Hobọtua Ukoko Wu Havwọ

Uvuẹn akpọ na ephian, iduduru ihworho a ga i Jehova rhẹ aghọghọ uvuẹn ikoko ri te uriusionrin buebun. Aye e dje ọdaremẹro phia kpahen uyono ọrhẹ ọkpọvi rẹ aye a mẹrẹn, aye na jeghwai hobọtua ukoko na uvuẹn izede buebun. Omaran yẹ oma o ruo kpahen ukoko wu havwọ?

1. Izede ego ye wu na sabu ha ọke ọrhẹ omẹgbanhon ọnọ hobọtua ukoko wu havwọ?

Ọwan ephian ina sabu ha userhumu phia uvuẹn ukoko ra havwọ. Jerẹ udje, imizu ezẹko uvuẹn ukoko wu havwọ i kpako ne yanghene e kpomẹ? Wu na sabu rha kpare aye riẹ iyono? Yanghene wu na sabu ha userhumu rẹn aye uvuẹn izede erọrọ, jerẹ ọrẹ wu na dẹ emaren yanghene ekwakwa aye i guọlọre rẹn aye, yanghene lele aye ruẹ oghwa aye fon? (Se James 1:27.) Ana ji sabu ha userhumu phia uvuẹn ẹruete ọrhẹ erufon ọrẹ Aghwẹlẹ Uvie ọwan. Avwa gba ọwan ruẹ ekwakwa enana-a. Ẹguọlọ re vwo kpahen Osolobrugwẹ ọrhẹ imizu ọwan yo mwu ọwan ‘homakpahontọre nẹ ẹhẹn sa.’—Psalm 110:3.

Iseri Jehova ri bromarhame ne, ina sabu ha userhumu rẹn ukoko na izede erọrọ. Imizu ehworhare ri nyamwu evwan i Baibol na, a ga ẹrhẹ idibo owian, orho ru, aye na ga ẹrhẹ ekpako. Imizu ehworhare ọrhẹ emẹse a ji hobọtua owian aghwoghwo na nyoma aye a ga ẹrhẹ ekobaro. Ezẹko a ha userhumu phia uvuẹn ebanbọn ekete ogame, erọrọ e riẹ ekete ra mai guọlọ userhumu ighwoghwẹmro Uvie na.

2. Marhẹ ene ru sabu ha igho ọrhẹ ekwakwa re vwori hobọtua ukoko ra havwọ?

Ọwan ina sabu “họghọ rẹn i Jehova rhẹ ekwakwa eghoghanren [ọwan].” (Proverbs 3:9) Ọwan e nie rhiẹ uphẹn ọduado ra hobọtua ukoko ra havwọ, ọrhẹ owian aghwoghwo na uvuẹn akpọ na ephian nyoma itetoro igho ọrhẹ ekwakwa erọrọ re vwori. (Se 2 Corinthians 9:7.) A ji ha itetoro ọwan ha userhumu rẹn imizu rẹ oghwọghọ kpregede ọ hobọte. Imizu buebun i vwo uruemru rẹ aye e “fiẹ emru rhẹ okokọ” ọke ephian, neneyo aye i sabu toro. (Se 1 Corinthians 16:2.) Ọwan ina sabu toro itetoro rhẹ ekpeti ri ha uvuẹn ekete ogame ọwan, yanghene ruie uvuẹn itanẹti nyoma donate.jw.org. Jehova ọ yẹ ọwan uphẹn re ne dje ẹguọlọ re vwo kpahiẹn phia, nyoma izede ra ha ekwakwa ugboma re vwori ruiruo lele.

YONO KODO RHỌ

3. Ana sabu ha ekwakwa ugboma ọwan ruiruo

Jehova ọrhẹ i Jesu i vwo ẹguọlọ kpahen ihworho re tiobọnẹ ghwologhwolo. Jerẹ udje, Jesu o vwo oniso kpahen ọmase uku owu, rọ damoma toro itetoro dedevwo ọye ovwiegbere. Se Luke 21:1-4, orho ru, are i gba kpahenrhọ enọ enana:

• Ọwan ine vi toro itetoro obuebun vwẹre, nẹ oma ọ ki merhen i Jehova?

• Marhẹ oma o ruẹ i Jehova ọrhẹ i Jesu kpahen itetoro ro nẹ ẹhẹn ọwan rhe?

Ne wu sabu yono kpahen oborẹ a ha itetoro ọwan ruiruo lele, kporo IVIDIO na. Orho ru, are i gba kpahenrhọ onọ ọnana.

IVIDIO: ‘Ẹghẹlẹ rọ ha Obọ re ne ru Rẹn i Jehova’ (4:47)

• Marhẹ ya ha itetoro ọwan ruiruo lele, nẹ ikoko ọwan uvuẹn akpọ na ephian i mẹrẹn erere nie rhe?

4. Ana sabu homakpahontọre na ha userhumu phia

Uvuẹn ọke i Baibol, idibo i Jehova i wianren gbanhon omamọ rhẹ oruru nẹ aye i sabu hẹrote ekete ogame aye. Ọrẹn, ọnana ọ ghwẹ ọrẹ aye ina ghwai toro igho. Se 2 Chronicles 34:9-11, orho ru, are i gba kpahenrhọ onọ ọnana:

• Marhẹ onyẹ Israel owuowu o ru hobọtua ẹruete oghwa i Jehova, yanghene ekete ogame ọnẹyen?

Ne wu sabu mẹrẹn oborẹ Iseri Jehova e ru hẹrokele udje ọke ahwanren ọrana, kporo IVIDIO na. Orho ru, are i gba kpahenrhọ enọ enana.

IVIDIO: Ra Hẹrote Ekete Ogame Ọwan (3:31)

• Mesoriẹ ọ ghanren ne ruẹ Aghwẹlẹ Uvie ọwan fon, no ji fẹro ọke ephian?

• Izede ezẹko ego ye wu ne ru sabu ha userhumu phia?

5. Imizu ehworhare ina sabu ru riaro, nẹ aye i wian ewian buebun uvuẹn ukoko rẹ aye i havwọ

Baibol na o jiririe rẹn Ilele Kristi ri rhiẹ ehworhare nẹ aye i rhe ruẹ riaro, nẹ aye i sabu hobọtua ukoko rẹ aye i havwọ. Ne wu sabu mẹrẹn udje owu, kporo IVIDIO na. Orho ru, are i gba kpahenrhọ onọ ọnana.

IVIDIO: Imizu Ehworhare—Are i Damoma Mwuovwan Ewian Esiri (5:19)

• Uvuẹn ividio na, marhẹ i Ryan o ru ru riaro nọ sabu ha userhumu rẹn ukoko rọ havwọ vuọnvuọn?

Baibol na ọ dabu dje kpahen evwan rẹ idibo owian ọrhẹ ekpako ina vi nyamwu. Se 1 Timothy 3:1-13, orho ru, are i gba kpahenrhọ enọ enana:

• Me ya guọlọ mie imizu ehworhare ra wian gbanhan nẹ aye i sabu ga ẹrhẹ idibo owian ọrhẹ ekpako?

• Me ya guọlọre mie ekrun aye?—Se oghwẹmro ọrẹ 4 ọrhẹ 11.

• Imizu ehworhare i rha damoma nyamwu evwan erana, erere ego yẹ imizu uvuẹn ukoko na ina mẹrẹn?

ME WU YONORIN?

Jehova o vwo ọdaremẹro kpahen omẹdamu ọwan ra ha ọke, omẹgbanhon ọrhẹ ekwakwa ugboma ọwan hobọtua ukoko ra havwọ.

Ẹzẹkoko

• Marhẹ ene ru sabu nyoma ọke ọrhẹ omẹgbanhon ọwan hobọtua ukoko ra havwọ?

• Marhẹ ene ru sabu nyoma ekwakwa ugboma ọwan hobọtua ukoko ra havwọ?

• Izede ego ye wu guọlọ nyoma yen hobọtua ukoko wu havwọ?

GUỌLỌ IYẸNRẸN ERỌRỌ

Yono kpahen oborẹ ọsoriẹ Osolobrugwẹ ọvwọ guọlọ nẹ idibo yi i rha kwa akwa ọrẹ ikpe na vwana.

“Me yi Baibol na ọ ta Kpahen Akwa Ọrẹ Ikpe Ẹkwa?” (Urhomu-ẹmro rọ ha uvuẹn itanẹti)

Baibol na ọ yẹ ehworhare ri bromarhame ne ewian ezẹko. Ọrẹn, orhianẹ ọmase ro bromarhame ne nọ yọ nọ wian ewian erana vwo?

“Re Vwẹruọ Omẹgbanhon Usun Uvuẹn Ukoko na” (Oghwa Odẹrẹ, February 2021)

Ni izobo rẹ Iseri Jehova ezẹko i zeri, ọrhẹ oborẹ aye i ru dje uduefigbere phia ọke aye a kpare ẹbe ukoko na vwe imizu erọrọ.

Ẹbe Ukoko Ra Kpara Riẹ Congo (4:25)

Guọlọ otọre oborẹ e ru vẹnẹ ẹga erọrọ uvuẹn izede ra ha igho hẹrote owian ọwan lele.

“Marhẹ Iseri Jehova e ru Mẹrẹn Igho rẹ Aye a ha Wian Owian Aye?” (Urhomu-ẹmro rọ ha uvuẹn itanẹti)