Aye i Vwiẹ Ọmọ Ne!

Abraham ọrhẹ Sarah i rọnmọ te ẹgbukpe buebun ne. Aye i nyajẹ omamọ oghwa aye vwo uvuẹn Ur, aye ne rhirhiẹ oghwọgbọ. Ọrẹn, Sarah o brenu-u, nime ọ hẹroso i Jehova.

Sarah ọ guọlọ vwiẹ ọmọ te erhirhiẹ ọ ta rẹn Abraham: ‘Odibo mẹ ọgbọtọ re se Hagar orho vwiẹ wẹn, ọmọ na ono rhiẹ ọmọ mẹ.’ Ọke oru, Hagar no vwiẹ ọmọ ọhworhare. Odẹ ye Ishmael.

Ẹgbukpe buebun a vrẹn, ọke Abraham ọ ha ẹgbukpe 99, Sarah ọ ji ha ẹgbukpe 89, epha awansa ni kọn bru aye rhe. Abraham nọ ta rẹn aye nẹ aye i ronmoma obotọre orhan owu, nẹ aye i jeghwai riẹ emaren kugbe. Wu rhe aruo ihworho ri kọn bru aye na? Aye emakashe! Aye ni ta rẹn Abraham: ‘Ẹgbukpe rọ sa na uvuẹn uvwre ọke ọnana, anuọ ono vwiẹ ọmọ ọhworhare wẹn.’ Sarah ọ kerhọ uvuẹn oghwọgbọ na. Nọ chẹẹ harẹn omayen, no roro: ‘Mẹmẹ ri ho ne na, mi na ji sabu vwiẹ ọmọ?’

Ẹgbukpe rọ ha kpahiẹn, Sarah no vwiẹ ọmọ ọhworhare, jerẹ oborẹ ọmakashe i Jehova o veri. Abraham no mwu Isaac rẹn ọmọ na, odẹ na o mevirhọ “Echẹẹ.”

Ọke Isaac ọ ha uvwre ẹgbukpe isionrin, Sarah nọ mẹrẹn Ishmael rọ ha Isaac djechẹẹ ọke ephian. Sarah ọ guọlọ sẹrorẹ Isaac, omarana, nọ ta rẹn Abraham no le Hagar ọrhẹ Ishmael nẹ oghwa na. Ukukaro, Abraham ọ guọlọ le aye-e. Ọrẹn, Jehova nọ ta rẹn Abraham: ‘Kerhọ i Sarah. Mi na hẹrote Ishmael. Nime, nyoma Isaac yẹ ive mẹ ono te orugba.’