Ӕмбырдтӕ видеоконференцийы уылты

Бирӕ бӕстӕты хицауад уынаффӕ рахаста, цӕмӕй адӕм кӕрӕдзимӕ хӕстӕг ма цӕуой ӕмӕ иумӕ ма ӕмбырд кӕной. Йегъовӕйы Ӕвдисӕнтӕ уыцы уынаффӕмӕ хъусынц, фӕлӕ уӕддӕр ӕмбырдтӕ уадзынц видеосвязы уылты. Уый тыххӕй пайда кӕнынц алыхуызон приложенитӕй, зӕгъӕм, приложенийӕ Zoom.

Цӕмӕй не ’мбырдтӕ ӕнӕкъуылымпыйӕ цӕуой, уый тыххӕй Разамонӕг совет уынаффӕ рахаста, нӕ организаци Zoom-ӕн мысайнӕгтӕй кӕй фиддзӕн. Иуӕй-иу ӕмбырдтӕн уый стыр ӕххуыс фӕци, уымӕн ӕмӕ видеоконференциты приложенийы аккаунтӕн арӕхдӕр фидын фӕхъӕуы 15–20 доллӕры кӕнӕ фылдӕр. Ӕмӕ сӕм уыйбӕрц ӕхца нӕй. Уыдон раздӕр пайда кодтой лӕвар приложенитӕй, фӕлӕ уыцы приложенитӕм уыцы иу рӕстӕг бирӕ адӕм баиу уа, уый гӕнӕн нӕй. Стӕй ӕдас не сты. Фӕлӕ ныр ӕмбырдтӕн сӕ бон у пайда кӕнын, нӕ организаци кӕмӕн фиды, уыцы аккаунттӕй. Уый фӕрцы ӕнцондӕр у ӕдасдзинадмӕ хъус дарын. Стӕй уый гӕнӕн ис, цӕмӕй-иу ӕмбырдтӕм бирӕ адӕм ӕрбаиу уой. Абон ахӕм аккаунттӕй пайда кӕнынц 65 000 ӕмбырдӕй фылдӕр 170 бӕстӕйӕ фылдӕры.

Ӕмбырд «Каираги» горӕт Манадойы (сакъадах Сулавесийы цӕгат хай, Индонези) раздӕр пайда кодта, видеоконференцитӕ кӕй фӕрцы ис уадзӕн, ахӕм лӕвар приложенийӕ. Ныр та пайда кӕны Zoom-ӕй. Ӕфсымӕр Хади Сантосо загъта: «Планшеттӕй ӕмӕ телефонтӕй пайда кӕнын чи нӕ зыдта, уыцы хотӕн ӕмӕ ’фсымӕртӕн дӕр ныр ӕнцондӕр у, цӕмӕй-иу ӕмбырдтӕм ӕрбаиу уой. Ныр ӕмбырды дӕргъы конференцимӕ цалдӕр хатты бахизын нӕ фӕхъӕуы».

Лестер Хихон лӕггад кӕны хистӕр нӕлгоймагӕй ӕмбырды «Гуаяканес Оэсте» (Гуаякиль, Эквадор). Уыцы ’фсымӕр загъта: «Нӕ бӕстӕйы хотӕ ӕмӕ ’фсымӕртӕй бирӕтӕ сты тынг мӕгуыр. Уымӕ гӕсгӕ иуӕй-иу ӕмбырдтӕн сӕ бон нӕ уыди Zoom-ӕн фидын, цӕмӕй-иу ӕмбырдмӕ ӕрбаиу уыдаиккой, кӕйдӕриддӕр фӕндыд, уыдон се ’ппӕт дӕр. Фӕлӕ нын ныр нӕ организацийы фӕрцы ис аккаунт Zoom-ы, ӕмӕ нӕ бон у ӕмбырдмӕ цасфӕнды адӕмы дӕр хонын».

Джонсон Мванза та хистӕр нӕлгоймагӕй лӕггад кӕны ӕмбырды «Нгверере Норт» (Лусакӕ, Замби). Ӕфсымӕр Джонсон ныффыста: «Хотӕ ӕмӕ ’фсымӕртӕй бирӕтӕ арӕх фӕзӕгъынц: „Нӕ организацийы фӕрцы нӕ бон у Zoom-ӕй пайда кӕнын. Уый руаджы фенгомдӕр стӕм ӕмӕ йӕ ӕмбарӕм, Йегъовӕ нӕ кӕй уарзы ӕмӕ ныл кӕй тыхсы“».

Ацы аккаунттӕ нӕ организаци балхӕдта, ӕрдзон бӕллӕхтӕ зиан кӕмӕн ӕрхастой, уыдонӕн баххуыс кӕнынӕн цы ’хца рахицӕн кӕны, уыдонӕй. Уыцы ’хца сисынц, ӕппӕтдунеон хъуыддагӕн кӕй раттынц, уыцы мысайнӕгтӕй. Бирӕтӕ мысайнаг ӕрбарвитынц сайты уылты donate.jw.org. Уыдоны фӕрцы нӕ бон у, хъуаг чи ӕййафы, уыцы хотӕ ӕмӕ ’фсымӕртӕн ӕххуыс кӕнын (2 Коринфӕгтӕм 8:14). Бузныг уын уӕ рӕдаудзинады тыххӕй!