Me yi Baibol na ọ ta Kpahen Ọhworhare Ọrhẹ Ọmase re Rhirhiẹ Kuẹgbe, Ọrẹn Aye a ji Rọnmọ-ọ?

Ẹkpahenrhọ i Baibol na

Baibol na ọ tare taghene ọhọre Osolobrugwẹ ọrẹ ihworho ina “kẹnoma rẹn irueruo ọfanrhiẹn.” (1 Thessalonians 4:3) Jerẹ oborẹ i Baibol na ọ tare, ẹmro na “ọfanrhiẹn” o ji sekpahen ọwiẹghwọ, uruemru ọhworhare ọ gbẹ ọhworhare yanghene ọmase ọ gbẹ ọmase, ọrhẹ uruemru ọhworhare ọrhẹ ọmase e bru ehware bọmọke aye a ki rọnmọ.

• Mesoriẹ o rhiẹ emru ọdamẹ rẹn Osolobrugwẹ taghene ọhworhare ọrhẹ ọmase ina vi rọnmọ?

• Ọ sọre nẹ ọhworhare ọrhẹ ọmase i rhirhiẹ kugbe bọmọke aye ina ki rọnmọ, nẹ aye i sabu rhe sẹ aye i fo owuowọnwan?

• Marhẹ eri rọnmọ ne ine ru bọn orọnmo rọ gbanhonron?

Mesoriẹ o rhiẹ emru ọdamẹ rẹn Osolobrugwẹ taghene ọhworhare ọrhẹ ọmase ina vi rọnmọ?

• Osolobrugwẹ yo ruẹ ẹkwaphiẹrhotọre orọnmo. Jehova o ruẹ ọnana neneyo esa ọrhẹ ane erukaro i sabu rọnmọ. (Genesis 2:22-24) Ọhọre i Jehova yẹ ọrẹ ọhworhare ọrhẹ ọmase ina rọnmọ, ji fuevwan kpahen omomaye, orhiẹ ọrẹ aye ine rhirhiẹ ye ibiọke-e.

• Osolobrugwẹ o rhe oborẹ ọ mai rhomu rẹn ituakpọ. Jehova o ruẹ ẹkwaphiẹrhotọre orọnmo no rhirhiẹ ye bẹmẹdẹ, nime o rheri taghene ọnọ rhua erere vwe i kohworho kohworho uvuẹn ekrun na. Roro kpahen ibiẹ udje ọnana. Jerẹ oborẹ ohworho rọ rhẹ emru wẹn o tiobọnẹ ọkpọvi kpahen oborẹ ana haye ruiruo lele, ọkpọvi ro nẹ obẹ Osolobrugwẹ rhe ọ ta rẹn ọwan kpahen oborẹ ene ru fikparobọ uvuẹn orọnmo. Ihworho ri nyalelie a mẹrẹn erere nie sa.—Isaiah 48:17, 18.

  

• Ihworho awanva ri vwa ji rọnmọ re bru ehware kugbe, ọ rhua ebẹnbẹn buebun sa . Jerẹ udje, evwan re vwe roro rhọ ọnọ sabu nẹ uvuien rhe, emiamo ra kpare nyoma irueruo ehware, ọrhẹ emiamiamo eroro.a

• Osolobrugwẹ ọ yẹ ehworhare ọrhẹ emẹse omẹgbanhon rẹ aye ine vwiẹ emọ nyoma omẹmẹrẹn rhe. Osolobrugwẹ ọ ha ukẹro ọghoghanren ha ni arhọ, omẹgbanhon re ne vwiẹ emọ ọrana ẹghẹlẹ ro nẹ obẹ Osolobrugwẹ rhe. Osolobrugwẹ ọ guọlọre nẹ irueruo ehware ọ homaphia uvwre eri rọnmọ ne ọvo, arha huvwele yi ne djephia taghene ọwan e ni arhọ ghanghanren.—Hebrews 13:4.

Ọ sọre nẹ ọhworhare ọrhẹ ọmase i rhirhiẹ kugbe bọmọke aye ina ki rọnmọ, nẹ aye i sabu rhe sẹ aye i fo owuowọnwan?

Ọhworhare ọrhẹ ọmase i rha tobọ rhirhiẹ kugbe aye i ki rọnmo, ọnana o mevirhọ taghene orọnmo aye ono vwo efikparobọ-ọ. Ukpomaran, onyerẹnkugbe ọ gbanhan orhianẹ awanva i brorhiẹn aye ine rhirhiẹ ye ji wian kugbe.b Ihworho ri rọnmọren na, aye i vive aye ine rhirhiẹ ye kugbe.—Matthew 19:6.

Marhẹ eri rọnmọ ne ine ru bọn orọnmo rọ gbanhonron?

O vwo orọnmo rọ gbare-e. Ọrẹn, eri rọnmọ ne ina sabu bọn orọnmo rọ gbanhonron, nyoma aye ina ha urhebro i Baibol ruiruo. O vwo idje ezẹko uvuẹn obotọre na:

• Hẹrote ọreva ghwẹ oma ọnọ.—1 Corinthians 7:3-5; Philippians 2:3, 4.

• Are i dje ẹguọlọ ọrhẹ ọghọ rẹn owuowọnwan.—Ephesians 5:25, 33.

• Suẹn oborẹ wa tẹmro lele.—Proverbs 12:18.

• Vwo uruemru edirin ji harhomu ogege.—Colossians 3:13, 14.