ọnana, erhe brudu phan kpahen oborẹ e vwe rhe-e, ukpomaran, na na tẹnrovi oborẹ ọ mai ghanren. Erhe ruẹ omaran, ne djephia taghene a hẹroso i Jehova, ro rhiẹ “Ohworho ro vwo irherhe ọgbagba.” (Job 36:4) Dedevwo ọwan e vwẹruọ ekwakwa buebun vwana-a, ọrẹn ọwan a tẹnroviẹ ọke re ne nyerẹn bẹmẹdẹ ji yono ekwakwa ekpokpọ mie Osolobrugwẹ ọwan.—Eccl. 3:11.