Emena Arudo ri John ọ Mẹrẹnren

Ọke e mwu ọnyikọ John rhẹ ekanron uvuẹn amwa rẹ urhie o kinhariẹ re se Patmos, Jesu no dje emena arudo 16 riẹn kpahen oborẹ ọnọ phia obaro na. Emena arudo na, i dje oborẹ ene ru odẹ Osolobrugwẹ fon lele, oborẹ Uvie Osolobrugwẹ ọnọ rhe lele, ọrhẹ oborẹ ene ru ruẹ ọhọre Osolobrugwẹ uvuẹn otọrakpọ na, jerẹ oborẹ ọ havwọ obẹ odjuwu.

Uvuẹn emena arudo owu, John nọ mẹrẹn i Jehova ro siyẹ aga usun ọnẹyen obẹ odjuwu rọ vuọnren rhẹ odidi, kugbe ekpako awan 24 ri ku ewun ọfuanfon ọrhẹ erhu orodje oro rhọ ri siyẹ kinhariẹ ye. Edon agbranran ọrhẹ aruọke ro braro, o nẹ obẹ aga usun na sa. Ekpako awan 24 na ni gburhomu rhotọre obaro i Jehova, aye na ha ẹga riẹn. Uvuẹn emena arudo ọrọrọ, John nọ mẹrẹn ihworho buebun ri nẹ ẹkwotọre, egbamwa ọrhẹ edjadjẹ sansan rhe, ra ha ẹga rẹn i Jehova. Ọmogegede na ro rhiẹ i Jesu, yọ hẹrote aye, nyoma yen yẹ aye ina jeghwai vwo arhọ i bẹmẹdẹ. Ọke oru, uvuẹn emena arudo ọrọrọ, Jesu ọrhẹ ekpako 24 na, ni tuẹn usun rhọ obẹ odjuwu. Uvuẹn emena arudo rọ ha kpahiẹn, John nọ mẹrẹn i Jesu ro lele agbakara na ro rhiẹ Echu, ọrhẹ ikpodje yi wọnrọn. Jesu no fikparobọ, no le rẹ aye rhiẹ otọrakpọ na.

Ọke oru, John nọ mẹrẹn i Jesu ro rhiẹ Ọmogegede na ọrhẹ awan 144,000 ri mevi Ugbenu i Zion. John nọ ji mẹrẹn ọmakashe ro ghwoghwo rẹn ihworho re rhirhiẹ otọrakpọ na taghene aye i zofẹn Osolobrugwẹ nẹ aye i jeghwai ha odidi riẹn.

Uvuẹn emena arudo rọ ha kpahiẹn, ne fiuvweri Armageddon. Uvuẹn owọnren ọnana, Jesu ọrhẹ emakashe yi, ni fiẹ Echu, ikpodje yi, ọrhẹ evwọkon na kparobọ. Uvuẹn emena arudo rọ kẹta, John nọ mẹrẹn ufuoma rọ ha obẹ odjuwu, ọrhẹ otọrakpọ na. Na ghwọghọ Echu ọrhẹ evwọkon na nie. Ọsoso ihworho ri ha obẹ odjuwu ọrhẹ otọrakpọ na, ni vwo uphẹn rẹ aye ina ga i Jehova, jeghwai ru odẹ ye fon.