ଈଶ୍ୱର ତାହାଙ୍କ ଭାବବାଦୀଙ୍କ ଦ୍ୱାରା କଥା କହନ୍ତି

ଯିହୂଦା ଏବଂ ଇସ୍ରାଏଲ ରାଜାମାନଙ୍କ ସମୟରେ ଏକ ବିଶେଷ ଧରଣର ଲୋକଙ୍କ ଆବିର୍ଭାବ ହୋଇଥିଲା, ସେମାନଙ୍କୁ ଭାବବାଦୀ କୁହାଯାଏ । ସେମାନେ ଦୃଢ଼ ବିଶ୍ୱାସୀ ଓ ସାହସୀ ଥିଲେ, ଆଉ ଈଶ୍ୱରଙ୍କ ବିଷୟରେ ଘୋଷଣା କରୁଥିଲେ । ଆସନ୍ତୁ ଚାରୋଟି ମୂଖ୍ୟ ବିଷୟକୁ ଦେଖିବା ଯାହା ଈଶ୍ୱରଙ୍କ ଭାବବାଦୀ କହିଥିଲେ ।

୧. ଯିରୁଶାଲମର ଧ୍ୱଂସ । ଅନେକ ବର୍ଷ ପୂର୍ବେ ଈଶ୍ୱରଙ୍କ ଭାବବାଦୀମାନେ ବିଶେଷ କରି—ଯିଶାଇୟ ଓ ଯିରିମିୟ ଯିରୁଶାଲମର ଧ୍ୱଂସ ଓ ପରିତ୍ୟକ୍ତ ହେବା ବିଷୟରେ ସତର୍କବାଣୀ ଘୋଷଣା କରିଥିଲେ । ସେମାନେ ସ୍ପଷ୍ଟଭାବେ କହିଥିଲେ ଯେ ଈଶ୍ୱର କାହିଁକି ଏହି ସହର ଉପରେ ଏତେ କ୍ରୋଧିତ । ଯିରୁଶାଲମର ଲୋକମାନେ ଦାବି କରିଆସୁଥିଲେ ଯେ ସେମାନେ ଯିହୋବାଙ୍କ ପ୍ରତିନିଧି, କିନ୍ତୁ ତାଙ୍କର ମିଥ୍ୟା ଧର୍ମ, ଭ୍ରଷ୍ଟାଚାରୀତା, ଅତ୍ୟାଚାରିତା ସେମାନଙ୍କ ଏହି ଦାବିକୁ ମିଥ୍ୟା ବୋଲି ପ୍ରମାଣିତ କରିଥିଲା ।—୨ ରାଜାବଳୀ ୨୧:୧୦-୧୫; ଯିଶାଇୟ ୩:୧-୮, ୧୬-୨୬; ଯିରିମିୟ ୨:୧-୩:୧୩.

୨. ଶୁଦ୍ଧଉପାସନାର ପୁନଃସ୍ଥାପନ । ଈଶ୍ୱରଙ୍କ ଲୋକମାନେ ୭୦ ବର୍ଷ ବାବିଲରେ ବନ୍ଦୀ ରହିବା ପରେ ମୁକ୍ତି ପାଇବାର ଥିଲା । ସେମାନଙ୍କୁ ନିଜର ସେହି ପରିତ୍ୟକ୍ତ ଜନ୍ମସ୍ଥାନକୁ ଫେରିବା ପରେ, ଯିହୋବାଙ୍କ ମନ୍ଦିର ଯିରୁଶାଲମରେ ପୁନଃନିର୍ମାଣ କରିବାର ଥିଲା । (ଯିରିମିୟ ୪୬:୨୭; ଆମୋଷ ୯:୧୩-୧୫) ପ୍ରାୟ ୨୦୦ ବର୍ଷ ପୂର୍ବେ, ଯିଶାଇୟ, ଭବିଷ୍ୟତ ବାଣୀ କରି କହିଥିଲେ ଯେ କୋରସ ନାମକ ଜଣେ ବ୍ୟକ୍ତି ବାବିଲକୁ ପରାଜିତ କରିବେ ଏବଂ ଈଶ୍ୱରଙ୍କ ଲୋକମାନଙ୍କୁ ପୁଣିଥରେ ସତ୍ୟଉପାସନାର ପୁନଃସ୍ଥାପନ କରିବାକୁ ଅନୁମତି ଦେବେ । ଏପରିକି କୋରସଙ୍କ ଯୁଦ୍ଧର ରଣକୌଶଳ ବିଷୟ ମଧ୍ୟ ଯିଶାଇୟ ବିସ୍ତାରଭାବେ ବର୍ଣ୍ଣନା କରିଥିଲେ ।—ଯିଶାଇୟ ୪୪:୨୪-୪୫:୩.

୩. ମସୀହଙ୍କ ଆଗମନ ଓ ତାହାଙ୍କ ଅଭିଜ୍ଞତା । ମସୀହ ବେଥଲିହିମ ସହରରେ ଜନ୍ମଗ୍ରହଣ କରିବେ । (ମୀଖା ୫:୨) ସେ ନମ୍ରତାର ସହ ଗଧ ଉପରେ ବସି ଯିରୁଶାଲମକୁ ଆସିବେ । (ଯିଖରିୟ ୯:୯) ଯଦ୍ୟପି ସେ ଭଦ୍ର ଓ ଦୟାଳୁ ତଥାପି ଅନେକ ଲୋକ ତାହାଙ୍କୁ ଗ୍ରହଣ କରିବେ ନାହିଁ । (ଯିଶାଇୟ ୪୧:୧-୩; ୫୩:୧, ୩) ତାହାଙ୍କ ମୃତ୍ୟୁ ଅତ୍ୟନ୍ତ କଷ୍ଟଦାୟକ ହେବ । କʼଣ ଏପରି ତାହାଙ୍କ ଜୀବନର ଶେଷ ହେବ ? ନାʼ, କାରଣ ତାହାଙ୍କ ବଳିଦାନ ଦ୍ୱାରା ଅନେକଙ୍କର ପାପ କ୍ଷମା ହେବ । (ଯିଶାଇୟ ୫୩:୪, ୫, ୯-୧୨) ଏହା କେବଳ ତାହାଙ୍କ ପୁନରୁତ୍ଥାନ ଦ୍ୱାରା ସମ୍ଭବ ।

୪. ପୃଥିବୀ ଉପରେ ମସୀହଙ୍କ ଶାସନ । ଅସିଦ୍ଧ ମନୁଷ୍ୟ କେବେ ମଧ୍ୟ ଶାନ୍ତିରେ ଶାସନ କରିପାରିବେ ନାହିଁ, କିନ୍ତୁ ମସୀହ ରାଜାଙ୍କୁ ଶାନ୍ତିର ରାଜା କୁହାଯାଏ । (ଯିଶାଇୟ ୯:୬, ୭; ଯିରିମିୟ ୧୦:୨୩) ତାହାଙ୍କ ଶାସନକାଳରେ ସମସ୍ତ ମାନବଜାତି ପରସ୍ପର ଶାନ୍ତିରେ ବାସ କରିବେ ଏପରି କି ସୃଷ୍ଟିର ସମସ୍ତ ଜୀବଜନ୍ତୁ ମଧ୍ୟ । (ଯିଶାଇୟ ୧୧:୩-୭) ରୋଗ ଆଉ ରହିବ ନାହିଁ । (ଯିଶାଇୟ ୪୪:୨୪) ଏପରି କି ମୃତ୍ୟୁ ଆଉ ଘଟିବ ନାହିଁ । (ଯିଶାଇୟ ୨୫:୮) ମସୀହଙ୍କ ଶାସନ ବେଳେ ଯେଉଁମାନେ ମରିଯିବେ ସେମାନେ ଏହି ପୃଥିବୀରେ ପୁଣିଥରେ ପୁନରୁତ୍‌ଥିତ ହେବେ ।—ଦାନିଏଲ ୧୨:୧୩.

—ଏହା ଯିଶାଇୟ, ଯିରିମିୟ, ଦାନିଏଲ, ଆମୋଷ, ମୀଖା ଏବଂ ଯିଖରିୟ ପୁସ୍ତକ ଉପରେ ଆଧାରିତ ।