Imizu ri ho ne i Ghanranren Rẹn Ukoko na

Ọkezẹko o jiri ne wa fuephan ga i Jehova. Ọrẹn fọkiẹ erhirhiẹ ọho, wu vwa rha sabu ruẹ te oborẹ we ruẹ bi-i. Ọnana ọnọ sabu lẹrhẹ ẹhọn seriotọre. Jerẹ udje, wu na sabu rha ha oborẹ wa sabu ruẹ vwana vwanvwọn oborẹ we ruẹ bi. Orhiomaran, marhẹ wu ne ru sẹrorẹ aghọghọ ọnọ?

OBORẸ I JEHOVA O FIẸRORHỌ MIO

Nọ oma, ‘Me yi Jehova ọ gwọlọre mi ru?’ Deuteronomy 6:5 nọ tare: “Are ine vi vwo ẹgwọlọ kpahen i Jehova Osolobrugwẹ are rhẹ ọsoso ọmudu are, ọsoso arhọ are, kugbe ọsoso omẹgbanhon are.”

Ekete i Baibol ọrana, o djephia taghene Jehova ọ gwọlọre ne wu ga ye rhẹ ọsoso ọmuduo, arhọ, ọrhẹ omẹgbanhuọn. Wu rha karorhọ ọrana, ọnọ ha userhumu wẹn ja ha oma vwanvwọn awọrọ yanghene ja ha oborẹ we ruẹ vwana vwanvwọn oborẹ we ruẹ bi.

Roro kpahen ọnana: Me wu ru rẹn i Jehova ọke wa ji ha uphuphẹn? Idibo i Jehova buebun ina ta taghene, aye i ruẹ ekete omẹgbanhon aye o teri. Omaran wu ji ru ọke wa ha uphuphẹn. Me yẹ erhirhiẹ wu havwọ vwana, ọnọ sabu yọ uphẹn ru rẹn i Jehova? Wu na sabu ruẹ ekete omẹgbanhuọn o teri vwana. Wu rha karorhọ ọrana, wu na mẹrẹnvwrurhe taghene we ji ruẹ ekete omẹgbanhuọn o teri, jerẹ oborẹ we ruẹ bi ọke wa ji ha uphuphẹn.

WU NA SABU YONO AWỌRỌ KPAHEN OBORẸ WU RHERI

O fori wu ji karorhọ ọnana: Ukperẹ wu na tẹnrovi obẹnbẹn wa dẹrughwaroghwẹ fọkiẹ ọho, wu na sabu nie rhẹ uphẹn wu ne yono awọrọ kpahen oborẹ wu rheri. Itiọrurhomẹmro, o vwo ekwakwa ezẹko wu na sabu ru vwana re wu vwa sabu ru ọke wa ha uphuphẹn. Jerẹ udje, wu na sabu ruẹ ekwakwa enana:

Wu na sabu gbikun oborẹ wu yono ne rẹn awọrọ. Roro kpahen idje ihworho ra nẹ iyẹnrẹn aye rhẹ i Baibol:

Orodje David: “Mẹmẹ uphuphẹn bi, ọrẹn vwana mi ho ne, ọrẹn mia ji mẹrẹn ohworho ọvwata owuorowu ra sẹrerhumuji-i, yanghene emọyen na gwọlọ emaren rẹ aye ena riọ-ọ.”—Ps. 37:25.

Joshua: “Nughe! Mia gwọlọ hwuẹ ne, are i rheri rhẹ ọsoso ọmudu are ọrhẹ ọsoso arhọ are taghene o vwo ẹmro owuorowu usuẹn ọsoso ẹmro irhorhomu ri Jehova Osolobrugwẹ are rọ tare o sefughwẹ ne-e.”—Josh. 23:14.

Ọkezẹko, wu ji ha aruẹ ẹmro erana ha urhebro rẹn awọrọ dẹ ne. David ọrhẹ Joshua i ta kpahen oborẹ aye i vi rhiẹromẹrẹn. Omarana, o fori na karorhọ oborẹ aye i tare na.

Orhianẹ o jiri ne wa ga i Jehova, wu ji vwo uphẹn wu na ta kpahen ebrurhọ sansan ri Jehova o tiobọnu wẹn ne. Wu karorhọ iyẹnrẹn owuorowu ro dje kpahen oborẹ i Jehova o ru ha userhumu rẹn idibo yi ne? Orhiomaran, wu vwe tirierhumu wu na ta rẹn awọrọ kpahiẹ-ẹn! Ọnana ọnọ sabu ha urhebro rẹn awọrọ. Itiọrurhomẹmro, wu na sabu bọn imizu ukoko na gbanhon, wu rhe gbikun rẹn aye kpahen oborẹ wu rhiẹromẹrẹn ne uvuẹn akpenyerẹn ọnọ.—Rom. 1:​11, 12.

Izede ọrọrọ wu ne ru bọn imizu ukoko na gbanhon, yẹ ọrẹ wu ne kwomakugbe aye ruẹ uyono ukoko uvuẹn Aghwẹlẹ Uvie, erhirhiẹ na orho serhọ. Wẹwẹ ọrhẹ imizu ukoko na ina mẹrẹn erere wu rhe ru te omaran. Connie ra hunute vrẹn ne nọ tare: “Mie vwo ẹhẹn ro totọre mie rhe kwomakugbe imizu ukoko na ruẹ uyono uvuẹn Aghwẹlẹ Uvie. Fọkime imizu ukoko na a dabu dje ẹgwọlọ mẹ. Omarana, ni mia damoma ruẹ ibiẹ ẹghẹlẹ rẹn imizu na. Habaye, mia ji damoma fiomarhọ owian uvie na sansan ji ha urhebro rẹn awọrọ uvuẹn uyono ukoko.”

JEHOVA O VWO ỌDAMẸ KPAHEN OGAME WA HA RIẸN

Baibol na o vwo idje ihworho buebun ri Jehova o vwo ẹgwọlọ kpahen omamọ, dedevwo aye i vwa rha sabu ruẹ te oborẹ aye i vi gwọlọ-ọ. Roro kpahen udje i Simeon rọ ho ne, ọye onyẹ Israel ro nyerẹnren ọke re vwiẹ i Jesu. Uvwrọke i Simeon o riẹ oghwa ẹga na, ọkezẹko, ọnọ sabu mẹrẹn idama ra wian ewian eghoghanren uvuẹn oghwa ẹga na. Ọrẹn, me yi Simeon ọnọ sabu rhe roro? Ọkezẹko, ọnọ sabu rhe roro taghene ọye orho fiemru uvuẹn ikẹro i Jehova-a, fọkime ọ vwọ rhọ sabu wian aruẹ ewian idama erana a wia-an. Ọrẹn, uvuẹn ikẹro i Jehova, Simeon “ọvwata rọ ga” ye, ọ ji yẹ ye uphẹn rọ mẹrẹn i Jesu ọke rọ ha ọmọboban. Jehova ọ ji nyoma i Simeon mẹraro taghene Jesu yo no rhiẹ i Messiah na! (Luke 2:​25-35) Itiọrurhomẹmro, Jehova ọ ha ukẹro sakamu ni Simeon fọkime ọ ho ne-e, ukpomaran uvuẹn ikẹro i Jehova, ọye ohworho ro vwo esegburhomẹmro ọgbogbanhon ọrhẹ “ẹhẹn ọfuanfon” na.

Wu na sabu vwo imwẹro taghene Jehova o vwo ọdamẹ kpahen omẹdamu ọnọ, udabọ erhirhiẹ ọnọ. Jehova o “rhiabọ dede ẹghẹlẹ wu na sabu tiobọnu, orhiẹ oborẹ wu vwe vwo-o.”—2 Cor. 8:12.

Omarana, tẹnrovi oborẹ wu na sabu ru. Jerẹ udje, roro kpahen aruẹ owian aghwoghwo wu na sabu vwobọrhọ, ọrhọ tobọ rhiẹ ibiọke dede. Wu na ji sabu ha urhebro rẹn imizu ukoko na, nyoma wu na ha ifonu se aye yanghene ya ibiẹ ẹmro urhebro rhẹ ẹbe vwe aye. Oma ọnọ merhẹn imizu ukoko na omamọ, orhianẹ odibo i Jehova rọ gare ẹgbukpe buebun ne rọ ho ne, o tiobọnu urhebro rẹn aye.

Dedevwo erhirhiẹ ihworho i vẹnẹren, ọrẹn eri ho ne ina ji sabu ruẹ ekete omẹgbanhon aye o teri uvuẹn ogame i Jehova. Djokarhọ oborẹ omizu ọmase owu rọ ho ne, ro nẹ obọrẹ ọren ọ va nẹ sa uvuẹn Africa rhe o rhiẹromẹrẹn, ikuegbe yi ọ ha ekpeti na “Omizu Ọmase Owu ọ ha i Baibol Simi Arhọ Ohworho,” uvuẹn urhomu-ẹmro ọnana.

Karorhọ taghene nyoma atamwu ọrhẹ esegburhomẹmro ọnọ, wu na sabu ha urhebro rẹn awọrọ. Wẹwẹ omamọ udje rẹn awọrọ, omarana, jenẹ o mwuo ẹro taghene “Osolobrugwẹ rhẹ ọvwọkon rọ nọ sẹrerhumuji ewian are ọrhẹ ẹgwọlọ are i dje kpahen odẹ ọnẹye-en, nyoma are e gbodibo harẹn ihworho efuanfon na ọke ephian.”—Heb. 6:10.

RUẸ EKETE OMẸGBANHUỌN O TERI HA USERHUMU RẸN AWỌRỌ

Iyẹnrẹn o djephia taghene ihworho buebun ri ho ne ra ji ha userhumu rẹn awọrọ, a dabu vwo omọkpokpọ ji vwo iroro rọ gbare.

Dedevwo, orhorhomu e ruo ọ sabu fiobarhọ erhirhiẹ ọho-o, ọrẹn, Uvie Osolobrugwẹ ono fiobarhọ ọdandan rọ suẹ uhwu ọrhẹ ọho.—Rom. 5:12.

Itiọrurhomẹmro, oborẹ we ruẹ rẹn i Jehova ọrhẹ userhumu we tiobọnẹ rẹn awọrọ nẹ aye i sabu yono kpahen i Jehova, ọnọ yọ omamerhomẹ ji lẹrhẹ ifiẹrorhọ wu vwo kpahen obaro na gbanhonrhọ. Imizu ri ho ne, are i karorhọ taghene Jehova o vwo ọdaremẹro kpahen ogame are a hariẹn, imizu ukoko na e ji yono nẹ udje esegburhomẹmro are.