Orhiẹ Ọwan Ọvo yi Havwiẹ-ẹ

1-2. (a) Mesoriẹ o mwu ọwan ẹro taghene Jehova ọnọ ha userhumu rẹn ọwan uvuẹn ọke ebẹnbẹn? (b) Me ye ne yono kpahen uvuẹn urhomu-ẹmro ọnana?

ARHA dẹrughwaroghwu ebẹnbẹn, ana sabu rhe roro taghene ọwan ọvo yi havwiẹ, jerẹ ohworho rọ ghwa owọ ọkokamu uvuẹn urhie rọ kpara. Ọrẹn, rhẹ ọwan ọvo yi havwiẹ-ẹ. Ọsẹ ọwan obẹ odjuwu ọ mẹrẹn ebẹnbẹn ọwan, o ji ve taghene ọnọ ha userhumu rẹn ọwan na sabu nyerẹnghele aye. Jehova o vive ọnana rẹn idibo yi ri vwo atamwu kpahiẹn: “Mi na ha userhumu wẹn.”—Isa. 41:10.

² Uvuẹn urhomu-ẹmro ọnana ene yono kpahen oborẹ i Jehova o ru ha userhumu rẹn ọwan nyoma (1) ro sun ọwan, (2) rọ hẹrote ọwan, (3) rọ sẹrorẹ ọwan, ọrhẹ (4) rọ ha urhebro rẹn ọwan. Jehova ọ yẹrẹ ọwan imwẹro taghene ọnọ hẹrote ọwan udabọ ebẹnbẹn ephian ra dẹrughwaroghwu. Ọ sẹrerhumuji ọwan dẹ-ẹ. Omarana, orhiẹ ọwan ọvo yi havwiẹ-ẹ.

JEHOVA O SUN ỌWAN

3-4. Marhẹ i Jehova o ru sun ọwan? (Psalm 48:14)

³ Se Psalm 48:14. Jehova o vwo fiẹrorhọ taghene ọwan ọvo ine sun oma ọwa-an. Marhẹ o ru sun idibo yi ri vwo atamwu kpahiẹn uvuẹn ọke ọwan na? Izede owu o ru ruẹ ọnana, yẹ nyoma i Baibol na. (Ps. 119:105) Nyoma i Baibol na, Jehova ọ ha userhumu rẹn ọwan brorhiẹn ji vwo iruemru ri na lẹrhẹ ọwan vwo obọdẹn omamerhomẹ vwana ọrhẹ arhọ i bẹmẹdẹ obaro na.a Jerẹ udje, o yonirin ọwan ne ti eghrẹn nẹ ẹhẹn, rhiẹ ihworho ra ta urhomẹmro ọrẹ kemru kemru, ji vwo ẹgwọlọ okokodo kpahen awọrọ. (Ps. 37:8; Heb. 13:18; 1 Pet. 1:22) Erhe dje aruẹ iruemru enana phia, na na sabu rhiẹ emamọ emiemọ, esa yanghene ane, ọrhẹ omamọ ugbehian.

⁴ Habaye, Baibol na o vwo iyẹnrẹn ihworho ri dẹrughwaroghwu ebẹnbẹn ri ji vwo iroro ri họhọ erẹ ọwan. (1 Cor. 10:13; Jas. 5:17) Erhe se iyẹnrẹn i Baibol enana ji ha iyono na ruiruo, ana mẹrẹn erere uvuẹn izede eva kirighwo. Ọrukaro, na na mẹrẹnvwrurhe taghene orhiẹ ọwan ọvo yi havwiẹ-ẹ—awọrọ i ji dẹrughwaroghwu aruẹ erhirhiẹ enana ji fiekparobọ ne. (1 Pet. 5:9) Ọreva, ene yono kpahen oborẹ ene ru nyerẹnghele ebẹnbẹn ọwan.—Rom. 15:4.

5. Ayọmo yi Jehova ọ ha sun ọwan uvuẹn izede ro suẹn riẹ arhọ na?

⁵ Jehova ọ ji nyoma imizu ukoko na sun ọwan.b Jerẹ udje, iniruo okinhariẹ e kin ikoko sansan ji ha urhebro rẹn ọwan. Ẹmro aye a haphia ọ bọn esegburhomẹmro ọwan gbanhan ji sa ọwan erhumu sẹrorẹ okugbe. (Acts 15:40–16:5) Ekpako ukoko e ji dje ọdamẹ phia rẹn oghwoghwẹmro owuowu. (1 Pet. 5:​2, 3) Emiemọ a ha userhumu rẹn emọ aye vwo ẹgwọlọ kpahen i Jehova, ji sa aye erhumu vwo emamọ iruemru, nẹ aye i sabu brorhiẹn ri serhọ. (Prov. 22:6) Habaye, imizu emẹse ri te edje ne uvuẹn ukoko na, a ha userhumu rẹn imizu emẹse ri rhiẹ iphuphẹn nyoma udje aye, ji tiobọnẹ urhebro ọrhẹ userhumu re rhiẹromẹrẹn.—Titus 2:​3-5.

6. Me ye ne vi ru na sabu mẹrẹn erere nẹ ọkpọvi Jehova?

⁶ Jehova ọ yẹrẹ ọwan i kemru kemru ra gwọlọre na sabu brorhiẹn ro serhọ ji vwo omamerhomẹ. Marhẹ ene ru djephia taghene e vwo ọdaremẹro kpahen oborẹ o ru rẹn ọwan? Proverbs 3:​5, 6 nọ tare: “Hẹrosuẹ i Jehova rhẹ ọsoso ọmuduo, wu vwa hẹrosuẹ irherhe omobọ ọnọ-ọ.” Erhe ru omaran, “no no ruẹ izede [ọwan] phiọn,” nọyẹ ọnọ ha userhumu rẹn ọwan kẹnoma rẹn ebẹnbẹn buebun ji nyerẹn obọdẹn akpọ. Oma ọ merhenren ọwan omamọ taghene Jehova o tiobọnu urhebro ẹgwọlọ ọnana rẹn ọwan!—Ps. 32:8.

JEHOVA Ọ HẸROTE ỌWAN

7. Izede ego yi Jehova o ru hẹrote ọwan? (Philippians 4:19)

⁷ Se Philippians 4:19. Haba userhumu ọrẹ ẹhẹn ri Jehova o tiobọnẹ rẹn ọwan, ọ ji sa ọwan erhumu vwo emaren, iwun, ọrhẹ ekete re ne rhirhiẹ. (Matt. 6:33; 2 Thess. 3:12) Dedevwo ana sabu rhe brudu kpahen edamẹ ugboma ọwan, ọrẹn Jehova ọ ha urhebro rẹn ọwan taghene e vwe brudu pha-an. (Se ẹmro re dje fiotọre ro sekpahen Matthew 6:25.) Mesoriẹ? Fọkime Ọsẹ ọwan ọ sẹrerhumuji idibo yi uvuẹn ọke ebẹnbẹ-ẹn. (Matt. 6:8; Heb. 13:5) Ana sabu hẹrosuiẹ taghene ọnọ hẹrote ọwan.

8. Me yi Jehova o ru rẹn i David?

⁸ Roro kpahen oborẹ i Jehova o ru ha userhumu rẹn i David. Uvwrọke i David ọ zẹ nẹ ekete owu riẹ ọrọrọ, Jehova ọ yẹriẹ ọrhẹ ihworho yi oborẹ aye i gwọlọre. Sekpahen ẹruete i Jehova uvwre ẹgbukpe erana, David nọ yare: “Mẹmẹ uphuphẹn bi, vwana mi ho ne, ọrẹn mia ji mẹrẹn ohworho ọvwata owuorowu ra sẹrerhumuji-i, yanghene emọyen na gwọlọ emaren rẹ aye ina riọ-ọ.” (Ps. 37:25) Ọkezẹko, wu ji mẹrẹn oborẹ i Jehova o ru hẹrote idibo yi ri fuevwan kpahiẹn ne.

9. Marhẹ i Jehova o ru hẹrote ihworho yi uvwrọke oghwọghọ kpregede? (Ji ni ifoto na.)

⁹ Jehova ọ hẹrote ihworho yi uvuẹn ọke oghwọghọ kpregede. Jerẹ udje, ọke orhọmo ọgbogbanhon ọ homaphia uvuẹn ọke Ilele Kristi erukaro na, Ilele Kristi ri ha ẹkwotọre sansan, ne dje emaren vwe imizu aye ri ha ebẹnbẹn. (Acts 11:​27-30; Rom. 15:​25, 26) Ihworho Osolobrugwẹ inyenana, e ji tiobọnẹ ghwologhwolo. Oghwọghọ kpregede ọrhọ homaphia, Jehova nọ nyoma idibo yi tiobọnẹ imwu, emaren, ame, iwun ọrhẹ ekwakwa erọrọ rẹn imizu re rhirhiẹ uvwrakpọ erana. Imizu ra bọn ebanbọn, a kwaphiẹ eghwa ọrhẹ Aghwẹlẹ Uvie ri ghwọghọre. Habaye, idibo i Jehova e tiobọnẹ urhebro i Baibol rẹn ihworho rẹ eghwa yanghene ihworho aye i vwo ẹgwọlọ kpahen i vare aye obọ.c

10-11. Me wu yono nẹ udje i Borys?

¹⁰ Jehova o ji tiobọnẹ ghwologhwolo rẹn ihworho ri vwa ga ye. Omaran o ji fo na gwọlọ uphẹn re ne dje uruemru esiri rẹn awọrọ ri vwa ga i Jehova. (Gal. 6:10) Ọnana ọnọ yẹ ọwan uphẹn re ne ghwoghwo rẹn aye. Roro kpahen udje i Borys ro rhirhiẹ Ukraine, ro rhiẹ principal uvuẹn isukuru owu. Dedevwo Borys rhẹ Oseri Jehova-a, ọrẹn, o dje uruemru esiri rẹn emọ isukuru ọnẹyen ri rhiẹ Iseri Jehova ji họghọ rẹn imwẹro aye. Ọke i Borys o brorhiẹn rọ nọ zẹ nẹ ekete re fiuvweri na riẹ ekete ọrọrọ ro fuoma uvuẹn ẹkwotọre na, imizu ukoko na ni ha userhumu riẹn. Ọke oru, Borys no riẹ Ẹkarorhọ Uhwu i Jesu. Borys nọ tare: “Iseri Jehova i dabu dje ọdamẹ ọrhẹ ẹruete ha mẹ. Mi kpẹmirẹ aye omamọ.”

¹¹ Ana ji sabu hẹrokele Ọsẹ ọwan obẹ odjuwu, nyoma re ne dje arodọmẹ phia rẹn eri gwọlọ userhumu, sẹ aye a ga i Jehova yanghene aye i vwa ga ye-e. (Luke 6:​31, 36) Ọwan i fiẹrorhọ taghene ẹgwọlọ re dje rẹn aye, ono mwu aye rhiẹ idibo i Kristi. (1 Pet. 2:12) O toro oborẹ erhirhiẹ na ọ havwọ-ọ, oma ọnọ merhẹn ọwan taghene e tiobọnu ghwologhwolo.—Acts 20:35.

JEHOVA Ọ SẸRORẸ ỌWAN

12. Ive ọgo yi Jehova o ve rẹn idibo yi? (Psalm 91:​1, 2, 14)

¹² Se Psalm 91:​1, 2, 14. Jehova o veri taghene ọnọ ha userhumu rẹn ọwan na sabu sẹrorẹ onyerẹnkugbe rhẹ ọye. Ọ vwọ samọ ha uphẹn rẹn Echu no biomu ẹga urhomẹmro-o. (John 17:15) “Ukpokpogho rode” na ọrhọ tonrhọ ne, ana sabu vwo imwẹro taghene Jehova ọnọ nyamwu ive yi, rọ nọ sẹrorẹ ọwan izede ọrẹ ẹhẹn ọrhẹ ọrẹ ugboma.—Rev. 7:​9, 14.

13. Izede ego yi Jehova o ru sẹrorẹ ọwan owuowu?

¹³ Marhẹ i Jehova o ru sẹrorẹ ọwan owuowu? Jehova ọ nyoma i Baibol na ha userhumu rẹn ọwan rhe oborẹ ọgbare ọrhẹ oborẹ ọsọre. (Heb. 5:14) Arha ha iruemru-urhi ri ha uvuẹn i Baibol na ruiruo, ọnọ sẹrorẹ ọwan nẹ oborẹ ọnọ ghwọghọ onyerẹnkugbe ọwan rhẹ i Jehova ji vwo omọkpokpọ. (Ps. 91:4) Habaye, Jehova ọ ji sẹrorẹ ọwan nyoma ukoko na. (Isa. 32:​1, 2) Erhe kwomakugbe ihworho ri vwo ẹgwọlọ kpahen Jehova ra ji ha iruemru-urhi Baibol ruiruo, ọnọ ha userhumu rẹn ọwan kẹnoma rẹn ekwakwa ibiobiomu.—Prov. 13:20.

14. (a) Mesoriẹ Osolobrugwẹ ọ ha uphẹn rẹn ọwan na rioja ọkezẹko? (b) Imwẹro ọgo yi Psalm 9:10 ọ yẹrẹ ọwan? (Ji se ekete ra djokarhọ.)

¹⁴ O ji vwo ọkezẹko ri Jehova ọ sẹrorẹ idibo yi ọke ahwanren nẹ ẹkuọn. Ọrẹn, orhiẹ ọke ephian yi Jehova o ruẹ omara-an. Ọkezẹko, “oborẹ e vwe fiẹrorhọ” ọ phia rẹn ọwan. (Eccl. 9:11) Habaye, Jehova ọ ji ha uphẹn rẹn idibo yi ezẹko uvuẹn akpọ na nẹ aye i dẹrughwaroghwu ẹkparehaso ji hwu, na sabu dje Echu rhiẹ ọmọrenfian. (Job 2:​4-6; Matt. 23:34) Omaran ọ ji havwọ inyenana. Dedevwo Jehova ọnọ sabu ha uphẹn rẹn ọwan na rioja, ọrẹn, e vwo imwẹro taghene ọ sẹrerhumuji ihworho ri vwo ẹgwọlọ kpahiẹ-ẹn.d—Ps. 9:10.

JEHOVA Ọ HA URHEBRO RẸN ỌWAN

15. Marhẹ e ru mẹrẹn urhebro nyoma ẹrhomo, Baibol ọrhẹ imizu ukoko na? (2 Corinthians 1:​3, 4)

¹⁵ Se 2 Corinthians 1:​3, 4. Ọkezẹko, e mwuomarhọ ji vwo ẹhẹn ro seriotọre yanghene ọfiamu. Ọkezẹko, wa dẹrughwaroghwẹ erhirhiẹ ọgbogbanhon vwana, rọ lẹrhuọ roro taghene wu havwiẹ kologho. Ohworho owuorowu o vwẹruọ iroro ọnọ? Ee, Jehova o vwẹruọ. Ọ jeghwai “ha urhebro rẹn ọwan uvuẹn edamuni ọwan ephian.” Izede ọgo? Arha rẹ i Jehova nyoma ẹrhomo, ọnọ yẹ ọwan “ufuoma ọrẹ Osolobrugwẹ rọ ghwẹ ọmẹrẹnvwrurhe ephian.” (Phil. 4:​6, 7) Ọwan a ji mẹrẹn urhebro erhe se i Baibol na. Baibol na o vwo ẹmro ẹgwọlọ, ẹghwanren ọrhẹ ifiẹrorhọ ri na sabu bọn ọwan gbanhon. Habaye, erhe riẹ uyono ukoko, ana mẹrẹn urhebro i Baibol ọrhẹ imizu ri na bọn ọwan gbanhon.

16. Me wu yono nẹ udje i Nathan ọrhẹ Priscilla?

¹⁶ Udje i Nathan ọrhẹ Priscilla re rhirhiẹ ẹkwotọre i United States, o djephia taghene Jehova ọ nyoma i Baibol na tiobọnẹ urhebro rẹn ọwan. Ẹgbukpe ezẹko ri vrẹnren, aye ni brorhiẹn taghene aye ina ya ga uvuẹn ekete ra gwọlọ userhumu ighwoghwẹmro Uvie na. Nathan nọ tare, “Ame i hẹroso i Jehova taghene ọnọ ha ebrurhọ rẹn omẹdamu ame.” Ọrẹn, ọke aye a ha avwaye, aye ni kpomurun ji dẹrughwaroghwu ebẹnbẹn igho. Fọkiẹ ọnana, esa ọrhẹ ane na ni ghwẹrioma rie, udabọ erhirhiẹ ọkanronmẹ igho na. Nathan nọ tare, “Ni mie roro kpahen oborẹ ọsoriẹ Osolobrugwẹ ọ vwọ ji ha ebrurhọ rẹn ame jerẹ oborẹ ame i fiẹrorhọ. Ni mia tobọ roro sẹ mi ruẹ emru sọ.” Ọke oru, Nathan ọrhẹ i Priscilla ni mẹrẹnvwrurhe taghene Osolobrugwẹ ọ sẹrerhumuji aye uvuẹn ọke ebẹnbẹ-ẹn. Nathan nọ tare, “Uvwrọke ọgbogbanhon ọnana, Baibol na nọ họhọ obọdẹn ugbehian rọ yẹ ame urhebro ọrhẹ ọkpọvi. Ukperẹ ame ina tẹnrovi obẹnbẹn na, ame ni tẹnrovi oborẹ i Jehova o ru sa ame erhumu dien, ọnana o mwuegbe ame hẹrhẹ ebẹnbẹn erọrọ obaro na.”

17. Marhẹ omizu ọmase re se Helga o ru mẹrẹn urhebro? (Ji ni ifoto na.)

¹⁷ Imizu ukoko na ina ji sabu ha urhebro rẹn ọwan. Izede ọgo? Roro kpahen udje omizu ọmase re se Helga, ro rhirhiẹ ẹkwotọre i Hungary. Uvwre ẹgbukpe buebun, o rhiẹromẹrẹn ebẹnbẹn ri lẹrheriẹ brudu ji ni omayen sakamu. Vwana, ọrhọ karorhọ ekwakwa ri phia vrẹn ne, no mwuien ẹro taghene Jehova ọ nyoma ukoko na ha urhebro riẹn. Nọ tare: “Ọke ephian yi Jehova ọ sa mẹ erhumu orhianẹ omẹgbanhon mẹ o riotọre fọkiẹ iruo mẹ, ọmọ mẹ ro kpomẹ mia hẹrote, ọrhẹ ebẹnbẹn erọrọ. Uvwre ẹgbukpe 30 rhe na, ọ nyamwu ive yi ẹdẹ owuowu nyoma rọ ha urhebro mẹ. O ru mẹ gbanhan nyoma ẹmro esiri, ekpẹmẹ ọrhẹ ọdaremẹro awọrọ e djephia mẹ. Ọgbọ buebun, imizu ukoko na e dje urhomu vwe mẹ, omaran ji te ikadi yanghene ẹmro ekpẹmẹ uvuẹn ọke mia gwọliẹ.”

18. Marhẹ ene ru ha urhebro rẹn awọrọ?

¹⁸ Ọwan i vwo uphẹn ra na hẹrokele Osolobrugwẹ, nyoma ra na ha urhebro rẹn awọrọ. Marhẹ ene ru ruẹ omaran? Ana sabu kerhọ aye rhẹ erhionrin, tẹmro rẹn aye bọrọbọrọ, ji ha userhumu rẹn aye uvuẹn izede ra mẹrẹn. (Prov. 3:27) E vwo omwemẹ ra na ha urhebro rẹn era rioja, ji tobọ te ihworho ri vwa ga Osolobrugwẹ vwana. Awọrọ arha dẹrughwaroghwẹ uduebro, omemwurhọ, yanghene emiamo, o fori na kọn bru aye, kerhọ aye, ji yẹ aye urhebro i Baibol. Arha hẹrokele i Jehova ro rhiẹ “Osolobrugwẹ urhebro ephian,” ana sabu ha userhumu rẹn imizu na din ebẹnbẹn ji ha userhumu rẹn awọrọ ri vwa ga i Jehova vwo ẹhẹn aye ina ga ye.—Matt. 5:16.

JEHOVA RHẸ ỌWAN I GBA HAVWIẸ ỌKE EPHIAN

19. Me yi Jehova o ruẹ rẹn ọwan, marhẹ ene ru hẹrokelie?

¹⁹ Jehova o vwo ọdamẹ kpahen ihworho ri vwo ẹgwọlọ kpahiẹn. Ọ vwọ sẹrerhumuji ọwan uvuẹn ọke ebẹnbẹ-ẹn. Jerẹ oborẹ ọmiọmọ ro vwo ẹgwọlọ ọ dabu hẹrote ọmọyen, omaran i Jehova ọ dabu hẹrote idibo yi ri vwo atamwu kpahiẹn. O sun ọwan, sẹrorẹ ọwan, hẹrote ọwan, ji ha urhebro rẹn ọwan. Ọwan a hẹrokele Ọsẹ ọwan obẹ odjuwu nyoma ra hobọtua awọrọ ji ha urhebro rẹn aye uvuẹn ọke ebẹnbẹn. Dedevwo ana sabu dẹrughwaroghwu ebẹnbẹn, ọrẹn e vwo imwẹro taghene Jehova rhẹ ọwan i gba havwiẹ. Fọkime o veri: “Wu vwa zofẹ-ẹn, fọkime mẹmẹ rhẹ owẹwẹ i gba havwiẹ.” (Isa. 41:10) Ọnana ọ yẹrẹ ọwan imwẹro ọgbogbanhon! Itiọrurhomẹmro, orhiẹ ọwan ọvo yi havwiẹ-ẹ.