Oborẹ i Jehova o ru ha Userhumu Rẹn Ọwan Vwo Edirin

1. Mesoriẹ a gwọlọ edirin, me yọ nọ ha userhumu rẹn ọwan? (1 Peter 5:10)

IDIBO i Jehova i gwọlọ edirin, fọkime e nyerẹn uvuẹn ẹdẹ ra bẹn enyerẹn. Ezẹko e kpomu emiamo ọgbogbanhon. Awọrọ a rioja fọkiẹ ihworho rẹ aye i vwo ẹgwọlọ kpahen ri hwuru. Habaye, awọrọ a ji dẹrughwaroghwẹ ẹkparehaso nẹ abọ ekrun yanghene igọmẹti. (Matt. 10:​18, 36, 37) Vwo imwẹro taghene Jehova ọnọ sabu ha userhumu wẹn vwo edirin, o toro ebẹnbẹn wa dẹrughwaroghwẹ-ẹ.—Se 1 Peter 5:10.

2. Me yọ ha userhumu rẹn ọwan vwo edirin?

² Edirin yẹ omẹgbanhon ra sabu din ebẹnbẹn, ẹkparehaso, egbanrhọ ọrhẹ edamuni, ji vwo ifiẹrorhọ kpahen obaro na. Jehova yo tiobọnẹ “omẹgbanhon rọ vrẹn ovwan” rẹn ọwan, rọ lẹrhẹ ọwan sabu din ebẹnbẹn. (2 Cor. 4:7) Uvuẹn urhomu-ẹmro ọnana, ene yono kpahen ekwakwa ẹne ri Jehova o tiobọnu ri na ha userhumu rẹn ọwan vwo edirin. Ene ji yono kpahen oborẹ ene ru ha ekwakwa enana ruiruo ji mẹrẹn erere nie rhe.

ẸRHOMO

3. Mesoriẹ ana sabu ta taghene ẹrhomo emru igbevwunu?

³ Jehova o tiobọnu emru igbevwunu rẹn ọwan rọ nọ ha userhumu rẹn ọwan vwo edirin. Jehova ọ yẹrẹ ọwan uphẹn ra na tẹmro riẹn, udabọ erhirhiẹ ijẹgba ọwan. (Heb. 4:16) Roro kpahen ọnana: Ana sabu nẹrhomo vwe i Jehova kpahen kemru kemru, o toro ọke na-a. Ọnọ sabu rhon ẹrhomo ọwan, o toro edjadjẹ yanghene ekete ra havwọ-ọ, ọrhọ tobọ rhianẹ ọwan i ha ekanron yanghene ekete kologho. (Jonah 2:​1, 2; Acts 16:​25, 26) Orhianẹ ọ bẹn ra na ta ẹhẹn ọwan rẹn i Jehova fọkiẹ ọfiamu, ono ji vwẹruọ ọwan. (Rom. 8:​26, 27) Itiọrurhomẹmro, ẹrhomo izede igbevwunu ra tẹmro rẹn i Jehova!

4. Mesoriẹ ana sabu ta taghene ẹrhomo ra nẹ vwe i Jehova ne vwo edirin o serhọ rhẹ ọhọriẹ?

⁴ Jehova ọ yẹrẹ ọwan imwẹro uvuẹn i Baibol na taghene, “kemru kemru ra nekpẹn yen ro serhọ rhẹ ọhọre ọnẹyen, ọye ọnọ kpahenrhọ ye rẹn ọwan.” (1 John 5:14) Ana sabu nẹrhomo vwe i Jehova nọ ha userhumu rẹn ọwan vwo edirin? Ee! Jehova ọ gwọlọre ne vwo edirin. Mesoriẹ a ta omaran? Erhe vwo edirin ebẹnbẹn, na yẹ i Jehova uphẹn rọ kpahanrhọ rẹn Echu ro rhiẹ i Dẹbolo rọ haye djechẹẹ na. (Prov. 27:11) Haba ọrana, Baibol na ọ tare taghene Jehova o vwo omwemẹ ro no “dje omẹgbanhon ọnẹyen harẹn ihworho ra ga ye rhẹ ọsoso ọmudu aye.” (2 Chron. 16:9) Omarana, o fori ne vwo imwẹro taghene Jehova o vwo omẹgbanhon ọrhẹ omwemẹ rọ nọ ha userhumu rẹn ọwan vwo edirin.—Isa. 30:18; 41:10; Luke 11:13.

5. Marhẹ ẹrhomo ono ru ha userhumu rẹn ọwan vwo ufuoma? (Isaiah 26:3)

⁵ Baibol na ọ tare taghene arha ta edamẹ ọwan rẹn i Jehova nẹ ẹhẹn rhe, “ufuoma ọrẹ Osolobrugwẹ rọ ghwẹ ọmẹrẹnvwrurhe ephian, nọ nọ sẹrorẹ ọmudu ọrhẹ oghwa iroro” ọwan. (Phil. 4:7) Roro kpahen oborẹ ọrana o mevirhọ. Ihworho ri vwa ga i Jehova a dẹrughwaroghwẹ akpọ ọgbogbanhon, ji ruẹ kemru kemru nẹ aye i sabu vwo omefuon. Jerẹ udje, nẹ ihworho ezẹko i sabu vwo ẹhẹn ro totọre, aye ne ruẹ kemru kemru omẹgbanhon aye o teri, nẹ aye i sabu biẹ iroro ọfiamu fughwẹ. Ọrẹn, uruemru ọrana ọ sọre. (Haye vwanvwọn Matthew 12:​43-45.) Udabọ ọrana, ufuoma ri Jehova o tiobọnẹ rẹn ọwan arha nẹrhomo vwe yi, ọ ghwẹ ufuoma ephian. Arha nẹrhomo vwe i Jehova, ne djephia taghene a hẹrosuiẹ, ọnọ ji yẹ ọwan “ufuoma ọke ephian.” (Se Isaiah 26:3.) Izede owu ri Jehova o ru ruẹ ọnana, yẹ ọrẹ ọ ha userhumu rẹn ọwan karorhọ oborẹ e yonorin uvuẹn i Baibol na. Iyono erana a lẹrhẹ ọwan vwo ufuoma fọkime e rheri taghene Jehova ọ hẹrote ọwan, ọ ji gwọlọ ne vwo efikparobọ.—Ps. 62:​1, 2.

6. Me wu na sabu haba ẹrhomo ọnọ? (Ji ni ifoto na.)

⁶ Oborẹ wu na sabu ru. Wu rha ha ebẹnbẹn, “donron ebẹnbẹn enọ vwe i Jehova,” ji nẹrhomo vwe yi nọ yọ ufuoma. (Ps. 55:22) Rẹ ye nọ yọ ẹghwanren ne wu sabu nyerẹn ghele ebẹnbẹn enọ. (Prov. 2:​10, 11) Ji karorhọ kpẹmẹ i Jehova uvuẹn ẹrhomo ọnọ. (Phil. 4:6) Damoma djokarhọ oborẹ i Jehova o ru ha userhumu wẹn din ebẹnbẹn enọ, ne wu ji kpẹmiẹ. Wu we jenẹ ebẹnbẹn wa dẹrughwaroghwẹ lẹrhẹ ebrurhọ wu mẹrẹn ne sẹruọ ẹro-o.—Ps. 16:​5, 6.

BAIBOL

7. Marhẹ uyono i Baibol ono ru ha userhumu rẹn ọwan vwo edirin?

⁷ Jehova ọ yẹrẹ ọwan i Baibol na, nọ ha userhumu rẹn ọwan vwo edirin. Baibol na ọ vuọnren rhẹ eghwẹmro sansan, ri yẹrẹ ọwan imwẹro taghene Jehova ọnọ ha userhumu rẹn ọwan. Roro kpahen udje owu. Matthew 6:8 ọ tare taghene: “Ọsẹ are o rhe oborẹ are i gwọlọre bọmọke are i ki tobọ nọ yen.” Jesu yọ tẹmro erana, o ji rhe i Jehova ghwẹ kohworho kohworho. Omarana, ana sabu vwo imwẹro taghene Jehova, o rhe oborẹ a gwọlọre, ọnọ ji ha userhumu rẹn ọwan. Baibol na ọ vuọnren rhẹ ive imemerhen sansan ri na ha userhumu rẹn ọwan din ebẹnbẹn.—Ps. 94:19.

8. (a) Hunute uruemru-urhi Baibol owu rọ nọ ha userhumu rẹn ọwan vwo edirin. (b) Me yọ nọ ha userhumu rẹn ọwan karorhọ iruemru-urhi Baibol uvuẹn ọke ra gwọliẹ?

⁸ Iruemru-urhi Baibol ina sabu ha userhumu rẹn ọwan din ebẹnbẹn. Aye i vuọnren rhẹ irorẹdjẹ ri na sa ọwan erhumu brorhiẹn ẹghwanren. (Prov. 2:​6, 7) Jerẹ udje, Baibol na ọ yẹrẹ ọwan urhebro taghene e vwe brudu phan kpahen obaro na-a. (Matt. 6:34) Erhe se i Baibol na ji roro kodo kpahiẹn, ọnọ ha userhumu rẹn ọwan karorhọ iruemru-urhi Baibol uvuẹn ọke ra gwọliẹ.

9. Marhẹ iyẹnrẹn ihworho uvuẹn i Baibol na o ru bọn ẹruẹhaso ọwan kpahen userhumu i Jehova gbanhonrhọ?

⁹ Baibol na ọ ji vuọn rhẹ iyẹnrẹn ihworho jerẹ ọwan, ri Jehova ọ hobọtua fọkime aye i hẹrosuiẹ. (Heb. 11:​32-34; Jas. 5:17) Erhe roro kpahen aruẹ iyẹnrẹn erana, nọ bọn imwẹro ọwan gbanhan taghene Jehova “yẹ ekete ra zẹrua ọrhẹ omẹgbanhon ọwan, userhumu ra mẹrẹn phẹphẹrẹ ọke ebẹnbẹn.” (Ps. 46:1) Arha djokarhọ idibo i Jehova ọke ahwanren ri fuephan ri ji hẹrosuiẹ, ọnana no mwu ọwan hẹrokele udje esegburhomẹmro ọrhẹ edirin aye.—Jas. 5:​10, 11.

10. Marhẹ ene ru ha i Baibol na ruiruo vuọnvuọn?

¹⁰ Oborẹ wu na sabu ru. Se i Baibol na kẹdẹkẹdẹ, ji djokarhọ eghwẹmro sansan ri ha urhebro wẹn ne. Ihworho buebun i ji mẹrẹnvwrurhe ne taghene isese i kẹdẹkẹdẹ, ọ ha userhumu rẹn aye ẹdẹ owuowu. Omizu ọmase owu re se Mariea ọ mẹrẹn ọnana vwrurhe, ọke eri vwiẹriẹ e kpomu emiamo ikansa. Me yọ ha userhumu riẹn vwo edirin uvwrọke rọ hẹrote aye bọmọke aye i ki hwu? Nọ tare, “kurhiọke kurhiọke yi mie se ji roro kodo kpahen ekete i Baibol ri ha, Ni Eyaya Ọfuanfon na so Kẹdẹkẹdẹ. Ọnana nọ ha userhumu mẹ karorhọ ẹmro sansan ri ha uvuẹn i Baibol na, ji tẹnrovi oborẹ ọ mai ghanren ukperẹ ono rhiẹ ebẹnbẹn mẹ.”—Ps. 61:2.

IMIZU UKOKO NA

11. Mesoriẹ o rhiẹ emru urhebro re rhe taghene imizu ọwan e ji din ebẹnbẹn?

¹¹ Jehova o tiobọnu imizu ukoko na rẹn ọwan, nẹ aye i ha userhumu rẹn ọwan vwo edirin. Fọkime e rheri taghene “okugbe imizu [ọwan] a ji dẹrughwaroghwu aruẹ ojẹriọ enana,” ọ yẹ ọwan imwẹro taghene rhẹ ọwan ọvo yi havwiẹ-ẹ. (1 Pet. 5:9) Itiọrurhomẹmro, imizu ọwan ri rhiẹromẹrẹn aruẹ ebẹnbẹn ra dẹrughwaroghwẹ i ji vwo edirin. Ọnana no mevirhọ taghene ana sabu vwo edirin!—Acts 14:22.

12. Marhẹ imizu ukoko na ine ru ha userhumu rẹn ọwan, me ya na ji sabu ru rẹn aye? (2 Corinthians 1:​3, 4)

¹² Imizu ọwan ina sabu ha urhebro rẹn ọwan vwo edirin. Ọnyikọ Paul ọ mẹrẹn ọnana vwrurhe. Uvuẹn ileta rọ yare, ọ hunute edẹ imizu ri ha userhumu riẹn ọke re jurhi riẹn no jo nẹ oghwa ye ji kpẹmẹ aye. Imizu na i ha userhumu rẹn i Paul ji yẹ ye urhebro ọrhẹ obẹhatua. (Phil. 2:​25, 29, 30; Col. 4:​10, 11) Inyenana, imizu ọwan ina sabu ha userhumu rẹn ọwan din ebẹnbẹn. Imizu ukoko na ina sabu ha userhumu rẹn ọwan din ebẹnbẹn; habaye, ana ji sabu ha userhumu rẹn imizu ọwan.—Se 2 Corinthians 1:​3, 4.

13. Me yọ ha userhumu rẹn omizu ọmase re se Maya sabu vwo edirin?

¹³ Imizu ukoko na i ha userhumu rẹn omizu ọmase owu re se Maya obẹ Russia. Elọkpa i ruẹ oghwa ye uvuẹn ẹgbukpe 2020, ọke oru, na hariẹ riẹ oghwa ẹghware fọkime o ghwoghwo rẹn awọrọ. Maya nọ tare, “ọke owu rẹ ẹhẹn mẹ o seriotọre, imizu ukoko na ni seri mẹ ji ya ileta vwe mẹ, rọ yẹre mẹ imwẹro taghene aye i vwo ẹgwọlọ kpahen mẹ. Mi rheri taghene mi ha usuẹn ekrun ro vwo ẹgwọlọ. Ọrẹn, nẹ ẹgbukpe 2020 rhe, no vi mwu mẹ ẹro rhọ.”

14. Erere ọgo ya na mẹrẹn nẹ obẹhatua imizu ukoko na uvuẹn ọke ebẹnbẹn? (Ji ni ifoto na.)

¹⁴ Oborẹ wu na sabu ru. We rhe diẹn ebẹnbẹn, wu vwe tephe rẹn imizu ukoko na-a. Wu vwe ru sikẹnsikẹn wu na nekpẹn userhumu mie ekpako ukoko na-a. Aye i “họhọ ekete re tiomanuẹ rẹn ogiribo na, ekete ra zẹrua nẹ oso ọduado.” (Isa. 32:2.) Karorhọ taghene imizu ukoko na a ji dẹrughwaroghwẹ akpọ ọgbogbanhon. We rhe dje uruemru esiri phia rẹn ihworho ri gwọleriẹ, ọnọ ha userhumu wẹn vwo ẹhẹn ro totọre ọrhẹ aghọghọ, ji din ebẹnbẹn enọ.—Acts 20:35.

IFIẸRORHỌ RE VWORI

15. Marhẹ ifiẹrorhọ o ru ha userhumu rẹn Jesu ọrhẹ ihworho ri fuephan kpahen i Jehova? (Hebrews 12:2)

¹⁵ Jehova ọ yẹrẹ ọwan ifiẹrorhọ rọ nọ ha userhumu rẹn ọwan vwo edirin. (Rom. 15:13) Karorhọ oborẹ ifiẹrorhọ o ru ha userhumu rẹn i Jesu vwo edirin ebẹnbẹn ọke rọ ha otọrakpọ na. (Se Hebrews 12:2.) Jesu o rheri taghene ọrhọ fuephan kpahen i Jehova, ono dje Echu rhiẹ ọmọrenfian ji ruẹ odẹ i Jehova fon. Jesu ọ ji tẹnrovi ọke rọ nọ rharhumu bru Ọsẹ yen nya obẹ odjuwu, ọrhẹ ọke imizie ina homaba ye sun uvuẹn Uvie na. Omaran ọ ji havwọ, ifiẹrorhọ re ne nyerẹn bẹmẹdẹ uvuẹn akpọ ọkpokpọ na, ọ ha userhumu rẹn ọwan din ebẹnbẹn ephian uvuẹn akpọ Echu.

16. Marhẹ ifiẹrorhọ o ru ha userhumu rẹn omizu ọmase owu vwo edirin, me ya na sabu yono nẹ oborẹ ọ tare?

¹⁶ Roro kpahen oborẹ ifiẹrorhọ Uvie na o ru ha userhumu rẹn omizu ọmase owu re se Alla ro rhirhiẹ i Russia, ọke re mwu esa ye rhẹ ekanron ji hẹrhẹ ọke re ne guien ẹzọn. Alla nọ tare: “Mia rha nẹrhomo vwe i Jehova kpahen ifiẹrorhọ mi vwori ji roro kodo kpahiẹn, ẹhẹn mẹ no totọre. Mi rheri taghene ekwakwa ine serhọ phẹrẹkpẹ. Jehova ono fiẹ evwreghrẹn yen kparobọ, ji yẹ ọwan ebrurhọ.”

17. Marhẹ ene ru sabu dje ọdaremẹro kpahen ifiẹrorhọ re vwori? (Ji ni ifoto na.)

¹⁷ Oborẹ wu na sabu ru. Roro kpahen obọdẹn akpọ ri Jehova ọnọ yẹ ọwan obaro na. Roro kpahen oborẹ akpọ ono rhirhiẹ wẹn uvuẹn akpọ ọkpokpọ na, ọrhẹ ebrurhọ ra na riamerhiẹn. Ebẹnbẹn ephian ra dẹrughwaroghwẹ vwana ọrẹ “ibiọke rọ ji pharhe.” (2 Cor. 4:17) Omarana, damoma ta rẹn awọrọ kpahen imwẹro ọnọ. Roro kpahen oborẹ akpọ ono rhirhiẹ rẹn ihworho ra dẹrughwaroghwẹ ebẹnbẹn uvuẹn akpọ na inyenana, ri vwe rhe kpahen ifiẹrorhọ rọ ha obaro na. Ana sabu ha ibiẹ ẹmro sa aye erhumu vwo imwẹro kpahen ifiẹrorhọ rọ ha obaro na.

18. Mesoriẹ ana sabu hẹroso ive i Jehova?

¹⁸ Ọke i Job o vwo edirin ebẹnbẹn yen hin, nọ ta rẹn i Jehova: “Vwana, mi me rhe ne taghene wa sabu ruẹ i kemru kemru, o vwo emru owuorowu wu vwo rhẹ ẹhẹn wu na ja sabu ru-u.” (Job 42:2) Jerẹ oborẹ i Job o yono ne, o vwo emru owuorowu rọ nọ sabu jaghwẹrhọ orugba ive i Jehova kpahen obaro na-a. Uyono ọrana ọnọ sabu ruẹ ọwan gbanhon ji vwo edirin. Jerẹ udje, gba haye taghene ọmase owu o kpomẹ, ẹhẹn yen no seriotọre fọkime o vwo idọkitọ owuorowu rọ sabu simie-e. Ọrẹn, ọke idọkitọ owu rọ tona o rhe kpahen aruẹ emiamo na ji ta riẹn kpahen oborẹ ono simie lele, ẹhẹn yen no totọre dedevwo ọnọ ha ibiọke nẹ omayen ọ ki gbanhon. Ọnọ sabu vwo edirin, fọkime o vwo ifiẹrorhọ taghene omayen ọnọ gbanhon. Omaran ọ ji havwọ, ifiẹrorhọ re vwo kpahen obaro na, ọ ha userhumu rẹn ọwan vwo edirin.

19. Me ya gwọlọre na sabu vwo edirin?

¹⁹ Jerẹ oborẹ e yono ne, Jehova ọ ha userhumu rẹn ọwan din ebẹnbẹn nyoma ẹrhomo, Baibol na, imizu ukoko na ọrhẹ ifiẹrorhọ re vwo kpahen obaro na. Arha ha ekwakwa erana ri Jehova o tiobọnu rẹn ọwan ruiruo, ọnọ ha userhumu rẹn ọwan nyerẹn ghele ebẹnbẹn ra dẹrughwaroghwẹ vwana, bọmọke akpọ Echu ọnana ono ki toba.—Phil. 4:13.