UYONO 54
Owian “Ọvrẹn ra Hẹrosua ro ji vwo Ẹghwanren na”
Jesu yẹ Urhomu ukoko Ilele Kristi na. (Ephesians 5:23) Vwana, Jesu o suẹn idibo yi nẹ odjuwu nyoma “ọvrẹn ra hẹrosua ro ji vwo ẹghwanren na.” (Se Matthew 24:45.) Ra mẹriẹn taghene i Jesu yọ hariẹ mwu na, “ọvrẹn” na ovwo omẹgbanhon ro no brorhiẹn ezẹko, ọrẹn, ọnọ vi huvwele i Jesu, ji hẹrote imizu i Jesu. Ọrọmo yẹ ọvrẹn ọrana? Marhẹ ọvrẹn na o ru hẹrote ọwan?
1. Ọrọmo yẹ “ọvrẹn ra hẹrosua ro ji vwo ẹghwanren na”?
Ọke rọ vrẹnren, Jehova ọ ha ọhworhare yanghene ẹko ehworhare ezẹko tiobọnu ọkpọvi rẹn ihworho yi. (Malachi 2:7; Hebrews 1:1) Ọke i Jesu o hwu hin, inyikọ ọrhẹ ekpako uvuẹn i Jerusalem na kobaro uvuẹn ukoko na. (Acts 15:2) Omaran ọ ji havwọ, uvuẹn ọke ọwan na, ibiẹ ẹko ekpako ya kobaro uvuẹn ukoko na. E se aye Ugboma Usuon ọrẹ Iseri Jehova. Aye ye tiobọnu emaren ẹhẹn ọrhẹ ọkpọvi kpahen owian aghwoghwo na. Ẹko ọnana yẹ “ọvrẹn ra hẹrosua ro ji vwo ẹghwanren na [ri Jesu] ọ ha mwu.” (Matthew 24:45a) Ọsoso imizu ri ha uvuẹn Ugboma Usuon na, Ilele Kristi ra ha ẹhẹn ọfuanfon djẹha, re fiẹrorhọ ọke aye ine lele i Kristi sun uvuẹn Uvie ọnẹyen obẹ odjuwu.
2. Emaren ẹhẹn ọgo yẹ ọvrẹn ra hẹrosua na o tiobọnẹ?
Jesu ọ tare taghene ọvrẹn ra hẹrosua na, ọnọ “yẹ [ereva aye ri ji rhiẹ Ilele Kristi] emaren aye uvuẹn ọke ro fori.” (Matthew 24:45b) Jerẹ oborẹ emaren ra ria, ọ lẹrhẹ oma ọwan gbanhan, emaren ẹhẹn, nọyẹ ọkpọvi rọ ha uvuẹn ẹmro Osolobrugwẹ, ọ yẹ ọwan omẹgbanhon ra guọlọre, na sabu sẹrorẹ atamwu ọwan kpahen i Jehova, ji wian owian ri Jesu ọ yẹrẹ ọwan. (1 Timothy 4:6) Ọwan a mẹrẹn emaren ẹhẹn nyoma iyono, emẹvwa okinhariẹ, emẹvwa eduado, omaran ji te ẹbe, ọrhẹ ividio ra bọn kpahen i Baibol na, ra ha userhumu rẹn ọwan vwẹruọ ọhọre Osolobrugwẹ, ji bọn onyerẹnkugbe ọwan rhẹ ọye gbanhan.
YONO KODO RHỌ
Yono oborẹ ọsoriẹ a guọlọ userhumu “ọvrẹn ra hẹrosua ro ji vwo ẹghwanren na,” nọyẹ, Ugboma Usuon na.
Ugboma Usuon na o tiobọnẹ emaren ẹhẹn, ọkpọvi, ọrhẹ userhumu rẹn Iseri Jehova ri ha uvuẹn akpọ na ephian
3. Ihworho i Jehova ine vi rhe ruẹ lele ẹkwaphiẹrhotọre
Nyoma ọkpọvi i Jesu, Ugboma Usuon na ọ hẹrote owian Iseri Jehova. Aruẹ ẹkwaphiẹrhotọre ọrana, ọ homaphia uvwre Ilele Kristi erukaro na. Kporo IVIDIO na.
Se 1 Corinthians 14:33, 40, orho ru, are i gba kpahenrhọ onọ ọnana:
Marhẹ eghwẹmro enana i ru djephia taghene i Jehova ọ guọlọre nẹ Iseri enẹyen i rhe ruẹ lele ẹkwaphiẹrhotọre?
4. Ọvrẹn ra hẹrosua na ọ dabu hẹrote owian aghwoghwo ọwan
Owian aghwoghwo na yẹ owian rọ mai ghanren, rẹ Ilele Kristi erukaro na i vwobọrhọ. Se Acts 8:14, 25, orho ru, are i gba kpahenrhọ enọ enana:
Usuẹn Ilele Kristi erukaro na, ọrọmo yọ ha ọkpọvi phia kpahen owian aghwoghwo na?
Marhẹ i Peter ọrhẹ i John i kpahenrhọ ọkpọvi rẹ inyikọ eri hẹrhẹre na i yẹrẹ aye?
Aghwoghwo na yẹ owian rọ mai ghanren rẹ Ugboma Usuon na ọ hẹrote. Kporo IVIDIO na.
Jesu ọ dabu dje kpahen oborẹ owian aghwoghwo na ọ ghanren te. Se Mark 13:10, orho ru, are i gba kpahenrhọ enọ enana:
Mesoriẹ owian aghwoghwo na ọ ghanren omamọ rẹn Ugboma Usuon na?
Mesoriẹ a guọlọ userhumu “ọvrẹn ra hẹrosua ro ji vwo ẹghwanren na,” nọ hẹrote owian akpọ ephian ọnana?
5. Ọvrẹn ra hẹrosua na o tiobọnẹ ọkpọvi
Ugboma Usuon na o tiobọnẹ ọkpọvi rẹn Ilele Kristi uvuẹn akpọ na ephian. Marhẹ o ru brorhiẹn kpahen ọkpọvi ro no tiobọnu? Yono kpahen oborẹ ugboma usuon uvuẹn ọke Ilele Kristi erukaro na i rurie lele. Se Acts 15:1, 2, orho ru, are i gba kpahenrhọ enọ enana:
Ẹmro ọgo yọ suẹ ẹfro uvwre Ilele Kristi erukaro na ezẹko?
Ayọmo yi Paul, Barnabas, ọrhẹ awọrọ i nekpẹn urhebro mie nẹ aye i sabu kwaphiẹ ẹmro na rhọ?
Se Acts 15:12-18, 23-29, orho ru, are i gba kpahenrhọ onọ ọnana:
Bọmọke ugboma usuon ọrukaro na o ki brorhiẹn, me yẹ aye e ruẹ nẹ aye i sabu mẹrẹn ọkpọvi Osolobrugwẹ kpahen ẹmro na?—Se oghwẹmro 12, 15, ọrhẹ 28.
Se Acts 15:30, 31 ọrhẹ 16:4, 5, orho ru, are i gba kpahenrhọ enọ enana:
Marhẹ Ilele Kristi erukaro na i kpahenrhọ ọkpọvi rẹ ugboma usuon na ọ yẹrẹ aye?
Marhẹ i Jehova o ru yẹ aye ebrurhọ fọkime aye i huvwele?
Se 2 Timothy 3:16 ọrhẹ James 1:5, orho ru, are i gba kpahenrhọ onọ ọnana:
Bọgo yẹ Ugboma Usuon uvuẹn ọke ọwan na a nya ya guọlọ ọkpọvi, aye e ki brorhiẹn?
OBORẸ IHWORHO EZẸKO A TA: “Wa rha kerhọ Ugboma Usuon na, nọyẹ wa ghwai nyalele ituakpọ.”
Me yọ lẹrheriẹ mwuo ẹro taghene i Jesu yo suẹn Ugboma Usuon na?
ME WU YONORIN?
Ugboma Usuon na yẹ “ọvrẹn ra hẹrosua ro ji vwo ẹghwanren na,” ri Kristi ọ ha mwu. Ọ ha ọkpọvi ọrhẹ emaren ẹhẹn rẹn Ilele Kristi ri ha uvuẹn akpọ na ephian.
Ẹzẹkoko
Ọrọmo yọ ha “ọvrẹn ra hẹrosua ro ji vwo ẹghwanren na” mwu?
Marhẹ Ugboma Usuon na o ru hẹrote ọwan?
O mwuruon ẹro taghene Ugboma Usuon na yẹ “ọvrẹn ra hẹrosua ro ji vwo ẹghwanren na”?
GUỌLỌ IYẸNRẸN ERỌRỌ
Se kpahen oborẹ Ugboma Usuon na o ru wian owian yen lele ẹkwaphiẹrhotọre ọke ephian.
“Me yẹ Ugboma Usuon Ọrẹ Iseri Jehova?” (Urhomu-ẹmro rọ ha uvuẹn itanẹti)
Yono kpahen oborẹ Ugboma Usuon na o ru damoma neneyo ọwan i mẹrẹn obọdẹn emaren ẹhẹn.
Marhẹ oma o ruẹ imizu ri ha usuẹn Ugboma Usuon na kpahen owian i Jesu ọ yẹrẹ aye na?
Marhẹ iyono ọrhẹ emẹvwa ọwan i ru djephia taghene i Jehova yọ yẹ Ugboma Usuon na ọkpọvi?