“Mi na Sẹrorẹ Emevigbanhon mẹ!”

O siyẹ otọre, omayen ephian ọ vuọnren rhẹ ikerivi ra miama omamọ. Ha ẹhẹn rorie, o gburhomu rhotọre, akoko yi ọ rhọye, o ha erhirhiẹ kologho, o tobọ vwo omẹgbanhon ro no le inye ri dan mwu era ye-e. O siyẹ uvuẹn iphirhikerewi ro djephia taghene o mwuomarhọ, oborẹ ọ sabu ru yẹ ọrẹ ọ ha evwẹrẹ eriẹ kotien ikerivi ri ha omayen. Ekwakwa buebun i vru nie obọ ne! Igbehian yen, ere rhirhiẹ kẹriẹ ọrhẹ imizie i sẹrerhumuje vwo ne. Imirẹghwa, tobọ te emọvwerhe na ha ye djechẹẹ. No roro taghene Osolobrugwẹ ye ọ sẹrerhumuje vwo ne, ọrẹn ọrana rhẹ urhomẹmro-o.—Job 2:8; 19:18, 22.

Ọrana i Job. Osolobrugwẹ nọ ta kpahiẹn: “O vwo ohworho rọ họheriẹ uvuẹn akpọ na-a.” (Job 1:8) Ẹgbukpe buebun a vrẹn ne, Jehova o ji ni Job rhiẹ owuọwan usuẹn evwata ri nyerẹnren.—Ezekiel 14:14, 20.

Wa dẹrughwaroghwu ebẹnbẹn ọrhẹ ukpokpogho? Ikuegbe i Job ọnọ yọ urhebro ọduado. Ọnọ sabu ha userhumu wẹn vwẹruọ uruemru owu ra guọlọ mie idibo Osolobrugwẹ ephian, nọyẹ emevigbanhon. Ituakpọ e dje emevigbanhon phia ọke aye i rha ha ọsoso ẹhẹn aye ga Osolobrugwẹ, ji ruẹ ọhọriẹ udabọ erhirhiẹ ebẹnbẹn. Jene yono mie i Job rhọ.

Oborẹ i Job o Vwo Rhe

Ọ họhọre taghene ọke i Job o hwu hin, ọke ẹgbukpe ezẹko a vrẹn yi Moses ọ ya ikuegbe akpenyerẹn i Job. Nyoma userhumu ẹhẹn ọfuanfon na, Moses nọ sabu dje kpahen ekwakwa ri phiare uvuẹn otọrakpọ na, ri hobọte akpenyerẹn i Job ọrhẹ ekwakwa ri phiare obẹ odjuwu.

Uvuẹn ọtonrhọ iyẹnrẹn na, Job o nyerẹn akpọ omamerhomẹ ro ji vwo ufuoma. A dabu rhe yi uvuẹn ẹkwotọre Uz—ọkezẹko rọ ha obọrẹ o rierun uvuẹn Arabia, a ji họghọ riẹn omamọ. Ọye ohworho ro tiobọnẹ ghwologhwolo, ji ha userhumu rẹn eri vwo edamẹ. Job ọrhẹ aniẹ i vwiẹ emọ ikpe. Ọrọ mai ghanren, Job ọ ga Osolobrugwẹ. Ọ damoma ro no ruẹ oborẹ ọ merhen i Jehova oma jerẹ oborẹ imizie Abraham, Isaac, Jacob, ọrhẹ Joseph i ji ru. Jerẹ ihworho enana, Job o ji wian owian orherẹn uvuẹn ekrun ọnẹyen, o ze izobo kẹdẹkẹdẹ fọkiẹ emọyen.—Job 1:1-5; 31:16-22.

Ogege, ekwakwa ni wenerin uvuẹn ikuegbe i Job. Ọwan i sabu se kpahen oborẹ ọ phiare obẹ odjuwu, rọ lẹrherẹ ọwan rhe ekwakwa ri Job o vwo rhe. Emakashe i Jehova i koko rhẹ obaro i Jehova, Echu nọ ji rhe. Jehova o rheri taghene Echu o vwo utuoma kpahen Job ro rhiẹ ọvwata, omarana Osolobrugwẹ nọ tẹmro rẹn Echu ji hunute emevigbanhon i Job. Echu no fiudugbere ta: “Job o ghemeghe zofẹn Osolobrugwẹ? Wẹwẹ a gbogba ẹruete hariẹ ye, oghwa ye ọrhẹ kemru kemru ro vwori?” Echu o vwo utuoma kpahen ihworho ra sẹrorẹ emevigbanhon aye. Aye i rha ha ogame ro nẹ ẹhẹn rhe rẹn Osolobrugwẹ, aye ne djephia taghene Echu orharhere ohworho. Omarana, Echu nọ ta taghene Job ọ ga Osolobrugwẹ fọkiẹ ufiuvwele. Echu nọ tare taghene kemru kemru ọrhọ va i Job obọ, Job ono phien i Jehova!—Job 1:6-11.

Job ọ sabu rhe-e, ọrẹn Jehova ọ yẹriẹ ọkpẹ uphẹn: Ọrẹ ono dje Echu rhiẹ ọmọrenfian. Na ha uphẹn rẹn Echu nọ ha i kemru kemru mie i Job. Ọrẹn, o vwo kpe i Job hwu-u. Echu nọ tuẹn owian ọkon ọnẹyen rhọ. Uvuẹn ẹdẹ owu ọvo, ikpokpogho buebun ni phia rẹn Job. No rhonrin taghene imalu ro vwori, ikẹrẹkẹtẹ, igegede ọrhẹ ijaki enẹyen i hwuru. Ọrọ mai biomu, ne kpe idibo i Job ra hẹrote isurhe yi. Uvuẹn erhirhiẹ owu, na nẹ iyẹnrẹn rẹn i Job taghene ‘erhanren o nẹ obẹ Osolobrugwẹ rhe,’ ọkezẹko oberun ro braro. Bọmọke i Job ọ ki dabu vwẹruọ erhirhiẹ rọ havwọ na, emru ọduado ọrọrọ nọ phiare. Ọke emọyen awan ikpe e koko uvuẹn oghwa ọmọyen ọkpako, ogiribo ọgbogbanhon nọ ghwọghọ oghwa na jeghwai kpe emọyen awan ikpe na!—Job 1:12-19.

Ọkezẹko, ọ bẹnren ra na sabu vwẹruọ erhirhiẹ i Job ọ havwọ na. Nọ bẹrẹ ewun ọnẹyen, da ẹtuiẹn, jeghwai se bru otọre. Job nọ tare taghene Osolobrugwẹ yọ yẹriẹ, Osolobrugwẹ yọ ji haye mie yi. Itiọrurhomẹmro, Echu o ruruie nọ họhọ taghene Osolobrugwẹ yo dje ikpokpogho na rhe. Ọrẹn, Job o phien Osolobrugwẹ jerẹ oborẹ Echu o fi ẹhẹn rhọ-ọ. Ukpomaran, Job nọ tare: “Jene rhe jiri odẹ i Jehova.”—Job 1:20-22.

“Itiọrurhomẹmro Ono Phien Owẹwẹ”

Echu no biomevwan, ọrẹn ọ dobọji-i. Nọ rharhumu rhiẹ obaro i Jehova ọke emakashe na e koko. Ọgbọrọrọ, Jehova no jiri emevigbanhon i Job rọ sẹroriẹ udabọ kparehaso Echu. Echu nọ tare: “Ugboma harẹn Ugboma. Onyakpọ ono tiobọnu kemru kemru ro vwori fọkiẹ arhọ ye. Ọrẹn, ọrẹ owẹnẹme, gba rionbọ ọnọ ne wu ghwọghọ usuaso ọrhẹ uhwen yi, itiọrurhomẹmro, ono vi phien owẹwẹ.” O mwu Echu ẹro taghene Job orho kpomu emiamo ọgbogbanhon, ono phien Osolobrugwẹ. Ọrẹn, Jehova ọ hẹroso i Job ji ha uphẹn rẹn Echu nọ ha emiamo mwu i Job, ọrẹn o vwo kpe yi hwu-u.—Job 2:1-6.

Ogege, erhirhiẹ ra ta kpahen uvuẹn ọtonrhọ na nọ phia rẹn i Job. Roro kpahen ane i Job. Ẹhẹn yen o seriotọre fọkime emọyen awan ikpe i hwu ne, nọ ji mẹrẹn esa ye rọ rioja gbangbanhon! Ọrẹ omemwurhọ, aniẹ nọ viẹ phia: “Wa ji sẹrorẹ emevigbanhon ọnọ? Phien Osolobrugwẹ ne wu hwu!” Ọnana rhẹ oborẹ ane i Job ọnọ ta bi-i. Job nọ tare taghene aniẹ ọ tẹmro jerẹ ohworho ro vwo vwo ọhọ. Udabọ ọrana, o kwe phien Osolobrugwẹ-ẹ. Ọ tẹmro ibiobiomu-u.—Job 2:7-10.

Wu rheri taghene ikuegbe omemwurhọ ọnana ọ hobọte owẹwẹ? Djokarhọ taghene rhẹ Job ọvo yẹ Echu ọ mọrenfian banre-en, ọrẹn ọ mọrenfian banren ituakpọ ephian. Nọ tare: “Onyakpọ ono tiobọnu kemru kemru ro vwori fọkiẹ arhọ ye.” Nọyẹ, Echu nọ ta taghene a sabu sẹrorẹ emevigbanhon ọwa-an! Nọ ta taghene we vwo ẹguọlọ kpahen Jehova-a, ji ta taghene wu na sẹrerhumuji Osolobrugwẹ ne wu sabu simi oma ọnọ. Echu nọ ha ye taghene wẹwẹ ohworho ufiuvwele jerẹ ọye! Wu guọlọ dje yi rhiẹ ọmọrenfian? Ọwan ephian i vwo uphẹn ọrana. (Proverbs 27:11) Jene yono kpahen obẹnbẹn ọrọrọ ri Job ọ dẹrughwaroghwu.

Ibrurhe ri Vwa ha Urhebro Phia

Iyẹnrẹn na o dje kpahen igbehian i Job awansa ri rhon kpahen ebẹnbẹn yen, aye ni me bruie urhe. Ọke aye a kparughwaro mẹriẹn, aye a sabu vwrurhe yi-i. Omayen ọ vuọnren rhẹ emiamiamo, ophiaronma yen o bi hin ne, ọ tobọ họhọ oborẹ ọ havwọ bi-i. Ehworhare awansa na Eliphaz, Bildad, ọrhẹ Zophar ne ruẹ kameriẹn aye a viẹ, ji kwrọ oghwurhie rhẹ urhomu aye. Aye ni siyẹ otọre kẹrẹ i Job, ọrẹn aye a tẹmro owuorowu-u. Aye i siyẹ avwaye ọkprughwre owu, te ason te uvo aye a tẹmro owuoruwu-u. E vwe roro taghene aye i ha urhebro phia-a, fọkime aye a nọ i Job onọ-ọ, oborẹ aye i ghwai rhe ọvo yẹ omiamiamo i Job ọ havwọ.—Job 2:11-13; 30:30.

Obẹtaye, Job nọ tuẹn ẹmro na rhọ. Fọkiẹ omiamiamo rọ ha uvuẹn ẹhẹn yen, no phien ẹdẹ re vwiẹ ye. Nọ ta kpahen emru owu rọ lẹrhẹ ẹhẹn yen seriotọre omamọ. O roro taghene Osolobrugwẹ yẹ esiri ebẹnbẹn yen! (Job 3:1, 2, 23) Dedevwo o ji vwo esegburhomẹmro, Job ọ ji guọlọ urhebro. Ọrẹn ọke igbehian yen a tẹmro, aye a yẹ i Job urhebro owuorowu-u.—Job 13:5.

Eliphaz ro rhiẹ ọkpako ro ji djerhe i Job usuẹn aye, nọ tuẹn ẹmro rhọ. O jiri-i, awanva ri hẹrhẹre ni homaba ye. Ọrẹ imwẹro, ana sabu ta taghene aye i ghwai nyalele iroro Eliphaz. Ẹmro ezẹko ehworhare erana i tare ọnọ sabu rhiẹ ẹmro ghemeghe, jerẹ ọke aye a ta kpahen oborẹ ihworho buebun i rheri, jerẹ udje, oborẹ Osolobrugwẹ o rierun te, ọrẹ ọnọ ghwọghọ evwọkon na, je ha ebrurhọ rẹn evwata. Ọrẹn, oborẹ aye i ta rẹn Job nẹ ọtonrhọ, o djephia taghene aye e ghini vwo ọdamẹ kpahiẹ-ẹn. Eliphaz ọ ha iroro phia izede ro serhọ, ọrẹn ọ chochọn urhomẹmro na-a, jerẹ udje orhianẹ Osolobrugwẹ omamọ ohworho rọ ha oja riẹ evwọkon, nọyẹ Job o ruẹ ọdandan, ọrẹn me yẹ urhomẹmro na? Job o ghini ru oborẹ obiomurun?—Job 4:1, 7, 8; 5:3-6.

O gbe ọwan unu taghene Job o tiẹn orharhere iroro ọrana-a. Ọ tenriẹn phẹlẹphẹlẹ. (Job 6:25) Ọrẹn, ibrurhe awansa na ni vwo imwẹro taghene Job o ru oborẹ obiomurun rọ vwọ guọlọ ta; omarana o fori no rioja. Eliphaz nọ mọrenfian banren Job taghene ọ kparoma, ọye ọvwọkon, ro vwo vwo ofẹnzẹ Osolobrugwẹ. (Job 15:4, 7-9, 20-24; 22:6-11) Zophar nọ ta rẹn Job taghene o tiobọnu irueruo ọkon, ji kẹnoma rẹn ọdandan. (Job 11:2, 3, 14; 20:5, 12, 13) Bildad nọ tẹmro rọ sọre omamọ. Nọ tare taghene ọkezẹko emọ i Job i ruẹ ọdandan, omarana aye i fo ihworho ri ne hwuo!—Job 8:4, 13.

A Kparahaso Emevigbanhon Ọwan!

Ehworhare erana ra kpara ruẹ na, ni ruẹ emru owu ro biomurun omamọ. Aye i vwo ẹhẹn eveva kpahen emevigbanhon i Job ọrhẹ awọrọ ri vwo atamwu kpahen Jehova! Uvuẹn ẹmro ọtonrhọ Eliphaz, nọ ta kpahen oborẹ o ru mẹrẹn okpodje owu. Oborẹ Eliphaz ọ mevirhọ ọke rọ tẹmro ọrana o ghini biomu omamọ: Osolobrugwẹ “o fiẹ ẹhẹn rhọ idibo yi-i, ọye ọ ji guọlọ orusọ emakashe yi.” Nyoma iroro ọnana, ituakpọ i sabu ruẹ oborẹ ọnọ merhen Osolobrugwẹ oma-a! Ọke oru, Bildad nọ tare taghene emevigbanhon i Job o fiemru rẹn Osolobrugwẹ-ẹ, jerẹ oborẹ o vwo vwo ọdamẹ kpahen ukolowọre!—Job 4:12-18; 15:15; 22:2, 3; 25:4-6.

Wu damoma ha urhebro rẹn ohworho rọ rioja ekwakwa buebun dẹ ne? Ọ vwọ lọhọ-ọ. Ọrẹn, ana sabu yono ekwakwa buebun mie ibrurhe efian i Job—maido kpahen oborẹ ana ja ta. Ehworhare enana i tẹmro ri họhọre taghene aye i serhọ, ọrẹn aye e dje aruẹdọn rẹn Job, yanghene ha odẹ ye seyi-i! Fọkime, aye e roro kpahen iroro i Job ọrhẹ erhirhiẹ rọ havwọ-ọ, orho jẹ aye sabu dje ẹguọlọ phia riẹ-ẹn.a Omarana, orhianẹ ẹhẹn ohworho wu vwo ọdamẹ kpahen o seriotọre, damoma dje ẹguọlọ ọrhẹ uruemru esiri riẹn. Damoma ruẹ esegburhomẹmro ọrhẹ uduefigbere ohworho na gbanhon, ha userhumu riẹn hẹroso i Jehova, no ji vwo imwẹro kpahen uruemru esiri, arodọmẹ ọrhẹ orhienbro ọsoso ọnẹyen. Ọrana yẹ oborẹ i Job ono ru rẹn igbehian ye orhianẹ aye yi vwo ebẹnbẹn. (Job 16:4, 5) Ọrẹn, marhẹ i Job ọ kpahenrhọ ẹkparehaso aye lele?

Job o Mevigbanhon

Ẹhẹn i Job o seriotọre, bọmọke ẹfro oseseri ọnana ọ ki tonrhọ. Nẹ ọtonrhọ rhe, o kweri taghene ẹmro enẹyen e havwọ “hwainhwain” ọrhẹ “ẹmro ohworho ẹhẹn yen ọ taghare.” (Job 6:3, 26) E vwẹruọ oborẹ ọsoriẹ. Ẹmro enẹyen i dje kpahen omiamiamo rọ ha uvuẹn ọmuduie. Oborẹ ọ tare o ghini djephia taghene o rhe ọsoso oborẹ ọ phia-a. Fọkime ebẹnbẹn ri Job ọrhẹ ekruien i rhiẹromẹrẹn i rhere kpregede uvuẹn izede re vwe vwẹruọ ye, Job no rorori taghene Jehova yọ soriẹ. Ekwakwa eghoghanren ezẹko i phiare ri Job o vwo rhe kpahen, omarana iroro enẹyen i sọre uvuẹn erhirhiẹ ezẹko.

Ọrẹn, Job ohworho ro vwo esegburhomẹmro ọgbogbanhon. A mẹrẹn esegburhomẹmro ọnana vwrurhe nyoma ẹmro rọ tare ri rhiẹ ẹmro urhomẹmro, ra ji bọn ọwan gbanhan inyenana. Ọke rọ ta kpahen igbevwunu emama, no djerẹ aye lele izede rẹ onyakpọ owuorowu ọnọ jọ sabu rhe, jokpanẹ nyoma userhumu Osolobrugwẹ. Jerẹ udje, ọ tare taghene Jehova ọ “ha akpọ na kpahen oberun emru owuorowu-u,” ro rhiẹ ẹmro otu isaiyẹnsi i kwerhọ ọke ẹgbukpe buebun a vrẹn hin.b (Job 26:7) Ọke i Job ọ ta kpahen ifiẹrorhọ ro vwo kpahen obaro na, no dje aruẹ uduefigbere rẹ idibo i Jehova ahwanren i ji djephia. Job o vwo imwẹro taghene ọrhọ tobọ hwu dede, Osolobrugwẹ ọnọ karorhọ ye, jeghwai rhọmiẹ nuhwu.—Job 14:13-15; Hebrews 11:17-19, 35.

Me wu na ta kpahen oghwẹmro emevigbanhon? Eliphaz ọrhẹ igbehian yen awanva i tare taghene emevigbanhon onyakpọ o fiemru rẹn Osolobrugwẹ-ẹ. Job o kwerhọ aruẹ uyono ọkon ọrana? Ẹjo! Job ọ tare taghene emevigbanhon ọwan ọ ghanren rẹn Osolobrugwẹ. Nọ sabu fiudugbere ta kpahen Jehova: Ono “rhe oborẹ mi vwo emevigbanhon te.” (Job 31:6) Habaye, Job nọ mẹrẹnvwrurhe taghene ẹmro efian igbehian yen, ẹkparehaso kpahen emevigbanhon ọnẹyen. Ọnana no mwu i Job tẹmro rọ mai seri, ẹmro na o mwidjẹn omamọ te erhirhiẹ ibrurhe awansa na i vwa sabu mẹrẹn ẹmro ta.

Job ọ mẹrẹnvwrurhe taghene emevigbanhon ọnẹyen o sekpahen irueruo yi kẹdẹkẹdẹ. Omarana nọ chochọn oborẹ o ruru ọrhẹ oborẹ o nyerẹn akpọ ye lele. Jerẹ udje, ọ kẹnoma nẹ aruẹ ema ẹgọ ephian; o dje uruemru esiri ọrhẹ ọghọ phia rẹn awọrọ; o vwo uruemru ẹfuọn, ọ ha ukẹro ọghoghanren ni orọnmo ọnẹyen; ọrọ mai ghanren, o vwo atamwu ọgbogbanhon kpahen Jehova ro rhiẹ Osolobrugwẹ urhomẹmro owu ọvo na. Omarana, Job nọ sabu ta: “Bọmọke mi ne hwu, mi na sẹrorẹ emevigbanhon mẹ!”—Job 27:5; 31:1, 2, 9-11, 16-18, 26-28.

Hẹrokele Esegburhomẹmro i Job

Emevigbanhon ọ ghanren wẹn jerẹ oborẹ ọ ghanren rẹn Job? Ọ phẹrẹre ra na ta ye, ọrẹn jerẹ i Job o fori na damoma rhe dje yi phia ọke ephian. Ọwan e djephia taghene a ha ọsoso ẹhẹn ọwan ga Osolobrugwẹ nyoma ra na huvwele yi, ji ruẹ oborẹ ọgbare uvuẹn ukẹruiẹ kẹdẹkẹdẹ ọrhọ tobọ rhianẹ a dẹrughwaroghwẹ ebẹnbẹn. Erhe nyerẹn omaran, ana lẹrhẹ oma merhen i Jehova ji lẹrhẹ ofa ruẹ Echu jerẹ oborẹ i Job o ruru ọke ahwanren. Ọnana yẹ izede rọ mai rhomu re ne ru hẹrokele i Job!

Ọrẹn, ikuegbe i Job o ji hi-in. Job ọ karorhọ oborẹ ọ mai ghanre-en, omarana nọ tẹnrovi oborẹ ono ru chochọn irueruo ọsoso yi, ukperẹ ono rhiẹ ọdo Osolobrugwẹ. Ọ guọlọ ọkpọvi ọrhẹ userhumu rọ nọ ha ukẹro i Jehova ọ ha ni ekwakwa e nie. Ọ ji rioja emiamiamo ọrhẹ omemwurhọ, omarana, o guọlọ obọdẹn urhebro. Me yi Jehova ono ru rẹn ọhworhare ọnana ro vwo esegburhomẹmro ọrhẹ emevigbanhon ọgbogbanhon na? Urhomu-ẹmro ọrọrọ ọnọ kpahenrhọ enọ erana.