Ọbe i Job Ọnọ ha Userhumu Wẹn wa Rha Rioja

1-2. Mesoriẹ ọ ghanren ne se ọbe i Job?

RO VWO ji jiri na, wu se ọbe i Job ne? Dedevwo o te emrẹ ẹgbukpe 3,500 ne ra ya ọbe ọnana, ọrẹn, ihworho buebun e ji nie rhiẹ ọbe rọ ghanranren omamọ. Ihworho buebun i jiri ohworho rọ ya ọbe i Job na, fọkime ọravwọ ọ ha ẹmro elolọhọ ruiruo. Jehova yo vwo ẹmro rọ ha uvuẹn ọbe i Job, ọrẹn, Jehova yọ ta rẹn i Moses nọ ya ẹmro erana rhotọre.—2 Tim. 3:16.

² Ọbe i Job ọ ha usuẹn ẹbe ri ha uvuẹn i Baibol na ri ghanranren omamọ. Mesoriẹ? Fọkime ọbe i Job ọ ta kpahen uphẹn rẹ emakashe ọrhẹ ituakpọ i vwori rẹ aye ine brorhiẹn sẹ aye ina ga i Jehova fọkiẹ ẹgwọlọ aye i vwo kpahiẹn ọrhẹ odẹ ye. O ji yono ọwan kpahen iruemru i Jehova jerẹ, ẹgwọlọ, ẹghwanren, orhienbro ọsoso, ọrhẹ omẹgbanhuiẹn. Jerẹ udje, erhe ku ẹbe i Baibol ri hẹrhẹre kugbe, ọbe i Job yọ mai se i Jehova “Ọrọmaigbanhon,” te ọgbọ 31. Habaye, ọbe i Job ọ ji kpahenrhọ enọ sansan re kpokpo ihworho buebun ẹhẹn, jerẹ: Mesoriẹ Osolobrugwẹ ọ ha uphẹn rẹn ojẹriọ?

3. Marhẹ ọbe i Job ono ru ha userhumu rẹn ọwan erhe yono kpahiẹn?

³ Jerẹ oborẹ ohworho ro mevi oberun ugbenu ọ dabu mẹrẹn ekete ri kẹreriẹ fiotọre, omaran ọbe i Job ọ ji ha userhumu rẹn ọwan ha ukẹro ri Jehova ọ ha ni ebẹnbẹn ọwan nie. Jene yono kpahen oborẹ iyẹnrẹn rọ ha uvuẹn ọbe i Job ono ru ha userhumu rẹn ọwan arha rioja. Ene yono kpahen erere emọ Israel a mẹrẹn bi orhianẹ aye i yono nẹ udje i Job, ọrhẹ oborẹ ono ru sa ọwan erhumu inyenana. Ene ji yono kpahen oborẹ ene ru ha iyẹnrẹn rọ ha ọbe i Job sa awọrọ erhumu.

OSOLOBRUGWẸ Ọ HA UPHẸN RẸN I JOB NỌ RIOJA

4. Marhẹ i Job o ru vẹnẹ emọ Israel ezẹko uvuẹn Egypt?

⁴ Job o rhirhiẹ amwa re se Uz, ọkezẹko amwa na ọ ha obọrẹ ọren ọ va nẹ sa uvuẹn Otọre Ive na, ọrhẹ obọrẹ o rierun uvuẹn Arabia. Ọke ọrana emọ Israel evrẹn uvuẹn Egypt. Emọ Israel ezẹko ọke ọrana uvuẹn Egypt a ga ema, ọrẹn Job ọ fuephan ga i Jehova. (Josh. 24:14; Ezek. 20:8) Jehova nọ ta kpahen i Job: “O vwo ohworho rọ họheriẹ uvuẹn akpọ na-a.”a (Job 1:8) Job yẹ ohworho rọ mai fe re ji mwuọghọ riẹn uvuẹn uvwrakpọ ọrana. (Job 1:3) Itiọrurhomẹmro, ephan o vi biomu Echu omamọ, fọkime Job ọdafe, ihworho buebun e mwuọghọ riẹn, ọ ji fuephan ga i Jehova!

5. Mesoriẹ i Jehova ọ ha uphẹn rẹn i Job nọ rioja? (Job 1:​20-22; 2:​9, 10)

⁵ Echu ọ tare taghene Job ọrhọ dẹrughwaroghwu ebẹnbẹn ọnọ sẹrerhumuji Jehova. (Job 1:​7-11; 2:​2-5) Dedevwo, Jehova o vwo ẹgwọlọ kpahen i Job omamọ, ọrẹn ọ ha uphẹn rẹn Echu nọ damẹ i Job ni sẹ oborẹ Echu ọ tare na urhomẹmro. (Job 1:​12-19; 2:​6-8) Omarana, Echu no kpe isurhe ọrhẹ emọ i Job awan ikpe hwu, ji ha ikerivi mwu ọsoso oma i Job. Udabọ emiamiamo erana ephian, Job ọ sẹrorẹ atamwuiẹ. (Se Job 1:​20-22; 2:​9, 10.) Ọke oru, Jehova nọ rharhumu yẹ i Job omọkpokpọ, efe, ọrhẹ emọ ikpe erọrọ, ihworho ne ji mwuọghọ rẹn i Job. Jehova nọ ha ẹgbukpe 140 ba ẹgbukpe i Job nọ sabu mẹrẹn iruemọ yen ọgbọ ọrẹ ẹniẹ. (Job 42:​10-13, 16) Me yẹ idibo i Jehova ọke ahwanren a sabu yono nẹ udje i Job bi, me ya na sabu yono nie rhe?

6. Erere ọgo yẹ emọ Israel na a sabu mẹrẹn bi orhianẹ aye i rhe oborẹ ọsoriẹ Osolobrugwẹ ọ ha uphẹn rẹn ojẹriọ? (Ji ni ifoto na.)

⁶ Erere emọ Israel na a sabu mẹrẹn bi. Emọ Israel i dẹrughwaroghwu akpọ ọgbogbanhon uvuẹn Egypt. Jerẹ udje, e mwu i Joshua ọrhẹ Caleb riẹ abọ evrẹn ọke aye a ha uphuphẹn. Aye i rhirhiẹ ato te ẹgbukpe 40 fọkiẹ emọ Israel ezẹko ri vwa huphele i Jehova. Orhianẹ emọ Israel na ni rhe kpahen edamuni Job ọrhẹ ebrurhọ ri Jehova ọ yẹriẹ, manẹ ọ ha userhumu rẹn aye ọrhẹ emọ aye rhe ohworho rọ suẹ ojẹriọ na. Habaye, ọ ji ha userhumu rẹn aye rhe oborẹ ọsoriẹ Osolobrugwẹ ọ ha uphẹn rẹn ojẹriọ ọrhẹ erere aye ina mẹrẹn aye i rha fuephan ga i Jehova.

7-8. Marhẹ iyẹnrẹn i Job ono ru ha userhumu rẹn ihworho ra rioja? Dje udje yi.

⁷ Oborẹ ene ru mẹrẹn erere. Ọrẹ omemwurhọ, ihworho buebun inyenana e vwo esegburhomẹmro kpahen Osolobrugwẹ-ẹ, fọkime aye e rhe oborẹ ọsoriẹ emamọ ihworho a rioja-a. Roro kpahen oborẹ ọ phia rẹn ọmase owu re se Hazelb ro nẹ Rwanda rhe. O vwo imwẹro kpahen Osolobrugwẹ ọke rọ kamu. Ọrẹn ọke oru, ekwakwa ni wenerin. Eri vwiẹ Hazel ni fonrọnmo, izie nọ rọnmọ ọhworhare ọrọrọ, esa izie na no ruẹ Hazel gbalogbalo. Habaye, ọhworhare owu ọ ji gba ye merhẹn ọke rọ kamu. Hazel ọ mẹrẹn urhebro rọ gwọlọre ọke o riẹ oghwa ẹga-a. Ọke oru, Hazel nọ ya ileta rọ tare: “Osolobrugwẹ, mia nẹrhomo vwo, mia ji damoma ruẹ oborẹ orhomurun, udabọ ọrana wa ha obiobiomu kwosa mẹ. Mi rha ga ghwomara-an, mi ne ji rhe ruẹ oborẹ o jeri mẹ.” Ọ darẹ ọwan omamọ taghene ihworho jerẹ Hazel, e roro taghene Osolobrugwẹ yọ suẹ ojẹriọ aye!

⁸ Ọwan i yono ne uvuẹn ọbe i Job taghene Echu yọ suẹ ojẹriọ ọwan, o rhiẹ Osolobrugwẹ-ẹ! E ji yono ne taghene o fo ne roro taghene fọkiẹ oborẹ ihworho i ru vrẹn ne yọ lẹrhẹ aye rioja-a. Baibol na ọ tare taghene “ọke ọrhẹ oborẹ e vwe fiẹrorhọ” ọ hobọte kohworho kohworho. (Eccl. 9:11; Job 4:​1, 8) Habaye, e ji yono ne taghene arha fuephan ga i Jehova uvuẹn ọke ebẹnbẹn, ne dje Echu rhiẹ ọmọrenfian. (Job 2:3; Prov. 27:11) Oma ọ merhenren ọwan taghene e rhe oborẹ ọsoriẹ ọwan ọrhẹ ihworho re vwo ẹgwọlọ kpahen a rioja. Ọke oru, Hazel nọ tuẹn uyono i Baibol rhọ rhẹ Iseri Jehova, ji vwẹruọ oborẹ ọsoriẹ ọ rioja, nọ tare: “Ni mi nẹrhomo vwe i Jehova nẹ ẹhẹn rhe ọgbọrọrọ. Ji ta taghene mia gwọlọ sẹrerhumuji Jehova-a, mi gemai ta taghene mi rha ga ye-e. Mi tẹmro erana, fọkime mie ghini rhe Osolobrugwẹ ọke ọrana-a. Ọrẹn, vwana mi rhe ne taghene Jehova o vwo ẹgwọlọ kpahen mẹ. Oma ọ dabu merhen mẹ vwana.” Itiọrurhomẹmro, oma ọ merhenren ọwan omamọ re rhe oborẹ ọsoriẹ Osolobrugwẹ ọ ha uphẹn rẹn ojẹriọ! Jene yono kpahen oborẹ iyẹnrẹn i Job ono ru ha userhumu rẹn ọwan uvuẹn ọke ebẹnbẹn.

OBORẸ ỌBE I JOB ONO RU HA USERHUMU RẸN ỌWAN VWO EDIRIN

9. Me yi Job o ruru ọke rọ rioja? (James 5:11)

⁹ Roro kpahen oja ri Job ọ dẹrughwaroghwu, era i vuọn omayen, o ji siyẹ otọre fọkiẹ emiamiamo na. Emiamo na ọ hobọte ugboma i Job omamọ. Fọkiẹ ọrana, Job orho vwo omẹgbanhon ghwomara-an, omarana, no siyẹ otọre ji ha evwẹrẹ eriẹ tọlọ omayen, habaye, nọ tuekwẹre fọkiẹ erhirhiẹ na. Job ọ ghwai din emiamiamo na ọvo-o, ọ ji fuephan ga i Jehova. (Se James 5:11.) Me yọ ha userhumu riẹn sẹrorẹ atamwuiẹ?

10. Me yo djephia taghene Job o vwo omamọ onyerẹnkugbe rhẹ i Jehova? Djeyi fiotọre.

¹⁰ Job nọ ta ọmuduie rẹn i Jehova. (Job 10:​1, 2; 16:20) Jerẹ udje, uvuẹn ọbe i Job urhomẹmriẹn ọrẹ 3 ọ tare taghene Job nọ ta rẹn i Jehova kpahen omiamiamo na rhẹ ekwẹre ọgbogbanhon, fọkime o roro taghene Jehova yọ suẹ omiamiamo na. Ọke oru, igbehian i Job awansa ni tare taghene Osolobrugwẹ yọ ha oja riẹ i Job fọkiẹ edandan yen. Habaye, Job ọ ji chochọn omayen taghene ọye ọ sẹrorẹ atamwuiẹ. Ẹmro ezẹko ri Job ọ tare, i djephia taghene o dje omayen rhiẹ ọvwata ghwẹ Osolobrugwẹ. (Job 10:​1-3; 32:​1, 2; 35:​1, 2) Job ọ ji ta taghene ọkezẹko ọ tẹmro “hwainhwain,” ọke rọ chochọn omayen. (Job 6:​3, 26) E yonorin uvuẹn urhomu-ẹmro 31, taghene Job ọ gwọlọre ni Jehova ọ kpahenrhọ orẹ ye, ji ta taghene o fo ohworho ri Jehova ọnọ ha oja re-e. (Job 31:35) Itiọrurhomẹmro, manẹ i Job ọ vwọ nọ i Jehova kpahen oborẹ ọsoriẹ ọ rioja-a.

11. Marhẹ i Jehova ọ kpahenrhọ rẹn i Job lele?

¹¹ Oborẹ i Job ọ tẹmro lele, o djephia taghene o vwo omamọ onyerẹnkugbe rhẹ i Jehova, ji hẹrosuiẹ taghene ono brorhiẹn ọsoso. Ọke i Jehova ọ nyoma aphẹrẹ ọgbogbanhon kpahenrhọ rẹn i Job, ọ ta riẹn kpahen oborẹ ọsoriẹ ọ rioja-a. Jehova ọ tuekwẹre kpahen i Job fọkime ọ ta ọmuduie phia-a. Ukpomaran, nọ ha urhebro rẹn i Job jerẹ oborẹ ọsẹ ọ ha urhebro rẹn ọmọyen. Ọrana yẹ izede ro serhọ ri Jehova ọ ha userhumu riẹn. Obẹtaye, Job nọ mẹrẹnvwrurhe taghene ọ dabu rhe erhirhiẹ na fiotọre-e, ji rhomunu fọkiẹ oborẹ ọ tẹmro lele. (Job 31:6; 40:​4, 5; 42:​1-6) Me yẹ idibo i Jehova ọke ahwanren a sabu yono nẹ udje i Job bi, me ya na sabu yono nie rhe?

12. Erere ọgo yẹ emọ Israel a sabu mẹrẹn nẹ udje i Job?

¹² Erere emọ Israel na a sabu mẹrẹn bi. Manẹ emọ Israel na a sabu yono nẹ oborẹ ọ phia rẹn i Job. Roro kpahen udje i Moses. Moses o rhiẹromẹrẹn akpọ ọgbogbanhon, ẹkparehaso, ẹhẹn yen o ji seriotọre fọkiẹ owian ro no sun agbamwa Israel. Ọgbọ buebun emọ Israel i brenu kpahen i Jehova uvuẹn ọke ebẹnbẹn. Ọrẹn, Moses nọ ta rẹn i Jehova kpahen ebẹnbẹn na nyoma ẹrhomo. (Ex. 16:​6-8; Num. 11:​10-14; 14:​1-4, 11; 16:​41, 49; 17:5) Moses o vwo edirin ọke ra ghwoghwie. Jerẹ udje, bọmọke emọ Israel i ki ruẹ Otọre Ive na, Moses nọ tuekwẹre ji “ha evwẹrugbunuie ta erharhere ẹmro,” ọ jeghwai jiri odẹ i Jehova-a. (Ps. 106:​32, 33) Fọkiẹ ọnana, Jehova orho kwe nẹ i Moses ọ ruẹ Otọre Ive na-a. (Deut. 32:​50-52) Dedevwo ọnana ọ miamiẹ i Moses omamọ; ọrẹn ọ homariotọre ji rhiabọ dede ọghwọghwu ri Jehova ọ yẹriẹ. Ọkezẹko, iyẹnrẹn i Job ọ ha userhumu rẹn emọ Israel ri fuephan din ebẹnbẹn aye, ọke i Moses o hwu hin. Orhianẹ emọ Israel ri fuephan i roro kpahen iyẹnrẹn na, manẹ ọ ha userhumu rẹn aye ta ọmudu aye rẹn i Jehova ji kẹnoma rẹn uruemru aye ine dje oma aye rhiẹ ọvwata ghwẹ Osolobrugwẹ. Manẹ ọ ji ha userhumu rẹn aye rhiabọ dede ọghwọghwu i Jehova.

13. Marhẹ iyẹnrẹn i Job ono ru ha userhumu rẹn ọwan vwo edirin? (Hebrews 10:36)

¹³ Erere ra na sabu mẹrẹn. Ọwan ri rhiẹ idibo i Jehova i ji gwọlọ edirin. (Se Hebrews 10:36.) Jerẹ udje, idibo i Jehova ezẹko a dẹrughwaroghwẹ emiamo sansan, ebẹnbẹn ekrun, uhwu ohworho aye i vwo ẹgwọlọ kpahen, yanghene erọrọ. Haba erhirhiẹ erana, ẹmro yanghene irueruo awọrọ ọnọ sabu lẹrhiẹ bẹn re ne din ebẹnbẹn. (Prov. 12:18) Ọrẹn, iyẹnrẹn i Job o yonirin ọwan taghene ana sabu ta ọmudu ọwan rẹn i Jehova rhẹ imwẹro taghene ọnọ kpahenrhọ rẹn ọwan. (1 John 5:14) Jerẹ oborẹ i Jehova ọ vwọ tuekwẹre kpahen Job, Jehova ọ ji tuekwẹre kpahen ọwan orhianẹ a tẹmro “hwainhwain,” ọke ra ta ọmudu ọwan riẹ-ẹn. Ukpomaran, Jehova ọnọ yẹ ọwan omẹgbanhon ọrhẹ ẹghwanren na sabu din. (2 Chron. 16:9; Jas. 1:5) Ọnọ sabu ghwọghwu ọwan jerẹ ọke rọ ghwọghwu i Job. Ọbe i Job o ji yono ọwan oborẹ ene ru rhiabọ dede ọghwọghwu yanghene urhebro ro nẹ i Baibol rhẹ, ukoko i Jehova ọrhẹ igbehian ri te edje ne. (Heb. 12:​5-7) Ana mẹrẹn erere jerẹ i Job, arha homariotọre rhiabọ dede ọghwọghwu i Jehova. (2 Cor. 13:11) E yono iyono eghoghanren mie i Job! Vwana, jene yono kpahen oborẹ ene ru ha ọbe i Job sa awọrọ erhumu.

HA ỌBE I JOB SA AWỌRỌ ERHUMU

14. Izede ọgo ye ne ru dje rẹn ihworho uvuẹn owian aghwoghwo na kpahen oborẹ ọsoriẹ a rioja?

¹⁴ Wu mẹrẹn ohworho uvuẹn owian aghwoghwo na dẹ ne rọ nọruọn kpahen oborẹ ọsoriẹ ituakpọ a rioja? Marhẹ wu kpahenrhọ ye lele? Ọkezẹko, wu ta riẹn kpahen oborẹ i Baibol na ọ tare kpahen oborẹ ọ phiare uvuẹn ogba Eden. Yanghene wu ta riẹn kpahen ofian rẹ Echu ọ ta rẹn Adam ọrhẹ Eve rọ lẹrhere aye kparehaso Osolobrugwẹ. (Gen. 3:​1-6) Ne wu ji ta riẹn taghene ọke Adam ọrhẹ Eve a kparehaso Osolobrugwẹ hin, ihworho na rioja ji hwuẹ. (Rom. 5:12) Obẹtaye, ne wu dje riẹn taghene Osolobrugwẹ ọ ha uphẹn rẹn ojẹriọ nọ sabu dje Echu rhiẹ ọmọrenfian, ji ta riẹn taghene obaro na ituakpọ ina rharhumu rhiẹ ihworho ri gbare. (Rev. 21:​3, 4) Ọnana omamọ ẹkpahenrhọ rọ ji ha userhumu rẹn ihworho buebun ne rhe oborẹ ọsoriẹ emamọ ihworho a rioja.

15. Marhẹ ene ru ha ọbe i Job ha userhumu rẹn ohworho rọ nọren ọwan onọ kpahen oborẹ ọsoriẹ a rioja? (Ji ni ifoto na.)

¹⁵ Jene roro kpahen ona ọrọrọ wu ne ru ha oborẹ ọ ha uvuẹn ọbe i Job ruiruo uvuẹn owian aghwoghwo na. Wu na sabu tonrhọ nyoma wu na kpẹmẹ ọravwọ fọkiẹ onọ ọghoghanren ọrana. Orho ru, gba ji ta riẹn taghene Job rọ fuephan ga i Jehova, ọ ji nọ kpahen oborẹ ọsoriẹ ọ rioja. Job ọ tobọ roro taghene Jehova yọ ha oja riẹ. (Job 7:​17-21) Ọnana ọnọ ha userhumu rẹn ọravwọ rhe taghene o jiri ne rẹ awọrọ a nọ aruẹ onọ ọrana. Orho ru, wu na sabu ha izede ona dje riẹn taghene Dẹbolo yọ suẹ ojẹriọ i Job, o rhiẹ Osolobrugwẹ-ẹ. Dẹbolo ọ tare taghene ituakpọ a ga Osolobrugwẹ fọkiẹ ebrurhọ aye ina mẹrẹn. Wu na ji sabu ta taghene dedevwo rhẹ Osolobrugwẹ yọ suẹ ojẹriọ i Job o rhiẹromẹrẹ-ẹn, ọrẹn Jehova ọ ha uphẹn riẹn nọ phia, ro djephia taghene ọ hẹroso ituakpọ ra fuephan ga ye taghene aye ine dje Echu rhiẹ ọmọrenfian. Obẹtaye, wu na sabu ta taghene Jehova ọ yẹ i Job ebrurhọ, fọkime ọ sẹrorẹ emevigbanhuiẹn. Omarana, ana sabu yẹ awọrọ urhebro nyoma ra na ta rẹn aye taghene rhẹ Osolobrugwẹ yọ suẹ ojẹriọ-ọ.

16. Hunute udje ro dje kpahen oborẹ ọbe i Job ono ru ha userhumu rẹn ohworho rọ rioja.

¹⁶ Roro kpahen oborẹ ọbe i Job o ru ha userhumu rẹn ọhworhare owu re se Mario. Ẹdẹ owu uvuẹn ẹgbukpe 2021, omizu ọmase owu no ghwoghwo nyoma ifonu. Mario yẹ ohworho ọrukaro ro tu se, no ji dje riẹn kpahen oborẹ ọ ha uvuẹn Jeremiah 29:​11, 12, taghene Osolobrugwẹ ọnọ yẹ ọwan omamọ obọdẹn akpọ ọrhẹ ifiẹrorhọ obaro na, ọ ji kerhọ ẹrhomo ọwan. Ọke omizu ọmase na ọ nọ i Mario kpahen oborẹ ọ ta riẹn na, Mario nọ tare taghene ọ ya ileta rọ gwọlọ dje vwe ekruien taghene ọ gwọlọ kpe omayen, bọmọke ifonuie o ki kporo. Mario nọ tare, “Mi vwo imwẹro kpahen Osolobrugwẹ, ọrẹn, urhiọke na ni mie roro taghene ọ sẹrerhumuji mẹ ne.” Ọke omizu ọmase na ọ rharhumu ha ifonu se yi, aye ni ta kpahen ojẹriọ i Job ọ dẹrughwaroghwu. Mario no brorhiẹn ro no se ọsoso ọbe i Job. Omarana, omizu ọmase na no dje ilinki vwe Mario nọ sabu se ọbe i Job uvuẹn edjadjẹ ọrẹ New World Translation of the Holy Scriptures. Obẹtaye, Mario no vwo omwemẹ ro no yono kpahen Osolobrugwẹ rhọ ro vwo ẹgwọlọ kpahiẹn.

17. Mesoriẹ oma ọ merhuọn taghene Jehova o fiẹ iyẹnrẹn i Job rhẹ i Baibol na? (Job 34:12)

¹⁷ Itiọrurhomẹmro, Baibol na o vwo omẹgbanhon rọ nọ ha userhumu rẹn ihworho ephian, tobọte era rioja. (Heb. 4:12) Oma ọ merhenren ọwan omamọ taghene Jehova o fiẹ iyẹnrẹn i Job rhẹ i Baibol na! (Job 19:​23, 24) Ọbe i Job ọ yẹrẹ ọwan imwẹro taghene “Osolobrugwẹ o vwo dumu ọko-on.” (Se Job 34:12.) Ọbe i Job o ji yono ọwan kpahen oborẹ ọsoriẹ Osolobrugwẹ ọ ha uphẹn rẹn ojẹriọ ọrhẹ oborẹ ene ru vwo edirin. Habaye, ọ ji ha userhumu rẹn ọwan ha urhebro rẹn awọrọ ra rioja. Uvuẹn urhomu-ẹmro rọ ha kpahen ọnana, ene yono kpahen oborẹ ene ru tiobọnu urhebro ro serhọ rẹn awọrọ.