Кӕсынц нӕм «циркмӕ кӕсӕгау»!
1 Апостол Павел фыста: «Дуне дӕр, зӕдтӕ дӕр ӕмӕ [нӕм] адӕм дӕр кӕсынц циркмӕ кӕсӕгау» (1 Кор. 4:9, НД). Ацы ныхӕстӕ куыд ис бамбарӕн ӕмӕ нын нӕ лӕггаддзинадыл абон куыд ӕндавынц?
2 Коринфы цӕрӕг дзырд «цирк» куы фехъуыстаид, уӕд, ӕвӕццӕгӕн, йӕ зӕрдыл ӕрлӕууыдаид Ромы гладиаторты тох, цыран-иу тӕрхонгонд адӕмы ракодтой мингай адӕмы размӕ ӕмӕ-иу сӕ уый фӕстӕ фыдмард акодтой. Афтӕ фыццаг ӕнусы дӕр бирӕтӕ — адӕм дӕр ӕмӕ зӕдтӕ дӕр — кастысты, чырыстӕттӕ, Паддзахады тыххӕй кӕй хъусын кодтой, уый тыххӕй куыд хъизӕмар кодтой, уымӕ (Дзут. 10:32, 33). Сӕ иузӕрдиондзинад бандӕвта бирӕтыл, абон нӕ фӕразондзинад, чи нӕм кӕсы, уыдоныл куыд ӕндавы, афтӕ. Фӕлӕ нӕм чи кӕсы «циркмӕ кӕсӕгау»?
3 Дуне ӕмӕ адӕм. Иуӕй-иу хатт газетты, журналты, радио ӕмӕ телеуынынады фӕхъусын кӕнынц Иегъовӕйы адӕмы куысты тыххӕй. Ӕмӕ нын кӕд ӕхсызгон вӕййы, нӕ куысты тыххӕй рӕстытӕ кӕй фӕдзурынц ӕмӕ нӕ кӕй феппӕлынц, уӕддӕр нӕ зӕрдыл дарӕм, нӕ фыдкойгӕнджытӕй рӕстӕгӕй-рӕстӕгмӕ уайдзӕфтӕ дӕр кӕй хъусдзыстӕм, уый. Фӕлӕ мах хъуамӕ дарддӕр дӕр, «уайдзӕфы ӕмӕ ӕппӕлдтыты», нӕхи ӕвдисӕм куыд Хуыцауы кусджытӕ (2 Кор. 6:4, 8). Афтӕмӕй ӕргомзӕрдӕ адӕм уындзысты, мах Йесо Чырыстийы ӕцӕг ахуыргӕнинӕгтӕ кӕй стӕм, уый.
4 Зӕдтӕ. Кӕсынц ма нӕм уӕларвон фӕлдисондтӕ дӕр. Хӕйрӕг ӕмӕ нӕм йӕ фыдгӕнӕг зӕдтӕ кӕсынц «знӕтӕй судзгӕйӕ» ӕмӕ архайынц, «Йесо Чырыстийӕн ӕвдисӕн чи лӕууы», уыдоны бакъуылымпы кӕныныл (Рар. 12:9, 12, 17, НФ). Хуыцауы иузӕрдион зӕдтӕ та кӕсынц ӕмӕ цин кӕнынц, иу тӕригъӕдджын дӕр йӕ тӕригъӕдтыл куы ӕрфӕсмон кӕны, уӕд (Лукайы 15:10). Зӕдтӕ нын абон нӕ лӕггаддзинад нымайынц зӕххыл иууыл хуыздӕр куыстыл ӕмӕ ӕвӕстиатӕй ӕххӕст кӕнын кӕй хъӕуы, ахӕм хъуыддагыл, ӕмӕ уый зонгӕйӕ хъуамӕ ныфсджындӕр кӕнӕм! (Рар. 14:6, 7).
5 Ныхмӕдзыдыл куы ӕмбӕлай кӕнӕ куы хъуыды кӕнай, зӕгъгӕ мын лӕггаддзинады ницы ӕнтысы, уӕд-иу ӕрхъуыды кӕн, алырдыгӕй дӕм кӕй кӕсынц, уый. Дӕ фӕразондзинад дзурӕг уыдзӕн дӕ иузӕрдиондзинадыл. Ӕппынфӕстаг та «уырнындзинады хорз скуыхты» руаджы фидар «хӕцдзынӕ мыггагмӕйы цардыл» (1 Тим. 6:12).