Iyẹnrẹn ra Hẹrosua rọ ji Bọn Esegburhomẹmro Gbanhan

Iseri Jehova i vwo ọdamẹ okokodo kpahen imizu ukoko aye. (1 Peter 2:17) Buebun ọwan i vwo aruẹ iroro ri Tannis, ro rhiẹ omizu ọmase obẹ Kenya o vwori. No tare, “Oma ọ merhen mẹ mi ne rhon kpahen oborẹ ọ phia rẹn imizu ukoko mẹ uvuẹn akpọ na ephian.” Marhẹ Tannis ọrhẹ iduduru Iseri Jehova erọrọ uvuẹn akpọ na, e ru rhon iyẹnrẹn enana? Avwẹ ẹgbukpe 2013, ame a sabu tiobọnẹ iyẹnrẹn sansan uvuẹn oghọn na, Oghwa Iyẹnrẹn, rọ ha uvuẹn iwẹbsaiti jw.org.

Oghwa Iyẹnrẹn na o tiobọnẹ iyẹnrẹn ra sabu hẹrosua kpahen Iseri Jehova sekpahen eghwẹmro jerẹ Baibol re tiobọnu, owian ra ha userhumu phia, owian ebanbọn, ọrhẹ iyẹnrẹn eghoghanren erọrọ. Ọ lẹrhẹ ọwan rhe kpahen imizu ukoko na, re mwu rhẹ ekanron fọkiẹ esegburhomẹmro aye. Oghwa Iyẹnrẹn na o ji vwo omamọ iyẹnrẹn kpahen oborẹ e rhiẹromẹrẹn uvuẹn owian aghwoghwo na, ọrhẹ Ẹkarorhọ Uhwu i Jesu. Ayọmo ya guọlọ iyẹnrẹn enana, marhẹ e ru mwuegbe aye?

Oborẹ e ru Mẹrẹn Iyẹnrẹn Ekpokpọ ra nẹ

Oghwa Iyẹnrẹn na ọ ha otọre oniso ọrẹ Awuiruo rọ Hẹrote Iyẹnrẹn Afiede (OPI). Esiri ukoko yẹ awuiruo ọnana ọ havwọ, ọ ha otọre oniso ọrẹ Umẹ rọ Hẹrote Ẹmro Irhi Ọrhẹ Ebẹnbẹn Sansan Ọrẹ Ugboma Usuon na. Imizu ehworhare ọrhẹ emẹse ri vrẹn 100 yi ha uvuẹn OPI—buebun aye a wian nẹ oghwa sa, usuẹn aye yẹ era ya eyaya, guọlọ otọre ekwakwa, ere sin ekwakwa, ọrhẹ erhienrhianrhian. Awọrọ e lele ere suẹn, era hẹrote isukuru sansan, ọrhẹ oghwa iyẹnrẹn erọrọ tẹmro. Imizu ri vrẹn 80 uvuẹn Awuiruo rọ Hẹrote Iyẹnrẹn (PID) uvuẹn akpọ na ephian, ya ha userhumu rẹn eri ha uvuẹn OPI.

Na sabu mwuegbe iyẹnrẹn owu, OPI ọrhẹ PID ri ha uvuẹn akpọ na a wian kugbe. Imizu na i rha mẹrẹnvwrurhe taghene o fori na nẹ iyẹnrẹn, aye na guọlọ riarorhọ, ji koko iyẹnrẹn erọrọ ra na sabu hẹroso. Aye e rhonmie awọrọ ji lele ewena erọrọ tẹmro. Aye i rhe koko iyẹnrẹn na hin ne, na ya ye rhotọre, kwaphiẹ ye rhọ, rharhumu nie sua, ha ifoto ba ye, ji dje yi vwe Umẹ rọ Hẹrote Ẹmro Irhi Ọrhẹ Ebẹnbẹn Sansan nẹ aye i kwenu rhọ ye.

Ẹmro Ekpẹmẹ

Marhẹ oma o ruẹ imizu ukoko na kpahen Oghwa Iyẹnrẹn ọnana? Omizu ọmase owu obẹ Philippines re se Cheryl, nọ tare, “Oma ọ merhen mẹ mi rha tuẹn ẹdẹ mẹ rhọ rhẹ iyẹnrẹn kpahen ukoko i Jehova ọrhẹ ihworho yi.”

Ihworho buebun a ta kpahen ovẹnẹ rẹ aye a mẹrẹn uvwre Oghwa Iyẹnrẹn Iseri Jehova rọ ha uvuẹn jw.org, ọrhẹ oghwa iyẹnrẹn erọrọ. Tatiana, rọ ha obẹ Kazakhstan, nọ tare: “Ọ merhoma taghene mi na sabu hẹroso iyẹnrẹn re tiobọnu uvuẹn jw.org. Ana sabu hẹrosuiẹ, jeghwai urhomẹmro.” Omizu ọmase owu obẹ Mexico re se Alma nọ tare: “Iyẹnrẹn re tiobọnẹ uvuẹn Oghwa Iyẹnrẹn Iseri Jehova ọ bọn ohworho gbanhan, ọ họhọ oghwa iyẹnrẹn erọrọ ra kpare erharhere iyẹnre-ẹn.”

Ana sabu hẹroso iyẹnrẹn re nẹ Oghwa Iyẹnrẹn na sa, aye a ji bọn esegburhomẹmro gbanhan. Bernard, ro rhirhiẹ Kenya, nọ tare: “Oghwa Iyẹnrẹn na ọ ha userhumu mẹ ne ni imizu ri ha akpọ na ephian taghene aye ekrun mẹ, o toro ekete aye i havwọ-ọ. Mia sabu ha edẹ aye ọrhẹ erhirhiẹ aye i havwọ ba ẹrhomo mẹ.” Omizu ọmase owu re se Bybron, ro ji rhirhiẹ Kenya, nọ tare: “Oma ọ merhen mẹ ọke ephian mi rha mẹrẹn iyẹnrẹn rọ ta kpahen i Baibol re tiobọnu uvuẹn edjadjẹ ọrọrọ! Irhomu-ẹmro enana a karorhọ mẹ taghene Jehova o vwo ni awan ruẹ-ẹ.”

Iyẹnrẹn ri tobọ ta kpahen imizu ọwan ra dẹrughwaroghwẹ ẹkparehaso dede, ọnọ ji sabu bọn ọwan gbanhon. Jackline ro rhirhiẹ Kenya, nọ tare, “Uduefigbere aye ri mi roro kpahen, ọ ghini lẹrhẹ esegburhomẹmro mẹ gbanhon ne. Mia damoma djokarhọ oborẹ ọ ha userhumu rẹn aye vwo edirin. Mi yono ne taghene ibiẹ ekwakwa jerẹ ẹrhomo ẹnẹ, isese i Baibol, ọrhẹ ijoro ẹsuọ dede, i ghanranren omamọ nẹ imizu ọwan i sabu sẹrorẹ atamwu aye.”

Omizu ọmase owu obẹ Costa Rica re se i Beatriz o vwo ọdaremẹro kpahen iyẹnrẹn ekpokpọ re tiobọnẹ ri sekpahen oghwọghọ kpregede. Nọ tare: “Oghwa Iyẹnrẹn na ọ lẹrhe mẹ mẹrẹn oborẹ ukoko na o ru hẹrote edamẹ imizu na izede phẹphẹrẹ, ro mwidjẹn, ro ji dje ẹguọlọ phia. Ọrana ọ yẹ mẹ imwẹro na taghene ọnana ghini ukoko i Jehova.”

Ghini emru omamerhomẹ ra na mẹrẹn iyẹnrẹn ekpokpọ, ri sekpahen okugbe imizu akpọ na ephian! O vwo rhiẹ itetoro are rẹn owian akpọ ephian na bi, manẹ a vwa sabu ruẹ te omara-an, buebun are e toro nyoma donate.jw.org. Are nobiruo fọkiẹ itetoro are ghwologhwolo.